Bible Society of South Africa
Leesplanne
Dagboek 2021
Dagboek 2021 – 30 November

Dagboek 2021 – 30 November

Hy het gekom om sy lewe as losprys te gee vir baie mense

Bybelteks(te)

MATTEUS 20

Die versoek van Jakobus en Johannes

20Toe kom die vrou van Sebedeus met haar twee seuns by Jesus en kniel voor Hom om Hom 'n guns te vra.

21“Wat kan Ek vir u doen?” vra Hy vir haar.

Sy sê vir Hom: “Belowe my dat hierdie twee seuns van my in u koninkryk langs U mag sit, een aan u regterhand en die ander een aan u linkerhand.”

22Toe antwoord Jesus: “Julle weet nie wat julle vra nie. Kan julle die lydensbeker drink wat Ek gaan drink?”

“Ons kan,” antwoord hulle.

23Jesus sê toe vir hulle: “Ja, my beker sal julle drink. Maar om aan my regter- en my linkerhand te sit, daaroor besluit Ek nie; dit is vir dié vir wie my Vader dit gereed gemaak het.”

24Toe die tien ander dissipels dit hoor, was hulle kwaad vir die twee broers.

25Jesus roep hulle toe nader en sê: “Julle weet dat dit by die nasies so is dat die regeerders oor hulle baasspeel, en dat die groot manne die mag oor hulle misbruik. 26Maar by julle moet dit nie so wees nie. Elkeen wat in julle kring groot wil word, moet julle dienaar wees; 27en elkeen wat onder julle die eerste wil wees, moet julle slaaf wees. 28So is dit ook met die Seun van die mens: Hy het nie gekom om gedien te word nie maar om te dien en sy lewe te gee as losprys vir baie mense.”

MATTEUS 20:20-28AFR83Maak oop in die Bybelleser

Terwyl ons in afwagting wag om die Verlosser se koms na die wêreld te vier, moet ons by die einde begin – by die betekenis van sy dood. Hy kom om te sterf. Lewe deur sy dood verwerf.

Sy volgelinge kon hierdie boodskap glad nie verstaan nie. Hulle wag so lank vir die koms van die verlosser van Israel. Hul aardse juk het te swaar geweeg. Uiteindelik is daar sprake daarvan dat Jesus die langverwagte Verlosser is. Hy roep vir Hom dissipels byeen en onderrig hulle oor God se Koninkryk. Van die begin af was dit so anders as wat hulle verwag het. Die voorskrifte wat Hy gee is anders as die van aardse koningshuise. Dit handel nie oor aardse trone en magsposisies nie.

Jesus kom wys hoe God se Koninkryk lyk. In hierdie gedeelte sien ons die praktiese daarvan. Vir mense gaan dit oor plekke en posisies van aansien en eer, soos wat Jakobus en Johannes se moeder vir haar kinders begeer. Jesus leer die omgekeerde waardes van die Koninkryk. Wie eerste is, sal laaste wees. Die waardes wat vir God belangrik is, is om te dien, om die minste te wees, om ander bo jouself te ag, om die ander wang te draai. (Baie voorbeelde hiervan kan ons in die bergpredikasie raaklees). Om dit dalk in ander woorde uit te druk: Die hart van God se Koninkryk gaan oor liefde vir God en jou naaste. So word God, die Koning, vereer.

Vers 28 sê: “So is dit ook met die Seun van die mens: Hy het nie gekom om gedien te word nie, maar om te dien en sy lewe te gee as losprys vir baie mense”. Sy sterwe bring vir baie mense die lewe.

Die dissipels moes leer dat hulle Verlosser se koms redding gebring het, maar daarmee saam het dit sy lewe gekos. As volgelinge moet hulle ook binne God se Koninkryksreëls leef, want die eer kom God toe!

Ons moet vandag ook so leef as sy Koningskinders.

Ds Manda le Roux, Weskus

Bible Society of South Africav.4.26.9
VOLG ONS