Bible Society of South Africa
Leesplanne
Dagboek 2021
Dagboek 2021 – 29 November

Dagboek 2021 – 29 November

Die koninkryk van die hemel het naby gekom

Bybelteks(te)

MATTEUS 3

Johannes die Doper en sy prediking

1In daardie tyd het Johannes die Doper in die woestyn van Judea begin preek 2en gesê: “Bekeer julle, want die koninkryk van die hemel het naby gekom.” 3Hy is die een wat die profeet Jesaja bedoel het toe hy gesê het:

“Iemand roep in die woestyn:

Maak die pad vir die Here gereed, maak die paaie vir Hom reguit.”

4Hierdie Johannes het klere van kameelhaar gedra met 'n leerband om sy heupe, en hy het van sprinkane en veldheuning gelewe. 5In dié dae het Jerusalem en die hele Judea en die hele omgewing van die Jordaan na hom toe gestroom. 6Hulle het hulle sondes bely en hulle deur hom in die Jordaanrivier laat doop.

7Toe hy merk dat baie van die Fariseërs en die Sadduseërs kom om deur hom gedoop te word, sê hy vir hulle: “Julle slange, wie het julle wysgemaak dat julle die dreigende toorn kan ontvlug? 8Dra liewer vrugte wat bewys dat julle bekeer is. 9Julle moet julle nie verbeel dat julle by julleself kan sê: ‘Ons het Abraham as voorvader’ nie. Dit sê ek vir julle: God kan uit hierdie klippe kinders vir Abraham verwek. 10Die byl lê klaar teen die wortel van die bome. Elke boom wat nie goeie vrugte dra nie, word uitgekap en in die vuur gegooi. 11Ek doop julle wel met water omdat julle julle bekeer het, maar Hy wat ná my kom, is my meerdere, en ek is nie eers werd om sy skoene uit te trek nie. Hy sal julle met die Heilige Gees en met vuur doop. 12Hy het sy skop in sy hand en Hy sal sy dorsvloer deur en deur skoonmaak. Sy koring sal Hy na die skuur toe bring, maar die kaf sal Hy met 'n onblusbare vuur verbrand.”

MATTEUS 3:1-12AFR83Maak oop in die Bybelleser

Vandag is die eerste Adventsondag. Ons beweeg in die tyd in, waarop daar met afwagting gewag word op die koms van die Verlosser. Ons moet ons verplaas na die situasie waarin die mense verkeer het voor Christus se koms en die verskil wat sy koms na die wêreld gemaak het.

Die volk van God het deur ‘n baie moeilike tyd gegaan. Vir lank wag hulle al op die koms van ‘n verlosser. Hulle het baie onderdrukking ervaar en is gedwing om verskeie keisers en konings te aanbid. Die afwagting op die koms van ‘n verlosser, was op die voorgrond in hulle gedagtes en gebede.

Johannes die Doper kondig aan dat die Verlosser na die wêreld kom. Hy is die voorloper wat die pad vir die Verlosser moet kom baan. Daarom sy dringende oproep: Bekeer julle, want die koninkryk van die hemel het naby gekom. Met Christus se koms na die wêreld het daar ‘n nuwe tyd aangebreek. God se heerskappy in die wêreld kry “gesig”. Jesus se prediking wys duidelik hoe God se regering lyk. Wys waaroor dit gaan, wat die reëls van hierdie Koninkryk is en hoe mens deel daaraan kry. Vir die volk moes dit ‘n nuwe tyd aankondig – tyd van verlossing, van vry-word van onderdrukking en vervolging.

Christus se koms en sy sterwe het hierdie redding gebring. Vir die Jode en vir elkeen wat in Hom glo. Maar dit was anders as wat hulle verwag het. Die redding was nie net uit slegte situasies nie, maar ewige redding. Deur Hom kry jy deel aan ‘n ander Koninkryk. Deur Hom word jy vry van aardse beheersing deur enige magte en kragte.

Ons het nou reeds deel aan God se Koninkryk. Hierdie Koninkryk sal sy volheid bereik met Christus se wederkoms. In hierdie tussentyd kan jy weet dat jy verlos is deur die Verlosser wat vir jou aan die kruis kom sterf het.

Leef, bewus van hierdie verlossing.

Ds Manda le Roux, Weskus

Bible Society of South Africav.4.26.9
VOLG ONS