Bible Society of South Africa
Leesplanne
Dagboek 2021
Dagboek 2021 – 30 Mei

Dagboek 2021 – 30 Mei

God kom na ons deur die Nagmaal en Doop

Bybelteks(te)

MARKUS 14

Die instelling van die nagmaal

22Terwyl hulle eet, het Jesus brood geneem en die seën gevra. Daarna het Hy dit gebreek en vir hulle gegee met die woorde: “Neem dit, dit is my liggaam.”

23Toe neem Hy 'n beker en nadat Hy die dankgebed uitgespreek het, gee Hy dit vir hulle, en hulle het almal daaruit gedrink. 24Hy sê vir hulle: “Dit is my bloed, die bloed waardeur die verbond beseël word en wat vir baie mense vergiet word. 25Dit verseker Ek julle: Ek sal nie weer wyn drink nie tot op daardie dag wanneer Ek die nuwe wyn in die koninkryk van God sal drink.”

MARKUS 14:22-25AFR83Maak oop in die Bybelleser

MARKUS 16

Jesus verskyn na sy opstanding

9Ná Jesus se opstanding vroeg die Sondagmôre, het Hy heel eerste aan Maria Magdalena verskyn, uit wie Hy vantevore sewe bose geeste uitgedrywe het. 10Sy het dit vir sy dissipels gaan vertel wat oor Hom getreur en gehuil het. 11Alhoewel hulle by haar gehoor het dat Hy lewe en dat sy Hom gesien het, het hulle haar tog nie geglo nie.

12Daarna het Jesus met 'n ander voorkoms aan twee van hulle verskyn terwyl hulle op pad was na die platteland toe. 13Hulle het dit vir die ander dissipels gaan vertel, maar dié het selfs vir húlle ook nie geglo nie.

14Later het Jesus aan die elftal self verskyn terwyl hulle aan tafel was. Hy het hulle verwyt oor hulle ongeloof en hardheid van hart omdat hulle dié wat Hom ná sy opstanding gesien het, nie geglo het nie. 15Hy het vir hulle gesê: “Gaan uit, die hele wêreld in, en verkondig die evangelie aan die hele mensdom. 16Wie tot geloof gekom het en gedoop is, sal gered word; wie nie glo nie, sal veroordeel word.

MARKUS 16:9-16AFR83Maak oop in die Bybelleser

God kom vandag nog na ons toe deur sigbare simbole, want ons is maar kortsigtig en sien steeds ’n raaiselagtige beeld in ’n dowwe spieël.

Jesus het die Doop ingestel toe Hy met sy afskeidswoorde vir sy dissipels gesê het dat hulle mense in sy Naam moet doop. Petrus verduidelik dit ook vir die nuwe bekeerdes in Handelinge 2:38 dat hulle hulle moet bekeer en gedoop moet word in die Naam van Jesus Christus, dan sal God hul sonde vergewe en die Heilige Gees vir hulle gee. So het Johannes die Doper al aan die begin van die Evangelies (soos in Joh 1:33) getuig.

Die Doop wys vir ons dat ons sonde vergewe is, nie omdat dit ’n bad met water en seep is wat vuiligheid afwas nie, maar omdat ons Doop eintlik ’n simboliese daad is. Dit is ’n gebed tot God om ons ’n skoon gewete te gee van ons sonde, omdat Jesus uit die dood opgestaan het.

Jesus het die Nagmaal kort voor sy kruisiging ingestel met die wyn en brood wat gewoonlik deel was van die Jode se maaltyd. Hy wil hê dat mense, elke keer as hulle hierdie alledaagse goed sien, aan Hom moet dink! As ons brood sien, witbrood, bruinbrood, brood waarvan die meel met klippe gemaal is, enige soort brood, moet ons sy liggaam sien en daaraan dink dat sy liggaam vir ons gebreek en doodgemaak is.

Elke keer as ons wyn sien, of dalk druiwesap, of dalk enige sap wat ons saam met ete gebruik, moet ons dink aan sy bloed wat vir ons gevloei het toe Hy doodgemaak is. En dan somtyds, met ’n gereëlde ritme, kan ons ook ’n spesiale erediens hou, waar ons nie ’n groot maaltyd deel nie, maar net hierdie twee belangrike tekens met mekaar deel: die brood en wyn van sy liggaam en bloed. God kom immers na ons deur die tekens van wyn en brood – sigbaar en teenwoordig.

Ds Milankie van der Walt, Namib-Suid

Bible Society of South Africav.4.26.9
VOLG ONS