Bible Society of South Africa
Leesplanne
Dagboek 2021
Dagboek 2021 – 23 Desember

Dagboek 2021 – 23 Desember

Wat is geloof?

Bybelteks(te)

MATTEUS 15

Die Kanaänitiese vrou

21Jesus het daarvandaan weggegaan en na die streke van Tirus en Sidon toe vertrek. 22'n Kanaänitiese vrou wat in daardie gebied gewoon het, het onverwags by Hom aangekom. Sy het aanhoudend geroep: “Ontferm U oor my, Here, Seun van Dawid! My dogter is in die mag van 'n bose gees, en dit gaan sleg.”

23Maar Hy het haar niks geantwoord nie.

Sy dissipels kom toe by Hom en vra: “Stuur haar weg, want sy hou aan met skreeu hier agter ons.”

24Jesus antwoord: “Ek is net na die verlore skape van die volk Israel toe gestuur.”

25Maar die vrou kom kniel voor Hom en sê: “Here, help my!”

26Hy sê vir haar: “Dit is nie mooi om die kinders se brood te vat en vir die hondjies te gooi nie.”

27“Dit is waar, Here,” sê sy, “maar die hondjies eet darem van die krummels wat van hulle base se tafels afval.”

28“Mevrou,” sê Jesus vir haar, “jou geloof is groot. Jou wens word vervul.”

Van daardie oomblik af was die dogter gesond.

Jesus maak baie siekes gesond

29Jesus het daarvandaan vertrek en by die See van Galilea gekom. Hy het teen die berg opgegaan en daar gaan sit. 30Baie mense het na Hom toe gekom met verlamdes, blindes, gebreklikes, dowes en nog baie ander, en hulle voor Hom neergesit. Hy het hulle gesond gemaak, 31sodat die menigte hulle verwonder het toe hulle sien dat stommes praat, gebreklikes herstel is, verlamdes loop en blindes sien. En hulle het die God van Israel geprys.

MATTEUS 15:21-31AFR83Maak oop in die Bybelleser

Wat presies is geloof? Is dit ’n gevoel, ’n rotsvaste sekerheid, of oor watter eienskappe moet jy beskik om ’n “groot geloof” te hê? Hierdie vrou het na Jesus gekom en gevra dat Hy haar moet help. Maar Hy het haar niks geantwoord nie. Haar geloof bestaan uit ’n gesprek met Jesus, maar daar is ’n stilte. Sou alles wat sy van Hom gehoor het, bedrieglik kon wees? Só begin elke geloof. Jy moet dit waag om na Jesus te kom selfs met die risiko om teleurgestel te word. Hierdie vrou het die grens oorgesteek en só binne die sfeer van Jesus se seëninge gekom.

Jy moet ook die grense van hierdie wêreld van elektroniese breine, rekenaars, selfone en rumoerige gebeure oorsteek en die stilte betree wat Jesus omring. Hierdie vrou reik uit na iets agter sy stilswye. Dat sy nie maar net laat staan het nie, lê daarin dat Jesus haar nie laat staan het nie, ten spyte van sy stilswye. Die genade van God kan ook stilbly. Ek kan dit op geen manier opeis nie. Ek het nie verdien om aan U te behoort nie. U kan verbygaan, maar sal U werklik kan, sal U dit regkry om verby te gaan by ’n mens wat alles van u liefde verwag? Sal U dit oor u hart kan kry, Jesus van Nasaret?

Weet jy wat? Jesus kan nie! Hierdie vrou het Jesus se beloftes voor sy voete neergesit, en oor hierdie beloftes kan Jesus nie tree nie. Haar geloof het nie geseëvier nie. Sy het Jesus bloot op sy woord geneem, en daarom het sy ’n groot geloof.

Hierdie treffende verhaal moet jy ook vir jouself waar maak. Jy wil Hom jou verlangende en uitgestrekte hande wys, en God wat aan sy kinders brood en nie klippe nie gee, sal ook genade bewys aan jou wat elke dag bid: Here, help my en wees my genadig, asseblief.

Ds Cornie Pieterse, Emeritus

Bible Society of South Africav.4.26.9
VOLG ONS