Dagboek 2021 – 22 Junie

In die tyd van Jesus was daar ’n godsdienshervorming, met Jesus as die hoofspeler in dié drama. Die Nuwe Testament vertel van die vroegste jare in die ontstaan en groei van die kerk. Dit was nie maklik nie. Daar aan die begin was daar baie teenstand. Die vroeë Christene het vele ontberings beleef en sommige het selfs hul lewe verloor.

Die Nuwe Testament bied vir ons inligting oor hoe alles verloop het. In die gedeelte wat ons hier gelees het, praat die apostel Paulus oor vrygewigheid of mededeelsaamheid as ’n Christelike deug. Paulus het vroeër al begin geld insamel vir die gemeente in Jerusalem wat baie swaar gekry het. Hy het die omstandighede daar geken, en het dit op hom geneem om by die res van die kerk te kollekteer om die Christene in Jerusalem te help.

Dit blyk dat die Korintiërgemeente vroeër onderneem het om ’n bydrae te maak vir hierdie saak, maar dat dit nooit uitgevoer is nie. Goeie voornemens handel nie ’n saak af nie. Dit kos toewyding en harde werk. Hy praat oor die kollekte, want dit gaan daaroor – maar eintlik praat hy oor iets groter, oor waardes en deugde wat altyd geld vir gelowige mense wat ontvangers is van die verlossing deur Jesus Christus.

Dit was vir Paulus aangrypend dat sekere gemeentes, ten spyte van hul eie haglike omstandighede, tog bereid was om te help. Hulle was brandarm, en het boonop swaar gely onder vervolging. Hy wou hulle verskoon, maar hulle het hom gesmeek om hulle toe te laat om by te dra en het uiteindelik meer gegee as waartoe hulle in staat was. Dit was egter nie die som geld wat hom beïndruk het nie, maar die gesindheid.

Die Masedoniërs, sê hy, gee vrygewig, opofferend, gewillig, heelhartig. Dié gesindheid groei uit die verbondenheid met Jesus Christus, want Hy was ryk en het ter wille van julle arm geword, sodat julle deur sy armoede ryk kon word.

Elkeen wat aan Christus behoort,
is ryk in mededeelsaamheid –
so vertoon ons die beeld van God.

Dr Piet van Staden, Emeritus/Stellenbosch/Worcester