Bible Society of South Africa
Leesplanne
Dagboek 2021
Dagboek 2021 – 20 April

Dagboek 2021 – 20 April

Doekies omdraai

Bybelteks(te)

JOHANNES 20

Die leë graf

1Die Sondagmôre vroeg, toe dit nog donker was, kom Maria Magdalena by die graf en sien dat die klip van die graf af weggerol is. 2Sy hardloop toe en gaan na Simon Petrus en na die ander dissipel toe vir wie Jesus baie lief was, en sê vir hulle: “Hulle het die Here uit die graf weggevat, en ons weet nie waar hulle Hom nou begrawe het nie.”

3Petrus en die ander dissipel het toe uitgekom en na die graf toe gegaan. 4Die twee het saam begin hardloop, maar die ander dissipel het vinniger as Petrus gehardloop en eerste by die graf gekom. 5Toe hy vooroor buk, sien hy die doeke lê, maar hy het nie ingegaan nie. 6Ná hom het Simon Petrus ook daar aangekom, en hy het in die graf ingegaan. Hy sien toe die doeke daar lê, 7ook die doek wat om Jesus se kop was. Dié doek het nie by die ander doeke gelê nie, maar was eenkant afsonderlik opgerol. 8Daarna het die ander dissipel, wat eerste by die graf gekom het, ook ingegaan, en hy het dit ook gesien en geglo.

9Hulle het nog nie die Skrif verstaan dat Jesus uit die dood moet opstaan nie.

10Daarna het die dissipels weer huis toe gegaan.

JOHANNES 20:1-10AFR83Maak oop in die Bybelleser

Sonde hou ons vasgenael en bevange. Hoe kry God ons van sonde af weg? God laat ons agterkom waartoe sonde in staat is. God laat jou Jesus sien sterf en besef: Ek doen dit aan Hom. Dít moet jou ’n weersin teen sonde laat kry, erg genoeg dat dit jou van sonde laat afsien, en van God af laat wegvlug!

’n Hond keer terug na sy braaksel toe, maar kry ek óóit weer die vrymoedigheid om na God toe terug te keer? Hoe? Wel, God bring my Sondae op grafbesoek. Ek gaan soontoe om te rou oor die afgestorwene, maar veral ook met berou oor alles wat ek anders moes gedoen het. Kyk nou, as die gevreesde dag kom waarop jy jou brouwerk in die oë moet kyk, kyk nou hoe sagkens werk God met mense wat eintlik ’n pak slae verdien.

Wat vind ek in die begraafplaas? ’n Oop graf, nie ’n gat in die hemel met ’n woedende, dreigende God nie. En die graf is leeg. Wat dáár moes wees, is nie; wat nié daar moes wees nie, is wél: doeke, dieselfde goed waarin jy babas toedraai, die goed wat die engele vir die herders gesê het die teken sal wees as hulle die Baba kry: Hy is nog in doeke toegedraai.

Ek sien nie ’n lyk wat my laat gril nie. Ook nie ’n lewende dooie wat my soos ’n zombie bestorm nie. Ek sien nie ’n verheerlikte liggaam wat blink soos sonlig sodat ek, wat reeds vir God so bang is, op vlug sou slaan nie. Net hierdie doeke, gestrooi én mooi opgerol. Ek wat gewoonlik sê Moet my nie die skok probeer spaar nie; wees met my reguit; praat prontuit; moenie doekies omdraai nie, vind in die graf waar ons Jesus Vrydagmiddag begrawe het net doeke, en vir eens is ek dankbaar God draai daar doekies om. Jesus werk sagkens met mense wat Hy liefhet.

Jesus het met my verstommende geduld en begrip. Ek is terug by God.

Ds Hennie la Grange, Kampersrus

Bible Society of South Africav.4.26.9
VOLG ONS