Dagboek 2021 – 18 Maart
Die massas word gemanipuleer
Bybelteks(te)
GENESIS 34
Gamor en Sigem trap in die strik van Jakob se seuns. Sigem is in so ’n mate verblind deur sy passie vir Dina dat hy al die mans van die stad oorreed om aan hul eise toe te gee. Manipulasie en magsmisbruik wat uitloop op gruwelike geweld en bloedvergieting.
Dit is presies wat gebeur wanneer die Joodse leiers die skare opsweep om aan te dring op Jesus se kruisiging. Persoonlik het hulle eintlik geen belang daarby of Jesus lewe of sterwe nie. Hulle word bloot die speelbal in die hande van die Joodse leiers wat hul bloeddorstigheid manipuleer ten einde in hul doel te slaag dat Jesus ter dood veroordeel word. Hul manipulasie is so effektief dat selfs Pontius Pilatus deur hulle oorgehaal word om teen sy eie beterwete te handel en ’n onskuldige Man te laat kruisig. Dit is die mag van opsweping en emosionele manipulasie.
Ongelukkig is die kerk se hande ook met bloed bevlek wanneer dit by die manipulasie van die massas kom. Die Rooms-Katolieke kerk het ’n bloedspoor gelaat met hul dwaalleer van die aflaatstelsel. Mense is met drogbeelde uit die vagevuur met vrees en bewing vervul ten einde in die hande van die kerklike elite te speel. Met goedkoop retoriek is mense oorgehaal om kruistogte te onderneem omdat dit kwansuis ’n “heilige oorlog“ is wat gevoer word.
Om die massas met holle slagspreuke te oortuig, is geen kuns nie en steeds aan die orde van die dag. Op die bloedvergieting en lewensverlies wat hierdie skadelike retoriek tot gevolg het, reageer die bulderende orators deur bloot hul skouers op te trek. Gelowiges, en veral gelowiges in leiersposisies, moet daarteen waak om te verval in oppervlakkige slagspreuke wat skadelik op die psiges van mense kan inwerk. Dit is vreemd aan ons teologiese tradisie in die Hervormde Kerk wat groot waarde heg aan kritiese nadenke. Om te manipuleer, is lafhartig. Om toe te tree tot die debat, is edel. Mag die oop gesprek in die kerk voortduur.
Dr Elritia le Roux, Middelburg
