Bible Society of South Africa
Leesplanne
Dagboek 2021
Dagboek 2021 – 18 Desember

Dagboek 2021 – 18 Desember

Wat is vrede?

Bybelteks(te)

MIGA 5

1Maar jy, Betlehem-Efrata,

jy is klein onder die families in Juda,

maar uit jou sal daar iemand kom

wat aan My behoort

en hy sal in Israel regeer.

Sy begin lê ver terug,

in die gryse verlede!

2Hy sal sy mense 'n kort rukkie prysgee,

so lank as dit 'n vrou neem om 'n kind in die wêreld te bring.

Dan sal dié uit sy familie wat die ramp oorleef het,

terugkom na die Israeliete toe.

3Hy sal na vore kom en sy volk lei

deur die krag wat die Here hom gee,

deur die sterkte van die Naam van die Here sy God.

Hulle sal woon tot in die uithoeke van die aarde,

want hulle leier sal sterk wees.

4Hy sal vrede bring.

Wanneer Assirië ons land binneval,

wanneer hy in ons mooi huise wil ingaan,

sal ons baie leiers,

genoeg generaals, teen hom uitstuur.

5Hulle sal Assirië platloop met die swaard,

die land van Nimrod met swaarde

wat reg is om te steek.

Die regeerder uit Betlehem sal ons red

uit die mag van Assirië

wanneer Assirië ons land binneval,

wanneer hy ons gebied binnekom.

6Dié van Jakob wat oorbly, sal tussen baie volke wees,

hulle sal daar wees soos dou wat van die Here af kom,

soos stortreëns op groen gras

wat nie vir 'n mens wag nie,

nie na mense kyk nie.

7Dié van Jakob wat oorbly, sal tussen die nasies wees,

tussen baie volke,

hulle sal daar wees soos 'n leeu tussen wild

of tussen 'n trop skape:

hy verskeur as hy tussen hulle deurstap,

hy vang sy prooi,

en niemand kan dit uit sy bek ruk nie.

8Mag jy jou teenstanders oorweldig, Israel,

mag al jou vyande uitgeroei word!

MIGA 5:1-8AFR83Maak oop in die Bybelleser

Hy sal vrede bring. Kersdag gedenk die tyding van groot blydskap: dat in die stadjie Betlehem die Verlosser, Jesus Christus, gebore is. Deur Christus bewys God sy liefde en genade aan ons. Vrede. Hoe begeer ons dit nie, want ons het so min daarvan. Vrede is daardie sekerheid, die salige bewus wees van die fondament waarop ons lewens gebou is. Hierdie vrede is daarom Jesus Christus self. Sy lewe, werke en woorde is die verkondiging van die genade van God. Sy dood is die verlossing wat God vir ons uit die dood en sonde toeberei het. Sy opstanding is die belofte van God aan elkeen van ons dat ook ons die dood sal oorwin en ewig by Hom sal wees.

Ons vergeet maklik dat Jesus self hierdie vrede is. Wanneer ons dit vergeet, skei ons Jesus en die vrede. Dit word dan twee dinge: Jesus, en die vrede. Dit is dan ’n vrede sonder God en sonder Christus. In die persoonlike lewe van mense sien ons dit ook. Die mense soek vrede. Daar is baie wat hulself opoffer in diens van hul naaste. Ja, dit is alles dinge wat kom uit die Kersgedagte, maar Christus self word meestal vergeet.

Watter skrille kontras is daar nie tussen die vrede van Kersfees en die vrede wat ons in ons daaglikse lewe ken! Die wêreld smag na vrede, maar hulle maak oorlog ter wille van vrede. Ons bid vir vrede en hoop ,angstig dat alles tog maar goed sal verloop. Laat ons ons eerder meer bekommer oor Christus en ons verhouding met Hom. Ons moet meer bereid wees om onsself toe te vertrou aan Christus, en die vrede sal aan ons gegee word.

Jesus Christus is die vrede van ons hart omdat Hy ons met God versoen. Hierdie vrede is ’n erfenis wat deur niks van ons ontneem kan word nie. Christus is ons vrede; loof die Here, want Hy is goed. Aan sy liefde is daar geen einde nie.

Ds Cornie Pieterse, Emeritus

Bible Society of South Africav.4.26.9
VOLG ONS