Bible Society of South Africa
Leesplanne
Dagboek 2021
Dagboek 2021 – 13 Mei

Dagboek 2021 – 13 Mei

Is daar padaanwysings?

Bybelteks(te)

JOHANNES 14

Jesus gaan na sy Vader toe

1“Julle moet nie ontsteld wees nie. Glo in God; glo ook in My. 2In die huis van my Vader is daar baie woonplek. As dit nie so was nie, sou Ek nie vir julle gesê het Ek gaan om vir julle plek gereed te maak nie. 3En as Ek gegaan het en vir julle plek gereed gemaak het, kom Ek terug en sal julle na My toe neem, sodat julle ook kan wees waar Ek is. 4En julle ken die weg na die plek waarheen Ek gaan.”

5Tomas sê toe vir Hom: “Here, ons weet nie waarheen U gaan nie; hoe kan ons dan die weg daarheen ken?”

6Jesus het vir hom gesê: “Ek is die weg en die waarheid en die lewe. Niemand kom na die Vader toe behalwe deur My nie. 7As julle My ken, sal julle my Vader ook ken. En van nou af ken julle Hom en sien julle Hom.”

8Toe sê Filippus vir Hom: “Here, wys vir ons die Vader, en dit is vir ons genoeg.”

9En Jesus sê vir hom: “Ek is al so lank by julle, en ken jy My nie, Filippus? Wie My sien, sien die Vader. Hoe kan jy dan sê: ‘Wys vir ons die Vader’? 10Glo jy nie dat Ek in die Vader is en die Vader in My nie? Die woorde wat Ek met julle praat, praat Ek nie uit my eie nie; maar dit kom van die Vader wat in My bly en sy werke doen. 11Glo in My omdat Ek in die Vader is en die Vader in My; of anders, glo op grond van die werke self.

12“Dít verseker Ek julle: Wie in My glo, sal ook die dinge doen wat Ek doen; en hy sal nog groter dinge as dit doen, omdat Ek na die Vader toe gaan. 13Wat julle ook al in my Naam vra, sal Ek doen, sodat die Vader deur die Seun verheerlik kan word. 14As julle My iets in my Naam vra, sal Ek dit doen.”

JOHANNES 14:1-14AFR83Maak oop in die Bybelleser

Jesus gaan nie meer lank by die dissipels wees nie, dus berei Hy hulle voor vir wat volgende op hulle wag. Hy vertel vir hulle Hy gaan na die huis van sy Vader om ’n plek vir hulle gereed te maak, en Hy sê ook dat die dissipels al klaar weet hoe om daar uit te kom.

Ek kan my verbeel hoe die dissipels, wat daar rondom Jesus was, verward na mekaar kyk en hul skouers optrek. Waar is hierdie plek waarvan Jesus praat? Miskien kan Jesus vir hulle padaanwysings of ’n adres gee? As enige van hulle ’n foon gehad het, kon hulle miskien vir die GPS-koördinate gevra het. Uiteindelik is dit Tomas wat vra: Here, ons weet nie waarheen U gaan nie; hoe kan ons dan die weg daarheen ken?

Jesus antwoord sy vraag met die baie bekende: Ek is die weg en die waarheid en die lewe. Niemand kom na die Vader toe behalwe deur My nie… Jesus vertel die dissipels, en so ook vir ons, hoe ons oor die “waarheen” Hy op pad is moet dink: na die Vader is ’n verhouding, nie ’n plek nie. En wat die pad wat Hy vat betref, die een waaroor die dissipels so onseker is: Jesus verseker hulle dat dit Hy self is. Op hierdie weg is ons saam met Jesus op reis. Die lewe saam met Hom is nie ’n bestemming of iets om te bereik nie, dit is eerder ’n manier van wees en word. Jesus gaan om ’n plek gereed te maak, want Hy is lief vir hulle.

Deur die hele Evangelie van Johannes probeer die skrywer met ons deel hoe belangrik dit is om Jesus Christus te ken en om ’n verhouding met Hom te hê. Dit is dan dat ons in God se teenwoordigheid kom en naby aan die Vader is, die Een wat vir ons sorg en só lief is vir ons dat Hy sy enigste Seun gestuur het vir ons onthalwe.

Ds Erika Ferreira, Bellville

Bible Society of South Africav.4.26.9
VOLG ONS