Dagboek 2021 – 12 Mei
Dawid se loflied
Bybelteks(te)
PSALMS 145
Ek wil getuig van u magtige dade
In hierdie Psalm van Dawid gaan dit eintlik oor een waarheid: Wat waar is aan die begin van die Psalm, is waar aan die einde daarvan, en dít is dat die Here regeer, en dat Hy besorg is oor alles en almal. Die Psalm begin by Dawid self – elke dag wil hy die Here loof. Daarna beweeg dit verder. Van geslag tot geslag behoort die werke van God verkondig en oorvertel te word, sodat die skepping en almal wat God aanbid, sy lof sal besing. Hierdie is nie leë lof nie! Ons hoef God nie te loof en te eer omdat Hy ons gaan straf as ons Hom nie loof nie, of omdat dit verpligtend is nie. Nee! Ons behoort God te loof en te eer vir hoe en wie Hy is. Hy is genadig en barmhartig, vol geduld en liefde. Hy ondersteun almal wat val, help dié wat terneergedruk is. Hy voed ons, sorg vir ons. Hy is by ons.
Ons weet hoe maklik ’n mens struikel en val in die lewe. Dawid het beslis geweet! Ons ken sy geskiedenis, owerspel, moord, die foute wat hy gemaak het as koning, as man en as pa. Ons lees in van sy ander Psalms dat hy dikwels bang en magteloos gevoel het wanneer hy gekonfronteer is met gevare of uitdagings. Maar tog bly die waarheid: God is barmhartig en vol liefde. Hy tel mense op wat val. Hy het Dawid opgetel, en Hy tel ons ook op. Of dit nou oor sonde is, of omdat die lewe ons al een keer te veel geklap het. Psalm 145 herinner ons dat God wat alles gemaak het – die heelal, die sterre –die wonderbare Here is en dat Hy aktief besig is in ons lewens.
Gebed
Here, wanneer ons terugkyk oor ons lewens, word dit duidelik: U is in beheer! U is genadig, barmhartig, geduldig en vol liefde! Here, gee asseblief dat ons dit altyd sal raaksien, dat ons altyd dankbaar sal bly en U sal loof en prys met alles wat ons is. Amen.
Ds Erika Ferreira, Bellville
