Bible Society of South Africa
Leesplanne
Dagboek 2021
Dagboek 2021 – 11 Mei

Dagboek 2021 – 11 Mei

Het ons genoeg?

Bybelteks(te)

1 KONINGS 17

8Toe het die woord van die Here weer tot Elia gekom en gesê: 9“Gaan na Sarfat toe by Sidon en gaan bly daar. Ek het 'n weduwee daar opdrag gegee om vir jou te sorg.”

10Hy gaan toe na Sarfat toe, en toe hy by die poort van die stad kom, was daar 'n weduwee net besig om houtjies op te tel. Hy vra haar toe: “Gee my asseblief 'n bekertjie water om te drink.”

11Terwyl sy dit gaan haal, roep hy agter haar aan: “Bring vir my asseblief 'n stukkie brood saam.”

12Toe sê sy: “So seker as die Here u God leef, ek het nie meer brood nie, net 'n handvol meel in die kruik en 'n bietjie olie in die erdekan. Ek maak nou maar 'n paar houtjies bymekaar en dan gaan ek vir my en my seuntjie iets klaarmaak om te eet. Daarna moet ons maar doodgaan.”

13Elia sê toe vir haar: “Moenie bekommerd wees nie. Gaan maak dit klaar net soos jy gesê het, maar maak eers vir my 'n roosterkoek en bring dit hier, daarna kan jy vir jou en jou seuntjie sorg. 14So sê die Here die God van Israel: Die meel in die kruik sal nie opraak nie, en die olie in die kan sal nie minder word nie, totdat die Here laat reën het op die land.”

15Sy gaan maak toe soos Elia gevra het. Van toe af het hulle genoeg gehad om te eet, hy en sy en haar gesin. 16Die meel in die kruik het nie opgeraak nie, en die olie in die kan het nie minder geword nie, soos die Here deur Elia beloof het.

1 KONINGS 17:8-16AFR83Maak oop in die Bybelleser

Elia is in ’n benarde situasie. Hy vlug vir sy lewe, hy het geen kos of skuiling nie, en boonop is daar ’n droogte in die land! God gryp egter in en stuur Elia na ’n weduwee in Sarfat – dáár sal hy kan hulp kry.

Hierdie weduwee se situasie is egter moontlik nog slegter as Elia s’n. In gewone omstandighede is dinge reeds vir haar as weduwee uitdagend, maar nou – te midde van ’n droogte en met ‘’ jong kind om voor te sorg – is dinge byna onmoontlik! Sy is letterlik besig om met die laaste bietjie wat sy het vir haar en haar seun ’n maaltyd voor te berei wanneer Elia hulp soek. Ek kan my net indink hoe ek sou voel in daardie vrou se situasie: om die klein bietjie wat ek het vir my en my seun te moet deel met ’n vreemde man? Kan hy nie sien hoe sleg dit gaan en hoe min daar is nie?

Maar waar die weduwee net skaarsheid en tekort raaksien, sien Elia oorvloed. Die boodskap aan die vrou is: Moenie bekommerd wees nie, die Here sal sorg. Daar sal genoeg wees. En op die ou end is daar genoeg! Die meel en die olie raak nie op nie. Die weduwee sal vir haar en haar seun kan aanhou sorg.

Te veel kere kyk ons vas in wat ons nie het nie en hoe sleg dit gaan. Tog nooi God ons om anders na die wêreld te kyk – om eerder te sien hoe Hy vir ons voorsien en vir ons sorg te midde van uitdagings of moeilike tye. Oorvloed beteken nie noodwendig derduisende in die bank nie, maar dit kan enigiets wees! Reën na ’n droogte, ’n heerlike koppie tee na ’n lang dag, vriende en familie wanneer jy alleen voel, ’n oproep, ’n drukkie, ons gesondheid, of om te kan lag! Die Here gee vir ons genoeg, ons moet net leer om op Hom te vertrou.

Ds Erika Ferreira, Bellville

Bible Society of South Africav.4.26.9
VOLG ONS