Bible Society of South Africa
Izinhlelo zokufunda
To The Word – Bible Reading Challenge
To The Word – Day 162

To The Word – Day 162

Job 8–10, Romans 6–8

Um(Imi)bhalo weBhayibheli

UJobe 8

Inkulumo yokuqala kaBilidadi: isandla sikaNkulunkulu sishaya ababi; abalungileyo bayasindiswa

1Wayesethatha uBilidadi umShuhi, wathi:

2“Koze kube nini ukhuluma lezi zinto,

amazwi akho abe ngumoya onamandla, na?

3UNkulunkulu uhlanekezela ukwahlulela yini?

USomandla uphendukezela ukulunga na?

4Uma abantwana bakho bonile kuye,

yena wabanikela emandleni ezono zabo,

5khona, uma wena ufunisisa uNkulunkulu,

unxuse kuye uSomandla,

6uma uhlambulukile, futhi ulungile,

khona yena uyakuvuka ngenxa yakho,

aphumelelise ikhaya lokulunga kwakho.

7Ukuqala kwakho sekuyakuba ngokuncane,

nokugcina kwakho kube ngokukhulu kakhulu.

8Ake ubuze ezizukulwaneni zakuqala,

uzibhekise lokho abakuphenyileyo oyise bazo,

9ngokuba thina singabezolo nje, asinalwazi,

lokhu imihla yethu emhlabeni iyithunzi;

10bona abayikukufundisa yini, bakutshele,

bakhiphe amazwi ezinhliziyweni zabo, na?

11Umhlanga ungahluma lapho kungekho xhaphozi na?

Incema ingamila kungekho manzi na?

12Uma iseluhlaza, ingakakhiwa,

iyabuna phambi kwabo bonke utshani.

13“Zinjalo izindlela zabo bonke abakhohlwa uNkulunkulu:

ithemba longenaNkulunkulu liyakuchitheka;

14ithemba lakhe liyakunqunywa,

nesisekelo sakhe siyindlu yolwembu.

15Uyakwencika endlini yakhe,

kepha ayiyikuma;

uyakubambelela kuyo,

kepha ayiyikuqina.

16Yena uluhlaza phambi kwelanga;

imixhantela yakhe iyaxhantela ensimini yakhe.

17Izimpande zakhe ziyathandela enqwabeni yamatshe,

aqhekeze indawo yamatshe.

18Uma echithwa endaweni yakhe,

iyakumala ngokuthi:

‘Angizange ngikubone.’

19Bheka, injalo indlela yokuthokoza kwakhe;

kuyakuvela abanye othulini.

20“UNkulunkulu akamlahli opheleleyo,

kabambi isandla sababi,

21aze agcwalise umlomo wakho ngokuhleka,

nezindebe zakho ngokumemeza.

22Abakuzondayo bayakwembeswa amahloni;

itende lababi aliyobe lisabakho.”

UJobe 8ZUL59NOVula kumfundi weBhayibheli

UJobe 9

UJobe uphendula inkulumo yokuqala kaBilidadi: uyahlushwa kungekho sizathu

1Wayesephendula uJobe ethi:

2“Ngeqiniso ngiyazi ukuthi kunjalo,

kepha umuntu angaba elungile phambi kukaNkulunkulu na?

3Uma efuna ukuthetha amacala naye,

angemphendule nakwelilodwa kwayinkulungwane.

4Ehlakaniphile enhliziyweni,

eqinile emandleni,

ngubani oziqinisele kuye, waphumelela,

5yena ogudluza izintaba ngokungazeleli,

ezigumbuqela ngentukuthelo yakhe;

6ozamazamisa umhlaba usuke endaweni yawo,

kuthuthumele izinsika zawo;

7oyala ilanga lingaphumi,

avalele izinkanyezi;

8oweneka izulu yedwa,

ahambe emazeni olwandle;

9owenza iBhere,* neMpambano,

nesiLimela,

namaKamelo aseningizimu;*

10owenza izinto ezinkulu ezingenakuhlolwa,

yebo, izimangaliso ezingenakubalwa.

11Bheka, uyangidlula, ngingaboni;

uyagudla, ngingezwa.

12Bheka, uyabamba;

ngubani ongamkhalima na?

Ngubani ongasho kuye ukuthi:

‘Wenzani na?’

13“UNkulunkulu akayikubuyisa intukuthelo yakhe;

phansi kwakhe bayakhothama abasizi bakaRahabi.

14Pho, mina ngingamphendula ngithini,

ngikhethe amazwi ami aqondene naye, na?

15Noma bengilungile,

bengingenakumphendula,

kepha nginxuse umahluleli wami.

16Uma bengimbizile abesengiphendula,

bengingayikukholwa nokho ukuthi

ubekile indlebe ezwini lami.

17Uyangilimaza ngesiphepho;

uyandisa amanxeba ami ngeze.

18Kavumi ukuba ngiphefumule,

kepha uyangigcwalisa ngomunyu.

19Uma kuyindaba yamandla,

nangu onawo;

uma yindaba yokwahlulela,

ngubani ongimemayo na?

20Noma ngilungile,

umlomo wami uyakungilahla;

noma ngingenacala,

uyakuthi ngonakele.

21Anginasici; anginakekeli umphefumulo wami;

anginanzi ukuphila kwami.

22Ukuphela kunye nje; ngalokho ngithi:

‘Uyaqeda ongenasici kanye nomubi.’

23Uma isiswebhu sibulala ngokuzumayo,

uyahleka ingozi yabangenacala.

24Umhlaba unikezwe esandleni sababi;

uyasibekela ubuso babahluleli bawo;

uma kungesiye, pho, ngubani na?

25“Imihla yami iyashesha kunesigijimi;

iyabaleka ingabonanga okuhle.

26Itshuza njengomkhunjana womhlanga,

njengokhozi olutheleka empangweni.

27Noma ngithi ngiyakukhohlwa ukukhala kwami,

ngiyeke ukunyukubala kwami, ngincibilike,

28ngiyesaba nokho bonke ubuhlungu bami,

ngiyazi ukuthi awuyikungibheka nginjengongenacala.

29Ngiyakulahlwa mina;

ngikhandlekelani ize na?

30Noma ngizigeza ngamanzi eqhwa,

ngihlambe izandla zami ngensipho,

31uyakungicwilisa nokho emgodini,

izingubo zami zinengwe yimi.

32Ngokuba akasiye umuntu onjengami

ukuba ngingase ngimphendule,

siye kanyekanye ekwahlulelweni.

33Akukho mnqamulajuqu phakathi kwethu

ongabeka isandla sakhe phezu kwethu sobabili.

34Makayisuse induku yakhe kimi;

ingebhe ngaye mayingangesabisi.

35Khona ngiyakukhuluma, ngingamesabi,

ngokuba anginjalo ngokwami.

UJobe 9ZUL59NOVula kumfundi weBhayibheli

UJobe 10

UJobe ukhala ngokuphathwa kwakhe kalukhuni

1“Umphefumulo wami ukhathele ukuhamba kwami;

ngiyazinikela ekukhaleni,

ngikhulume ngomunyu womphefumulo wami.

2Ngiyakusho kuNkulunkulu ukuthi:

‘Ungangilahli;

ngazise ukuthi uphikisanelani nami na?

3Kuhle yini kuwe ukuba ucindezele,

ulahle umsebenzi wezandla zakho,

ukhanye phezu kwamasu ababi, na?

4Amehlo enyama unawo na?

Uyabona njengabantu na?

5Imihla yakho injengemihla yomuntu na?

Neminyaka yakho injengezinsuku zabantu na?

6lokhu ufuna ukona kimi,

ufunisisa isono sami,

7noma ukwazi ukuthi angimubi

nokuthi akakho ongophula esandleni sakho.

8Izandla zakho zingibumbile,

zangenza ngokupheleleyo nxazonke;

nokho uyangichitha.

9Ake ukhumbule ukuthi ungenzile njengebumba;

pho, uyakungibuyisela othulini na?

10Awungithululanga njengobisi,

wangijiyisa njengoshizi,* na?

11Awungembathisanga isikhumba nenyama,

wangiphica ngamathambo nangemisipha, na?

12Ungenzele ukuphila nomusa;

ukungihambela kwakho kulondile umoya wami.

13Kepha ufihlile enhliziyweni yakho lokhu;

ngiyazi ukuthi lokhu kukuwe kokuthi:

14Uma ngona, uyangiqaphela;

awuyikuthethelela ukona kwami.

15Uma nginecala, maye kimi!

Noma bengilungile,

bengingayikuphakamisa ikhanda lami,

lokhu ngisuthi ngehlazo,

ngibona ukuhlupheka kwami.

16Nokuba bengiziphakamisa,

ubuyakungizingela njengengonyama,

ubuye uzenze omangalisayo kimi.

17Ubuyakuletha kimi ofakazi

abasha, wandise intukuthelo yakho

kimi, amabandla ngamabandla

angisukele.

18“ ‘Ungikhipheleni esizalweni na?

Ngangiyakugqibuka lingakangiboni iso,

19ngibe njengokungathi ngingekho,

ngiyiswe ethuneni ngisaphuma esiswini.

20Imihla yami ayiyingcosana na?

Makapheze, angiyeke ukuba ngithokoze kancane,

21ngingakayi lapho ngingasayikubuya khona,

izwe lobumnyama nelomthunzi wokufa,

22izwe lobumnyama obunjengesigayegaye

nelomthunzi wokufa nelesiphithiphithi,

lapho ukukhanya kunjengobumnyama.’ ”

UJobe 10ZUL59NOVula kumfundi weBhayibheli

KwabaseRoma 6

UNkulunkulu akasenzeli umusa ukuba sihlale esonweni, kodwa ukuba sinqobe isono, simkhonze ekulungeni

1Ngakho siyakuthini na? Sihlale esonweni, ukuze kuvame umusa na? 2Qha nakanye. Thina esafa maqondana nesono singabuye sihambe kanjani kuso na? 3Kumbe anazi yini ukuthi sonke esabhapathizelwa kuKristu Jesu, sabhapathizelwa kukho ukufa kwakhe na? 4Ngakho sembelwa naye ngokubhapathizelwa kukho ukufa ukuba njengalokho uKristu wavuswa kwabafileyo ngenkazimulo kaYise, kanjalo nathi sihambe ekuphileni okusha.

5Ngokuba uma sihlanganisiwe kanye naye ngokufa okufananayo, siyakuba njalo nangokuvuka, 6sazi lokhu ukuthi umuntu wethu omdala wabethelwa kanye naye esiphambanweni, ukuze umzimba wesono wenziwe ize, singabe sisakhonza isono, 7ngokuba ofileyo ukhululiwe esonweni.

8Kepha uma safa kanye noKristu, siyakholwa ukuthi siyakuphila futhi kanye naye, 9sazi ukuthi uKristu esevusiwe kwabafileyo akasafi, ukufa akusabusi phezu kwakhe. 10Ngokuba ukufa, afa ngakho, wakufa kanye nje ngenxa yesono; kepha ukuphila akuphilayo ukuphilela uNkulunkulu.

11Kanjalo nani manizisho ukuthi ningabafileyo maqondana nesono, kodwa niphilele uNkulunkulu kuKristu Jesu. 12Ngakho makungabusi isono emzimbeni wenu ofayo, nize nilalele izinkanuko zawo; 13futhi ninganikeli izitho zenu esonweni, zibe yizikhali zokungalungi, kodwa zinikeleni nina kuNkulunkulu njengabaphilayo bevukile kwabafileyo nezitho zenu kuNkulunkulu, zibe yizikhali zokulunga, 14ngokuba isono asiyikubusa phezu kwenu; ngokuba aniphansi komthetho, kepha niphansi komusa.

15Kunjani, pho, na? Siyakona ngokuba singephansi komthetho kodwa phansi komusa na? Qha nakanye. 16Anazi yini ukuthi lowo enizinikela kuye ukuba nibe yizinceku zokumlalela, niyizinceku zakhe enimlalelayo, noma ezesono kube ngukufa noma ezokulalela kube ngukulunga, na? 17Kepha makabongwe uNkulunkulu ukuthi nina enaniyizinceku zesono senilalela ngenhliziyo indlela yesifundiso enanikelwa kuyo 18nokuthi, senikhululiwe esonweni, naba yizinceku zokulunga.

19Ngikhulumisa okomuntu ngenxa yobuthakathaka benyama yenu. Ngokuba njengalokho nanikela izitho zenu zibe yizinceku zamanyala nezokungalungi kwaba ngukungalungi, kanjalo nikelani manje izitho zenu zibe yizinceku zokulunga kube ngukungcweliswa. 20Ngokuba lapho nise yizinceku zesono, nanikhululekile maqondana nokulunga. 21Ngaleso sikhathi naninezithelo zini na? Eseninezinhloni ngakho manje; ngokuba ukugcina kwalokho kungukufa. 22Kepha manje, senikhululiwe esonweni naba ngabakhonza uNkulunkulu, ninazo izithelo zenu kube ngukungcweliswa nasekugcineni ukuphila okuphakade. 23Ngokuba inkokhelo yesono ingukufa, kepha isipho somusa sikaNkulunkulu singukuphila okuphakade kuKristu Jesu iNkosi yethu.

KwabaseRoma 6ZUL59NOVula kumfundi weBhayibheli

KwabaseRoma 7

Ukukhululeka emthethweni

1Kanti anazi yini, bazalwane, ngokuba ngikhuluma kwabawazi umthetho, ukuthi umthetho uyabusa phezu komuntu ngesikhathi sonke esekhona na? 2Ngokuba owesifazane oganileyo uboshelwe ngomthetho endodeni isekhona; kepha nxa indoda isifile, ukhululiwe emthethweni wendoda. 3Ngalokho-ke lapho indoda isekhona, uyakuthiwa isiphingi, uma eba ngowenye indoda; kepha nxa indoda isifile, ukhululekile emthethweni, angebe yisiphingi, uma eba ngowenye indoda.

4Kanjalo nani bazalwane bami, nani naba ngabafileyo maqondana nomthetho ngomzimba kaKristu ukuba nibe ngabomunye, lowo owavuswa kwabafileyo, ukuze sithelele uNkulunkulu izithelo. 5Ngokuba kwathi sisenyameni, ukuhuheka kwezono okwavela ngomthetho kwasebenza ezithweni zethu ukuthelela ukufa izithelo; 6kepha kalokhu sikhululiwe emthethweni, sifile maqondana nalokho esasibanjwa yikho ukuba sikhonze emoyeni omusha, kungesegameni elidala.

Umthetho nesono

7Ngakho siyakuthini na? Umthetho uyisono na? Qha nakanye; kepha bengingasazanga isono, uma bekungengomthetho; ngokuba ukufisa bengingakwazanga, uma umthetho ubungashongo ukuthi: “Ungafisi;” 8kepha isono sathola ithuba ngomyalo, sasebenza kimi ukufisa konke; ngokuba ngaphandle komthetho isono sifile. 9Mina-ke ngake ngahamba ngaphandle komthetho; kepha kwathi ukuba kufike umyalo, savuka isono, 10ngafa mina; umyalo obungowokuphila wona wafunyanwa ungowokufa kimi, 11ngokuba isono, sithola ithuba ngomyalo, sangikhohlisa, sangibulala ngawo. 12Ngakho-ke umthetho ungcwele, nomyalo ungcwele, ulungile, muhle.

13Pho, okuhle kwaba ngukufa kimi na? Qha nakanye; kepha isono, ukuba sibonakale ukuthi siyisono, sangibangela ukufa ngakho okuhle, ukuze isono ngawo umyalo sibe ngesonayo kakhulu.

Ubugqila bomuntu phansi komthetho

14Ngokuba siyazi ukuthi umthetho ungowomoya; kepha mina ngingowenyama, othengisiwe phansi kwesono. 15Ngokuba engikwenzayo angikuqondi; ngokuba engikwenzayo akusikho lokho engikuthandayo; kodwa lokho engikuzondayo, yikho engikwenzayo. 16Kepha uma ngenza lokho engingakuthandiyo, ngiyawuvumela umthetho ukuthi muhle. 17Kodwa kalokhu akuseyimi engikwenzayo, kodwa yisono esihlala kimi. 18Ngokuba ngiyazi ukuthi kimi, kungukuthi enyameni yami, akuhlali okuhle; ngokuba intando ikhona kimi, kodwa ukwenza okuhle akukho, 19ngokuba okuhle engikuthandayo angikwenzi, kodwa okubi engingakuthandiyo lokho ngiyakwenza. 20Uma-ke ngenza lokho engingakuthandiyo akuseyimi engenza lokho, kodwa yisono esihlala kimi.

21Ngalokho ngifumana kimina engithanda ukwenza okuhle umthetho wokuthi kukhona okubi kimi, 22ngokuba ngiwenamela umthetho kaNkulunkulu ngokomuntu ongaphakathi, 23kepha ngibona omunye umthetho ezithweni zami olwayo nomthetho wengqondo yami, ungithumbela emthethweni wesono osezithweni zami. 24Wo! mina muntu wosizi, ngubani oyakungikhulula kulo mzimba wokufa na? 25Makabongwe uNkulunkulu ngoJesu Kristu iNkosi yethu. Ngalokho-ke mina ngokwami ngikhonza umthetho kaNkulunkulu ngengqondo kepha umthetho wesono ngenyama.

KwabaseRoma 7ZUL59NOVula kumfundi weBhayibheli

KwabaseRoma 8

Okholwayo usindiswa ekulahlweni, ahambe ngokukaMoya

1Kanjalo akusekho ukulahlwa kwabakuKristu Jesu. 2Ngokuba umthetho kaMoya wokuphila okuKristu Jesu ungikhululile emthethweni wesono nowokufa. 3Ngokuba lokho okwehlula umthetho, ngokuba ungenamandla ngenxa yenyama, wakwenza uNkulunkulu ngokuthuma iNdodana yakhe ifana nenyama yesono, nangenxa yesono walahla isono enyameni, 4ukuze umyalo womthetho ugcwaliseke kithina esingahambi ngokwenyama kepha ngokukaMoya.

5Ngokuba abokwenyama banaka okwenyama, kepha abakaMoya banaka okukaMoya. 6Ngokuba ukunaka kwenyama kungukufa, kepha ukunaka kukaMoya kungukuphila nokuthula. 7Ngokuba ukunaka kwenyama kungubutha kuNkulunkulu; ngokuba akuwuthobeli umthetho kaNkulunkulu, yebo, futhi kungekwenze; 8abasenyameni abanakumthokozisa uNkulunkulu.

9Kepha nina anisenyameni, kodwa nikuye uMoya, uma uMoya kaNkulunkulu ehlala kini. Kepha uma umuntu engenaye uMoya kaKristu, lowo kasiye owakhe. 10Uma uKristu ekini, umzimba ufile ngenxa yesono, kepha umoya ungukuphila ngenxa yokulunga. 11Uma-ke uMoya walowo owavusa uJesu kwabafileyo ehlala kini, yena owavusa uKristu Jesu kwabafileyo uyakuphilisa nemizimba yenu efayo ngaye uMoya wakhe ohlala kini.

12Ngalokho-ke, bazalwane, asinacala kuyo inyama lokuba sihambe ngokwenyama. 13Ngokuba uma nihamba ngokwenyama, nizakufa; kepha uma nibulala imisebenzi yomzimba ngoMoya, nizakuphila. 14Ngokuba bonke abaholwa nguMoya kaNkulunkulu, labo bangabantwana bakaNkulunkulu. 15Ngokuba anamukeliswanga umoya wobugqila ukuba nibuye nesabe, kepha namukeliswa umoya wobuntwana esimemeza ngaye sithi: “Aba, Baba!” 16Yena lowo Moya ufakaza kanye nomoya wethu ukuthi singabantwana bakaNkulunkulu. 17Uma-ke singabantwana, siyizindlalifa futhi, izindlalifa zikaNkulunkulu, izindlalifa kanye noKristu, uma phela sihlupheka kanye naye, ukuze siphiwe inkazimulo futhi kanye naye.

Abantwana bakaNkulunkulu bayakungena ebukhosini emva kwezinhlupheko

18Ngokuba ngithi izinhlupheko zesikhathi samanje azinakulinganiswa nenkazimulo eyakwambulwa kithina. 19Ngokuba ukulangazela kokudaliweyo kulindele ukwambulwa kwabantwana bakaNkulunkulu. 20Ngokuba okudaliweyo kwabekwa phansi kobuze, kungengentando yakho kodwa ngaye owakubekayo, 21ethembeni lokuthi nakho okudaliweyo kuyakukhululwa ebugqileni bokubhubha, kube ngukukhululeka kwenkazimulo yabantwana bakaNkulunkulu.

22Ngokuba siyazi ukuthi konke okudaliweyo kuyabubula kanyekanye kunezinseka kuze kube manje; 23akusikho lokho kuphela, kepha nathi uqobo lwethu esinolibo lukaMoya siyabubula phakathi kwethu, silindele isimo sobuntwana, ukukhululwa komzimba wethu. 24Ngokuba ethembeni sisindisiwe; kepha ithemba elibonwayo alisilo ithemba; ngokuba lokhu umuntu akubonayo usakwethembelani na? 25Kodwa uma sithemba lokho esingakuboniyo, siyakulindela ngokubekezela.

26Ngokunjalo noMoya uyasisiza ebuthakathakeni bethu; ngokuba asikwazi esingakucela ngokufaneleyo, kodwa uMoya uqobo usikhulumela ngokububula okungenakuphinyiselwa; 27kepha yena ohlola izinhliziyo uyakwazi okuqondwa nguMoya, ngokuba ukhulumela abangcwele ngokwentando kaNkulunkulu.

28Siyazi ukuthi kwabamthandayo uNkulunkulu konke kusebenzelana kube ngokuhle, kulabo ababiziweyo ngecebo lakhe. 29Ngokuba labo ayebazi ngaphambili wabamisa ngaphambili, bafane nesimo seNdodana yakhe, ukuze yona ibe yizibulo phakathi kwabazalwane abaningi; 30labo abamisile ngaphambili ubabizile futhi; labo ababizile ubalungisisile futhi; labo abalungisisileyo ubaphile nenkazimulo futhi.

Umuntu unqoba ngaye uJesu

31Sesiyakuthini ngalokho na? Uma uNkulunkulu emi ngakithi, ngubani ongamelana nathi na? 32Yena ongayigodlanga eyakhe iNdodana, kepha wayinikela ngenxa yethu sonke, kungaba kanjani ukuba angasiphi konke kanye nayo na? 33Ngubani ozakumangalela abakhethiweyo bakaNkulunkulu na? UNkulunkulu ungolungisisayo; 34ngubani olahlayo na? UKristu Jesu owafayo, yebo impela, owavuswa kwabafileyo, ongakwesokunene sikaNkulunkulu, nguyena osinxuselayo. 35Ngubani ozakusahlukanisa nothando lukaKristu na? Noma ukuhlupheka, noma ukubandezeka, noma ukuzingelwa, noma indlala, noma ukuhamba ze, noma ingozi, noma inkemba, na? 36Kulotshiwe ukuthi:

“Ngenxa yakho sibulawa usuku lonke,

sithiwa izimvu zokuhlatshwa.”

37Kepha kukho konke lokho siyanqoba nokunqoba ngowasithandayo. 38Ngiyakholwa ukuthi nakufa, nakuphila, nazingelosi, nababusi, nakho okukhona, nakho okuzayo, namandla, 39nakuphakama, nakujula, nanto enye edaliweyo akuyikuba namandla okusahlukanisa nothando lukaNkulunkulu olukuKristu Jesu iNkosi yethu.

KwabaseRoma 8ZUL59NOVula kumfundi weBhayibheli
Bible Society of South Africav.4.26.9
SITHOLE KU