UJobe 10

₁“Umphefumulo wami ukhathele ukuhamba kwami;

ngiyazinikela ekukhaleni,

ngikhulume ngomunyu womphefumulo wami.

₂Ngiyakusho kuNkulunkulu ukuthi:

‘Ungangilahli;

ngazise ukuthi uphikisanelani nami na?

₃Kuhle yini kuwe ukuba ucindezele,

ulahle umsebenzi wezandla zakho,

ukhanye phezu kwamasu ababi, na?

₄Amehlo enyama unawo na?

Uyabona njengabantu na?

₅Imihla yakho injengemihla yomuntu na?

Neminyaka yakho injengezinsuku zabantu na?

₆lokhu ufuna ukona kimi,

ufunisisa isono sami,

₇noma ukwazi ukuthi angimubi

nokuthi akakho ongophula esandleni sakho.

₈Izandla zakho zingibumbile,

zangenza ngokupheleleyo nxazonke;

nokho uyangichitha.

₉Ake ukhumbule ukuthi ungenzile njengebumba;

pho, uyakungibuyisela othulini na?

₁₀Awungithululanga njengobisi,

wangijiyisa njengoshizi,* na?

₁₁Awungembathisanga isikhumba nenyama,

wangiphica ngamathambo nangemisipha, na?

₁₂Ungenzele ukuphila nomusa;

ukungihambela kwakho kulondile umoya wami.

₁₃Kepha ufihlile enhliziyweni yakho lokhu;

ngiyazi ukuthi lokhu kukuwe kokuthi:

₁₄Uma ngona, uyangiqaphela;

awuyikuthethelela ukona kwami.

₁₅Uma nginecala, maye kimi!

Noma bengilungile,

bengingayikuphakamisa ikhanda lami,

lokhu ngisuthi ngehlazo,

ngibona ukuhlupheka kwami.

₁₆Nokuba bengiziphakamisa,

ubuyakungizingela njengengonyama,

ubuye uzenze omangalisayo kimi.

₁₇Ubuyakuletha kimi ofakazi

abasha, wandise intukuthelo yakho

kimi, amabandla ngamabandla

angisukele.

₁₈“ ‘Ungikhipheleni esizalweni na?

Ngangiyakugqibuka lingakangiboni iso,

₁₉ngibe njengokungathi ngingekho,

ngiyiswe ethuneni ngisaphuma esiswini.

₂₀Imihla yami ayiyingcosana na?

Makapheze, angiyeke ukuba ngithokoze kancane,

₂₁ngingakayi lapho ngingasayikubuya khona,

izwe lobumnyama nelomthunzi wokufa,

₂₂izwe lobumnyama obunjengesigayegaye

nelomthunzi wokufa nelesiphithiphithi,

lapho ukukhanya kunjengobumnyama.’ ”