To The Word – Day 157

₁Umthamo owomileyo kanye nokuthula ungcono

kunendlu egcwele okuhlatshiweyo kanye nokuxabana.

₂Inceku eqondileyo iyabusa phezu kwendodana ehlazisayo;

iyakudla ifa phakathi kwezelamani.

₃Ukhamba lokuncibilikisela lungolwesiliva,

nesithando ngesegolide,

kepha ovivinya izinhliziyo nguJehova.

₄Owenza okubi uqaphela izindebe zokona,

nomqambimanga ubeka indlebe olimini olubi.

₅Oklolodela ompofu usola uMenzi wakhe,

nothokoza ngengozi akayikuyekwa.

₆Abantwana babantwana bangumqhele wabadala,

nodumo lwabantwana lungoyise.

₇Izindebe ezinobungcweti azifanele isiwula;

kakhulu kangakanani umlomo wamanga isikhulu.

₈Isipho sinjengetshe elinqabileyo emehlweni omninilo:

noma ebhekaphi, uyaphumelela.

₉Osibekela isiphambeko ufuna uthando,

kepha onokondisa indaba wahlukanisa abahlobo.

₁₀Insolo ingena koqondileyo

kunemivimbo eyikhulu koyisiwula.

₁₁Omubi ufuna ukuhlubuka kuphela;

ngalokho kuyakuthunyelwa kuye isithunywa esinonya.

₁₂Umuntu makahlangane nebhere* elaphuciwe amawundlu alo

kunesiwula ebuwuleni baso.

₁₃Ophindisela okuhle ngokubi,

ububi abuyikusuka endlini yakhe.

₁₄Ukuqala kokuxabana kunjengokuvula amanzi;

ngalokho yeka inkani, ingakashisi.

₁₅Othetha omubi nolahla olungileyo

bayisinengiso kuJehova bobabili.

₁₆Yini ukuba kube yimali esandleni

sesiwula ukuthenga ukuhlakanipha,

kungekho ukuqonda, na?

₁₇Umngane uthanda ngezikhathi zonke,

nomzalwane uzalwa ekuhluphekeni.

₁₈Umuntu oswela ingqondo unikana nomunye izandla,

abe yisibambiso phambi komakhelwane wakhe.

₁₉Othanda ukuxabana uthanda isiphambeko;

owenza umnyango wakhe ukuba uphakame ufuna ukubhujiswa.

₂₀Onenhliziyo ephambeneyo akafumani okuhle;

onolimi oluyisigwegwe uwela engozini.

₂₁Ozala isiwula kulusizi kuye;

uyise wesiwula akathokozi.

₂₂Inhliziyo eyenamileyo iyikhambi elihle,

kepha umoya owaphukileyo uyomisa amathambo.

₂₃Omubi uyamukela umvuzo okhishwa esifubeni

ukuba aphambukise izindlela zokwahlulela.

₂₄Ukuhlakanipha kuphambi koqondileyo,

kepha amehlo esiwula asemikhawulweni yomhlaba.

₂₅Indodana eyisiwula ilusizi kuyise

nokubaba kowayizalayo.

₂₆Ukuhlawulisa olungileyo akukuhle,

nokushaya abaqotho akulungile.

₂₇Obamba amazwi akhe unokwazi;

onomoya opholileyo ungumuntu oqondileyo.

₂₈Nesiwula lapho sithule kuthiwa isihlakaniphi;

ovala umlomo wakhe ungoqondileyo.

₁Ozahlukanisayo ufuna esakhe isifiso,

uphika konke ukuhlakanipha.

₂Isiwula asithokozi ngokuqonda,

kuphela ngokuveza okusenhliziyweni yakhe.

₃Lapho kufika omubi,

kufika nokudelela;

kanye nehlazo kukhona inhlamba.

₄Amazwi omlomo womuntu anjengamanzi ajulileyo,

nomfula ogobhozayo,

nomthombo wokuhlakanipha.

₅Ukukhetha ubuso bomubi

ukuba olungileyo aphambukiswe ekwahlulelweni akukuhle.

₆Izindebe zesiwula ziletha ukuxabana,

nomlomo waso ubiza imivimbo.

₇Umlomo wesiwula ungukubhujiswa kwaso,

nezindebe zaso zilugibe lomphefumulo waso.

₈Amazwi omncethezi anjengezibiliboco;

ayehlela kokuphakathi komuntu.

₉Ovilapha emsebenzini wakhe

yena ungumfowabo wochithayo.

₁₀Igama likaJehova lingumbhoshongo onamandla;

olungileyo ugijimela kuwo, alondeke.

₁₁Imfuyo yesicebi ingumuzi waso onamandla;

injengogange oluphakemeyo emicabangweni yaso.

₁₂Ngaphambi kokubhujiswa inhliziyo yomuntu iyaziqhenya;

ukuthobeka kwandulela udumo.

₁₃Obuyisa izwi engakezwa,

kungubuwula nehlazo kuye.

₁₄Umoya womuntu uyasekela ubuthakathaka bakhe,

kepha ngubani ongathwala umoya owaphukileyo na?

₁₅Inhliziyo yoqondileyo iyazuza ukwazi,

nezindlebe zabalungileyo ziyafuna ukwazi.

₁₆Isipho somuntu siyamenzela indawo,

simholele kwabakhulu.

₁₇Ongowokuqala ecaleni lakhe usengathi ulungile,

kepha umakhelwane wakhe ufika, amphenye.

₁₈Inkatho iyaqeda ukuxabana,

yahlukanise phakathi kwabanamandla.

₁₉Umzalwane owoniweyo ulukhuni kunomuzi onamandla,

nokuxabana kunjengemigoqo yenqaba.

₂₀Isisu somuntu siyasutha ngesithelo somlomo wakhe,

saneliswe ngokuthela kwezindebe zakhe.

₂₁Ukufa nokuphila kusemandleni olimi,

nabaluthandayo bayakudla izithelo zalo.

₂₂Ofumana umfazi uthola okuhle;

uzuzile isisa kuJehova.

₂₃Ompofu ukhuluma ngokuncenga,

kepha isicebi siphendula kalukhuni.

₂₄Umuntu wabangane uyazilimaza,

kepha kukhona abangane ababambelela kuneselamani.

₁Ungcono ompofu ohamba ekupheleleni kwakhe

kunophambene ngezindebe zakhe eyisiwula.

₂Futhi akulungile ukuba umphefumulo ungabi nakwazi;

oshesha ngezinyawo uyaduka.

₃Ubuwula bomuntu buchitha indlela yakhe,

kepha inhliziyo yakhe iyamthukuthelela uJehova.

₄Imfuyo iyenezela abangane abaningi,

kepha ompofu uyashiywa ngumngane wakhe.

₅Ufakazi wamanga akayekwa,

nophafuza amanga akayikusinda.

₆Baningi abancenga izikhulu;

bonke bangabangane bomuntu wezipho.

₇Bonke abazalwane bompofu bayamzonda;

kakhulu kangakanani abangane badedela kude naye;

uyabaxosha ngamazwi,

kepha awasekho.

₈Ozuza ukuqonda uthanda umphefumulo wakhe;

ogcina ingqondo uyakufumana okuhle.

₉Ufakazi wamanga akayekwa,

nophafuza amanga uyakubhubha.

₁₀Ukutamasa akufanele isiwula;

kakhulu kangakanani akufanele ukuba inceku ibuse phezu kwezikhulu.

₁₁Ukuhlakanipha komuntu kubambezela intukuthelo yakhe;

kuludumo lwakhe ukudlula esiphambekweni.

₁₂Ukufutheka kwenkosi

kunjengokubhonga kwengonyama,

kepha isihhe sayo sinjengamazolo etshanini.

₁₃Indodana eyisiwula iyinhlupheko kayise,

nokuxabana komfazi kungukuconsa njalonjalo.

₁₄Indlu nemfuyo kuyifa elivela koyise,

kepha umfazi ohlakaniphileyo uvela kuJehova.

₁₅Ubuvila bushonisa ebuthongweni obunzima,

nesidenge siyalamba.

₁₆Ogcina umyalo ulonda umphefumulo wakhe,

kepha onganaki izindlela zakhe uyakufa.

₁₇Onomusa kompofu utsheleka uJehova,

nomsebenzi wakhe uyawubuyisela kuye.

₁₈Yilaye indodana yakho,

lisekhona ithemba;

ungabhekisi inhliziyo yakho ukuyibulala.

₁₉Onolaka olukhulu uyathweswa ihlawulo,

ngokuba uma umophula,

umelwe ukukuphinda.

₂₀Yizwa isiluleko, wamukele ukulaywa,

ukuze uhlakaniphe ekugcineni.

₂₁Kukhona amacebo amaningi enhliziyweni yomuntu,

kepha isiluleko sikaJehova siyakuma.

₂₂Ukuthandwa komuntu kubangwa ngumusa wakhe;

ompofu ungcono kunomuntu wamanga.

₂₃Ukumesaba uJehova kungokokuphila;

onakho uhlezi anelisiwe,

akahanjelwa ngububi.

₂₄Ivila liyafaka isandla salo esitsheni;

alisibuyiseli nasemlonyeni walo.

₂₅Shaya isideleli, ongenalwazi uyakuthola ukuqonda;

sola oqondileyo, uyakuqonda ukwazi.

₂₆Ochitha uyise noxosha unina

uyindodana ehlazisayo nebanga amahloni.

₂₇Yeka, ndodana yami,

ukulalela ukulaywa,

uyakuduka emazwini okwazi.

₂₈Ufakazi omubi uyadelela ukwahlulela;

umlomo wababi uyagwinya ukona.

₂₉Izahlulelo zilungiselwa izideleli,

nemivimbo umhlane weziwula.

₁Bengilindela uJehova;

wayesezikhothamisela kimi,

wezwa ukukhala kwami.

₂Wangikhipha emgodini wokubhujiswa odakeni lobishi,

wamisa izinyawo zami edwaleni,

waqinisa izinyathelo zami.

₃Wabeka igama elisha emlonyeni wami,

igama lokubonga uNkulunkulu wethu;

abaningi bayakukubona, besabe,

bamethembe uJehova.

₄Ubusisiwe umuntu obeka ithemba lakhe kuJehova,

ongaphendukeli kwabazidlayo nakwabaphambukela emangeni.

₅Jehova Nkulunkulu wami,

ziningi izimangaliso zakho ozenzileyo,

nezizindlo zakho ngathi;

akukho okungafaniswa nawe;

uma ngiyilanda, ngiyisho,

miningi kunokuba ibalwe.

₆Umhlatshelo nomnikelo wokudla awuwuthandi;

izindlebe zami uzibhobozile;

umnikelo wokushiswa nomnikelo wesono awuwubizi.

₇Ngase ngithi: “Bheka, ngiyeza;

encwadini esongwayo kulotshiwe ngami ukuthi:

₈Ngiyathanda ukwenza intando yakho,

Nkulunkulu wami,

nomthetho wakho usenhliziyweni yami.”

₉Ngishumayelile ukulunga ebandleni elikhulu;

bheka, angizivalanga izindebe zami;

Jehova, wena uyakwazi.

₁₀Ukulunga kwakho angikuthukusanga enhliziyweni yami;

ngashumayela ukukholeka kwakho nensindiso yakho;

umusa wakho neqiniso lakho angikufihlelanga ibandla elikhulu.

₁₁Wena Jehova ungangigodleli ububele bakho;

umusa wakho neqiniso lakho makungilonde njalo.

₁₂Ngokuba izinhlupheko ezingenakubalwa zingihaqile,

iziphambeko zami zingificile,

angaze ngaba nakubona;

ziningi kunezinwele zekhanda lami;

inhliziyo yami ingishiyile.

₁₃Makuthandeke kuwe Jehova ukuba ungikhulule;

Jehova, mawuphuthume ungisize.

₁₄Mabajabhe, babe namahloni bonke

abafuna umphefumulo wami ukuba bawuhlwithe;

abafisa ukulimala kwami

mababuyiselwe emuva, bajabhiswe.

₁₅Mabashaqeke ngenxa yehlazo labo abathi kimi:

“Ashila, ashila!”

₁₆Mabethabe, bajabule kuwe bonke abakufunayo;

abathanda insindiso yakho mabasho

njalo, bathi:

“Makadunyiswe uJehova.”

₁₇Noma ngihlupheka, ngimpofu,

iNkosi iyanginaka;

wena ungumsizi wami noMsindisi wami;

Nkulunkulu wami, mawungalibali.

₁Ubusisiwe onakekela ohluphekayo;

uJehova uyakumsindisa osukwini olubi.

₂UJehova uyakumlondoloza, amphilise;

uyakubusiswa emhlabeni;

awuyikumnikela entandweni yezitha zakhe.

₃UJehova uyakumphasa ecansini egula;

wena uyakuguqula ukhukho lwakhe ekuguleni kwakhe.

₄Mina ngithi: “Jehova, ngihawukele,

uphulukise umphefumulo wami, ngokuba ngonile kuwe.”

₅Izitha zami zikhuluma okubi ngami, zithi:

“Uzakufa nini, igama lakhe lichitheke, na?”

₆Nalapho kuza ozongibona,

ukhuluma amanga;

inhliziyo yakhe izibuthela ukonakala,

abesephuma akhulume ngakho.

₇Bonke abangizondayo banyenyezelana ngami:

bangisongozela okubi, bathi:

₈“Into embi inamathele kuye;

olele phansi kasayikululama.”

₉Yebo, nomhlobo wami ebengimethemba,

obedla isinkwa sami,

ungiphakamisele isithende sakhe.

₁₀Kepha wena Jehova, ngihawukele, ungilulamise,

ukuze ngibaphindisele.

₁₁Ngalokho ngiyazi ukuthi uyangithanda,

ngokuba isitha sami asihalalisi phezu kwami.

₁₂Mina uyangimisa ebuqothweni bami;

uyangibeka phambi kobuso bakho kuze kube phakade.

₁₃Makabongwe uJehova uNkulunkulu ka-Israyeli,

kusukela phakade kuze kube phakade.

Amen, Amen.