Bible Reading Plan – Day 266

₂“Koze kube nini nibekela amazwi ami izingibe na?

Qondani, andukuba sikhulume.

₃Kungani ukuba sithiwe siyizilwane,

singcolile emehlweni enu, na?

₄Wena ozidwengula olakeni lwakho,

umhlaba uyakushiywa ngenxa yakho,

nedwala lisuswe endaweni yalo, na?

₅Yebo, nokukhanya komubi kuyakucimeka,

nelangabi lomlilo wakhe aliyikukhanya.

₆Ukukhanya kuyakufiphala etendeni lakhe,

nesibani sakhe phezu kwakhe siyakucimeka.

₇Izinyathelo zakhe ezinamandla ziyakufinyezwa;

amasu akhe ayamlahla phansi.

₈Ngokuba uyaphonswa yizinyawo zakhe enetheni,

uhamba phezu kweveku.

₉Isicupho siyakumbamba ngesithende;

ifolo liyakumbamba.

₁₀Uthukuselwe inkintshela emhlabathini,

nesihibe emgwaqweni.

₁₁Ingebhe iyakumethusa nxazonke;

iyamzingela ezinyathelweni zakhe.

₁₂Ububi buyakumlambela,

ulungiselwe ingozi eceleni kwakhe.

₁₃Amalungu omzimba wakhe ayakudliwa,

yebo, ukufa okwesabekayo kuyakudla amalungu akhe.

₁₄Uyakuhlwithwa etendeni lakhe alethembayo,

ayiswe enkosini yengebhe.

₁₅Etendeni lakhe bayakuhlala abangesibo abakhe,

kuvumvuzelwe isibabule ekhaya lakhe.

₁₆Izimpande zakhe ziyakoma ngaphansi;

phezulu kuyabuna amagatsha akhe.

₁₇Ukukhunjulwa kwakhe kuyakuphela emhlabeni,

angabi negama ezweni.

₁₈Uyakukhishwa ekukhanyeni, aqhutshelwe ebumnyameni,

axoshwe ezweni.

₁₉Akayikuba nandodana namzukulwana phakathi kwabantu bakhe;

akuyikuba khona lapho egogobala khona.

₂₀Abasentshonalanga bayethuswa lusuku lwakhe,

nabasempumalanga babanjwa ngukwesaba.

₂₁Impela zinjalo izindlu zaboni;

injalo indawo engamazi uNkulunkulu.”

₂“Koze kube nini nihlupha umphefumulo wami,

ningiphohloze ngamazwi, na?

₃Seningihlazisile kayishumi;

aninamahloni okuthi ningiphathe kabi na?

₄Uma impela ngidukile,

ukuduka kwami kukimi ngedwa.

₅Uma impela niyazikhukhumezela kimi,

niphikisane nami ngehlazo lami,

₆yazini-ke ukuthi uNkulunkulu ungihlanekezele,

ungihaqe ngenetha.

₇Bheka, ngikhala ngithi: ‘Ngubudlova!’

Kepha angiphendulwa;

ngicela ukusizwa,

kodwa akukho ukwahlulelwa.

₈Uvalile indlela yami ukuze ngingabi nakudlula;

ubeka ubumnyama emikhondweni yami.

₉Ungikhumulile udumo lwami;

ususile umqhele ekhanda lami.

₁₀Ungidilizile nxazonke, sengimukile;

usiphulile ithemba lami njengomuthi.

₁₁Ungivuthisele intukuthelo yakhe,

wangishaya njengezitha kuye.

₁₂Amabutho akhe afika kanyekanye,

alungise indlela ukuba angisukele;

amisa nxazonke zetende lami.

₁₃“Udedisile kimi abafowethu,

nabazana nami sebahlukene impela nami.

₁₄Izihlobo zami zingishiyile,

nengazana nabo bangikhohliwe.

₁₅Abagogobele endlini yami

nezincekukazi zami bangishaya umfokazi;

ngingowezizwe emehlweni abo.

₁₆Ngibiza inceku yami,

kayingiphenduli;

ngiyayinxusa ngomlomo wami.

₁₇Umoya wami mubi kumkami,

ngiyanuka kubantwana besisu sikamame.

₁₈Yebo, nezingane ziyangidelela;

uma ngivuka, zikhuluma ngami.

₁₉Ababeyizifuba zami bayanengwa yimi;

labo ababengithanda sebengifulathele.

₂₀Amathambo ami anamathela

esikhumbeni sami nasenyameni yami;

ngisinde ngokulambisa kuphela.

₂₁Ngihawukeleni, ngihawukeleni,

nina bangane bami,

ngokuba isandla sikaNkulunkulu singithintile.

₂₂Ningizingelelani njengoNkulunkulu,

ningasuthi ngenyama yami na?

₂₃“Sengathi amazwi ami angalotshwa!

Sengathi angabhalwa encwadini,

₂₄aqoshwe edwaleni ngepeni lensimbi nangomthofu,

kuze kube phakade!

₂₅Kepha mina ngiyazi ukuthi uMhlengi wami ukhona;

ekupheleni uyakuma othulini.

₂₆Nalapho sesishabalele isikhumba sami,

ngiyakumbuka uNkulunkulu ngikhululekile enyameni yami,

₂₇engiyakumbona uqobo lwami;

amehlo ami ayakumbona,

kungabi njengomfokazi;

okuphakathi kwami kuyaphela esifubeni sami.

₂₈Uma nithi: ‘Siyakumxosha yini pho!

njengokuba impande yendaba ifumaniseka kimi,’

₂₉yesabani inkemba,

ngokuba ulaka lungolwezono ezifanele inkemba,

ukuze nazi ukuthi ukwahlulelwa kukhona.”

₂“Ngalokho imicabango yami iyangiphendula

ngenxa yokushesha okuphakathi kwami.

₃Ngiyezwa insolo engihlazisayo,

kepha umoya wasengqondweni yami uyangiphendula.

₄“Awukwazi yini ukuba lokhu kungokwasendulo,

selokhu abantu babekwa emhlabeni,

₅ukuthi ukujabula kwababi kufushane,

nokuthokoza kwabangenaNkulunkulu

kungokokuphazima kweso nje, na?

₆Noma ubukhulu bakhe bukhuphukela ezulwini,

nekhanda lakhe lifinyelela emafwini,

₇uyakubhubha kuze kube phakade njengamasimba akhe;

abambonayo bayakuthi: ‘Uphi na?’

₈Uyakundiza njengephupho,

angabe esafunyanwa;

uyakuxoshwa njengombono wasebusuku.

₉Iso elalimgqolozela alisamboni,

nendawo yakhe ayisamboni.

₁₀Abantwana bakhe bayakuzincengela kwabampofu,

izandla zakhe zibuyise impahla yakhe.

₁₁Amathambo akhe agcwele ubusha,

kepha buyakulala phansi kanye naye othulini.

₁₂“Noma ububi bumnandi emlonyeni wakhe,

noma ebufihla phansi kolimi lwakhe,

₁₃noma ebugodla engabushiyi,

kepha ebugcina emlonyeni wakhe,

₁₄kuyaguquka nokho ukudla kwakhe phakathi kwakhe,

kube yinyongo yamabululu ezibilinini zakhe.

₁₅Ugwinyile ingcebo;

uyakubuye ayihlanze;

uNkulunkulu uyakuyikhipha esiswini sakhe.

₁₆Uyakumunca isihlungu samabululu;

ulimi lwenyoka luyakumbulala.

₁₇Akayikubuka imifula,

iminonjana nemifudlana yezinyosi namangqanga.

₁₈Lokho owakukhandlekelayo uyakukubuyisa, angakugwinyi;

ngempahla ayitholileyo akayikujabula.

₁₉Ngokuba ucindezele,

washiya abampofu;

uhlwithile indlu, angabuye ayakhe.

₂₀“Ngokuba wayengazi ukuthula esiswini sakhe;

kayikuphepha nalutho kulokho akufisayo.

₂₁Akusalanga lutho angaludlanga;

ngalokho inhlanhla yakhe ayiyikuma.

₂₂Ekusutheni kokuvama kwakhe uyaminywa;

izandla zakho konke ukuhlupheka ziyakumfikela.

₂₃Kuyakuthi lapho eyakugcwalisa isisu sakhe,

uNkulunkulu aphonse kuye ukuvutha kwentukuthelo yakhe,

akunise phezu kwakhe esekudleni.

₂₄Uyabalekela isikhali sensimbi,

kepha ubhotshozwa ngumnsalo wethusi.

₂₅Uyawukhipha uphume emzimbeni wakhe;

nxa uphuma unyampuza enyongweni,

abesehlelwa yingebhe.

₂₆Ubumnyama bonke bubekelelwe ingcebo yakhe;

umlilo ongavuthelwanga uyakuyidla,

uchithe okusele etendeni lakhe.

₂₇Izulu liyakwambula ububi bakhe,

umhlaba umvukele.

₂₈Imfuyo yendlu yakhe iyakumuka,

inyamalale ngomuhla wentukuthelo.

₂₉Lesi siyisabelo somuntu omubi esivela kuNkulunkulu,

nefa alinqunyelweyo nguNkulunkulu.”

₂“Yizwani nokuzwa amazwi ami;

lokhu makube yinduduzo evela kini.

₃Ngivumeleni ukuba nami ngikhulume;

nalapho sengikhulumile, klolodani.

₄“Mina-ke, ukukhala kwami kungomuntu na?

Ngingekhathazeke na?

₅Ngibukeni, nimangale,

nibeke izandla emilonyeni yenu.

₆Lapho ngikhumbula nje,

ngishaywa luvalo;

ukwesaba kubamba inyama yami.

₇Ababi baphilelani,

baze babe badala,

yebo, bakhule emandleni, na?

₈Inzalo yabo iyema phambi kwabo kanye nabo,

nabantwana babo phambi kwamehlo abo.

₉Izindlu zabo zinokuthula, azinangebhe;

uswazi lukaNkulunkulu aluphezu kwabo.

₁₀Inkunzi yabo iyakhwela, kayiphuthi;

inkomo yabo iyazala, kayiphunzi.

₁₁Bakhipha izingane zabo njengomhlambi;

abantwana babo bayagida.

₁₂Bahlabelela ngesigubhu nangehabhu,*

bathokoza ngezwi lomtshingo.

₁₃Baqeda imihla yabo ngokuhle,

behlela endaweni yabafileyo ngokuthula.

₁₄Nokho bathi kuNkulunkulu:

‘Suka kithi,

asifuni ukwazi izindlela zakho.

₁₅USomandla uyini ukuba simkhonze na?

Siyakuzuzani, uma sikhuleka kuye, na?’

₁₆Bhekani, inhlanhla yabo ayisesandleni sabo;

icebo lababi malibe kude nami.

₁₇“Kukangaki isibani sababi sicimeka,

nengozi ibehlela,

babelwe izabelo ngentukuthelo, na?

₁₈Babeyakuba njengezibi phambi komoya,

nanjengamakhoba aphephethwa yisiphepho.

₁₉UNkulunkulu ubekela abantwana babo ububi babo;

yebo, kodwa makabuphindisele kubo uqobo ukuba babazi.

₂₀Awabo amehlo mawabone ukuchithwa kwabo,

bona baphuze ukufutheka kukaSomandla.

₂₁Banokujabula kuni endlini yabo emva kwabo,

lapho umumo wezinyanga zabo usunqunyiwe, na?

₂₂UNkulunkulu uyakufundiswa ukwazi,

yena owahlulela abaphakemeyo, na?

₂₃“Omunye ufa esemi kahle kukho konke,

ezinzile, enokuthula.

₂₄Izinhlangothi zakhe zigcwele amafutha;

umnkantsha wamathambo akhe umanzi.

₂₅Omunye ufa enomphefumulo onomunyu,

engazange adle okuhle.

₂₆Balala phansi othulini kanyekanye;

izimpethu ziyabasibekela.

₂₇Bhekani, ngiyazi imicabango yenu,

namacebo enu eniyakungona ngawo.

₂₈Nithi: ‘Iphi indlu yezikhulu,

liphi itende lokuhlala kwababi, na?’

₂₉Anibuzanga abadlula endleleni,

nibazi ubufakazi babo

₃₀bokuthi omubi ugodlelwa usuku lokubhujiswa

nokuthi bayamukiswa ngosuku lwentukuthelo, na?

₃₁Ngubani oyakumtshela indlela yakhe ebusweni bakhe?

Ngubani oyakumphindisela ngalokho akwenzileyo na?

₃₂Uyayiswa ethuneni, kulindwe elibeni.

₃₃Amagabade asesigodini ayakuba mnandi kuye;

bonke abantu bayakudonswa emva kwakhe,

njengokuba bengenakubalwa nababe phambi kwakhe.

₃₄“Pho, ningiduduzelani ngeze,

lokhu ezimpendulweni zenu kusele inkohliso nje, na?”