Bible Reading Plan – Day 265

₁“Umuntu ozelwe ngowesifazane

imihla yakhe mifushane,

igcwele ukuyaluza.

₂Uyavela njengembali, abune;

ubaleka njengethunzi, angemi.

₃Konje uvulela onjalo amehlo akho,

ungingenise ekwahluleweni nawe, na?

₄Ngubani ongaveza okuhlambulukileyo kukho

okungcolileyo na?

Kakho noyedwa.

₅Uma imihla yakhe inqunyiwe,

umumo wezinsuku zakhe ukuwe,

ubekile umkhawulo wakhe,

aze angadluli,

₆ungambheki, aphumule,

ukuze athokoze ngosuku lwakhe njengomqashwa.

₇“Ngokuba kukhona ithemba emthini:

uma unqunywa, ungabuye uhlume,

nehlumela lawo aliyikuphela.

₈Noma impande yawo iguga emhlabathini,

nesiphunzi sawo sifela othulini,

₉ngephunga lamanzi uyakuhluma,

uveze izingatsha njengesithombo.

₁₀Kepha umuntu ofileyo uphelile;

umuntu ogqabukileyo uphi na?

₁₁Njengamanzi anyamalele elwandle,

nomfula oshileyo ome,

₁₂kanjalo umuntu ulala phansi,

angabe esavuka;

lize lingabikho izulu abayikuvuka,

bangaphaphanyiswa ebuthongweni babo.

₁₃Sengathi ungangifihla endaweni yabafileyo,

ungisithe kuze kudlule intukuthelo yakho,

unginqumele isikhathi,

ungikhumbule.

₁₄Uma umuntu efa,

uyakubuye aphile na?

Bengiyakulinda zonke izinsuku zomshikashika wami,

kuze kufike ukumuka kwami.

₁₅Ubuyakubiza, mina ngiphendule;

ubuyakulangazelela umsebenzi wezandla zakho,

₁₆yebo, khona ubuyakubala izinyathelo zami,

ungaqapheli isono sami.

₁₇Isiphambeko besiyakuvalelwa esikhwameni,

besewusibekela ukona kwami.

₁₈“Impela intaba iyawa, idilike;

idwala liyasuswa endaweni yalo;

₁₉amanzi ayagubha amatshe;

ukuphuphuma kwawo kuyakhukhula uthuli lomhlaba;

kanjalo uyachitha nethemba lomuntu.

₂₀Uyamsukela kuze kube phakade,

amuke;

uyaguqula ubuso bakhe, ummukise.

₂₁Amadodana akhe ayadunyiswa,

engazi yena;

ayeyiswa, engakuqondi.

₂₂Inyama yakhe iyezwa ubuhlungu bayo kuphela;

umphefumulo wakhe uzidabukela wona kuphela.”

₂“Ohlakaniphileyo uyakuphendula

ngokwazi okungumoya nje,

agcwalise isisu ngomoya wasempumalanga, na?

₃Aphikisane ngamazwi angasizi

lutho nangezinkulumo ezingenalusizo na?

₄Yebo, uyachitha ukwesaba,

unciphisa ukuzindla phambi kukaNkulunkulu.

₅Ngokuba ububi bakho buyafundisa umlomo wakho;

ukhetha ulimi lwabanobuqili.

₆Ngumlomo wakho okulahlayo,

akusimi;

izindebe zakho ziyafakaza ngawe.

₇Ungumuntu wokuqala owazalwayo na?

Wavela ngaphambi kwezintaba na?

₈Uzwile imfihlakalo kaNkulunkulu,

wazigodlela wedwa ukuhlakanipha na?

₉Wazini esingayazi thina na?

Uqonda ntoni engekho kithina na?

₁₀Kithina kukhona izimpunga namakhehla

amadala kunoyihlo.

₁₁Zincane yini kuwe izinduduzo zikaNkulunkulu,

nezwi elikhulunywa kahle kuwe na?

₁₂Umukiselwani yinhliziyo yakho na?

Kungani ukuba amehlo akho aphayizele,

₁₃uphendulele kuNkulunkulu ukufutheka kwakho,

ukhiphe amazwi emlonyeni wakho na?

₁₄Uyini umuntu ukuba abe ngohlambulukileyo,

nozelwe ngowesifazane ukuba alungisiswe, na?

₁₅Bheka, nabangcwele bakhe akabethembi,

nezulu alihlambulukile emehlweni akhe;

₁₆kakhulu kangakanani onengekayo nowonakeleyo,

umuntu ophuza ukona njengamanzi, na?

₁₇“Ngiyakukwazisa, ungilalele;

ngiyakukulandisa engikubonileyo

₁₈lokho izihlakaniphi ezikubonakalisile,

zikuthathe koyise, zingakufihlanga,

₁₉zona ezaphiwa zodwa izwe,

kungadabulanga kuzo umfokazi ngokuthi:

₂₀Umuntu omubi uyazibinya imihla yonke,

umumo weminyaka othukuselwe isidlwangudlwangu.

₂₁Izwi lengebhe lisezindlebeni zakhe;

lapho ehlezi kahle,

uyakufikelwa ngumphangi.

₂₂Akethembi ukuthi uyakubuya ebumnyameni;

uyalindelwa yinkemba.

₂₃Uyazulazulela ukudla: kuphi na?

Uyazi ukuthi usuku lobumnyama selungasesandleni sakhe.

₂₄Ukuhlupheka nosizi kuyamethusa;

kuyamahlula njengenkosi ezilungiselele impi,

₂₅ngokuba waselulela isandla sakhe kuNkulunkulu,

wazigabisa kuSomandla.

₂₆Wamdumela ngentamo elukhuni,

nangamaqhubu adumbileyo amahawu akhe,

₂₇ngokuba wasibekela ubuso bakhe ngamafutha akhe,

wenza umvingqi okhalweni lwakhe.

₂₈Wahlala emizini ebiyakuchithwa,

nasezindlini ebezingahlalwa,

ezaziyakuba ngamanxiwa nje.

₂₉Akayikuceba, nemfuyo yakhe ayiyikuma,

nokudla kwakhe akuyikukhothamela phansi.

₃₀Akayikusuka ebumnyameni;

ilangabi liyakushisa amagatsha akhe,

amuke ngokuphefumula komlomo kaNkulunkulu.

₃₁Makangethembi ezeni, ezikhohlisa,

ngokuba ize liyakuba ngumvuzo wakhe.

₃₂Kuyakufezwa kungakabi yisikhathi,

negatsha lakhe alisayikuba luhlaza.

₃₃Uyakuvuthulula igwanya lakhe njengomvini,

alahle imbali yakhe njengomnqumo.

₃₄Ngokuba ibandla labangenaNkulunkulu liyakuba

yinyumba,

umlilo uqede amatende abathengwa ngemivuzo.

₃₅Bakhulelwe ingozi, bazala ukona;

isisu sabo silungisela inkohliso.”

₂“Ngizwile izinto eziningi ezinjalo;

nina nonke ningabaduduzi ababi.

₃Amazwi angumoya nje awayikuphela yini?

Ucunulwa yintoni ukuba uphendule na?

₄Nami ngingakhuluma njengani;

uma imiphefumulo yenu ibisesikhundleni

somphefumulo wami,

bengiyakuhlanganisa amazwi ngani,

ngininikinele ikhanda lami.

₅Benginganiqinisa ngomlomo,

induduzo yezindebe zami inidambise.

₆“Noma ngikhuluma,

ubuhlungu bami abudanjiswanga;

noma ngiyeka,

kuyini okumuka kimi na?

₇Kepha manje ungikhathazile,

uyichithile yonke indlu yami.

₈Ungicindezele, kungubufakazi;

ukonda kwami kuyangivukela,

kufakaze ebusweni bami.

₉Ulaka lwakhe luyangidwengula,

lungizingele;

uyangigedlela amazinyo;

isitha sami singicijisela amehlo aso.

₁₀Bangikhamisela imilomo yabo,

bangimukula esihlathini ngenhlamba,

bangihlanganyela.

₁₁UNkulunkulu uyanginikela kubantu abonakeleyo,

angiphonse esandleni sababi.

₁₂Ngangihlezi kahle, wangichoboza;

wangibamba ngentamo,

wangiphahlaza;

wangimisa ngibe yisigcibisholo.

₁₃Abacibishelayo bakhe bangihaqa;

uyaqhekeza izinso zami engenasihawu;

uchithela inyongo yami emhlabathini.

₁₄Uyangidiliza nokudiliza futhifuthi,

angidumele njengeqhawe.

₁₅“Ngithungile indwangu yamasaka phezu kwesikhumba sami.

ngingcolisile uphondo lwami othulini.

₁₆Ubuso bami bubomvu ngokukhala;

ezinkosheni zami kukhona ithunzi lokufa,

₁₇noma kungekho ubudlova ezandleni zami

nokukhuleka kwami kulungile.

₁₈Mhlaba, ungathukusi igazi lami;

ukukhala kwami makungabi nandawo.

₁₉Namanje bheka,

ufakazi wami usezulwini;

ummeli wami usezindaweni eziphakemeyo.

₂₀Abangane bami bayangiklolodela;

iso lami liphophoza izinyembezi kuNkulunkulu

₂₁ukuba amphikele umuntu kuNkulunkulu

nendodana yomuntu kumakhelwane wayo.

₂₂Ngokuba iyingcosana iminyaka eyakubalwa,

ngingakahambi indlela engingayikubuya kuyo.

₁“Umoya wami usuchithekile, imihla yami iyacimeka;

okwami sekuyithuna nje.

₂Impela kukhona abangiklolodelayo,

iso lami lisekucunuleni kwabo.

₃Ake unginike isibambiso, ungimele;

ngubani oyakuxhawulana nami na?

₄Ngokuba uvalile izinhliziyo zabo zingaqondi;

ngalokho awuyikubaphakamisa.

₅Ochaka abangane bakhe ngenxa yesabelo,

amehlo abantwana bakhe ayakufiphala.

₆Ungibeke isaga sabantu,

ngibe ngokhafulelwa ebusweni.

₇Iso lami lifiphele ngosizi;

onke amalungu ami anjengethunzi.

₈Abaqotho bayethuswa yilokho;

ongenacala uyavukela ongenaNkulunkulu.

₉Kepha olungileyo ubambelela endleleni yakhe;

onezandla ezihlanzekileyo ude eqina njalo.

₁₀Nokho buyani nonke phela, nize;

kodwa angiyikuthola phakathi kwenu ohlakaniphileyo.

₁₁Imihla yami isidlulile,

amasu ami anqunyiwe

kanye nemicabango yami yenhliziyo.

₁₂Ubusuku babenza imini,

bathi:

‘Ukukhanya kuseduze nobumnyama.’

₁₃Uma ngithemba ukuthi indawo yabafileyo iyindlu yami,

ngendlalele ukhukho lwami ebumnyameni,

₁₄ngibize ukubola ngokuthi ubaba

nezimpethu ngokuthi umame nodadewethu,

₁₅liphi, pho, ithemba lami na?

Yebo, ithemba lami,

ngubani oyakulibona na?

₁₆Liyakwehlela emigoqweni yendawo yabafileyo,

lapho kuyakuba khona ukuphumula othulini kanyekanye.”