Bible Reading Plan – Day 263

₈“Kodwa mina bengiyakumfuna uNkulunkulu;

kuNkulunkulu bengiyakubeka indaba yami,

₉yena owenza izinto ezinkulu ezingaphenyekiyo,

izimangaliso ezingenakubalwa,

₁₀yena onisa imvula emhlabeni,

athume amanzi ebusweni bamasimu,

₁₁ukuze aphakamise abayizimpofana nabadabukileyo

baphakanyiselwe ukusindiswa.

₁₂Uyachitha amacebo abanobuqili,

ukuze izandla zabo zingabi nakufeza umgomo wabo.

₁₃Uyabamba abahlakaniphileyo ebuqilini babo;

isiluleko soyisigwegwe siyachithwa ngokuphuthuma.

₁₄Emini bahlangana nobumnyama,

baphumputha emini njengasebusuku.

₁₅Uyasindisa enkembeni yemilomo yabo,

yebo, abampofu esandleni sonamandla.

₁₆Ompofu usenethemba;

ububi buvala umlomo wabo.

₁₇“Bheka, ubusisiwe lowo muntu uNkulunkulu amlayayo;

ngalokho ungadeleli ukukhuzwa nguSomandla.

₁₈Ngokuba uma ezwisa ubuhlungu,

ubuye abophe;

uyalimaza, kepha izandla zakhe zibuye zelaphe.

₁₉Uyakophula ezinhluphekweni eziyisithupha;

yebo, nakweziyisikhombisa awuyikuthintwa ngokubi.

₂₀Endlaleni uyakukuhlenga ekufeni

nasempini emandleni enkemba.

₂₁Uyakufihlwa enkalivasini* yolimi;

awuyikwesaba lapho kufika ukuchitha.

₂₂Uyakuhleka incithakalo nendlala,

nezilo zomhlaba awuyikuzesaba.

₂₃Ngokuba unesivumelwano namatshe asendle;

izilo zasendle zihlalisana kahle nawe.

₂₄Uyakwazi ukuthi itende lakho linokuthula;

uyakuhambela indlu yakho,

awuyikusilalelwa lutho.

₂₅Uyakwazi ukuthi inzalo yakho iyakuba nkulu,

abantwana bakho babe njengotshani bomhlaba.

₂₆Uyakufika ethuneni usuthi ngobudala

njengeqhinqa lamabele ngesikhathi salo.

₂₇Bheka, lokho sikuphenyile; kunjalo;

kuzwe, uzazele khona.”

₂“Sengathi ukuncokolozwa kwami

ngabe kulinganiswe nokulinganiswa,

inhlupheko yami ibekwe esilinganisweni kanyekanye.

₃Ngokuba manje iyasinda kunesihlabathi solwandle;

ngalokho amazwi ami ayengukubheda.

₄Ngokuba imicibisholo kaSomandla ikimi;

isihlungu sayo siphuzwa ngumoya wami;

izesabiso zikaNkulunkulu ziyangehlela.

₅Imbongolo yasendle iyakhala yini inotshani na?

Inkabi iyakhonya isekudleni kwayo na?

₆Okudumayo kungadliwa ngaphandle kukasawoti na?

Kukhona ukuklwabusa kokumhlophe kweqanda na?

₇Umphefumulo wami uyala ukukuthinta,

kungukudla okunengekayo kimi.

₈“Sengathi isicelo sami singenziwa,

uNkulunkulu angiphe lokhu engikubhekayo.

₉Yebo, sengathi uNkulunkulu angangichoboza,

athukulule isandla sakhe, anginqume.

₁₀Lokho ngakube kuhlale kube yinduduzo yami,

yebo, ngabe ngijabule ebuhlungwini obungahawukeliyo

ukuthi angigodlanga amazwi oNgcwele.

₁₁Ayini amandla ami ukuba ngingaze ngethembe na?

Ukuphela kwami kuyini ukuba ngingaze ngibekezele na?

₁₂Pho, amandla ami angamandla amatshe yini?

Inyama yami iyithusi na?

₁₃Akusikho yini ukuthi alukho usizo kimi;

ukusindiswa kususwa kimi.

₁₄“Odangeleyo nga ehawukelwa ngumngane wakhe;

kepha ukumesaba uSomandla kuyayekwa.

₁₅Abafowethu bambuluzile njengomfula,

njengemithonjana yemifula eshayo,

₁₆emnyama ngeqhwa,

lapho ungqoqwane ezisitheza khona,

₁₇kepha ngesikhathi sokufudumala inyamalale,

ishe endaweni yayo, lapho libalele.

₁₈Abahamba ngezindlela zayo bayaphambuka,

benyukela oqwathuleni, babhubhe.

₁₉Izihambi zakwaThema zabheka;

izindwendwe zakwaSheba zazihlalela.

₂₀Zajabha, ngokuba zazibhekile;

sezifike khona zadana.

₂₁Ngokuba kalokhu seniyize nje;

nibona okwesabisayo niyesaba.

₂₂Ngasho yini ukuthi: ‘Ngipheni,

ninginike isipho empahleni yenu,’ na?

₂₃noma: ‘Ngikhululeni esandleni sesitha,

ningihlenge esandleni sezidlova,’ na?

₂₄“Ngifundiseni, khona ngiyakuthula mina,

ningiqondise lapho ngiduke khona.

₂₅Ukukhuluma okuqotho kunamandla,

kepha ukusolwa nokusolwa yinina kusizani na?

₂₆Nicabanga yini ukusola amazwi,

lokhu ukukhuluma kophelelwa ithemba kungumoya nje na?

₂₇Yebo, nenza inkatho ngentandane,

nithengisa ngomngane wenu.

₂₈Manje, qalani ukungibuka;

kuyakuba sobala,

uma ngiqamba amanga.

₂₉Ake niphenduke,

kungabikho ukungalungi,

nibuye niphenduke;

indaba yami ilungile.

₃₀Kukhona ukungalungi olimini lwami yini,

ulwanga lwami alunakuqonda okubi na?

₁“Umuntu akasempini yini emhlabeni,

imihla yakhe ayinjengemihla yomqashwa na?

₂Njengenceku ekhefuzelela ithunzi,

nanjengomqashwa obheka umvuzo wakhe,

₃kanjalo ngithole ifa lezinyanga zokubi;

ngimiselwe ubusuku bezinhlupheko.

₄Lapho ngilala phansi,

ngisho ngithi:

‘Ngingavuka nini,’

ngokuba ubusuku bude;

ngigcwele ukubinyabinyeka kuze kuse.

₅Inyama yami yembesiwe izimpethu namagade othuli;

isikhumba sami siyaphola,

sibuye sibhicike.

₆“Imihla yami iyashesha kunesaluko,

iphela ingenathemba.

₇Khumbula ukuthi ukuphila kwami kungumoya;

iso lami aliyikubuye libone okuhle.

₈Iso longibonayo alisayikungibuka;

amehlo akho esekimi, angisekho.

₉Ifu liphela lihamba;

kanjalo owehlele endaweni yabafileyo akasayikukhuphuka.

₁₀Kasayikubuyela endlini yakhe;

indawo yakhe ayisayikumazi.

₁₁“Ngalokho nami angiyikubamba

umlomo wami;

ngiyakukhuluma osizini lomoya wami,

ngikhale ngomunyu womphefumulo wami.

₁₂Ngilulwandle yini,

ngingumkhomo yini,

ukuze ungibekele abalindi?

₁₃Lapho ngithi umbhede wami uyakungiduduza,

ukhukho lwami lungithwalise ukukhala kwami,

₁₄uyangesabisa ngamaphupho,

ungethusa ngemibono,

₁₅ukuze umphefumulo wami ukhethe ukuklinywa

nokufa kunalawa mathambo ami.

₁₆Ngiyanengwa yiwo;

mangingahlali njalo;

ngiyeke, ngokuba imihla yami iyize.

₁₇Uyini umuntu ukuba umkhulise,

nokuba ubeke inhliziyo yakho kuye,

₁₈nokuba umhambele ekuseni njalo,

umhlole njalonjalo, na?

₁₉Koze kube nini uyeka ukungibheka na?

Ngiyeke, ngize ngiminze amathe ami.

₂₀Noma ngonile,

ngenzeni kuwe mlindi wabantu na?

Ungimiseleni ngibe yisigcibisholo sakho,

ngize ngibe ngumthwalo nakimi, na?

₂₁Awuthetheleli ngani isiphambeko sami,

ususe isono sami, na?

Ngokuba manje ngiyakulala phansi othulini;

uyakungifunisisa, kepha angiyikubakho.”

₂“Koze kube nini ukhuluma lezi zinto,

amazwi akho abe ngumoya onamandla, na?

₃UNkulunkulu uhlanekezela ukwahlulela yini?

USomandla uphendukezela ukulunga na?

₄Uma abantwana bakho bonile kuye,

yena wabanikela emandleni ezono zabo,

₅khona, uma wena ufunisisa uNkulunkulu,

unxuse kuye uSomandla,

₆uma uhlambulukile, futhi ulungile,

khona yena uyakuvuka ngenxa yakho,

aphumelelise ikhaya lokulunga kwakho.

₇Ukuqala kwakho sekuyakuba ngokuncane,

nokugcina kwakho kube ngokukhulu kakhulu.

₈Ake ubuze ezizukulwaneni zakuqala,

uzibhekise lokho abakuphenyileyo oyise bazo,

₉ngokuba thina singabezolo nje, asinalwazi,

lokhu imihla yethu emhlabeni iyithunzi;

₁₀bona abayikukufundisa yini, bakutshele,

bakhiphe amazwi ezinhliziyweni zabo, na?

₁₁Umhlanga ungahluma lapho kungekho xhaphozi na?

Incema ingamila kungekho manzi na?

₁₂Uma iseluhlaza, ingakakhiwa,

iyabuna phambi kwabo bonke utshani.

₁₃“Zinjalo izindlela zabo bonke abakhohlwa uNkulunkulu:

ithemba longenaNkulunkulu liyakuchitheka;

₁₄ithemba lakhe liyakunqunywa,

nesisekelo sakhe siyindlu yolwembu.

₁₅Uyakwencika endlini yakhe,

kepha ayiyikuma;

uyakubambelela kuyo,

kepha ayiyikuqina.

₁₆Yena uluhlaza phambi kwelanga;

imixhantela yakhe iyaxhantela ensimini yakhe.

₁₇Izimpande zakhe ziyathandela enqwabeni yamatshe,

aqhekeze indawo yamatshe.

₁₈Uma echithwa endaweni yakhe,

iyakumala ngokuthi:

‘Angizange ngikubone.’

₁₉Bheka, injalo indlela yokuthokoza kwakhe;

kuyakuvela abanye othulini.

₂₀“UNkulunkulu akamlahli opheleleyo,

kabambi isandla sababi,

₂₁aze agcwalise umlomo wakho ngokuhleka,

nezindebe zakho ngokumemeza.

₂₂Abakuzondayo bayakwembeswa amahloni;

itende lababi aliyobe lisabakho.”

₂“Ngeqiniso ngiyazi ukuthi kunjalo,

kepha umuntu angaba elungile phambi kukaNkulunkulu na?

₃Uma efuna ukuthetha amacala naye,

angemphendule nakwelilodwa kwayinkulungwane.

₄Ehlakaniphile enhliziyweni,

eqinile emandleni,

ngubani oziqinisele kuye, waphumelela,

₅yena ogudluza izintaba ngokungazeleli,

ezigumbuqela ngentukuthelo yakhe;

₆ozamazamisa umhlaba usuke endaweni yawo,

kuthuthumele izinsika zawo;

₇oyala ilanga lingaphumi,

avalele izinkanyezi;

₈oweneka izulu yedwa,

ahambe emazeni olwandle;

₉owenza iBhere,* neMpambano,

nesiLimela,

namaKamelo aseningizimu;*

₁₀owenza izinto ezinkulu ezingenakuhlolwa,

yebo, izimangaliso ezingenakubalwa.

₁₁Bheka, uyangidlula, ngingaboni;

uyagudla, ngingezwa.

₁₂Bheka, uyabamba;

ngubani ongamkhalima na?

Ngubani ongasho kuye ukuthi:

‘Wenzani na?’

₁₃“UNkulunkulu akayikubuyisa intukuthelo yakhe;

phansi kwakhe bayakhothama abasizi bakaRahabi.

₁₄Pho, mina ngingamphendula ngithini,

ngikhethe amazwi ami aqondene naye, na?

₁₅Noma bengilungile,

bengingenakumphendula,

kepha nginxuse umahluleli wami.

₁₆Uma bengimbizile abesengiphendula,

bengingayikukholwa nokho ukuthi

ubekile indlebe ezwini lami.

₁₇Uyangilimaza ngesiphepho;

uyandisa amanxeba ami ngeze.

₁₈Kavumi ukuba ngiphefumule,

kepha uyangigcwalisa ngomunyu.

₁₉Uma kuyindaba yamandla,

nangu onawo;

uma yindaba yokwahlulela,

ngubani ongimemayo na?

₂₀Noma ngilungile,

umlomo wami uyakungilahla;

noma ngingenacala,

uyakuthi ngonakele.

₂₁Anginasici; anginakekeli umphefumulo wami;

anginanzi ukuphila kwami.

₂₂Ukuphela kunye nje; ngalokho ngithi:

‘Uyaqeda ongenasici kanye nomubi.’

₂₃Uma isiswebhu sibulala ngokuzumayo,

uyahleka ingozi yabangenacala.

₂₄Umhlaba unikezwe esandleni sababi;

uyasibekela ubuso babahluleli bawo;

uma kungesiye, pho, ngubani na?