Bible Reading Plan – Day 140

₁Lapho uhlezi ekudleni nombusi,

qonda nokuqonda ophambi kwakho,

₂ubeke umese emphinjeni wakho,

uma ungumuntu wephango.

₃Unganxaneli izilovela zakhe,

lokhu zingukudla okukhohlisayo.

₄Ungakhandlekeli ukuceba;

kuyeke ngokuqonda kwakho.

₅Amehlo akho ayandizela kulokho,

kepha akusekho,

ngokuba kuyazenzela impela amaphiko

njengokhozi olundizela ezulwini.

₆Ungadli ukudla koneso elibi,

ungafisi izilovela zakhe,

₇ngokuba unjengozicabangelayo;

uthi kuwe: “Yidla uphuze,”

kepha inhliziyo yakhe ayikho kuwe.

₈Umthamo owudlileyo uyakuwuhlanza,

uchithe amazwi akho amnandi.

₉Ungakhulumi ezindlebeni zesiwula,

ngokuba siyakudelela ukuhlakanipha

kwamazwi akho.

₁₀Ungasusi isikhonkwane esidala,

ungangeni emasimini ezintandane,

₁₁ngokuba umhlengi wazo unamandla;

uyakumela indaba yazo kuwe.

₁₂Beka inhliziyo yakho ekulayweni,

nezindlebe zakho emazwini okwazi.

₁₃Ungayeki ukumlaya umntwana,

ngokuba uma umshaya ngoswazi akayikufa.

₁₄Uyakumshaya ngoswazi,

wophule umphefumulo wakhe endaweni yabafileyo.

₁₅Ndodana yami,

uma inhliziyo yakho ihlakanipha,

inhliziyo yami iyakuthokoza,

yebo, eyami.

₁₆Izinso zami ziyakujabula,

lapho izindebe zakho zikhuluma okulungileyo.

₁₇Inhliziyo yakho mayingabi namhawu ngezoni,

kepha mawube sekumesabeni uJehova usuku lonke.

₁₈Ngokuba impela umvuzo ukhona,

nethemba lakho aliyikunqunywa.

₁₉Yizwa wena ndodana yami, uhlakaniphe,

uhole inhliziyo yakho ngendlela.

₂₀Ungabi phakathi kwezinseli zewayini

nabayiziminzi zenyama.

₂₁Ngokuba inseli noyisiminzi bayakuba mpofu;

ukozela kuyakwembathisa umuntu amanikiniki.

₂₂Lalela uyihlo owakuzalayo,

ungamdeleli unyoko lapho esemdala.

₂₃Thenga iqiniso, ungathengisi ngalo,

nokuhlakanipha, nokulaywa, nokuqonda.

₂₄Uyise wolungileyo uyakwethaba nokwethaba,

nozala ohlakaniphileyo uyathokoza ngaye.

₂₅Mabathokoze uyihlo nonyoko,

ethabe owakubelethayo.

₂₆Ndodana yami,

ngiphe inhliziyo yakho,

amehlo akho enamele izindlela zami.

₂₇Ngokuba isifebe singumgodi ojulileyo,

nowesifazane ondindayo ungumhholo onyinyeneyo.

₂₈Uqamekela njengomphangi;

uyandisa abambuluzayo phakathi kwabantu.

₂₉Ngubani othi: “Maye!”

Ngubani othi: “Wo!”

Ngubani oxabanayo?

Ngubani okhalayo,

ngubani onezilonda ngeze, na?

Ngubani onamehlo aklwelayo na?

₃₀Yibo abalibala ngasewayinini,

abaya ukunambitha iwayini elixutshanisiweyo.

₃₁Ungalibuki iwayini ukuthi libomvu,

nokuthi liyacwebezela endebeni,

ukuba lehle kalula.

₃₂Ngasekugcineni liyaluma njengenyoka,

lihlabe njengebululu.

₃₃Amehlo akho ayakubona imihlola,

inhliziyo yakho ikhulume okuphambeneyo.

₃₄Uyakuba njengolele ekujuleni kolwandle

nohlezi esihlokweni sensika yomkhumbi.

₃₅Uyakuthi: “Bangishayile, angilimalanga;

bangigalele, angikwazanga.

Lapho ngivuka, ngiyakubuye ngilifune.”

₁Ungabi namhawu ngabantu ababi,

ungafisi ukuba nabo.

₂Ngokuba izinhliziyo zabo ziceba ukuchitha,

nezindebe zabo zikhuluma ngengozi.

₃Indlu iyakhiwa ngokuhlakanipha,

iqiniswe ngokuqonda.

₄Amakamelo agcwaliswa ngokwazi,

ngayo yonke ingcebo enqabileyo nemnandi.

₅Umuntu ohlakaniphileyo udlula onamandla,

nomuntu onokwazi onezikhwepha.

₆Ngokuba ngokucabanga ungaphaka impi yakho,

nokusinda kumi ngobuningi babeluleki.

₇Ukuhlakanipha kuphakeme kunesiwula;

esangweni asivuli umlomo waso.

₈Ocabanga ukwenza okubi

uyakubizwa ngokuthi owenza amacebo.

₉Ukuceba ubuwula kuyisono,

nesideleli siyisinengiso kubantu.

₁₀Uma udangala ngosuku lokuhlupheka,

amandla akho mancane.

₁₁Bophule abayiswa ekufeni;

abakhubekiselwa ekubulaweni ubagodle.

₁₂Uma uthi: “Bheka, besingakwazi,”

akakuqondi yini olinganisa izinhliziyo,

nolonda umphefumulo wakho akakwazi, na?

Futhi akayikuphindisela bonke abantu ngokwemisebenzi yabo na?

₁₃Ndodana yami, yidla izinyosi,

ngokuba zimnandi,

noju oluhle emlonyeni wakho.

₁₄Yazi ukuthi kunjalo ukuhlakanipha emphefumulweni wakho;

uma ukutholile, kuyakuba khona isikhathi esizayo,

nethemba lakho aliyikunqunywa.

₁₅Wena omubi ungaqamekeli indlu yolungileyo,

ungachithi indawo yakhe yokuphumula.

₁₆Ngokuba olungileyo angawa kasikhombisa,

abesebuye avuke,

kepha ababi bayakukhubeka ngobubi.

₁₇Ungathokozi ngokuwa kwesitha sakho,

nenhliziyo yakho mayingajabuli ngokukhubeka kwaso,

₁₈funa uJehova akubone,

kube kubi emehlweni akhe,

asuse intukuthelo yakhe kuso.

₁₉Ungazikhathazi ngabenza okubi,

ungabi namhawu ngamashinga.

₂₀Ngokuba omubi akayikuba namvuzo,

nesibani samashinga siyakucima.

₂₁Ndodana yami, yesaba uJehova nenkosi,

ungahlangani nabahlubukayo.

₂₂Ngokuba ingozi yabo iyakuvuka masinyane;

ngubani owazi ukuchithwa kweminyaka yabo na?

Ukukhetha ubuso ekwahluleleni akukuhle.

₂₄Oshoyo komubi ukuthi: “Ulungile,”

lowo abantu bayakumqalekisa,

nezizwe ziyakumthukuthelela.

₂₅Kwabamthethisayo kuyakuba mnandi,

kufike phezu kwabo isibusiso esihle.

₂₆Njengokwanga kwezindebe,

injalo impendulo eqinisileyo.

₂₇Qeda umsebenzi wakho ngaphandle,

uzilungiselele wona ensimini,

wakhe ngasemuva indlu yakho.

₂₈Ungabi ngufakazi ngomakhelwane wakho kungekho sizathu;

wothi ukhohlise ngezindebe zakho na?

₂₉Ungasho ukuthi: “Njengalokho ekwenzile kimi,

kanjalo ngiyakwenza kuye,

ngimphindisele umuntu njengesenzo sakhe.”

₃₀Ngadlula ensimini yomuntu oyivila,

nasesivinini somuntu ongenangqondo;

₃₁bheka, kuso sonke kwakukhona izimbathi,

sisibekelwe phezulu ngezimbabazane,

nogange lwaso lwamatshe lwaludilizelwe phansi.

₃₂Ngabuka-ke mina, ngacabanga;

ngabona, ngathola ukulaywa:

₃₃ubuthongo obuncane, ukozela okuncane,

ukusonga izandla kancane kuze kulalwe,

₃₄bese kuthi ubumpofu bakho bufike njengomhambuma,

nokuswela kwakho njengomuntu wesihlangu.

₂Kuludumo lukaNkulunkulu ukusitha into,

kepha udumo lwamakhosi lungukuphenya indaba.

₃Njengezulu ngokuphakama nomhlaba ngokujula,

injalo inhliziyo yomuntu ngokuphenywa.

₄Susa amanyela esiliveni,

bese kuthi kuphumele umkhandi isitsha.

₅Susa omubi phambi kwenkosi,

bese kuthi isihlalo sayo sobukhosi siqiniswe ngokulunga.

₆Ungaziphakamisi phambi kwenkosi,

ungemi endaweni yabakhulu.

₇Ngokuba kungcono ukuba kuthiwe

kuwe: “Yenyuka lapha,”

kunokuba wehliswe phambi kwesikhulu asesibonile amehlo akho.

₈Ungasheshi ukuphuma ukuyophikisana

ukuba ungazi ukuthi uyakwenze njani ekugcineni,

lapho umakhelwane wakho ekuhlazisile.

₉Mela indaba yakho nomakhelwane wakho,

ungambuli imfihlakalo yomunye,

₁₀funa okuzwayo akuhlazise,

nodumo lwakho lungabuyi.

₁₁Izwi elikhulunywayo ngesikhathi esiyiso

linjengama-apula* asezitsheni zesiliva.

₁₂Njengecici legolide nesivunulo segolide elicwengekileyo,

unjalo umsoli ohlakaniphileyo endlebeni elalelayo.

₁₃Njengokubanda kweqhwa ngosuku lokuvuna,

sinjalo isithunywa esithembekileyo kosithumileyo,

ngokuba siyahlumelela inkosi yaso.

₁₄Njengamafu nomoya ngaphandle kwemvula kodwa,

unjalo umuntu ozidumisa ngesipho angasiphiyo.

₁₅Ngokubekezela kade isikhulu singavunyiswa,

nolimi oluthambileyo luyaphula amathambo.

₁₆Uma uthole izinyosi,

yidla okwanele wena,

funa udinwe, ubuye uhlanze.

₁₇Unyawo lwakho malungavami endlini yomakhelwane wakho,

funa adinwe nguwe, abuye akuzonde.

₁₈Umuntu ofakazela amanga ngomakhelwane wakhe

uyisando, nenkemba,

nomcibisholo obukhali.

₁₉Ukwethemba ombuluzayo ngosuku lokuhlupheka

kunjengezinyo elaphukileyo nonyawo olwenyeleyo.

₂₀Oyihlabelelela inhliziyo edabukileyo izihlabelelo

unjengokhumula ibhantshi ngosuku lwamakhaza, nanjengoviniga esilondeni.

₂₁Uma okuzondayo elambile,

mnike ukudla, adle;

uma omile, muphe amanzi, aphuze.

₂₂Ngokuba uyakubuthela amalahle omlilo ekhanda lakhe,

besekuthi uJehova akuvuze.

₂₃Umoya wasenyakatho uyaletha imvula,

nolimi olunyenyayo ubuso obuthukutheleyo.

₂₄Kungcono ukuhlala egumbini lophahla

kunokuhlala nowesifazane oxabanayo endlini ehlanganyelweyo.

₂₅Njengamanzi aqandayo emphefumulweni owomileyo,

unjalo umbiko omuhle ovela ezweni elikude.

₂₆Njengomthombo odungekileyo nesiphethu esonakaleyo,

unjalo olungileyo ozanyazanyiswa phambi komubi.

₂₇Ukudla izinyosi eziningi akukuhle,

nokuzifunela udumo kakusilo udumo.

₂₈Njengomuzi odiliziweyo ungenalugange,

unjalo umuntu omoya wakhe ungenakubanjwa.