Bible Reading Plan – Day 139

₁Iwayini liyisideleli,

uphuzo olunamandla lungumxokozeli;

bonke abaduka ngalo abahlakaniphile.

₂Ingebhe ngenkosi injengokubhonga kwengonyama;

oyithukuthelisayo wona umphefumulo wakhe.

₃Kuludumo kumuntu ukuhlala kude nokuxabana,

kepha zonke iziwula ziyaphikisana.

₄Ngenxa yobusika ivila aliyikulima;

ngalokho uyakuthekela ngesikhathi sokuvuna, kungekho lutho.

₅Isiluleko enhliziyweni yomuntu sinjengamanzi ajulileyo,

kepha umuntu oqondileyo uyakusikhipha.

₆Abantu abaningi bayamemezela,

kube yilowo nalowo umusa wakhe,

kepha ngubani ongafumana umuntu othembekileyo na?

₇Olungileyo ohamba ekupheleleni kwakhe,

babusisiwe abantwana bakhe emva kwakhe.

₈Inkosi ehlezi esihlalweni sokwahlulela

ihlakaza konke okubi ngamehlo ayo.

₉Ngubani ongasho ukuthi:

“Ngihlanzile inhliziyo yami,

sengihlambulukile ezonweni zami, na?”

₁₀Izisindo ezimbili nama-efa* amabili,

kokubili kuyisinengiso kuJehova.

₁₁Naye umntwana uyaziwa ngezenzo zakhe,

uma isenzo sakhe sihlanzekile,

noma siqotho.

₁₂Indlebe ezwayo neso elibonayo,

uJehova wenzile kokubili.

₁₃Ungathandi ubuthongo,

funa ufikelwe ngubumpofu;

vula amehlo akho,

uyakusutha ngesinkwa.

₁₄“Kubi, kubi,” kusho umthengi;

kepha esehambile uyazigabisa.

₁₅Kukhona igolide namarubi* amaningi,

kepha ukwazi kwezindebe kuyigugu elinqabileyo.

₁₆Thatha ingubo yoyisibambiso somfokazi,

umbambe abe yisibambiso omela abezizwe.

₁₇Isinkwa samanga simnandi kumuntu,

kepha ngasemuva umlomo wakhe uyakugcwaliswa ngohlalwane.

₁₈Amacebo onke ayaqiniswa

ngokululekana;

yilwa impi ngamasu.

₁₉Ohamba encetheza uyambula izimfihlakalo;

ngalokho ungahlangani naye ovula kakhulu umlomo wakhe.

₂₀Oqalekisa uyise nonina,

isibani sakhe siyakucimeka esigayegayeni.

₂₁Imfuyo ingatholwa ngokushesha ekuqaleni,

kepha ukuphela kwayo akuyikubusiswa.

₂₂Ungasho ukuthi:

“Ngiyakuphindisela okubi,”

yethemba kuJehova, uyakukusindisa.

₂₃Izisindo ezimbili ziyisinengiso kuJehova,

nesilinganiso senkohliso asilungile.

₂₄Izinyathelo zomuntu zingezikaJehova;

pho, umuntu angaqonda kanjani indlela yakhe na?

₂₅Kulugibe ukusho ngamawala ukuthi:

“Kungcwele,”

abesebuya acabange emva kwezithembiso zakhe.

₂₆Inkosi ehlakaniphileyo iyahlakaza ababi,

iphindisele phezu kwabo ukushinga kwabo.

₂₇Umoya womuntu uyisibani sikaJehova,

siphenya konke okuphakathi komuntu.

₂₈Umusa neqiniso kuyalonda inkosi;

isihlalo sayo sobukhosi sisekelwa ngomusa.

₂₉Udumo lwabasha lungamandla abo,

nesivunulo sabadala singubumpunga.

₃₀Imivimbo elimazayo ihlanza ububi,

nezishayo okuphakathi komuntu.

₁Inhliziyo yenkosi isesandleni sikaJehova njengemifula yamanzi;

uyayiphendulela lapho ethanda khona.

₂Zonke izindlela zomuntu zilungile emehlweni akhe,

kepha uJehova ulinganisa izinhliziyo.

₃Ukwenza ukulunga nokwahlulela

kukhethekile kuJehova kunemihlatshelo.

₄Ukuzidla kwamehlo nokuziqhenya kwenhliziyo,

isibani sababi, kuyisono.

₅Imicabango yokhutheleyo isenzuzweni,

kepha eyabo bonke abaphangisayo isekusweleni kuphela.

₆Ukuthola ingcebo ngolimi lwamanga

kuyize elizulazuliswa,

nezingibe zokufa.

₇Ukuchitha kwababi kuyabaqothula,

ngokuba benqaba ukwenza ukulunga.

₈Indlela yothweswe icala iyinsongensonge,

kepha ohlanzekileyo,

isenzo sakhe silungile.

₉Kungcono ukuhlala egumbini lophahla

kunokuhlala nowesifazane oxabanayo endlini ehlanganyelweyo.

₁₀Umphefumulo womubi ufisa okubi;

umakhelwane wakhe kafumani isisa emehlweni akhe.

₁₁Lapho isideleli sihlawuliswa,

ongenalwazi uyahlakanipha,

nalapho ohlakaniphileyo efundiswa,

uyathola ukwazi.

₁₂Olungileyo uyaqaphela indlu yomubi;

ababi bayachithelwa ebubini.

₁₃Ovala indlebe yakhe ngokukhala kompofu

naye uyakukhala angaphendulwa.

₁₄Isipho ekusithekeni siyadambisa ulaka,

nomvuzo esifubeni ukufutheka okunamandla.

₁₅Kuyintokozo kolungileyo ukwenza ukwahlulela,

kepha kwabenza ukona kuyincithakalo.

₁₆Umuntu oduka endleleni yokuhlakanipha

uyakuphumula ebandleni lezithunzi.

₁₇Othanda injabulo uyakuba mpofu,

nothanda iwayini namafutha kayikuceba.

₁₈Omubi uyihlawulo lolungileyo,

nombuluzayo usesikhundleni sabaqotho.

₁₉Kungcono ukuhlala ezweni lasehlane

kunokuhlala nowesifazane oxabanayo nothethayo.

₂₀Kukhona ingcebo enxanelekayo

namafutha endlini yohlakaniphileyo,

kepha umuntu oyisiwula uyakugwinya.

₂₁Olandela ukulunga nomusa

uyafumana ukuphila, nokulunga, nodumo.

₂₂Ohlakaniphileyo angenyukela emzini wamaqhawe,

awise phansi inqaba ayethembayo wona.

₂₃Ogcina umlomo wakhe nolimi lwakhe

ulonda umphefumulo wakhe ezinsizini.

₂₄Ozidlayo nozigabisayo,

yisideleli igama lakhe,

yena osebenza ngokuziphakamisa okukhulu.

₂₅Isifiso sevila siyalibulala,

ngokuba izandla zalo ziyenqaba ukusebenza.

₂₆Kuyafiswa nokufiswa usuku lonke,

kepha olungileyo uyaphana engancishi.

₂₇Umhlatshelo wababi uyisinengiso;

kakhulu kangakanani uma ulethwa ngomgomo omubi.

₂₈Ufakazi wamanga uyabhujiswa,

kepha umuntu ozwileyo angakhuluma njalo.

₂₉Umuntu omubi uyenza lukhuni ubuso bakhe,

kepha oqotho uyanaka indlela yakhe.

₃₀Akukho ukuhlakanipha,

akukho ukuqonda,

nesiluleko, okungamelana noJehova.

₃₁Ihhashi lilungiselwa usuku lokulwa,

kepha ukusindiswa kungokukaJehova.

₁Igama elihle likhethekile kunengcebo enkulu,

nomusa kunesiliva negolide.

₂Abacebileyo nabampofu bahlangene;

uJehova ungumenzi wabo bonke.

₃Qqondileyo uyabona ububi, acashe,

kepha abangenalwazi badlula nje, bahlupheke ngakho.

₄Umvuzo wokuthobeka kokumesaba uJehova

uyingcebo, nodumo, nokuphila.

₅Ameva nezingibe kusendleleni yabaphambeneyo,

kepha ogcina umphefumulo wakhe uyakudedela kude nakho.

₆Khulisa umntwana ngendlela eyakuba ngeyakhe;

kuyakuthi lapho esekhulile,

angasuki kuyo.

₇Isicebi sibusa phezu kwabampofu,

nobolekayo uyisigqila somtshelekileyo.

₈Ohlwanyela ububi uyakuvuna usizi,

nenduku yolaka lwakhe iyakuphela.

₉Oneso elimnene uyakubusiswa,

ngokuba uyapha ompofu okwesinkwa sakhe.

₁₀Xosha isideleli,

besekuphuma ukuxabana,

kuphele ukuphikisana nehlazo.

₁₁Othanda inhlanzeko ngenhliziyo

nonomusa emlonyeni wakhe ungumngane wenkosi.

₁₂Amehlo kaJehova anaka onokwazi,

kepha uyachitha amazwi ombuluzayo.

₁₃Ivila lithi: “Kukhona ingonyama ngaphandle;

ngiyakubulawa phandle esigcawini.”

₁₄Umlomo wowesifazane ondindayo ungumgodi ojulileyo;

othukuthelelwayo nguJehova uyakuwela kuwo.

₁₅Ubuwula buboshelwe enhliziyweni yomntwana,

kepha induku yokulaya iyabudedisela kude naye.

₁₆Ocindezela ompofu ukuba azandisele

nophayo isicebi bayakuba ngabokuswela kuphela.

₁₇Beka indlebe yakho,

uzwe amazwi ezihlakaniphi,

ubeke ukufundisa kwami enhliziyweni yakho.

₁₈Ngokuba kumnandi, uma ukugcina phakathi kwakho,

kubekwe kanyekanye ezindebeni zakho.

₁₉Ukuba ithemba lakho libe kuJehova,

ngikwazisile khona namuhla,

yebo, wena.

₂₀Angithi ngilobile kuwe nangaphambili

ngeziluleko nangokwazi,

₂₁ukuze ngikwazise ukuthembeka kwamazwi eqiniso

ukuba ubuyisele kwabakuthumileyo amazwi eqiniso, na?

₂₂Ungamphangi ompofu ngokuba empofu,

ungamchobozi oswelayo esangweni,

₂₃ngokuba uJehova uyakumela indaba yabo,

aphuce ababaphucayo umphefumulo wabo.

₂₄Ungabi ngumngane womuntu onolaka,

ungahambi nomuntu onokufutheka,

₂₅funa ufunde izindlela zakhe,

uthole ugibe lomphefumulo wakho.

₂₆Ungabi ngowabaxhawulanayo,

nowabayizibambiso zezikwenetu;

₂₇uma kungekho ongakhokha ngakho,

ubuyakususelwani umbhede wakho phansi kwakho na?

₂₈Ungasusi isikhonkwane esidala

oyihlo abasimisileyo.

₂₉Uyambona umuntu ehlakaniphile emsebenzini wakhe na?

Uyakuma phambi kwamakhosi,

akayikuma phambi kwabantukazana nje.