Bible Reading Plan – Day 141

₁Njengeqhwa ehlobo nemvula ngesikhathi sokuvuna,

kanjalo udumo alufanele isiwula.

₂Njengomzwilili ekuhambeni kwawo

nanjengenkonjane ekundizeni kwayo,

kanjalo isiqalekiso esingenasizathu asizi.

₃Isiswebhu singesehhashi,

netomu lingelembongolo,

noswazi lungolomhlane weziwula.

₄Ungasiphenduli isiwula njengobuwula baso,

funa ufane naso.

₅Phendula isiwula njengobuwula baso,

funa sibe ngohlakaniphileyo emehlweni aso.

₆Othuma izwi ngesandla sesiwula

unquma izinyawo zakhe,

uphuza ingozi.

₇Imilenze yonyonga iyalengalenga;

zinjalo izaga emilonyeni yeziwula.

₈Njengobopha itshe endwayimaneni,

unjalo onika isiwula udumo.

₉Njengeva elingena esandleni sesidakwa,

sinjalo isaga emlonyweni weziwula.

₁₀Ingqongqo yenza konke yodwa;

oqasha isiwula uqasha abadlulayo nje.

₁₁Njengenja ebuyela ebuhlanzweni bayo,

kanjalo isiwula siphinda ubuwula baso.

₁₂Uyabona umuntu ohlakaniphile emehlweni akhe na?

Kukhona ithemba ngesiwula kunaye.

₁₃Ivila lithi: “Kukhona ingonyama endleleni

nebhubesi esigcawini.”

₁₄Isicabha siphenduka ngezingibe zaso,

nevila ecansini lalo.

₁₅Ivila liyafaka isandla salo esitsheni;

kuyamkhathaza ukusibuyisela emlonyeni walo.

₁₆Ivila lihlakaniphile emehlweni alo

kunabayisikhombisa abaphendula ngokuhlakanipha.

₁₇Odlula nje ehlanganyela ukuxabana okungesikho okwakhe

unjengobamba inja ngezindlebe zayo.

₁₈Njengohlanya oluphonsa izikhuni

nemicibisholo ebulalayo,

₁₉unjalo umuntu okhohlisa umakhelwane wakhe,

ethi: “Angithi ngintelile nje na?”

₂₀Ngokuphela kwezinkuni umlilo uyacimeka,

nalapho kungekho abancethezi, kuyabodla ukuxabana.

₂₁Njengamalahle othuthwini nezinkuni emlilweni,

unjalo umuntu ophikisa ukuvusa inkani.

₂₂Amazwi omncethezi anjengesibiliboco:

ayehlela kokuphakathi komuntu.

₂₃Izindebe ezishisayo nenhliziyo embi

kunjengesitsha sebumba esinamekwe ngamanyela esiliva.

₂₄Ozondayo uyazenzisa ngezindebe zakhe,

ubekelela inkohliso enhliziyweni yakhe.

₂₅Lapho enza izwi lakhe libe mnandi, ungakholwa nguye,

ngokuba kukhona izinengiso eziyisikhombisa enhliziyweni yakhe.

₂₆Noma inzondo yakhe isibekelwa ngenzondo,

ububi bakhe buyakwambulwa ebandleni.

₂₇Omba umgodi uyakuwela kuwo,

nogingqa itshe, liyakubuyela phezu kwakhe.

₂₈Ulimi lwamanga luyazonda olubachobozileyo,

nomlomo othophayo usebenza incithakalo.

₁Ungazigabisi ngolwakusasa,

ngokuba awukwazi okungavela ngosuku.

₂Makakudumise omunye,

kungabi ngumlomo wakho,

kube ngumfokazi,

kungabi yizindebe zakho.

₃Itshe liyasinda nesihlabathi sinzima,

kepha ukukhathaza kwesiwula kuyasinda kunakho kokubili.

₄Ulaka lulunya nentukuthelo iyisikhukhula,

kepha ngubani ongema phambi komhawu na?

₅Ukusola okusobala kungcono

kunothando olufihliweyo.

₆Amanxeba othandayo athembekile,

kepha ukwanga kwesitha kuyachichima.

₇Umphefumulo osuthiyo uyanengwa yizinyosi,

kepha emphefumulweni olambileyo konke okubabayo kumnandi.

₈Njengenyoni esuka ibaleka esidlekeni sayo,

unjalo umuntu obalekele indawo yakhe.

₉Amafutha nempepho kuyathokozisa inhliziyo;

bunjalo ubumnandi bomuntu ngokululeka ngenhliziyo.

₁₀Ungashiyi umngane wakho nomngane kayihlo,

ungangeni endlini yomfowenu ngosuku lwengozi yakho;

ungcono umakhelwane oseduze kunomfowenu okude.

₁₁Ndodana yami, hlakanipha,

uthokozise inhliziyo yami

ukuba ngiphendule ongisolayo.

₁₂Oqondileyo uyabona ububi, acashe,

kepha abangenalwazi badlula nje, bahlupheke ngakho.

₁₃Thatha ingubo yoyisibambiso somfokazi,

umbambe abe yisibambiso omela abezizwe.

₁₄Obusisa umngane wakhe ngezwi elikhulu, evuka ekuseni,

kuyakubalelwa kuye ukuthi kuyisiqalekiso.

₁₅Ukuconsa okunganqamukiyo ngosuku lwemvula

nowesifazane oxabanayo kuyafana.

₁₆Omvimbela yena uvimbela umoya;

isandla sakhe sokunene sihlangana namafutha nje.

₁₇Insimbi ilola insimbi,

nomuntu ubuso bomunye.

₁₈Olonda umkhiwane uyakudla izithelo zawo,

nolinda inkosi yakhe uyakudunyiswa.

₁₉Njengasemanzini ubuso bubhekana nobuso,

injalo inhliziyo yomuntu kumuntu.

₂₀Indawo yabafileyo nokubhubha akusuthi,

namehlo omuntu awasuthi.

₂₁Ukhamba lokuncibilikisela lungolwesiliva,

nesithando ngesegolide,

nomuntu unjengodumo lwakhe.

₂₂Noma ugqula isiwula ngembokodwe

etsheni lokusila phakathi komqhazulo,

ubuwula baso abuyikusuka kuso.

₂₃Yazi nokwazi ukuma kwezimvu zakho,

ubeke inhliziyo yakho emihlambini yakho.

₂₄Ngokuba ingcebo ayiyikuhlala kuze kube phakade;

umqhele uyahlala izizukulwane ngezizukulwane na?

₂₅Lapho utshani bumuka,

nohlaza lubonakala,

nemifino yezintaba ibuthwa,

₂₆kukhona izimvu zokuba wembathe,

nezimpongo ukuba zibe yintengo yomhlaba.

₂₇Kuyakuba khona ubisi lwezimbuzi

olwanele ukudla kwakho nokudla kwendlu yakho,

nokuphila kwamantombazana akho.

₁Ababi bayabaleka, noma kungekho obaxoshayo,

kepha abalungileyo banesibindi njengengonyama.

₂Ngesiphambeko salo izwe linezikhulu eziningi,

kepha ngabantu abaqondileyo nabanokwazi liyakuma.

₃Umuntu oswelayo ocindezela abampofu

unjengemvula ekhukhulayo engashiyi ukudla.

₄Abashiya umthetho badumisa ababi,

kepha abagcina umthetho balwa nabo.

₅Abantu ababi abaqondi ukwahlulela,

kepha abafuna uJehova baqonda konke.

₆Ungcono ompofu ohamba ekupheleleni kwakhe

kunocebileyo ophambene ngezindlela zakhe.

₇Ogcina umthetho uyindodana eqondileyo,

kepha ongumngane weziminzi uhlazisa uyise.

₈Owandisa imfuyo yakhe ngenzalo nangenzuzo

uyibuthela onomusa kwabampofu.

₉Ophendula indlebe yakhe ekuzweni umthetho,

nomkhuleko wakhe uyisinengiso.

₁₀Odukisela abaqotho endleleni embi

uyakuwela emgodini wakhe,

kepha abapheleleyo bayakudla ifa lokuhle.

₁₁Isicebi sihlakaniphile emehlweni aso,

kepha ompofu oqondileyo uyakusifica.

₁₂Lapho abalungileyo bethokoza,

udumo lukhulu,

kepha ekuvukeni kwababi abantu bamelwe ukufunwa.

₁₃Ofihla iziphambeko zakhe akayikuphumelela,

kepha ozivumayo azishiye uyakuthola umusa.

₁₄Ubusisiwe umuntu owesaba njalo,

kepha oyenza lukhuni inhliziyo yakhe uyakuwela ebubini.

₁₅Njengengonyama ebhongayo nebhere* elihahayo,

unjalo umbusi omubi phezu kwabantu abampofu.

₁₆Wena sikhulu esingenakuqonda nesicindezelayo,

ozonda inzuzo engalungile uyakwandiza izinsuku zakhe.

₁₇Umuntu osindwa yigazi lomunye

uyakubalekela egodini;

makangasizwa muntu.

₁₈Ohamba ekupheleleni uyakusinda,

kepha ophambene ngezindlela zakhe uyakuwa kwenye yazo.

₁₉Olima insimu yakhe uyakusutha ngokudla,

kepha olandela amayiyane uyakusutha ngobumpofu.

₂₀Umuntu othembekileyo uyakuvama izibusiso,

kepha oshesha ukuceba akayikuyekwa.

₂₁Ukukhetha ubuso akukuhle;

ngomthamo wesinkwa umuntu angenza isiphambeko.

₂₂Umuntu oneso elibi ushesha ukuba athole imfuyo;

akazi ukuthi ukuswela kuyakumehlela.

₂₃Osola umuntu uyakuthola ngasemuva isisa

kunothopha ngolimi lwakhe.

₂₄Ophanga uyise nonina, ethi:

“Akusiso isiphambeko,”

yena ungumngane wochithayo.

₂₅Onomoya ohahayo uyavusa ukuxabana,

kepha owethemba kuJehova uyakukhuluphaliswa.

₂₆Owethemba enhliziyweni yakhe uyisiwula;

kepha ohamba ngokuhlakanipha uyakhululwa.

₂₇Opha ompofu akayikuswela,

kepha ositheza amehlo akhe uyakuba neziqalekiso eziningi.

₂₈Lapho ababi bevuka, umuntu uyacasha,

kepha ngokubhubha kwabo abalungileyo bayanda.