Bible Reading Plan – Day 136

₁Isilinganiso esikhohlisayo siyisinengiso kuJehova,

kepha isisindo esiyiso siyintokozo yakhe.

₂Lapho kufika ukuziqhenya,

kufika nehlazo;

kepha kwabathobekileyo kukhona ukuhlakanipha.

₃Ukuphelela kwabaqotho kuyabahola,

kepha ukuphambanisa kwabambuluzayo kuyabachitha.

₄Ingcebo ayisizi ngosuku lolaka,

kepha ukulunga kophula ekufeni.

₅Ukulunga kopheleleyo kuqondisa indlela yakhe,

kepha omubi uyakuwa ngobubi bakhe.

₆Ukulunga kwabaqotho kuyabophula,

kepha abambuluzayo babanjwa ezifisweni zabo.

₇Akwethembayo umuntu omubi kuyaphela ekufeni kwakhe,

nethemba lobubi liyabhubha.

₈Olungileyo uyakhululwa osizini,

kepha omubi ungena esikhundleni sakhe.

₉Ngomlomo umuntu

ongenaNkulunkulu ubulala umakhelwane wakhe,

kepha abalungileyo bayakhululwa ngokwazi.

₁₀Nxa abalungileyo behlezi kahle,

umuzi uyathokoza;

lapho bebhubha,

kukhona ukwenanela.

₁₁Ngesibusiso sabaqotho umuzi uyaphakanyiswa,

kepha ngomlomo wababi uyachithwa.

₁₂Odelela umakhelwane wakhe akanakuhlakanipha,

kepha umuntu onengqondo uyazithulela.

₁₃Ohamba encetheza uyambula izimfihlakalo,

kepha othembekile emoyeni uyayisibekela indaba.

₁₄Lapho kungekho iziluleko,

abantu bayawa,

kepha lapho kukhona abeluleki abaningi,

lapho kukhona ukuphumelela.

₁₅Uyahlupheka nokuhlupheka omela umfokazi,

kepha ozonda ukunika isibambiso ulondekile.

₁₆Owesifazane onomusa uzuza udumo,

nezidlwangudlwangu zizuza ingcebo.

₁₇Umuntu onesihawu wenzela okuhle umphefumulo wakhe,

kepha ononya uhlupha inyama yakhe.

₁₈Omubi uthola inzuzo yenkohliso,

kepha ohlwanyela ukulunga unomvuzo oqinisekileyo.

₁₉Oqinile ekulungeni uyakuphila,

kepha olandela okubi,

kuyakuba ngukufa kwakhe.

₂₀Abanhliziyo ephambeneyo

bayisinengiso kuJehova,

kepha abapheleleyo endleleni yabo bayintokozo kuye.

₂₁Impela omubi akayekwa,

kepha inzalo yabalungileyo iyakhululwa.

₂₂Njengendandatho yegolide empumulweni yengulube,

unjalo owesifazane omuhle ongenangqondo.

₂₃Isifiso sabalungileyo singokuhle kuphela;

ithemba lababi lilulaka.

₂₄Ukhona ohlakazayo;

nokho uyenezelwa kakhulu;

kepha ogodla kunokufaneleyo ubangelwa ukuswela kuphela.

₂₅Umphefumulo ophanayo uyakukhuluphaliswa;

ophuzisayo uyakuphuziswa naye.

₂₆Ogodla amabele,

abantu bayamqalekisa,

kepha isibusiso siyakuba sekhanda lothengisa ngawo.

₂₇Ofuna okuhle ufuna okwamukelekayo,

kepha ofuna okubi, kuyakumehlela.

₂₈Owethemba ingcebo yakhe uyakuwa,

kepha abalungileyo bayakuhluma njengamaqabunga aluhlaza.

₂₉Okhathaza indlu yakhe uyakudla ifa lomoya,

nesiwula siyakuba yinceku yonenhliziyo ehlakaniphileyo.

₃₀Isithelo solungileyo singumuthi wokuphila,

nohlakaniphileyo uyazuza imiphefumulo.

₃₁Bheka, olungileyo uyavuzwa emhlabeni;

kakhulu kangakanani omubi nesoni.

₁Othanda ukulaywa uthanda ukwazi;

ozonda ukusolwa uyisiwula.

₂Omuhle uthola umusa kuJehova,

kepha umuntu wamacebo uyamlahla.

₃Umuntu akanakuma ngobubi,

kepha impande yabalungileyo ayiyikunyakaziswa.

₄Owesifazane okhutheleyo ungumqhele kuyo indoda yakhe,

kepha ohlazisayo unjengokubola kwamathambo ayo.

₅Imicabango yabalungileyo ingeyokwahlulela,

kepha iziluleko zababi ziyinkohliso.

₆Amazwi ababi aqamekela igazi,

kepha umlomo wabaqotho uyabophula.

₇Ababi bayachithwa, bangabikho,

kepha indlu yabalungileyo iyakuma.

₈Umuntu uyadunyiswa ngokokuhlakanipha kwakhe,

kepha ophambene ngenhliziyo uyadelelwa.

₉Odelelwayo eyinceku udlula ozidumisayo eswele ukudla.

₁₀Olungileyo uyakunaka ukuphila kwesilwane sakhe,

kepha isihhe sababi silunya.

₁₁Olima insimu yakhe uyakusutha ngokudla,

kepha olandela amayiyane akanangqondo.

₁₂Ishinga lifisa impango yababi,

kepha impande yabalungileyo iyathela.

₁₃Ngokuphambeka kwezindebe kukhona ugibe lomubi,

kepha olungileyo uyaphuma ekuhluphekeni.

₁₄Umuntu uyasutha ngokuhle ngesithelo somlomo wakhe,

nemisebenzi yezandla zomuntu iyabuyela kuye.

₁₅Indlela yesiwula ilungile emehlweni aso,

kepha ohlakaniphileyo ulalela iziluleko.

₁₆Ukukhathazeka kwesiwula kuyaziwa ngosuku,

kepha oqondileyo uyasibekela ihlazo.

₁₇Ophefumula iqiniso ulanda ngokulunga,

kepha ufakazi wamanga ngenkohliso.

₁₈Bakhona abaphahluka njengokuhlaba kwenkemba,

kepha izilimi zabahlakaniphileyo ziyimpiliso.

₁₉Indebe yeqiniso iyakuma kuze kube phakade,

kepha ulimi lwamanga lungolomzuzwana nje.

₂₀Inkohliso isezinhliziyweni zabaceba okubi,

kepha abaluleka ukuthula,

kubona kukhona intokozo.

₂₁Olungileyo akayikwehlelwa nangokukodwa okubi,

kepha ababi bayakugcwala ububi.

₂₂Izindebe zamanga ziyisinengiso kuJehova,

kepha abenza iqiniso bayintokozo yakhe.

₂₃Umuntu oqondileyo uyafihla ukwazi,

kepha izinhliziyo zeziwula zimemeza ubuwula.

₂₄Isandla sabakhutheleyo siyakubusa,

kepha izidenge ziyakuphoqelwa umsebenzi.

₂₅Ukukhathazeka enhliziyweni yomuntu kuyayithobisa,

kepha izwi elihle liyayithokozisa.

₂₆Olungileyo ungumholi womakhelwane wakhe,

kepha indlela yababi iyabadukisa.

₂₇Isidenge asiyosi inyamazane yaso,

kepha imfuyo enqabileyo ingeyokhutheleyo.

₂₈Endleleni yokulunga kukhona ukuphila,

nalapho umkhondo wakho udlula khona, akukho ukufa.

₁Indodana ehlakaniphileyo iyalaywa nguyise,

kepha isideleli asilaleli ukukhuzwa.

₂Umuntu uyadla okuhle ngesithelo somlomo wakhe,

kepha umphefumulo wabambuluzayo uyadla ubudlwangudlwangu.

₃Olinda umlomo wakhe ugcina ukuphila kwakhe;

okhamisa izindebe zakhe uyakuba nencithakalo.

₄Umphefumulo wevila uyafisa,

ungatholi lutho,

kepha imiphefumulo yabakhutheleyo iyakhuluphaliswa.

₅Olungileyo uyazonda amazwi amanga,

kepha omubi ubanga amahloni,

ahlazise.

₆Ukulunga kuyamlondoloza ondlela yakhe iphelele,

kepha ububi buyachitha isoni.

₇Kukhona ozishaya ocebileyo,

engenalutho kodwa;

kukhona ozishaya ompofu,

enemfuyo enkulu.

₈Ihlawulo lokuphila komuntu liyingcebo yakhe,

kepha ompofu akezwa ukukhuzwa.

₉Ukukhanya kwabalungileyo kuyathokoza,

kepha izibani zababi ziyacimeka.

₁₀Ngokuziqhenya kuvela ukuxabana kuphela,

kepha kwabalulekwayo kukhona ukuhlakanipha.

₁₁Imfuyo etholakala kalula iyancipha,

kepha obutha kancane kancane uyandiselwa.

₁₂Ithemba elilitshazisiweyo ligulisa inhliziyo;

isifiso esigcwalisiweyo singumuthi wokuphila.

₁₃Odelela izwi uzehlisela ukubhujiswa,

kepha owesaba imiyalo uyakuvuzwa.

₁₄Ukufundisa kohlakaniphileyo kungumthombo wokuphila,

ukuze kudedwe ezihibeni zokufa.

₁₅Ukuqonda kahle kuveza umusa,

kepha indlela yabambuluzayo ilukhuni.

₁₆Bonke abaqondileyo basebenza ngokwazi,

kepha isiwula sihlakaza ubuwula.

₁₇Isithunywa esibi siwela ebubini,

kepha isigijimi esithembekileyo siyimpiliso.

₁₈Ubumpofu nehlazo kukuye onqaba ukulaywa,

kepha onaka ukusolwa uyadunyiswa.

₁₉Isifiso esigcwalisiweyo simnandi emphefumulweni,

kepha ukudeda ebubini kuyisinengiso kuzo iziwula.

₂₀Ohamba nabahlakaniphileyo uyakuhlakanipha,

kepha umngane weziwula uyakushoshozelwa yizo.

₂₁Ububi bulandela izoni,

kepha abalungileyo bavuzwa ngokuhle.

₂₂Olungileyo ushiyela abantwana babantwana bakhe ifa,

kepha ingcebo yesoni ibekelelwa olungileyo.

₂₃Emqathweni wabampofu kukhona ukudla okuningi,

kepha kukhona okuchithwa ngenxa yokungalungi.

₂₄Oyeka uswazi uyazonda indodana yakhe,

kepha oyithandayo uyayilaya ngesineke.

₂₅Olungileyo uyadla uze usuthe umphefumulo wakhe,

kepha isisu sababi siyaswela.