Bible Reading Plan – Day 135

₁Ukuhlakanipha akumemezi yini,

nokuqonda akukhiphi izwi lakho na?

₂Kumi esiqongweni sezindawo eziphakemeyo,

ngasendleleni phakathi kwemikhondo.

₃Ngaseceleni kwamasango,

ngasekungeneni komuzi,

lapho kungenwa ngeminyango,

kuyamemeza ngokuthi:

₄“Ngiyanibiza nina madoda;

izwi lami likumadodana abantu.

₅Qondani ukuhlakanipha nina eningenalwazi;

nani ziwula,

manibe nenhliziyo eqondileyo.

₆Zwanini,

ngokuba ngiyakulanda okukhulu;

ukukhamisa kwezindebe zami kuyakuba ngokulungileyo.

₇Ngokuba umlomo wami uyakukhuluma iqiniso;

ububi buyisinengiso ezindebeni zami.

₈Onke amazwi omlomo wami asekulungeni;

akukho okuyisigwegwe nokuphambeneyo kuwo.

₉Aqondile onke koqondayo;

alungile kothola ukwazi.

₁₀Yamukelani ukufundisa kwami kunesiliva,

nokwazi kunegolide elikhethekileyo.

₁₁Ngokuba ukuhlakanipha kuhle kunamarubi,*

nakho konke okungafiswa akunakulinganiswa nakho.

₁₂Mina kuhlakanipha ngakhile ekuqondeni,

ngithola ukwazi namasu.

₁₃Ukumesaba uJehova kungukuzonda okubi;

ukuzidla, nokuzikhukhumeza,

nendlela embi,

nomlomo wobuphoxo, ngiyakuzonda.

₁₄Kimina kukhona ukululeka nempumelelo;

ngingukuqonda, nginamandla.

₁₅Amakhosi abusa ngami,

nababusi bamisa ukulunga.

₁₆Izikhulu zibusa ngami,

namakhosana, bonke abahluleli bomhlaba.

₁₇Ngiyathanda abangithandayo;

abangifunayo bayakungifumana.

₁₈Ingcebo nodumo kukimi,

ukunotha okumiyo nokulunga.

₁₉Isithelo sami sihle kunegolide,

kunegolide elicwengekileyo,

nenzuzo yami kunesiliva elikhethekileyo.

₂₀Ngiyahamba endleleni yokulunga,

phakathi kwemikhondo yokwahlulela,

₂₁ukuze ngenze abangithandayo badle ifa lemfuyo,

ngigcwalise izindlu zabo zengcebo.

₂₂“UJehova wangidala ngingukuqala kwendlela yakhe

ngaphambi kwemisebenzi yamandulo.

₂₃Ngamiswa kwaphakade kwasekuqaleni,

umhlaba ungakabikho.

₂₄Lungakabikho utwa ngazalwa,

ingakabikho imithombo egcwele amanzi.

₂₅Zingakasekelwa izintaba,

namagquma engakabikho, ngazalwa,

₂₆engakawenzi umhlaba namasimu,

nokuqala kothuli lwezwe.

₂₇Ekulungiseni kwakhe izulu ngangikhona,

nasekudwebeni kwakhe umkhathi ebusweni botwa.

₂₈Lapho enza ukuba isibhakabhaka phezulu siqine,

nemithombo yotwa iphuphume ngamandla,

₂₉lapho emisela ulwandle umncele,

ukuze amanzi angeqi izwi lakhe,

nalapho emisa izisekelo zomhlaba,

₃₀khona nganginaye ngiyingcweti yomsebenzi,

ngiyintokozo yakhe imihla ngemihla,

ngijabula phambi kwakhe isikhathi sonke,

₃₁ngijabula ezweni lomhlaba wakhe,

intokozo yami ikanye namadodana abantu.

₃₂“Ngalokho, bantwana, ngizweni,

ngokuba babusisiwe abagcina izindlela zami.

₃₃Yizwani ukulaya, nihlakaniphe,

ningakwenqabi.

₃₄Ubusisiwe umuntu ongizwayo,

elinda imihla ngemihla ngasemasangweni ami,

ehlala ngasezinsikeni zeminyango yami.

₃₅Ngokuba ongifumanayo,

ufumana ukuphila,

azuze umusa kuJehova.

₃₆Ongangifumani uyona umphefumulo wakhe;

bonke abangizondayo bathanda ukufa.”

₁Ukuhlakanipha kwakhile indlu yakho;

kuzibazile izinsika zakho eziyisikhombisa.

₂Kuhlabile umhlatshelo,

kuvubele iwayini lakho;

futhi kulungisile itafula lakho.

₃Kuthumile izintombi zakho, kuyamema

emagqumeni aphakemeyo omuzi, kuthi:

₄“Ongenalwazi makaphambukele lapha,”

kongenangqondo kuthi:

₅“Wozani nidle isinkwa sami,

niliphuze iwayini engilivubeleyo.

₆Yekani ubuwula, niphile,

nihambe ngendlela yokuqonda.

₇“Osola isideleli uzithathela inhlamba;

othethisa omubi uzitholela isisihla.

₈Ungathethisi isideleli, funa sikuzonde;

thethisa isihlakaniphi,

siyakukuthanda.

₉Siphe isihlakaniphi,

siyakwanda ngokuhlakanipha;

fundisa olungileyo,

uyakwenezela emfundweni.

₁₀“Ukuqala kokuhlakanipha kungukumesaba uJehova,

nokumazi oNgcwele kungukuqonda.

₁₁Ngokuba ngami izinsuku zakho ziyakuba ziningi,

neminyaka yokuphila kwakho iyakwenezelwa kuwe.

₁₂Uma uhlakaniphile, uzihlakaniphele;

uma udelela,

uyakukuthwala wena wedwa.”

₁₃Ubuwula bungowesifazane oyisithutha onomsindo,

ongazi lutho.

₁₄Uhlezi ngasemnyango wendlu yakhe

esihlalweni ezindaweni eziphakemeyo zomuzi

₁₅ukuba ameme abadlula endleleni,

abaqonda emikhondweni yabo,

ngokuthi:

₁₆“Ongenalwazi makaphambukele lapha,”

kongenangqondo uthi:

₁₇“Amanzi ebiweyo amnandi,

nesinkwa sentukuso singesenamisayo.”

₁₈Kepha akazi ukuthi kuyizithunzi ezilapho

nokuthi izimenywa zakhe zisezigodini zendawo yabafileyo.

Indodana ehlakaniphileyo ithokozisa uyise,

kepha indodana eyisiwula ilusizi kunina.

₂Ingcebo yobubi ayisizi lutho,

kepha ukulunga kophula ekufeni.

₃UJehova akavumi ukuba olungileyo alambe,

kepha isifiso somubi uyasihlohloloza.

₄Isandla esinobudenge siveza ubumpofu,

kepha isandla sokukhuthala siyacebisa.

₅Obutha ehlobo uyindodana ehlakaniphileyo;

olele ubuthongo ngesikhathi sokuvuna uyindodana ehlazisayo.

₆Izibusiso zisekhanda lolungileyo,

kepha umlomo wababi uyafihla ubudlwangudlwangu.

₇Ukukhunjulwa kolungileyo kubusisekile,

kepha igama lababi liyabola.

₈Ohlakaniphile ngenhliziyo uyakwamukela imiyalo,

kepha isiwula esiphoshozayo siyakuwiswa.

₉Ohamba ngobuqotho uhamba ngokulondeka,

kepha ohlanekezela izindlela zakhe uyakwaziwa.

₁₀Oqwayiza iso ubanga usizi,

kepha osola ubuso nobuso uveza ukuthula.

₁₁Umlomo wolungileyo ungumthombo wokuphila,

kepha umlomo wababi ufihla ubudlwangudlwangu.

₁₂Inzondo iyabanga ukuxabana,

kepha uthando luyasibekela iziphambeko zonke.

₁₃Ezindebeni zoqondileyo kufunyanwa ukuhlakanipha,

kepha uswazi lungolomhlane wongenangqondo.

₁₄Abahlakaniphileyo bayabekelela ukwazi,

kepha umlomo wesiwula uyincithakalo eseduze.

₁₅Imfuyo yesicebi ingumuzi waso onamandla;

incithakalo yabampofu ingubumpofu babo.

₁₆Umsebenzi wolungileyo ungowokuphila;

inzuzo yababi ingeyokona.

₁₇Onaka ukulaywa usendleleni yokuphila,

kepha owenqaba ukusolwa uyaduka.

₁₈Ofihla inzondo unezindebe zamanga;

ophumisa inhlebo uyisiwula.

₁₉Lapho amazwi emaningi khona,

akuphuthi ukuphambeka;

obamba umlomo wakhe uhlakaniphile.

₂₀Ulimi lolungileyo luyisiliva elikhethekileyo;

ingqondo yababi iyinto encane.

₂₁Izindebe zolungileyo ziyondla abaningi,

kepha iziwula ziyafa ngokuswela ingqondo.

₂₂Isibusiso sikaJehova siyacebisa;

akenezeli usizi kuso.

₂₃Ukwenza okubi kunjengokudlala kuso isiwula;

kunjalo ukuhlakanipha kumuntu onengqondo.

₂₄Akwesabayo omubi kuyamehlela,

nabakufisayo abalungileyo bayakuphiwa.

₂₅Lapho sidlula isivunguvungu,

akasekho omubi,

kepha olungileyo uyisisekelo esingunaphakade.

₂₆Njengoviniga emazinyweni nomusi emehlweni,

linjalo ivila kwabalithumileyo.

₂₇Ukumesaba uJehova kuyandisa izinsuku,

kepha iminyaka yababi iyancishiswa.

₂₈Ithemba labalungileyo liyakuba yintokozo,

kepha abakwethembayo ababi kuyakubhubha.

₂₉Indlela kaJehova iyinqaba kopheleleyo,

kepha incithakalo ikubenzi bokona.

₃₀Olungileyo akayikunyakaziswa kuze kube phakade,

kepha ababi abayikuhlala ezweni.

₃₁Umlomo wolungileyo uyathela ukuhlakanipha,

kepha ulimi oluphambeneyo luyakunqunywa.

₃₂Izindebe zolungileyo ziyakwazi okuhle,

kepha umlomo wababi okuphambeneyo.