Bible Reading Plan – Day 117

₁UJehova uyinkosi;

umhlaba mawethabe,

zijabule iziqhingi eziningi.

₂Amafu nobumnyama kuyamphahla;

ukulunga nokwahlulela kuyisisekelo sesihlalo sakhe sobukhosi.

₃Umlilo uyahamba phambi kwakhe,

udla izitha zakhe nxazonke.

₄Imibani yakhe ikhanyisa izwe;

umhlaba uyakubona, uthuthumele.

₅Izintaba zincibilika njengengcina phambi kukaJehova,

phambi kweNkosi yomhlaba wonke.

₆Amazulu ashumayela ukulunga kwakhe;

izizwe zonke zibona inkazimulo yakhe.

₇Mabajabhe bonke abakhonza izithombe ezibaziweyo,

abazigabisa ngezithombe.

Mkhonzeni nina nonke bonkulunkulu.

₈ISiyoni liyezwa, liyajabula;

amadodakazi akwaJuda ayethaba

ngenxa yezahlulelo zakho, Jehova.

₉Ngokuba wena Jehova uphezu komhlaba wonke,

uphakeme kakhulu phezu kwawonkulunkulu bonke.

₁₀Nina enithanda uJehova zondani okubi;

uyagcina imiphefumulo yabamkhonzayo;

uyabasindisa ezandleni zababi.

₁₁Ukukhanya kuhlwanyelelwe olungileyo,

ukujabula kuhlwanyelelwe abanhliziyo ziqotho.

₁₂Jabulani kuJehova nina balungileyo,

nibonge igama lakhe elingcwele.

₁Mhubeleni uJehova igama elisha,

ngokuba wenze izimangaliso;

esokunene sakhe nengalo yakhe engcwele kumtholele ukunqoba.

₂UJehova wazisile insindiso yakhe;

ukulunga kwakhe ukwambulile emehlweni abezizwe.

₃Ukhumbulile umusa wakhe nokuthembeka kwakhe kuyo indlu ka-Israyeli;

imikhawulo yonke yomhlaba ibonile insindiso kaNkulunkulu wethu.

₄Hlokomani kuJehova ngezwi lokuhalalisa,

nihlabelele ngenjabulo, nihube.

₅Mhubeleni uJehova ngehabhu,*

ngehabhu nangezwi lehubo.

₆Ngamacilongo nangokukhala komtshingo

hlokomani ngezwi lokuhalalisa phambi kweNkosi uJehova.

₇Maludume ulwandle nokugcwala kwalo,

izwe nabakhileyo kulo.

₈Imifula mayishaye ihlombe,

izintaba zihalalise kanyekanye

₉ebusweni bukaJehova,

ngokuba uyeza ukwahlulela umhlaba.

Uyakwahlulela izwe ngokulunga nezizwe ngobuqotho.

₁UJehova uyinkosi; mabathuthumele abantu;

uhlezi phezu kwamakherubi;* mawuzamazame umhlaba.

₂UJehova mkhulu eSiyoni,

uphakeme phezu kwezizwe zonke.

₃Mababonge igama lakho elikhulu nelesabekayo;

ungcwele yena.

₄Amandla eNkosi athanda okulungileyo,

umisile ubuqotho;

ukwahlulela nokulunga ukwenzile kwaJakobe.

₅Mphakamiseni uJehova uNkulunkulu wethu,

nikhuleke ngasesanabelweni sezinyawo zakhe;

ungcwele yena.

₆OMose no-Aroni babe phakathi kwabapristi bakhe;

uSamuweli wayephakathi kwabakhulekayo egameni lakhe.

Bakhuleka kuJehova,

yena waphendula.

₇Wakhuluma kubo esensikeni yefu;

bagcina ubufakazi bakhe nezimiso abanika zona.

₈Jehova Nkulunkulu wethu,

wena ubaphendulile,

waba kubo uNkulunkulu othethelelayo

nophindiselayo ngezenzo zabo.

₉Mphakamiseni uJehova uNkulunkulu wethu,

nikhuleke ngasentabeni yakhe engcwele,

ngokuba ungcwele uJehova uNkulunkulu wethu.

₁Hlokoma kuJehova ngezwi lokuhalalisa,

mhlaba wonke.

₂Mkhonzeni uJehova ngokujabula,

nisondele ebusweni bakhe ngokuhuba kwentokozo.

₃Yazini ukuthi uJehova unguNkulunkulu;

nguye osenzileyo, akuthina,

sibe ngabantu bakhe nezimvu zedlelo lakhe.

₄Ngenani emasangweni akhe ngokubonga,

nasemagcekeni akhe ngokudumisa;

mbongeni, nibusise igama lakhe.

₅Ngokuba muhle uJehova;

umusa wakhe umi phakade,

nokuthembeka kwakhe ezizukulwaneni ngezizukulwane.

₁Ngizakuhlabelela ngomusa nokwahlulela,

ngikudumise wena Jehova.

₂Ngizakuqaphelisisa indlela engenacala.

Uyakuza nini kimi na?

Ngizakuhamba endlini yami ngenhliziyo engenacala.

₃Angizukubeka phambi kwamehlo ami into embi;

ukwenza kwabahlubukayo ngiyakuzonda;

akuyikunamathela kimi.

₄Inhliziyo ephambeneyo iyakusuka kimi;

omubi angiyikumazi.

₅Omhlebayo umakhelwane wakhe ngasese ngizakumqeda;

onamehlo aqhoshayo nenhliziyo ezidlayo angiyikumvumela.

₆Amehlo ami akwabathembekileyo bomhlaba

ukuba bahlale nami;

ohamba endleleni engenacala uyakungikhonza.

₇Osebenza ukukhohlisa akayikuhlala endlini yami;

okhuluma amanga akayikuma phambi kwamehlo ami.

₈Ekuseni imihla ngemihla ngiyakubaqeda bonke ababi bomhlaba,

ukuze nginqume emzini kaJehova bonke abenzi bokubi.

₁Jehova, yizwa umkhuleko wami;

ukukhala kwami makufinyelele kuwe.

₂Ungafihli ubuso bakho kimi ngosuku losizi lwami;

beka indlebe yakho kimi,

ngosuku engimemeza ngalo usheshe ungiphendule.

₃Ngokuba izinsuku zami ziphelile njengomusi;

amathambo ashile njengezinkuni.

₄Inhliziyo yami ishayiwe,

ibunile njengotshani,

ngokuba ngiyakhohlwa ukudla isinkwa sami.

₅Ngenxa yezwi lokububula kwami

amathambo ami anamathele enyameni yami.

₆Ngiyafana nevuba ehlane,

nginjengesikhova kwahlongasibi.

₇Ngiyaqwasha,

nginjengenyoni eyodwa ophahleni lwendlu.

₈Izitha zami ziyangithuka usuku lonke;

abahlanya ngami bayangiqalekisa.

₉Ngokuba ngidlile umlotha njengesinkwa,

nophuzo lwami ngiluxubanisile nezinyembezi.

₁₀Ngenxa yentukuthelo nolaka lwakho ungifukulile, wangilahla.

₁₁Izinsuku zami zinjengethunzi elandayo;

mina uqobo ngiyabuna njengotshani.

₁₂Kepha wena Jehova uyakuhlala kuze kube phakade,

nesikhumbuzo sakho ezizukulwaneni ngezizukulwane.

₁₃Uyakuvuka, uhawukele iSiyoni;

sekuyisikhathi sokuliphatha ngomusa,

yebo, isikhathi esimisiweyo sesifikile.

₁₄Ngokuba izinceku zalo ziyathokoza ngamatshe alo,

zihawukele uthuli lwalo.

₁₅Khona abezizwe bayakulesaba igama likaJehova,

amakhosi onke omhlaba inkazimulo yakho.

₁₆Ngokuba uJehova ulakhile iSiyoni,

ubonakele enkazimulweni yakhe;

₁₇wanaka umkhuleko wabangenalutho,

engawudeleli umthandazo wabo.

₁₈Lokhu kuyakulotshelwa isizukulwane esizayo;

abantu abayakudalwa bayakudumisa uJehova.

₁₉Ngokuba ubheke phansi esekuphakameni kwakhe okungcwele,

wabuka umhlaba esezulwini

₂₀ukuba ezwe ukububula kwesiboshwa,

akhulule abantwana bokufa,

₂₁ukuze kumenyezelwe eSiyoni igama likaJehova

nodumo lwakhe eJerusalema,

₂₂nxa izizwe zibuthana ndawonye

kanye nemibuso ukumkhonza uJehova.

₂₃Wanciphisa amandla ami endleleni,

wafinyeza izinsuku zami.

₂₄Ngithi: “Nkulunkulu wami,

ungangisusi enxenyeni yezinsuku zami;

iminyaka yakho isezizukulwaneni ngezizukulwane.

₂₅Endulo wawusekela umhlaba,

izulu lingumsebenzi wezandla zakho.

₂₆Kuyakubhubha lokhu,

kepha uyakuma;

yebo, kuyakuguga konke njengengubo;

njengesambatho uyakukuguqula, kuguqulwe.

₂₇Kepha unguwe njalo,

iminyaka yakho ayiyikuphela.

₂₈Abantwana bezinceku zakho bayakuhlala;

inzalo yabo iyakuma phambi kwakho.”

₁Mbonge uJehova, mphefumulo wami;

konke okuphakathi kwami makubonge igama lakhe elingcwele.

₂Mbonge uJehova, mphefumulo wami,

ungakhohlwa imisebenzi yonke yakhe yomusa,

₃yena othethelela zonke izono zakho,

owelapha zonke izifo zakho;

₄okhulula ukuphila kwakho ekubhujisweni,

okuqhelisa ngomusa nangobubele;

₅osuthisa ukulangazela kwakho ngokuhle,

ubusha bakho bubuyiswe njengokhozi.

₆UJehova ubenzela bonke abacindezelwayo

ukulunga nokwahlulela.

₇Wamazisa uMose izindlela zakhe,

nabantwana bakwa-Israyeli izenzo zakhe.

₈UJehova unobubele nesihawu;

wephuza ukuthukuthela, kuvama umusa.

₉Akathethi njalonjalo;

akagcini intukuthelo yakhe kuze kube phakade.

₁₀Akasiphathi njengokufanele izono zethu,

akasivuzi njengokwamacala ethu.

₁₁Ngokuba njengokuphakama kwezulu phezu komhlaba

unjalo umusa wakhe phezu kwabamesabayo.

₁₂Njengokuba impumalanga yahlukene nentshonalanga,

udedisile kangaka kithi iziphambeko zethu.

₁₃Njengoyise ehawukela abantwana bakhe,

kanjalo uJehova uyabahawukela abamesabayo.

₁₄Ngokuba uyakwazi ukubunjwa kwethu;

uyakhumbula ukuthi siluthuli.

₁₅Izinsuku zomuntu zinjengotshani;

uyakhahlela njengembali yasendle.

₁₆Ngokuba umoya uyadlula phezu kwayo, bese yinyamalala,

nendawo yayo ingabe isayazi.

₁₇Kepha umusa kaJehova uphezu kwabamesabayo kwaphakade kuze kube phakade,

nokulunga kwakhe kubantwana babantwana,

₁₈kubo abagcina isivumelwano sakhe

bekhumbula iziyalezo zakhe ukuba bazenze.

₁₉UJehova umisile isihlalo sakhe sobukhosi ezulwini;

nombuso wakhe ubusa phezu kwakho konke.

₂₀Bongani uJehova nina zingelosi zakhe,

nina maqhawe anamandla enenza okwezwi lakhe

nilalela ukukhuluma kwezwi lakhe.

₂₁Bongani uJehova nina mabandla onke akhe,

nina zinceku zakhe enenza intando yakhe.

₂₂Bongani uJehova nina misebenzi yakhe yonke

ezindaweni zonke zombuso wakhe.

Mbonge uJehova, mphefumulo wami.

₁Mbonge uJehova, mphefumulo wami;

Jehova Nkulunkulu wami, umkhulu,

wembethe udumo nobukhosi;

₂ogqoka ukukhanya njengengubo,

oweneka izulu njengendwangu;

₃obeka imishayo yezindlu zakhe emanzini,

owenza amafu abe yinqola yakhe,

ohamba ngamaphiko omoya;

₄owenza izingelosi zibe yimimoya,

izikhonzi zakhe zibe yilangabi lomlilo.

₅Umisile umhlaba phezu kwezisekelo zawo,

ukuze ungazanyazanyiswa kuze kube phakade naphakade.

₆Wawumboza ngolwandle njengengubo;

amanzi ema phezu kwezintaba.

₇Ngokukhuza kwakho abaleka,

ngezwi lokuduma kwakho ashesha asuka.

₈Enyuka izintaba, ehla izigodi,

aze afika endaweni owawuyimisele wona.

₉Umisile umncele ukuba angaweqi,

angabuyi ukusibekela umhlaba.

₁₀Uthumela imithombo ezigodini;

yona igijima phakathi kwezintaba.

₁₁Iyaphuzisa izilwane zonke zasendle,

izimbongolo zasendle zicime ukoma kwazo.

₁₂Izinyoni zezulu zakhile ngakuyo,

zizwakalisa izwi lazo phakathi kwamagatsha.

₁₃Uphuzisa izintaba okuvela emakamelweni akhe;

umhlaba uyaneliswa yisithelo semisebenzi yakho.

₁₄Uhlumisela izinkomo utshani

nemifino yokusiza umuntu,

ukuze aveze ukudla emhlabeni,

₁₅newayini elijabulisa inhliziyo yomuntu,

namafutha okukhazimulisa ubuso,

nesinkwa esiqinisa inhliziyo yomuntu.

₁₆Iyasutha imithi kaJehova,

imisedari* yaseLebanoni ayitshalileyo,

₁₇okwakhele kuyo izinyoni;

ugolantethe unendlu yakhe kuyo imisayipuresi.*

₁₈Izintaba eziphakemeyo ngezezimbuzi zasendle;

amawa ayisiphephelo sezimbila.

₁₉Wenza inyanga ibe ngeyokwahlukanisa izikhathi;

ilanga liyazi ukushona kwalo.

₂₀Wenza ubumnyama kube ngubusuku;

phakathi kwabo kuphuma izilo zonke zasehlathini.

₂₁Izingonyama ezintsha zibhongela impango,

zifuna ukudla kwazo kuNkulunkulu.

₂₂Liphuma ilanga,

bese zibuyela phansi zilale emihumeni yazo.

₂₃Bese kuphuma umuntu,

aye emsebenzini wakhe

nasekukhandlekeni kwakhe kuze kuhlwe.

₂₄Jehova, yeka ubuningi bemisebenzi yakho;

yonke uyenzile ngokuhlakanipha;

umhlaba ugcwele izidalwa zakho.

₂₅Nantu ulwandle, lukhulu, lubanzi;

lapho kukhona izilwanyana ezinwabuzelayo ezingenakubalwa,

izilwane ezincane nezinkulu.

₂₆Kuhamba khona imikhumbi,

uLeviyathani* lowo omenzile ukuba adlale kulo.

₂₇Zonke lezi zidalwa zibheka wena,

ukuze uzinike ukudla kwazo ngesikhathi esiyiso.

₂₈Uyazinika ukudla, zibuthe;

uvula isandla sakho, zisuthe ngokuhle.

₂₉Uyasitheza ubuso bakho, zethuke;

uyasusa umphefumulo wazo, zife,

zibuyele othulini lwazo.

₃₀Uyathumela umoya wakho, zidalwe;

wenza bube busha ubuso bomhlaba.

₃₁Inkazimulo kaJehova mayime kuze kube phakade;

uJehova kathokoze ngemisebenzi yakhe,

₃₂yena obheka umhlaba, besewuthuthumela,

othinta izintaba, zithunqe.

₃₃Ngiyakumhubela uJehova kukho konke ukuphila kwami;

ngiyakuhlabelela kuNkulunkulu wami ngisekhona.

₃₄Ukuzindla kwami makube mnandi kuye;

mina mangithokoze kuJehova.

₃₅Izoni maziphele emhlabeni,

kungabe kusaba khona ababi.

Mbonge uJehova, mphefumulo wami.

Haleluya!