Bible Reading Plan – Day 116

₁Nkosi, wena uyisiphephelo sethu ezizukulwaneni ngezizukulwane.

₂Kungakaveli izintaba,

ungakawenzi umhlaba nezwe,

kuthi kusukela phakade kuze kube phakade

wena Nkulunkulu ukhona.

₃Uyambuyisela umuntu othulini, uthi:

“Buyani, bantwana babantu.”

₄Ngokuba iminyaka eyinkulungwane emehlweni akho injengezolo selidlulile,

nanjengomlindo ebusuku.

₅Uyabamukisa njengesikhukhula, banjengobuthongo;

ekuseni banjengotshani obuhlumayo;

₆ekuseni buyakhahlela, buhlume;

kusihlwa bunqunywe, bubune.

₇Ngokuba siyaqedwa yintukuthelo yakho,

nangolaka lwakho siyabhubha.

₈Ubekile amacala ethu phambi kwakho,

izono zethu ezifihliweyo ekukhanyeni kobuso bakho.

₉Ngokuba izinsuku zethu ziyadlula ngentukuthelo yakho;

siyafeza iminyaka yethu njengephefu.

₁₀Izinsuku zeminyaka yethu zineminyaka engamashumi ayisikhombisa;

kuthi uma ziziningi, zineminyaka engamashumi ayisishiyagalombili;

nokho ukuvama kwazo kungukuhlupheka nelize,

ngokuba zidlula masinyane,

thina siyandiza, simuke.

₁₁Ngubani owaziyo amandla entukuthelo yakho

nolaka lwakho olunjengakho ukwesabeka kwakho na?

₁₂Sifundise, Nkosi, ukubala izinsuku zethu,

sizuze inhliziyo enokuhlakanipha.

₁₃Buya, Jehova! Koze kube nini na?

Hawukela izinceku zakho.

₁₄Sisuthise ngomusa wakho,

kuse sekuseni,

ukuze sithokoze, sijabule izinsuku zethu zonke.

₁₅Sithokozise ngangezinsuku owasihlupha ngazo,

nangangeminyaka esabona okubi ngayo.

₁₆Izenzo zakho mazibonakale kuzo izinceku zakho,

nenkazimulo yakho kubantwana bazo.

₁₇Yebo, ubuhle beNkosi uNkulunkulu wethu abube phezu kwethu,

umise umsebenzi wezandla zethu phezu kwethu;

yebo, umsebenzi wezandla zethu uwumise.

₁Yena owakhile ekusithekeni koPhezukonke

nohlezi emthunzini kaSomandla

₂uthi kuJehova: “Uyisiphephelo sami nenqaba yami

noNkulunkulu wami engimethembayo.”

₃Ngokuba yena uyakukhipha ogibeni lomcuphi

nasobhadaneni olubhubhisayo.

₄Ngezimpaphe zakhe uyakukusibekela,

uphephele phansi kwamaphiko akhe;

ukuthembeka kwakhe kuyisihlangu nehawu.

₅Awuyikwesaba ivuso lasebusuku,

nomcibisholo ondizayo emini,

₆nobhadane oluhamba ebumnyameni,

nesifo esibhubhisayo emini enkulu.

₇Bayakuwa abayizinkulungwane ngaseceleni kwakho,

nabayizinkulungwane eziyishumi ngakwesokunene sakho,

kepha akuyikufinyelela kuwe.

₈Uyakubuka nje ngamehlo akho,

ubone ukuphindiselwa kwababi,

₉ngokuba uthi:

Jehova, uyisiphephelo sami;

oPhezukonke umenzile abe yinqaba yakho.

₁₀Awuyikwehlelwa ngokubi,

nesifo asiyikusondela etendeni lakho.

₁₁Ngokuba uyakuyaleza izingelosi zakhe ngawe,

zikulondoloze ezindleleni zakho zonke.

₁₂Ziyakukuthwala ngezandla,

ungaqhuzuki ngonyawo lwakho etsheni.

₁₃Uyakunyathela ingonyama nebululu,

unyathele phansi ibhongo lengonyama nodrako.*

₁₄Ngenxa yokuba enamathele kimi, ngakho ngiyamkhulula;

ngiyamphakamisa ngokuba elazi igama lami.

₁₅Uyakungibiza, ngimphendule;

ngiyakuba naye esosizini,

ngimkhulule, ngimdumise.

₁₆Ngiyakumsuthisa ngobude bezinsuku,

ngimbonise insindiso yami.

₁Kuhle ukumbonga uJehova nokuhubela igama lakho wena oPhezukonke;

₂ukushumayela umusa wakho ekuseni nokuthembeka kwakho ebusuku,

₃ngokubetha ugubhu olunezintambo eziyishumi,

nomqangala, kanye nehabhu* elizwakala kamnandi.

₄Ngokuba ungithokozisile, Jehova, ngezenzo zakho;

ngiyakumemeza ngokujabula.

₅Yeka ubukhulu bezenzo zakho, Jehova.

Imicabango yakho ijulile kakhulu.

₆Umuntu oyisilima angekucabange,

nesiwula asikuboni.

₇Noma ababi behluma njengotshani,

nezigangi noma ziqhakaza zonke,

kuyenzeka ukuba babhujiswe kuze kube phakade.

₈Kepha wena Jehova uphakeme kuze kube phakade.

₉Ngokuba bheka, izitha zakho, Jehova,

bheka, izitha zakho, ziyakubhubha;

bonke abenza okubi bayakuhlakazwa.

₁₀Kepha uphondo lwami uyaluphakamisa njengolwenyathi,

ngigcotshwa ngamafutha amasha.

₁₁Iso lami liyakubona ngokujabula izitha zami,

nezindlebe zami ziyakuzwa ngokuthokoza ngababi abangivukelayo.

₁₂Olungileyo uyahluma njengesundu,

uyakhula njengomsedari* eLebanoni.

₁₃Batshaliwe endlini kaJehova,

bamila emagcekeni kaNkulunkulu wethu.

₁₄Nasebudaleni bayakuthela izithelo,

bahlume babe luhlaza,

₁₅ukuze bashumayele ukuthi uJehova ulungile;

uyidwala lami okungekho kuye ukungalungi.

₁UJehova uyinkosi,

wembethe ubukhosi;

uJehova wembethe, ubhince amandla.

Nezwe limi liqinile, lingazanyazanyiswa.

₂Isihlalo sakhe sobukhosi simi siqinile kwasendulo;

wena ukhona kwaphakade.

₃Imifula iphakamisile, Jehova,

imifula iphakamisile ukuholoba kwayo;

imifula iphakamisa ukuduma kwayo.

₄UJehova ophakeme unamandla

kunokuholoba kwamanzi amaningi,

kunokuduma kwamadlambi olwandle.

₅Ukufakaza kwakho kuqinisekile kakhulu.

Ubungcwele buyifanele indlu yakho, Jehova,

kuze kube phakade.

₁Nkulunkulu wempindiselo,

Jehova, Nkulunkulu wempindiselo, vela ukhanye.

₂Phakama, Mahluleli womhlaba,

uphindisele kwabazidlayo izenzo zabo.

₃Jehova, koze kube nini ababi,

koze kube nini ababi bethaba na?

₄Bayampompoza,

bakhuluma amagangangozi;

bayazidla bonke abenza okubi.

₅Isizwe sakho, Jehova, bayasiphohloza,

nefa lakho balinyathela phansi.

₆Bayabhubhisa umfelokazi nomfokazi,

nezintandane bayazibulala.

₇Bathi: “UJehova akaboni,

uNkulunkulu kaJakobe akanaki.”

₈Qaphelani nina zithutha phakathi kwabantu;

nani ziwula, niyakuqonda nini na?

₉Owenza indlebe kanakuzwa na?

Owadala iso kanakubona na?

₁₀Othethisa abezizwe,

yena ofundisa abantu ukwazi, kanakujezisa na?

₁₁UJehova uyayazi imicabango yabantu ukuba ingumoya nje.

₁₂Jehova, ubusisiwe lowo muntu omyalayo,

omfundisayo ngomthetho wakho,

₁₃wenzela ukuba umphumuze ezinsukwini ezimbi,

aze ambelwe umgodi lowo ongenamthetho.

₁₄Ngokuba uJehova akayikulahla abantu bakhe,

nefa lakhe akayikulishiya.

₁₅Ngokuba ukulunga kuyakubuyela ekwahluleleni,

bonke abaqotho ngenhliziyo bakulandele.

₁₆Ngubani oyakungimela phambi kwababi na?

Ngubani oyakungelekelela kwabenza okubi na?

₁₇Uma uJehova ebengesilo usizo lwami,

umphefumulo wami ubuyakushesha ukuhlala ekuthuleni kokufa.

₁₈Lapho ngithe unyawo lwami luyashelela,

umusa wakho, Jehova, wangiphasa.

₁₉Kubo ubuninginingi bemicabango yenhliziyo yami

ukududuza kwakho kwathokozisa umphefumulo wami.

₂₀Isihlalo sobubi singahlanganyela nawe yini,

leso esisebenza okubi kungathi ngomthetho na?

₂₁Bahlangana ukuvukela umphefumulo wolungileyo;

igazi elingenacala bayalilahla.

₂₂Kepha uJehova waba yinqaba yami,

uNkulunkulu wami waba yiwa engiphephela kulo.

₂₃Uyaphindisela kubo ukushinga kwabo,

abaqede ngobubi babo;

uJehova uNkulunkulu wethu uyakubaqeda.

₁Wozani simhubele uJehova,

sihlabelele ngenjabulo kulo idwala lensindiso yethu.

₂Masize phambi kobuso bakhe ngokubonga,

sihlabelele kuye ngamahubo.

₃Ngokuba uJehova unguNkulunkulu omkhulu,

uyinkosi enkulu phezu kwawonkulunkulu bonke.

₄Esandleni sakhe kukhona ukujula komhlaba;

iziqongo zezintaba ngezakhe nazo.

₅Ulwandle ngolwakhe, walwenza;

nomhlabathi owomileyo izandla zakhe zawubumba.

₆Wozani; masikhuleke, sikhothame,

siguqe phambi kukaJehova,

uMenzi wethu.

₇Ngokuba yena unguNkulunkulu wethu,

thina singabantu bedlelo lakhe nezimvu zesandla sakhe.

Namuhla, uma nilizwa izwi lakhe,

₈ningayenzi lukhuni inhliziyo yenu njengaseMeriba,

njengasosukwini lwaseMasa ehlane,

₉lapho oyihlo bangilinga khona, bangivivinya,

babona umsebenzi wami.

₁₀Iminyaka engamashumi amane nganengwa yileso sizukulwane,

ngaze ngathi: “Bangabantu abanhliziyo zabo zidukile,

abazazanga izindlela zami,”

₁₁engafunga ngabo olakeni lwami, ngathi:

“Abasoze bangena ekuphumuleni kwami.”

₁Hlabelelani kuJehova ihubo elisha,

nihlabelele kuJehova,

mhlaba wonke.

₂Hlabelelani kuJehova, nibonge igama lakhe,

nimemeze insindiso yakhe imihla ngemihla.

₃Landani inkazimulo yakhe phakathi kwabezizwe,

izimangaliso zakhe phakathi kwabantu bonke.

₄Ngokuba mkhulu uJehova, udumisekile kakhulu;

uyesabeka phezu kwabo bonke onkulunkulu.

₅Ngokuba bonke onkulunkulu babezizwe bayizithombe,

kepha uJehova walenza izulu.

₆Udumo nobukhosi kusebusweni bakhe;

amandla nenkazimulo kusendlini yakhe engcwele.

₇Mnikeni uJehova nina mindeni yabantu,

mnikeni uJehova inkazimulo namandla.

₈Mnikeni uJehova inkazimulo yegama lakhe,

nilethe umnikelo,

ningene emagcekeni akhe.

₉Khulekani kuJehova,

nihlobe ubungcwele;

thuthumela ebusweni bakhe,

mhlaba wonke.

₁₀Thanini phakathi kwabezizwe: “UJehova uyinkosi,”

izwe lihlala liqinile, lingenakushukunyiswa;

uthetha amacala ezizwe ngobuqotho.

₁₁Malijabule izulu, umhlaba uthokoze;

maluhlokome ulwandle nokugcwala kwalo.

₁₂Mawename amasimu nakho konke okukuwo,

ijabule imithi yonke yehlathi

₁₃ebusweni bukaJehova, ngokuba uyeza,

yebo, uyeza ukwahlulela umhlaba;

uyakwahlulela izwe ngokulunga,

nezizwe ngokuthembeka kwakhe.