Bible Reading Plan – Day 113

₁Siyakubonga, Nkulunkulu, siyabonga;

igama lakho liseduze;

balanda izimangaliso zakho.

₂Lapho ngiyakugcina isikhathi esimisiweyo,

ngiyakwahlulela ngokulunga.

₃Umhlaba uyancibilika nabo bonke abakhe kuwo;

mina ngimisile izinsika zawo. Sela*

₄Ngithe kwabazidlayo: “Ningazidli,”

nakwababi: “Ningaphakamisi uphondo.

₅Ningaluphakamiseli phezulu uphondo lwenu,

ningajoqi ngentamo elukhuni.”

₆Ngokuba ukuphakanyiswa akuveli empumalanga

nasentshonalanga nasehlane lasezintabeni,

₇kepha uNkulunkulu ungumahluleli;

omunye uyamehlisa,

omunye amphakamise.

₈Ngokuba esandleni seNkosi kukhona isitsha;

iwayini liyakhephuza;

sigcwele ngeliqungiweyo,

yona iyathulula ngaso;

impela bonke ababi emhlabeni bayakuyimunca inhleze yalo,

bayiphuze.

₉Kepha mina ngiyakumemezela ngakho kuze kube phakade,

ngidumise uNkulunkulu kaJakobe.

₁₀Zonke izimpondo zababi ngiyakuzinquma;

kepha izimpondo zolungileyo ziyakuphakanyiswa.

₁UNkulunkulu uyaziwa kwaJuda,

igama lakhe likhulu kwa-Israyeli.

₂Itabernakele* lakhe liseSalema,

nendlu yakhe iseSiyoni.

₃Waphula lapho imicibisholo yomnsalo,

nesihlangu, nenkemba, nempi. Sela*

₄Uyakhazimula ngobukhosi,

lapho uvela ezintabeni zempango.

₅Bachithekile abaqinile ngenhliziyo,

balele ubuthongo babo;

amaqhawe awafumanisanga izandla zawo.

₆Ngokusola kwakho,

Nkulunkulu kaJakobe,

kwehlelwa ngubuthongo inqola kanye nehhashi.

₇Wena, yebo, wena uyesabeka;

ngubani ongema ebusweni bakho

ngesikhathi solaka lwakho na?

₈Wezwakalisa ukwahlulela kuvela ezulwini;

umhlaba wesaba, wathula

₉mhla evuka uNkulunkulu ukuba ahlulele,

asindise bonke abathobekileyo bomhlaba. Sela*

₁₀Ngokuba ulaka lomuntu luyakukudumisa;

insalelo yolaka uyakuyibhinca.

₁₁Thembisani, nigcwalise izithembiso kuJehova uNkulunkulu wenu.

Bonke abamzungezileyo mabalethe izipho kuye owEsabekayo.

₁₂Uyanquma umoya wezikhulu,

wesabeka kuwo amakhosi omhlaba.

₁Izwi lami ngiyakuliphakamisela kuNkulunkulu,

ngikhale kuNkulunkulu ukuba angibekele indlebe.

₂Osukwini losizi lwami ngiyayifuna iNkosi;

ebusuku isandla sami seluliwe, asidangali;

umphefumulo wami wala ukududuzwa.

₃Ngiyamkhumbula uNkulunkulu ngibubula;

ngiyazindla, umoya wami uyaphela amandla. Sela*

₄Uzibambile izinkophe zamehlo ami, angavaleki;

ngikhathazekile,

angisakwazi ukukhuluma.

₅Ngiyazindla ngezinsuku zasendulo,

ngeminyaka yaphakade.

₆Ebusuku ngiyakhumbula ukubetha kwami ugubhu,

ngizindla enhliziyweni yami;

nomoya wami uyahlolisisa.

₇INkosi iyakulahla kuze kube phakade na?

Ayisenakuphinda ibe nomusa na?

₈Umusa wayo unqamukile njalo yini na?

Isithembiso siphelile yini ezizukulwaneni ngezizukulwane na?

₉UNkulunkulu ukhohliwe ukuba abe nomusa na?

Uvalele ububele bakhe ngolaka na? Sela*

₁₀Ngase ngithi:

“Yilokhu ukuhlupheka kwami,

ngokuba isandla sokunene soPhezukonke siphendukile.”

₁₁Ngiyakukhumbula izenzo zikaJehova,

yebo, ngikhumbule izimangaliso zasendulo,

₁₂ngicabange ngawo wonke umsebenzi wakho,

ngizindle ngezenzo zakho.

₁₃Indlela yakho, Nkulunkulu, isebungcweleni;

ngubani ongunkulunkulu omkhulu njengoNkulunkulu na?

₁₄Wena unguNkulunkulu owenza izimangaliso;

amandla akho uwazisile ezizweni.

₁₅Ngengalo yamandla wasindisa abantu bakho,

amadodana kaJakobe noJosefa. Sela*

₁₆Amanzi akubona, Nkulunkulu,

amanzi akubona, athuthumela,

nezintwa zazamazama.

₁₇Amafu athela amanzi,

izulu laduma,

imicibisholo yakho yaphuma.

₁₈Izwi lokuduma kwakho lalisesivunguvungwini;

imibani yakhanyisa izwe;

umhlaba wadikizela, wazamazama.

₁₉Indlela yakho yayiselwandle,

nomendo wakho wawusemanzini amaningi,

kodwa izinyathelo zakho zazingaziwa.

₂₀Wahola abantu bakho njengezimvu ngesandla sikaMose no-Aroni.

₁Zwanini, bantu bami, umthetho wami,

nibeke izindlebe zenu emazwini omlomo wami.

₂Ngizakuvula umlomo wami ngomfanekiso,

ngibonakalise izimfihlakalo zasendulo.

₃Esikuzwileyo sakwazi,

nawobaba abasitshela khona,

₄asinakukufihla kubantwana babo,

izindumiso zikaJehova zisitshele kuso isizukulwane esizayo,

namandla akhe nezimangaliso zakhe azenzileyo.

₅Ngokuba wamisa ubufakazi kwaJakobe,

wabeka umthetho kwa-Israyeli,

ayala ngawo obaba

ukuba bafundise abantwana babo,

₆ukuze isizukulwane esilandelayo sazi,

abantwana abayakuzalwa,

bavuke, batshele abantwana babo,

₇babeke ithemba labo kuNkulunkulu,

bangakhohlwa imisebenzi kaNkulunkulu,

kepha bagcine imiyalo yakhe.

₈Bangabi njengawoyise,

isizukulwane esiphambeneyo nesihlubukayo,

isizukulwane esingaqinisanga inhliziyo yaso,

nesimoya waso wawungathembekile kuNkulunkulu.

₉Abantu bakwa-Efrayimi,

sebehlomile bephethe iminsalo,

babuyela emuva ngosuku lokulwa.

₁₀Abasigcinanga isivumelwano sikaNkulunkulu,

benqaba ukuhamba emthethweni wakhe,

₁₁bakhohlwa imisebenzi yakhe

nezimangaliso zakhe abebabonisile zona.

₁₂Wazenza izimangaliso emehlweni awoyise

ezweni laseGibithe endaweni yaseSowani.

₁₃Wahlukanisa ulwandle, wabawelisa;

wamisa amanzi njengodonga.

₁₄Wabahola ngefu emini,

nobusuku bonke ngokukhanya komlilo.

₁₅Waqhekeza amadwala ehlane,

wabaphuzisa njengasotweni olujulileyo.

₁₆Waphumisa edwaleni izifufula,

wehlisa amanzi njengemifula.

₁₇Nokho baqhubeka benza ukona kuye,

baphambana noPhezukonke ehlane.

₁₈Bamlinga uNkulunkulu enhliziyweni yabo

ngokucela ukudla abakufisayo.

₁₉Bakhuluma kabi ngoNkulunkulu, bathi:

“UNkulunkulu angalungisa isithebe ehlane na?

₂₀Bhekani, washaya idwala,

kwaphuma amanzi,

nemifula yampompoza;

kepha angabanika nesinkwa,

alungisele abantu bakhe inyama, na?”

₂₁Ngalokho uJehova ekuzwa lokho

wathukuthela, kwavutha umlilo ngoJakobe,

ulaka lwavuka ngo-Israyeli;

₂₂ngokuba abakholwanga nguNkulunkulu,

abathembanga ensindisweni yakhe.

₂₃Nokho wayala amafu phezulu,

wavula iminyango yezulu,

₂₄wanisa phezu kwabo imana* kube ngukudla,

wabapha amabele ezulu;

₂₅abantu badla isinkwa sezingelosi,

bathunyelwa ukudla ngokugcweleyo.

₂₆Waphumisa umoya wasempumalanga ezulwini;

ngamandla akhe waqhuba umoya waseningizimu.

₂₇Wawisa phezu kwabo inyama njengothuli,

nezinyoni ezinamaphiko njengesihlabathi solwandle.

₂₈Wakwehlisa phakathi kwekamu* labo naphakathi kwezindlu zabo.

₂₉Badla, basuthiswa kakhulu;

baphiwa abakufisayo.

₃₀Bebengakahlukani nokufisa kwabo,

ukudla kwabo kusesemlonyeni wabo,

₃₁intukuthelo kaNkulunkulu yabavukela,

wabulala abakhulupheleyo babo,

wawisa phansi izinsizwa zakwa-Israyeli.

₃₂Nokho bona njalo,

abakholwanga yizimangaliso zakhe.

₃₃Ngakho waqedela izinsuku zabo ezeni neminyaka yabo ovalweni.

₃₄Lapho ebabulala, bamfuna;

babuye bamfunisisa uNkulunkulu.

₃₅Base bekhumbula ukuthi uNkulunkulu uyidwala labo;

uNkulunkulu oPhezukonke ungumkhululi wabo.

₃₆Kepha bamthopha ngomlomo wabo,

baqamba amanga kuye ngolimi lwabo;

₃₇ngokuba inhliziyo yabo yayingabambeleli kuye,

bengathembekile esivumelwaneni sakhe.

₃₈Kepha yena enesihawu wathethelela ububi babo,

akabhubhisanga;

yebo, wabamba kaningi intukuthelo yakhe,

akavusanga lonke ulaka lwakhe.

₃₉Wakhumbula ukuthi bayinyama,

bangumoya odlulayo ongabuyiyo.

₄₀Kwaba kaningi kangakanani bephambana naye ehlane,

bemdabukisa kwahlongasibi.

₄₁Babuye bamlinga uNkulunkulu,

bamdabukisa oNgcwele ka-Israyeli.

₄₂Abakhumbulanga isandla sakhe

nosuku abahlenga ngalo ezitheni,

₄₃lapho ezenza izibonakaliso zakhe eGibithe

nezimangaliso zakhe endaweni yaseSowani.

₄₄Waphendula lapho imifula yabo nemifudlana yabo yaba yigazi,

ukuze bangabi nakuphuza.

₄₅Wathumela phakathi kwabo izibawu ezabadlayo

namasele ababhubhisayo.

₄₆Wanika imiswenya ukudla kwabo,

nomsebenzi wabo isikhonyane.

₄₇Wabulala imivini yabo ngesichotho,

nemikhiwane yabo ngesangquma.

₄₈Wanikela izinkomo zabo esichothweni

nezimvu zabo kuyo imibani.

₄₉Waphonsa kubo ukuvutha kwentukuthelo yakhe,

nolaka, nokufutheka, nokuhlupheka,

ngokuthuma izithunywa zobubi.

₅₀Walungisela intukuthelo yakhe indlela;

akaphephisanga umphefumulo wabo ekufeni,

kepha wanikela ukuphila kwabo ezifweni.

₅₁Washaya amazibulo onke aseGibithe,

okokuqala kwamandla abo ematendeni kaHamu.

₅₂Kepha waphumisa abantu bakhe njengezimvu;

wabahola ehlane njengomhlambi.

₅₃Wabahola kahle, abaze besaba;

kepha ulwandle lwasibekela izitha zabo.

₅₄Wabayisa emnceleni wakhe ongcwele,

entabeni esasiyizuzile isandla sakhe sokunene.

₅₅Waxosha abezizwe phambi kwabo;

edabula izwe wababela ifa,

wahlalisa izizwe zakwa-Israyeli ematendeni azo.

₅₆Nokho bamlinga, baphambana noNkulunkulu oPhezukonke,

abaze bagcina imiyalo yakhe.

₅₇Bahoshekela emuva,

bakhohlisa njengawoyise,

baphenduka njengomnsalo ogejayo.

₅₈Bamthukuthelisa ngezindawo zabo eziphakemeyo,

bamcunula ngezithombe zabo.

₅₉UNkulunkulu ekuzwa lokho wathukuthela,

wamlahla impela u-Israyeli.

₆₀Walishiya itabernakele* laseShilo,

itende abelimisile phakathi kwabantu.

₆₁Wanikela amandla akhe ekuthunjweni,

nenkazimulo yakhe esandleni sesitha.

₆₂Wanikela abantu bakhe enkembeni,

wathukuthelela ifa lakhe.

₆₃Izinsizwa zabo zadliwa ngumlilo;

izintombi zabo azihutshelwanga.

₆₄Abapristi babo bawa ngenkemba;

abafelokazi babo abaze balila.

₆₅Yayisivuka iNkosi njengokade elele,

njengesiqhwaga esikade sahlulwa yiwayini,

₆₆yazishayela emuva izitha zayo,

yazithela ngehlazo eliphakade.

₆₇Yalahla indlu kaJosefa,

ayikhethanga isizwe sakwa-Efrayimi.

₆₈Kepha yakhetha isizwe sakwaJuda,

intaba yaseSiyoni eyithandayo.

₆₉Yayakha indlu yayo engcwele njengezintaba

nanjengomhlaba ewusekeleyo kuze kube phakade.

₇₀Yakhetha uDavide inceku yayo,

yamthabatha ezibayeni zezimvu.

₇₁Esalandele izimvukazi ezenyisayo,

yamthabatha ukuba abeluse abantu bayo uJakobe,

nefa layo u-Israyeli.

₇₂Njalo wabelusa ngobuqotho benhliziyo yakhe,

wabahola ngenhlakanipho yesandla sakhe.