Bible Reading Plan – Day 114

₁Nkulunkulu, abezizwe bangenile efeni lakho;

bangcolisile ithempeli lakho elingcwele;

benze iJerusalema libe yincithakalo.

₂Bazinikile izidumbu zezinceku zakho

zibe ngukudla kwezinyoni zezulu,

inyama yabakwesabayo kuzo izilo zomhlaba.

₃Bachithile igazi labo njengamanzi nxazonke zeJerusalema,

akwababikho obembelayo.

₄Sesiyisihlamba kubakhelwane bethu,

umbhinqo nenhlekiso kwabasiphahlileyo.

₅Koze kube nini, Jehova,

uthukuthele njalo,

ukushisekela kwakho kuvutha njengomlilo, na?

₆Thela ulaka lwakho phezu kwabezizwe abangakwaziyo

naphezu kwemibuso engakhulekeli igama lakho.

₇Ngokuba sebemdlile uJakobe,

umuzi wakhe sebewuchithile.

₈Mawungasibaleli amacala akuqala;

umusa wakho mawusheshe usihlangabeze,

ngokuba sesibuthakathaka kakhulu.

₉Sisize, Nkulunkulu wensindiso yethu,

ngenxa yenkazimulo yegama lakho;

usikhulule, usithethelele izono zethu

ngenxa yegama lakho.

₁₀Bangasholoni abezizwe ukuthi:

“Uphi uNkulunkulu wabo na?”

Makwazeke kwabezizwe emehlweni ethu

ukuphindiselwa kwegazi lezinceku zakho elichithiweyo.

₁₁Ukububula kwesiboshwa makuze phambi kwakho;

londoloza ngobukhulu bengalo

yakho asebengabantwana bokufa.

₁₂Buyisela kubakhelwane bethu,

kuphindwe kasikhombisa esifubeni sabo

inhlamba abakuhlambalaza ngayo, Nkosi.

₁₃Khona thina bantu bakho,

izimvu zedlelo lakho,

siyakukubonga kuze kube phakade,

sishumayele udumo lwakho ezizukulwaneni ngezizukulwane.

₁Yizwa, malusi ka-Israyeli,

ohola uJosefa njengomhlambi,

ohlezi phezu kwamakherubi;*

mawubonakale ngokukhazimula.

₂Vusa amandla akho phambi kuka-Efrayimi noBenjamini noManase,

uze ukusisindisa.

₃Sibuyise, Nkulunkulu,

ukhanyise ubuso bakho,

khona siyakusindiswa.

₄Jehova Nkulunkulu Sebawoti,

koze kube nini uthunqela ngolaka umkhuleko wabantu bakho na?

₅Wabapha isinkwa sezinyembezi,

wabaphuzisa izinyembezi ngesilinganiso esikhulu.

₆Usenza sibe yinto ebangwa ngabakhelwane bethu,

nezitha zethu zisihleka usulu.

₇Sibuyise, Nkulunkulu Sebawoti,

ukhanyise ubuso bakho,

khona siyakusindiswa.

₈Wakhipha umvini eGibithe,

waxosha abezizwe, watshala wona.

₉Wawulungisela indawo phambi kwawo,

wagxila, wagcwalisa umhlaba.

₁₀Izintaba zambozwa ngumthunzi wawo,

nemisedari* kaNkulunkulu ngamagatsha awo.

₁₁Wenabisa amagatsha awo,

aze afika elwandle,

namaxhantela awo, aze afika emfuleni.

₁₂Uzidilizeleni izintango zawo,

baze bawukhe bonke abadlula ngendlela, na?

₁₃Ingulube yasehlathini iyawudla,

nezilwane zasendle ziyawuqothula.

₁₄Nkulunkulu Sebawoti, mawubuye;

bheka usezulwini, ubone,

unakekele lo mvini,

₁₅yebo, lo mvini otshalwe ngesokunene sakho,

nendodana ozikhulisele yona.

₁₆Ushiswe ngumlilo, unqunyiwe;

bayakubhubha ngokukhuza kobuso bakho.

₁₇Isandla sakho masibe phezu kwendoda yesokunene sakho,

phezu kwendodana yomuntu ozikhulisele yona;

₁₈khona asisayikuhoshekela emuva kuwe;

siphilise, khona siyakukhuleka egameni lakho.

₁₉Sibuyise, Jehova Nkulunkulu Sebawoti;

ukhanyise ubuso bakho,

khona siyakusindiswa.

₁Halalisani uNkulunkulu amandla ethu,

nimemeze ngokujabula kuNkulunkulu kaJakobe.

₂Hlabani ihubo,

nithathe isigubhu nehabhu* elihle nogubhu.

₃Bethani icilongo ekwethwaseni kwenyanga

nasekuhlanganeni kwenyanga ngosuku lomkhosi wethu.

₄Ngokuba kuyisimiso kwa-Israyeli

nomthetho kaNkulunkulu kaJakobe.

₅Kungubufakazi abumisayo kwaJosefa mhla ephuma ezweni laseGibithe.

Ngizwa ulimi ebengingalwazi luthi:

₆“Ngasusa ihlombe lakhe emthwalweni,

izandla zakhe zakhululeka eqomeni lokuthwala.

₇Wakhuleka usosizini, ngakukhulula;

ngakuphendula ngisekusithekeni kokuduma,

ngakuvivinya ngasemanzini aseMeriba. Sela*

₈“Zwanini, bantu bami,

ngizakufakaza kini ukuthi:

O Israyeli, sengathi ungangilalela!

₉Makungabikho kuwe unkulunkulu omunye,

ungakhuleki kunkulunkulu wabezizwe.

₁₀Mina nginguJehova uNkulunkulu wakho

owakukhuphula ezweni laseGibithe;

khamisa umlomo wakho, ngiwugcwalise.

₁₁“Kepha abantu bami abalalelanga izwi lami,

u-Israyeli akanginakanga.

₁₂Ngase ngibayeka enkanini yenhliziyo yabo

ukuba bahambe ngokuthanda kwabo.

₁₃“Sengathi abantu bami bangangizwa,

u-Israyeli ahambe ezindleleni zami.

₁₄Bengiyakuthobisa masinyane izitha zabo,

ngiselulele isandla sami kwabamelene nabo.

₁₅Abazondi bakaJehova bebeyakuzithobela kuye,

kepha isikhathi sabantu bami besiyakuba khona kuze kube phakade.

₁₆Ubeyakubapha ukolweni omuhle;

yebo, bengiyakubasuthisa ngezinyosi zasesiweni.”

₁UNkulunkulu umi emhlanganweni wawonkulunkulu;

uyahlulela phakathi kwawonkulunkulu.

₂Koze kube nini nahlulela ngokungalungile

nikhetha ubuso bababi na? Sela*

₃Yahlulelani ompofu nentandane,

nimenzele okufaneleyo olusizi noswelayo.

₄Khululani oswelayo nompofu,

nibophule esandleni sababi.

₅Abanakwazi, abanakuqonda,

bahamba ebumnyameni;

izisekelo zonke zomhlaba ziyazamazama.

₆Mina ngathi: “Ningonkulunkulu nina,”

nonke ningamadodana oPhezukonke.

₇Kanti nokho niyakufa njengabantu nje,

niwe njengesinye sezikhulu.

₈Vuka, Nkulunkulu,

wahlulele umhlaba,

ngokuba wena uyindlalifa yezizwe zonke.

₁Nkulunkulu, ungathuli, ungalibali,

ungali ukukhuluma, Nkulunkulu.

₂Ngokuba bheka,

izitha zakho ziyaxokozela,

nabakuzondayo baphakamisa ikhanda.

₃Ngobuqili benza uzungu ngabantu bakho,

bacebisana ukulwa nabathukusiweyo bakho.

₄Bathi: “Wozani sibaqothule,

bangabe besaba yisizwe,

negama lika-Israyeli lingabe lisakhunjulwa.”

₅Baceba nganhliziyonye,

benza isivumelwano ngawe:

₆amatende ka-Edomi naka-Ishmayeli,

nakaMowabi nakaHagari,

₇noGebali, no-Amoni, no-Amaleki,

neFilistiya nabakhile eTire.

₈Ne-Asiriya lahlangana nabo,

laba yingalo yabantwana bakaLoti. Sela*

₉Yenza kubo njengakuMidiyani,

nakuSisera,

nakuJabini ngasemfuleni iKishoni,

₁₀ababhubhela e-Eni Dori,

baba ngumquba womhlabathi.

₁₁Amakhosana abo wenze abe njengo-Orebi noZebi,

nabakhulu babo bonke njengoZeba noSalimuna

₁₂ababethi: “Masizithabathele amadlelo kaNkulunkulu.”

₁₃Nkulunkulu wami, benze babe njengezibi ezikhwishizayo,

njengamakhoba amuka nomoya.

₁₄Njengomlilo oshisa ihlathi,

njengelangabi elithungela izintaba,

₁₅baxoshe kanjalo ngesivunguvungu sakho,

ubethuse ngesiphepho sakho.

₁₆Thela ubuso babo ngehlazo,

baze bafune igama lakho, Jehova.

₁₇Mabahlazeke, baphele amandla kuze kube phakade;

mabahluleke, babhubhe,

₁₈bazi ukuthi nguwe wedwa ogama lakho linguJehova;

ungoPhezukonke emhlabeni wonke.

₁Zithandeka kangaka izindlu zakho, Jehova Sebawoti.

₂Umphefumulo wami ulangazelela,

womela amagceke kaJehova;

inhliziyo yami nomzimba wami kuyahuba ngokwethaba kuNkulunkulu ophilayo.

₃Ngokuba umzwilili ufumene indlu,

nenkonjane isidleke sayo,

lapho ibeka khona amazinyane ayo,

ngisho ama-altare akho,

Jehova Sebawoti,

Nkosi yami, Nkulunkulu wami.

₄Babusisiwe abahlala endlini yakho;

bayakuhlala bebonga wena. Sela*

₅Ubusisiwe umuntu omandla akhe akuwe,

abazindlela zakho zisezinhliziyweni zabo.

₆Bedabula imfunda yezinyembezi

bayenza ibe yindawo yeziphethu;

yebo, nemvula yokuqala iyayisibekela ngezibusiso.

₇Baqhubeka emandleni,

baze babonakale phambi kukaNkulunkulu eSiyoni.

₈Jehova Nkulunkulu Sebawoti,

yizwa umkhuleko wami,

ubeke indlebe,

Nkulunkulu kaJakobe. Sela*

₉Wena Nkulunkulu, siHlangu sethu,

bheka, ubuke ubuso bogcotshiweyo wakho.

₁₀Ngokuba usuku lunye emagcekeni akho

luhle kunezinye eziyizinkulungwane.

Ngiyakhetha ukulinda emnyango wendlu kaNkulunkulu wami

kunokuhlala ematendeni ababi.

₁₁Ngokuba uJehova uNkulunkulu uyilanga nesihlangu;

uJehova uyakupha umusa nodumo;

akayikubenqabela okuhle abahamba ngobuqotho.

₁₂Jehova Sebawoti,

ubusisiwe umuntu okwethembayo.

₁Jehova, wabusisa izwe lakho,

wambuyisa uJakobe ekuthunjweni.

₂Wasusa icala labantu bakho,

wasibekela zonke izono zabo. Sela*

₃Wamukisa yonke intukuthelo yakho,

waphenduka ekuvutheni kolaka lwakho.

₄Sibuyise, Nkulunkulu wensindiso yethu,

ulahle ukusicanukela kwakho.

₅Uyakusithukuthelela njalonjalo na?

Uyakwelulela ulaka lwakho ezizukulwaneni ngezizukulwane na?

₆Awuzukusivusa, sibuye siphile,

ukuze abantu bakho bathokoze ngawe, na?

₇Sitshengise umusa wakho, Jehova,

usiphe insindiso yakho.

₈Mangizwe lokho uNkulunkulu uJehova azakukukhuluma;

uyakhuluma ukuthula kubantu bakhe

nakubo abamesabayo;

mabangabuyeli ebuwuleni.

₉Impela insindiso yakhe iseduze nabamesabayo,

ukuze kuhlale udumo ezweni lethu.

₁₀Kuyakuhlangabezana umusa neqiniso,

kwangane ukulunga nokuthula.

₁₁Kuyakuhluma iqiniso emhlabeni,

kulunguzele phansi nokulunga kwasezulwini.

₁₂Yebo, uJehova uyakuveza okuhle;

izwe lethu liyakuthela izithelo zalo.

₁₃Ukulunga kuyakuhamba phambi kwakhe,

kwenzele izinyawo zakhe indlela.