Bible Reading Plan – Day 112

₁Nkulunkulu, phuthuma ungikhulule.

Jehova, phuthuma ungisize.

₂Mabajabhe, bayangaze

abafuna umphefumulo wami.

Mababuyiselwe emuva,

bajabhiswe abangifisela umonakalo.

₃Abathi ashila, ashila mababuyele emuva

ngenxa yokuhlazeka kwabo.

₄Mabethabe, bajabule kuwe bonke abakufunayo;

abathanda insindiso yakho mabasho njalonjalo, bathi:

“Makabe mkhulu uNkulunkulu.”

₅Ngokuba mina ngihluphekile, ngimpofu;

Nkulunkulu, ngiphuthumele.

Wena uyinsizakalo yami nomkhululi wami;

Jehova, ungalibali.

₁Jehova, ngiyethemba wena;

mangingajabhi naphakade.

₂Ngikhulule ngokulunga kwakho, ungihlangulise;

beka indlebe yakho kimi, ungisindise.

₃Yiba kimi idwala lokuhlala,

ukuze ngiye kulo njalonjalo;

ukuyalezile ukusindiswa kwami,

ngokuba uyidwala lami nenqaba yami.

₄Nkulunkulu wami,

ngikhulule esandleni somubi,

esandleni songalungile nesonakeleyo.

₅Ngokuba wena uyithemba lami, Nkosi Jehova,

ithemba lami kwasebusheni bami.

₆Ngencike kuwe kwasesiswini;

nguwe owangikhipha ezibilinini zikamame;

ukudumisa kwami kuyakuba ngawe njalo.

₇Nginjengesimangaliso kwabaningi,

kepha wena uyisiphephelo sami esinamandla.

₈Umlomo wami uzakugcwala ukubonga wena,

nalo udumo lwakho usuku lonke.

₉Ungangilahli esikhathini sobudala,

ungangishiyi ekupheleni kwamandla ami,

₁₀ngokuba izitha zami zikhuluma ngami,

nabawuhlomele umphefumulo wami bayahlebelana,

₁₁bathi: “UNkulunkulu umshiyile;

zingelani nimbambe,

ngokuba akakho osindisayo.”

₁₂Nkulunkulu, ungabi kude nami;

Nkulunkulu, phuthuma ungisize.

₁₃Abamelene nomphefumulo wami mabajabhe, baphele;

abangifunela umonakalo mabembathe

amahloni nenhlamba.

₁₄Mina kodwa ngiyakwethemba njalo,

ngengeze ukudumisa ekudunyisweni kwakho.

₁₅Umlomo wami uyakulanda ukulunga kwakho,

nensindiso yakho lonke usuku;

ngokuba anginakukubala.

₁₆Ngiyakuletha izenzo ezinqabileyo zeNkosi uJehova;

ngiyakubonga ukulunga kwakho, okwakho kuphela.

₁₇Nkulunkulu, ungifundisile kwasebusheni bami;

ngizilandile izimangaliso zakho kuze kube manje.

₁₈Futhi mawungangishiyi,

nxa ngimdala, ngiyimpunga,

ngize ngishumayele ingalo yakho kuso isizukulwane,

amandla akho kubo bonke abezayo.

₁₉Ukulunga kwakho, Nkulunkulu, kufinyelele ezulwini;

wena owenze izinto ezinkulu, Nkulunkulu,

ngubani onjengawe na?

₂₀Wena owasizwisa izinhlupheko eziningi ezimbi,

uyakubuye usiphilise,

usikhuphule ezinzulwini zomhlaba.

₂₁Yandisa udumo lwami,

ubuye ungiduduze.

₂₂Yikhona nami ngizakububonga ubuqotho bakho,

Nkulunkulu wami,

ngogubhu lwezintambo;

ngizakukudumisa ngehabhu*

wena oNgcwele ka-Israyeli.

₂₃Izindebe zami zizakujabula,

ngokuba ngizakukudumisa wena,

nomphefumulo wami owuhlengileyo.

₂₄Ulimi lwami futhi luzakukhuluma lonke usuku ngokulunga;

ngokuba badunyaziwe, bajabhisiwe abangifunela umonakalo.

₁Nkulunkulu, nika inkosi izahlulelo zakho

nendodana yenkosi ukulunga kwakho.

₂Iyakwahlulela isizwe sakho

ngeqiniso nezihlupheki zakho ngemfanelo.

₃Izintaba ziyakuletha ukuthula kubantu;

kanjalo namagquma, ngokulunga.

₄Izakubahlulela abahluphekileyo kubantu,

isindise abantwana babampofu,

imphohloze onokhahlo.

₅Bayakwesaba wena, kusekhona ilanga nenyanga,

izizukulwane ngezizukulwane.

₆Iyakwehla njengemvula edlelweni,

njengesihlambi esimatisa umhlaba.

₇Ezinsukwini zayo olungileyo uyakuqhakaza,

kuvame ukuthula, ize ingabikho inyanga.

₈Iyakubusa kusukela elwandle kuze kube selwandle,

kusukela emfuleni kuze kube semikhawulweni yomhlaba.

₉Abakhe ehlane bayakukhothama phambi kwayo;

izitha zayo zizakukhotha uthuli.

₁₀Amakhosi aseTharishishi naweseziqhingini ayakuletha izipho;

amakhosi aseSheba naseSeba ayakwethula izipho.

₁₁Onke amakhosi ayakuziwisa phambi kwayo;

zonke izizwe ziyakuyikhonza.

₁₂Ngokuba iyakukhulula ompofu ozikhalela kuyo,

nohluphekayo ongenamsizi.

₁₃Iyakuhawukela odangeleyo nompofu;

iyakusindisa imiphefumulo yabampofu.

₁₄Iyakukhulula umphefumulo wabo okhahlweni nasendluzuleni;

igazi labo liyakuba yigugu emehlweni ayo.

₁₅Iyakuphila, bayinike igolide laseSheba,

bayithandazele njalo,

bayibusise lonke usuku.

₁₆Kuyakuba khona inala kakolweni ezweni

esiqongweni sezintaba;

ukudla kwalo kuyakuhashazela njengeLebanoni;

abemizi bayakukhahlela njengotshani bomhlaba.

₁₇Igama layo liyakuma kuze kube phakade;

igama layo liyakuxhanta,

lisekhona ilanga;

bayakuzibusisa ngayo;

bonke abezizwe bayakuthi ibusisiwe.

₁₈Makabongwe uJehova uNkulunkulu, uNkulunkulu ka-Israyeli,

onguye yedwa owenza izimangaliso.

₁₉Malibongwe igama lakhe lenkazimulo kuze kube phakade,

umhlaba wonke ugcwale inkazimulo yakhe. Amen, Amen.

₂₀Imikhuleko kaDavide indodana kaJese isaphelile.

₁Impela uNkulunkulu umnene ku-Israyeli,

kubo abanenhliziyo ehlanzekileyo.

₂Kepha mina, izinyawo zami zicishe zakhubeka;

kwaba kancane ukuba izinyathelo zami zishelele.

₃Ngokuba ngaba nomhawu ngabazidlayo,

lapho ngibona ukubusa kwababi.

₄Ngokuba abanabuhlungu kuze kube sekufeni kwabo,

namandla abo aqinile.

₅Abahlupheki njengabanye abantu;

abahlushwa njengabanye abantu.

₆Ngakho-ke iqholo lingumnaka wabo;

indluzula ibembesa njengengubo.

₇Amehlo abo aphinqekile ngokunona;

imicabango yenhliziyo iyachichima.

₈Bayaklolodela; ebubini bakhuluma ngokukhahla;

bakhuluma besekuphakamemi.

₉Umlomo wabo bawuphakamisela ezulwini;

ulimi lwabo luhambela emhlabeni.

₁₀Ngakho-ke isizwe sakhe sibuyela lapha;

amanzi amaningi bazimuncela wona.

₁₁Bathi: “UNkulunkulu wazi kanjani na?

Imbala kukhona ukwazi koPhezukonke na?”

₁₂Bheka, laba bayibo ababi;

bazinza njalo; bandisa imfuyo.

₁₃Impela ngiyihlanzele ize inhliziyo yami,

ngahlamba izandla zami ngingenacala,

₁₄ngokuba ngahlushwa usuku lonke;

kwasa ngijeziswa.

₁₅Uma bengithe,

ngizakukhuluma kanjalo,

bheka, ngabe ngisikhohlisile isizukulwane sabantwana bakho.

₁₆Kwathi ngicabanga ukuba ngikuqonde lokho,

kwaba luhlupho emehlweni ami,

₁₇ngaze ngangena endlini engcwele kaNkulunkulu,

ngaqaphelisisa ukugcina kwabo.

₁₈Impela ubabeka ezindaweni ezibushelezi;

ubawisa babe yincithakalo.

₁₉Maye, bachithwa ngokuphazima kweso!

Bashona, babhubha benovalo.

₂₀Njengephupho ekuphaphameni, Nkosi,

uyakudelela umfanekiso wabo ekuvukeni kwakho.

₂₁Kwathi inhliziyo yami yaba nomunyu,

kuhlaba ezinsweni zami,

₂₂ngaba yisiphukuphuku,

angaqonda lutho;

ngaba yisilwane kuwe.

₂₃Kepha mina ngiyakube ngikuwe njalo;

ungibambile ngesandla sami sokunene.

₂₄Uyakungihola ngesiluleko sakho,

andukuba ungamukele enkazimulweni.

₂₅Nginobani ezulwini na?

Uma nginawe, angifuni lutho emhlabeni.

₂₆Inyama yami nenhliziyo yami iyaphela;

nokho uNkulunkulu uyidwala lenhliziyo yami

nesabelo sami kuze kube phakade.

₂₇Ngokuba bheka, abakude nawe bayakubhubha;

uyabachitha bonke abahlubukayo kuwe ngokuphinga.

₂₈Kepha mina kungilungele ukusondela kuNkulunkulu;

ngenzile iNkosi uJehova ibe yisiphephelo sami,

ukuze ngishumayele zonke izenzo zakho.

₁Nkulunkulu, usilahleleni kuze kube phakade na?

Intukuthelo yakho ithunqelelani izimvu zedlelo lakho na?

₂Khumbula ibandla lakho owalizuza endulo,

owalikhulula ukuba libe yisifunda sefa lakho,

nentaba yaseSiyoni ohlala kuyo.

₃Lulamisela izinyawo zakho emidilikweni yaphakade;

isitha sone konke endlini engcwele.

₄Izitha zakho zibhongile phakathi kwendlu yakho yokubuthana,

zamisa izimpawu zazo zaba yizimpawu.

₅Zaba sengathi abantu baphakamisa amazembe

emithini eminyeneyo.

₆Konke okubaziweyo kwayo

sezikuphohloze ngembazo nangesando.

₇Zayokhela indlu yakho engcwele;

indlu yegama lakho zayidumaza kwaze kwaba phansi emhlabathini.

₈Zathi enhliziyweni yazo: “Masibachithe kanyekanye,”

zashisa zonke izindlu zokubuthana zikaNkulunkulu ezweni.

₉Izimpawu zethu asiziboni;

akusekho mprofethi;

akakho kithina owaziyo ukuthi koze kube nini.

₁₀Nkulunkulu, koze kube nini umcindezeli ethuka,

isitha sihlambalaza igama lakho njalo, na?

₁₁Usihoshelani isandla sakho,

isandla sakho sokunene, na?

Sihoshe esifubeni sakho, uzichithe.

₁₂Nokho uNkulunkulu uyiNkosi yami kwaphakade

eyenza insindiso emhlabeni.

₁₃Nguwena owahlukanisa ulwandle ngamandla akho,

wachofoza amakhanda ezilo ezesabekayo emanzini.

₁₄Nguwena owaphohloza amakhanda kaLeviyathani,*

wamnika abe ngukudla kwezidalwa zasehlane.

₁₅Nguwena owaqhamukisa isiphethu nomfudlana;

nguwe owomisa imifula egobhoza njalo.

₁₆Usuku ngolwakho,

nobusuku ngobakho;

nguwena owenza ukukhanya nelanga.

₁₇Nguwena owamisa yonke imikhawulo yomhlaba;

nguwe owenza ihlobo nobusika.

₁₈Khumbula lokhu, Jehova,

ukuthi isitha sithukile,

nesizwe esinobuwula silihlambalazile igama lakho.

₁₉Ungawunikeli umphefumulo wejuba lakho esilwaneni;

ungakhohlwa ukuphila kwezihlupheki zakho njalo.

₂₀Khumbula isivumelwano,

ngokuba izindawo ezimnyama zezwe zigcwele izindlu zobudlova.

₂₁Ocindezelweyo makangabuyi ejabhile;

ohluphekayo nompofu mababonge igama lakho.

₂₂Vuka, Nkulunkulu,

uyimele indaba yakho;

khumbula ukuthi uklolodelwa yiziwula usuku lonke.

₂₃Ungakhohlwa izwi lezitha zakho,

ukuxokozela kwabakuvukelayo okwenyukela njalonjalo.