Bible Reading Plan – Day 106

₁Phikisana, Jehova,

nabaphikisana nami,

ulwe nabo abalwa nami.

₂Thatha ihawu nesihlangu,

uvuke, ungisize.

₃Hosha umkhonto, uvimbe indlela kwabangizingelayo;

yisho kuwo umphefumulo wami, uthi:

“Mina ngiyinsindiso yakho.”

₄Mabajabhe, bahlazeke abafuna umphefumulo wami;

mababuyiselwe emuva, bajabhiswe abangisongelayo.

₅Mababe njengamakhoba emoyeni,

ingelosi kaJehova ibadudule.

₆Indlela yabo mayibe mnyama, ibebushelezi,

ingelosi kaJehova ibaxoshe.

₇Ngokuba bangenzele ngasesitha igebe lenetha labo, kungekho sici,

bembele umphefumulo wami umgodi, kungekho cala.

₈Ukubhujiswa makumehlele engazelele;

inetha lakhe alibeke ngasesitha malimbambe yena;

makawele kulo kube ngukubhujiswa kwakhe.

₉Khona umphefumulo wami uzakwethaba kuJehova,

uthokoze ngokusindisa kwakhe.

₁₀Onke amathambo ami azakuthi:

“Jehova, ngubani onjengawe,

wena okhulula ohluphekayo,

yebo, ohluphekayo nompofu komphangayo, na?”

₁₁Ofakazi abangalungile bayasukuma,

babuza kimi engingakwaziyo.

₁₂Bangiphindisela okubi ngokuhle;

umphefumulo wami bawusozisele.

₁₃Kanti ekuguleni kwabo mina ngangembethe ezokuzila;

umphefumulo wami ngawuhlupha ngokuzila ukudla;

umkhuleko wami wabuyela esifubeni sami.

₁₄Ngahamba kungathi bekungumngane wami nomfowethu;

njengokhalela unina ngakhothama ngokulila.

₁₅Kepha ekuweni kwami bahlekisa ngami, babuthana ndawonye;

abashayi engingabaziyo bangibunganyela;

badumaza bengayeki.

₁₆Njengezinteli ezikhonzela ucezu lwesinkwa

bangigedlela amazinyo.

₁₇Nkosi, lokho uzakukubukela kuze kube nini na?

Sindisa umphefumulo wami ekubhubhiseni kwabo,

ukuphila kwami ezingonyameni ezingamabhongo.

₁₈Ngizakukubonga ebandleni elikhulu,

ngikudumise phakathi kwabantu abaningi.

₁₉Mabangajabuli ngami abayizitha zami bengenasizathu;

mabangaqwayizi amehlo abangizonda ngeze.

₂₀Ngokuba abakhulumi ukuthula,

kepha baqamba amazwi enkohliso ngabazithuleleyo emhlabeni.

₂₁Yebo, bangikhamisela kakhulu umlomo wabo, bathi:

“Ashila, ashila, iso lethu liyabona!”

₂₂Uyakubona, Jehova; mawungathuli;

Nkosi, mawungabi kude nami.

₂₃Vuka, usukumele ukwahlulelwa kwami,

Nkulunkulu wami, Nkosi yami,

umele icala lami.

₂₄Ngahlulele ngokulunga kwakho,

Jehova Nkulunkulu wami;

mabangajabuli ngami.

₂₅Mabangasho enhliziyweni yabo ukuthi:

“He, kwaya ngesifiso sethu!”

Mabangasho ukuthi: “Simgwinyile.”

₂₆Mabajabhe,

babe namahloni bonke abajabula ngokuhlupheka kwami;

abazikhukhumeza ngami mabembathiswe ukujabha nendumazo.

₂₇Mabethabe, bajabule abathokoza ngokulunga kwami;

mabathi njalonjalo:

“Makadunyiswe uJehova

othokoza ngenhlanhla yenceku yakhe.”

₂₈Ulimi lwami luzakushumayela ngokulunga kwakho,

usuku lonke ngodumo lwakho.

₁Inkulumo yesiphambeko komubi,

isekujuleni kwenhliziyo yami, ithi:

Akukho ukumesaba uNkulunkulu phambi kwamehlo akhe.

₂Ngokuba ukonakala kwakhe kuyamthopha emehlweni akhe,

ukuze kungafunyanwa,

azondeke ngakho.

₃Amazwi omlomo wakhe angukona nenkohliso;

ukuyekile ukuhlakanipha nokwenza okulungileyo.

₄Uceba okubi ecansini lakhe,

uzimisa endleleni engalungile;

okubi kakwenyanyi.

₅Jehova, ububele bakho bufinyelela ezulwini,

nokuthembeka kwakho kuze kube semafwini.

₆Ukulunga kwakho kunjengezintaba ezinkulukazi,

ukwahlulela kwakho kulutwa olukhulu;

usindisa abantu nezilwane, Jehova.

₇Ububele bakho, Nkulunkulu, buyigugu elingaka;

abantwana babantu bakhosela ethunzini lamaphiko akho.

₈Bayakusutha ngamanoni endlu yakho,

ubaphuzise okomfula wokuthokoza kwakho.

₉Ngokuba ukuwe umthombo wokuphila;

ekukhanyeni kwakho siyakubona ukukhanya.

₁₀Mawume umusa wakho kubo abakwaziyo,

nokulunga kwakho kubo abaqotho ngenhliziyo.

₁₁Unyawo loziqhenyayo malungangifikeli;

nesandla somubi masingangixoshi.

₁₂Bheka, bawile abenza okubi;

bawiswe phansi, abasenakuvuka.

₁Ungazikhathazi ngababi,

ungabi namhawu ngabenza okungalungile.

₂Ngokuba bayakusikwa masinyane njengotshani,

babune njengemithana eluhlaza.

₃Themba kuJehova,

wenze okulungileyo;

hlala ezweni, uzondle ngokukholeka;

₄zithokozise ngoJehova,

yikhona ezakukunika okufiswa yinhliziyo yakho.

₅Nikela indlela yakho esandleni sikaJehova, umethembe;

yena uzakukwenza.

₆Uzakuhlalukisa ukulunga kwakho njengokukhanya,

nokufanele wena njengemini.

₇Thula phambi kukaJehova,

ulindele yena;

ungakhathazeki ngonenhlanhla endleleni yakhe,

ngomuntu osongoza amacebo amabi.

₈Pheza ukuthukuthela;

yeka ulaka, ungakhathazeki;

kubanga ukona nje.

₉Ngokuba ababi bazakuchithwa,

kepha abalindela uJehova bazakudla ifa lomhlaba.

₁₀Kuse ngumzuzwana, omubi angabe esabakho;

kuyakuthi lapho uhlola indawo yakhe,

uyakube engasekho.

₁₁Kepha abathobekileyo bazakulidla ifa lomhlaba,

bathokoze ngokuthula okukhulu.

₁₂Omubi uyamsongela olungileyo ngokubi,

amgedlele amazinyo.

₁₃INkosi iyakumhleka,

ngokuba iyabona ukuthi usuku lwakhe luyeza.

₁₄Ababi bahosha inkemba,

bansale umnsalo wabo

ukuba bamwise phansi ohluphekileyo nompofu,

babulale abandlela ilungile.

₁₅Inkemba yabo izakungena kweyabo inhliziyo,

iminsalo yabo yaphulwe.

₁₆Okuncane anakho olungileyo kungcono

kunemfuyo yababi abaningi.

₁₇Ngokuba izingalo zababi ziyakwaphulwa,

kepha uJehova uyabaphasa abalungileyo.

₁₈UJehova uyazazi izinsuku zabaqotho;

ifa labo liyakuma kuze kube phakade.

₁₉Abayikujabha esikhathini esibi;

bayakusutha ezinsukwini zendlala.

₂₀Ngokuba ababi bayakubhubha;

izitha zikaJehova zinjengobuhle bamadlelo:

ziyakunyamalala,

zinyamalale njengentuthu.

₂₁Omubi uyatsheleka, angabuyiseli;

kepha olungileyo unesihawu, aphane.

₂₂Ngokuba ababusisiweyo bakhe bazakulidla ifa lomhlaba,

kepha abaqalekiswa nguye bazakuchithwa.

₂₃Izinyathelo zomuntu ziqiniswa nguJehova;

uyayithanda indlela yakhe.

₂₄Noma ekhubeka, akayikuwa phansi,

ngokuba uJehova uphasa isandla sakhe.

₂₅Kade ngimusha, manje sengimdala;

angizange ngibone olungileyo eshiyiwe

nenzalo yakhe iphanza ukudla.

₂₆Usuku lonke uyahawukela,

atsheleke, nenzalo yakhe iyisibusiso.

₂₇Deda kokubi, wenze okuhle,

uyakuhlala kuze kube phakade.

₂₈Ngokuba uJehova uthanda ukulunga,

akabashiyi abangcwele bakhe;

bayalondolozwa kuze kube phakade,

kepha inzalo yababi iyachithwa.

₂₉Abalungileyo bazakudla ifa lomhlaba,

bahlale kuwo njalonjalo.

₃₀Umlomo wolungileyo ushumayela ukuhlakanipha;

ulimi lwakhe lukhuluma ukulunga.

₃₁Umthetho kaNkulunkulu wakhe usenhliziyweni yakhe;

izinyathelo zakhe azisheleli.

₃₂Omubi uqaphela olungileyo,

ufuna ukumbulala.

₃₃UJehova akayikumnikela esandleni sakhe;

akayikumlahla lapho ahlulelwa khona.

₃₄Lindela uJehova, ulonde indlela yakhe;

uzakukuphakamisa, udle ifa lomhlaba,

ubukele lapho ababi bechithwa khona.

₃₅Ngambona omubi oyisidlova

ezenabisile njengomuthi oluhlaza ogxilileyo;

₃₆kwathi lapho umuntu edlula, bheka, wayengasekho;

ngamfuna, kepha akabe esafunyanwa.

₃₇Mbhekisise ongasolekiyo,

umbone oqotho;

ngokuba umuntu wokuthula, ukugcina kwakhe kuhle.

₃₈Kepha abaphambukayo bayakubhujiswa bonke;

isikhathi sababi siyakunqunywa.

₃₉Ukusindiswa kwabalungileyo kuvela kuJehova;

uyinqaba yabo esikhathini sokuhlupheka.

₄₀UJehova uyabasiza, abakhulule;

ubakhulula kwababi, abasindise,

ngokuba bayamethemba.

₁Jehova, ungangijezisi ngentukuthelo yakho,

ungangishayi ngolaka lwakho.

₂Ngokuba imicibisholo yakho ingihlabile;

isandla sakho singicindezele kanzima.

₃Akukho ukuphila enyameni yami ngenxa yentukuthelo yakho;

akukho ukuthula emathanjeni ami ngenxa yesono sami.

₄Ngokuba iziphambeko zami zeqile phezu kwekhanda lami;

njengomthwalo osindayo ziyangisinda.

₅Izilonda zami ziyanuka,

zichicha ubovu

ngenxa yobuwula bami.

₆Ngikhonkobele, ngithotshisiwe kakhulu;

usuku lonke ngihamba ngilila.

₇Ngokuba ukhalo lwami lutshutshumba kakhulu;

akukho ukuphila enyameni yami.

₈Ngibuthakathaka, ngidubekile kabi;

ngiyakhala ngenxa yokugqiha kwenhliziyo yami.

₉Nkosi, ukufisa kwami konke kuphambi kwakho;

ukububula kwami akufihlekile kuwe.

₁₀Inhliziyo yami iyagquma kakhulu;

amandla ami angishiyile,

ngisho nokukhanya kwamehlo ami akusekho kimi.

₁₁Abathandekayo bami nabahlobo bami

bemi kude nokuhlupheka kwami;

abakwethu bemi kude laphaya.

₁₂Abafuna umphefumulo wami bayangicupha;

abafuna ukungilimaza bakhuluma okubi,

bazindla inkohliso usuku lonke.

₁₃Mina kodwa nginjengesithulu, angizwa;

nginjengesimungulu esingavuli umlomo waso.

₁₄Yebo, nginjengomuntu ongezwayo;

akukho ukuphikisa emlonyeni wakhe.

₁₅Ngokuba ngithemba wena Jehova;

wena Nkosi Nkulunkulu wami uzakuphendula.

₁₆Ngokuba ngithe:

“Funa bajabule ngami,

ekusheleleni konyawo lwami bazikhukhumeze ngami.”

₁₇Ngokuba ngiseduze kokuwa,

nobuhlungu bami buphambi kwami ngezikhathi zonke.

₁₈Ngokuba ngiyabika ukona kwami;

ngiyadabuka ngesono sami.

₁₉Kepha izitha zami ziphilile, zinamandla;

baningi abangizonda ngeze.

₂₀Abaphindisela okubi ngokuhle bamelene nami,

ngokuba ngilandela okulungileyo.

₂₁Ungangishiyi, Jehova;

Nkulunkulu wami, ungabi kude nami.

₂₂Phuthuma, ungisize,

Nkosi, nsindiso yami.