Bible Reading Plan – Day 105

₁Mnikeni uJehova,

nina madodana kaNkulunkulu,

mnikeni uJehova udumo namandla.

₂Mnikeni uJehova udumo lwegama lakhe,

nikhuleke kuJehova emvunulweni engcwele.

₃Izwi likaJehova liphezu kwamanzi,

uNkulunkulu wenkazimulo uyaduma;

uJehova uphezu kwamanzi amakhulu.

₄Izwi likaJehova linamandla;

izwi likaJehova linenkazimulo.

₅Izwi likaJehova liyaphula imisedari;*

uJehova waphula imisedari yaseLebanoni.

₆ILebanoni ulitshekulisisa okwenkonyane,

neSiriyoni njengethole lenyathi.

₇Izwi likaJehova lidabula amalangabi omlilo.

₈Izwi likaJehova lizamazamisa ihlane;

uJehova uzamazamisa ihlane laseKadeshi.

₉Izwi likaJehova liphunzisa izimbabala;

lihluba amahlathi;

nasethempelini lakhe konke kuthi: “Udumo!”

₁₀UJehova wayehlezi ebusa phezu kukazamcolo;

uJehova uhlezi eyinkosi kuze kube phakade.

₁₁UJehova uzakunika abantu bakhe amandla;

uJehova uzakubusisa abantu bakhe ngokuthula.

₁Ngiyakuphakamisa, Jehova,

ngokuba ungikhuphulile;

awuvumanga ukuba izitha zami zijabule phezu kwami.

₂Jehova Nkulunkulu wami,

ngakhala kuwe, wangiphilisa.

₃Jehova,

umphefumulo wami uwukhuphulile endaweni yabafileyo,

wangiphilisa phakathi kwabashona emgodini.

₄Dumisani uJehova nina enimkhonzayo,

nibonge igama lakhe elingcwele.

₅Ngokuba ukuthukuthela kwakhe kuba ngokomzuzwana nje,

umusa wakhe uba ngowokuphila konke;

kusihlwa kungena ukukhala,

ekuseni ukujabula.

₆Mina ngithe ekubuseni kwami:

Angisoze nganyakaziswa naphakade.

₇Jehova,

ngomusa wakho ubuwenzile ukuba iqine intaba yami;

wabufihla ubuso bakho,

ngase ngithuthumela.

₈Ngakhala kuwe Jehova;

nganxusa kuJehova, ngathi:

₉“Kukhona nzuzoni egazini lami

nasekushoneni kwami egebeni na?

Uthuli luzakukudumisa yini,

lushumayele iqiniso lakho, na?

₁₀Yizwa, Jehova, ube nomusa kimi;

Jehova, yiba ngumsizi wami.”

₁₁Waphendula ukukhala kwami kwaba ngukusina;

wangikhumula izingubo zami zokulila,

wangembathisa ukujabula,

₁₂ukuze umphefumulo wami ukudumise, ungathuli;

Jehova Nkulunkulu wami, ngizakukubonga kuze kube phakade.

₁Ithemba lami ngilibeka kuwe Jehova;

mawungangijabhisi naphakade;

ngikhulule ngokulunga kwakho.

₂Beka kimi indlebe yakho,

ungophule masinyane,

ube yidwala eliqinileyo kimi,

indlu yezinqaba yokungisindisa.

₃Ngokuba wena uyidwala lami nenqaba yami;

ngenxa yegama lakho uyakungihola,

ungiqondise.

₄Uyakungikhipha enetheni abangicuphe ngalo,

ngokuba wena uyinqaba yami.

₅Ngibeka umoya wami esandleni sakho;

uyangihlenga, Jehova Nkulunkulu othembekayo.

₆Ngiyabazonda abakhonza onkulunkulu abayize,

kepha mina ngithemba uJehova.

₇Ngizakwethaba,

ngijabule ngomusa wakho,

ngokuba ukubonile ukuhlupheka kwami,

wazinaka izinsizi zomphefumulo wami;

₈awunginikelanga esandleni sesitha,

wazimisa izinyawo zami endaweni ebanzi.

₉Yiba nomusa kimi, Jehova,

ngokuba ngiyahlupheka;

iso lami liyafa usizi,

nomphefumulo wami nomzimba wami.

₁₀Ngokuba ukuphila kwami kuphelela osizini,

neminyaka yami ekububuleni;

amandla ami aphelile ngokona kwami,

namathambo ami ancunzekile.

₁₁Ngenxa yezitha zami zonke sengaba yisihlamba,

ikakhulu kubakhelwane bami ngaba ngobesabisayo abangane bami;

abangibona endleleni bayangibalekela.

₁₂Sengakhohlakala enhliziyweni njengofileyo;

nginjengesitsha esifileyo.

₁₃Ngokuba ngikuzwile ukuhleba kwabaningi

ngokwesabisayo nxazonke;

besenza icebo ngami

bahlosa ukubulala umphefumulo wami.

₁₄Kepha mina ngithemba wena Jehova;

ngithi: “UnguNkulunkulu wami.”

₁₅Izikhathi zami zisesandleni sakho;

ngikhulule esandleni sezitha zami nakwabangizingelayo.

₁₆Khanyisa ubuso bakho phezu kwenceku yakho;

ngisindise ngomusa wakho.

₁₇Jehova, mawungangijabhisi,

ngokuba ngiyakubiza;

mabajabhiswe ababi,

bathuliswe endaweni yabafileyo.

₁₈Mazithuliswe izindebe zamanga ezijivaza olungileyo

ngokuzidla nangokweyisa.

₁₉Yeka ubukhulu bomusa wakho

obagodlele wona abakwesabayo,

owenzele bona ababalekela kuwe,

phambi kwabantwana babantu.

₂₀Ubafihla ekusithekeni kobuso bakho

ngenxa yezigungu zabantu;

ubalondoloza edokodweni

ekuxabaneni kwezilimi.

₂₁Makabongwe uJehova,

ngokuba ungenzele umusa wakhe omangalisayo

emzini oqinileyo.

₂₂Mina-ke ngithe ovalweni lwami:

Ngixoshiwe emehlweni akho;

nokho walizwa izwi lokunxusa kwami ekukhaleni kwami kuwe.

₂₃Mthandeni uJehova nina nonke enimkhonzayo;

uJehova uyabalondoloza abakholekileyo,

amphindisele kakhulu ozidlayo.

₂₄Qinani, inhliziyo yenu ibe nesibindi,

nina nonke enithemba uJehova.

₁Ubusisiwe osiphambeko sakhe sithethelelwe,

osono sakhe sisibekelwe.

₂Ubusisiwe umuntu uJehova angambaleli isiphambeko,

kungekho nkohliso emoyeni wakhe.

₃Kwathi ngithule, amathambo ami aguga

ngokububula kwami usuku lonke.

₄Ngokuba imini nobusuku isandla sakho sasinzima phezu kwami,

uloya lwami loma njengokomisa kwehlobo. Sela*

₅Ngasivuma isono sami kuwe,

angisifihlanga isiphambeko sami;

ngathi: “Ngizakuzivuma izono zami kuJehova,”

wena wathethelela icala lesono sami. Sela*

₆Ngakho-ke yilowo nalowo olungileyo makakhuleke kuwe

ngesikhathi sokukufumana;

impela kuyakuthi lapho amanzi amakhulu ekhukhula,

angafinyeleli kuye.

₇Wena uyindawo yami yokucasha;

uyangilondoloza ngingahlupheki;

ungiphahla ngenjabulo yokukhululwa. Sela*

₈Ngizakukufundisa, ngikubonise indlela ozakuhamba ngayo;

ngizakukululeka ngeso lami.

₉Ningabi njengehhashi nembongolo engenangqondo;

umkhala netomu yimvunulo yayo yokuyiqondisa,

uma ingasondeli kuwe.

₁₀Omubi unezinhlupheko eziningi,

kepha othemba uJehova umusa uyakumphahla.

₁₁Jabulani kuJehova, nethabe nina balungileyo,

nethabe nina nonke baqotho ngenhliziyo.

₁Yethabani kuJehova nina balungileyo;

ukudumisa kubafanele abaqotho.

₂Bongani uJehova ngehabhu;*

mdumiseni ngogubhu oluzintambo ziyishumi.

₃Mhubeleni ihubo elisha,

nibethe kahle ngenhlokomo.

₄Ngokuba izwi likaJehova lilungile;

zonke izenzo zakhe ziyakholeka.

₅Uthanda ukulunga nokwahlulela;

umhlaba ugcwele umusa kaJehova.

₆Ngezwi likaJehova izulu lenziwa,

namabandla onke ngomoya womlomo wakhe.

₇Ubuthela ndawonye amanzi olwandle njengenqwaba;

uwabeka ajulileyo ezinqolobaneni.

₈Umhlaba wonke mawumesabe uJehova;

bonke abakhileyo ezweni mabathuthumele phambi kwakhe.

₉Ngokuba wakhuluma, kwaba khona;

wayaleza, kwema khona.

₁₀UJehova uchitha icebo labezizwe;

uphuthisa imicabango yabantu.

₁₁Icebo likaJehova limi phakade,

nemicabango yenhliziyo yakhe ezizukulwaneni ngezizukulwane.

₁₂Sibusisiwe isizwe esiNkulunkulu waso nguJehova,

isizwe asikhethileyo sibe yifa lakhe.

₁₃UJehova uyabheka esezulwini;

uyababona bonke abantwana babantu.

₁₄Esendaweni lapho ehlala khona

uyababuka bonke abakhileyo ezweni,

₁₅yena owadala izinhliziyo zabo bonke,

oqaphela zonke izenzo zabo.

₁₆Ayikho inkosi esindiswa ngobuningi bempi yayo;

isiqhwaga asikhululwa ngobukhulu bamandla aso.

₁₇Ihhashi liyize ekusindiseni,

alihlangulisi ngobukhulu bamandla alo.

₁₈Bheka, iso likaJehova liphezu kwabamesabayo,

abathemba umusa wakhe,

₁₉ukuba akhulule umphefumulo wabo ekufeni,

abaphilise endlaleni.

₂₀Umphefumulo wethu ulindela uJehova;

ungukusiza kwethu nesihlangu sethu.

₂₁Ngalokho inhliziyo yethu ithokoza ngaye,

ngokuba sithemba igama lakhe elingcwele.

₂₂Umusa wakho, Jehova,

mawube phezu kwethu,

njengalokhu sithemba wena.

₁Ngiyakumbonga uJehova ngezikhathi zonke;

ukudunyiswa kwakhe kuyakuba semlonyeni wami njalonjalo.

₂Umphefumulo wami uyakuzibonga ngoJehova;

abathobekileyo bayakukuzwa, bajabule.

₃Mtuseni uJehova kanye nami,

siphakamise igama lakhe kanyekanye.

₄Ngamfuna uJehova, wangiphendula;

wangikhulula kulo lonke uvalo lwami.

₅Babheka kuye phezulu, bakhanya;

ubuso babo abusoze bajabha.

₆Nasi isihlupheki esakhala,

uJehova wezwa,

wasikhulula kuzo zonke izinhlupheko zaso.

₇Ingelosi kaJehova iyamisa nxazonke kubo abamesabayo, ibakhulule.

₈Yizwani nibone ukuthi uJehova muhle;

ubusisiwe lowo muntu ophephela kuye.

₉Mesabeni uJehova nina bangcwele bakhe,

ngokuba abasweli lutho abamesabayo.

₁₀Amabhongo ezingonyama ayaswela, alambe,

kepha abafuna uJehova abayikuswela lutho oluhle.

₁₁Zanini, bantwana, ningilalele;

ngizakunifundisa ukumesaba uJehova.

₁₂Ngumuphi umuntu othanda ukuphila,

ofisa izinsuku zokuba abone okuhle na?

₁₃Londa ulimi lwakho kokubi,

nezindebe zakho kukho ukukhuluma inkohliso.

₁₄Deda kukho okubi, wenze okuhle;

funa ukuthula, ukujonge.

₁₅Amehlo kaJehova akubo abalungileyo;

izindlebe zakhe zikukho ukukhala kwabo.

₁₆Ubuso bukaJehova bumelene nabenza okubi

ukuba achithe ukukhunjulwa kwabo emhlabeni.

₁₇Labo bayakhala, uJehova uyezwa;

uyabakhulula kuzo zonke izinhlupheko zabo.

₁₈UJehova useduze nabo abanenhliziyo eyaphukileyo;

uyabasindisa abanomoya odabukileyo.

₁₉Ziningi izinhlupheko zolungileyo,

kepha uJehova uyamkhulula kuzo zonke.

₂₀Uyawagcina onke amathambo akhe;

alaphulwa nelilodwa kuwo.

₂₁Okubi kuyakumbulala omubi;

abazonda olungileyo bayakulahlwa ngecala.

₂₂UJehova ukhulula umphefumulo wezinceku zakhe;

akakho kwabamethembayo oyakuba necala.