Bible Reading Plan – Day 107

₁Ngithe: “Ngizakulinda izindlela zami

ukuba ngingoni ngolimi lwami;

ngizakugcina umlomo wami ngesifonyo,

omubi esekhona phambi kwamehlo ami.”

₂Ngabindela impela, ngathula nakukho okuhle;

kwavuswa ubuhlungu bami.

₃Inhliziyo yami yavutha phakathi kwami;

kwaphembeka umlilo ngisazindla;

ngakhuluma ngolimi lwami.

₄“Jehova, ngazise ukuphela kwami,

nesilinganiso sezinsuku zami ukuba siyini;

mangazi ukuthi ngingodlulayo.

₅Bheka, izinsuku zami wazenza zaba ngangobubanzi besandla;

imihla yokuphila kwami ayilutho kuwe;

impela yilowo nalowo muntu ungumoya nje,

noma eqine kangakanani. Sela*

₆“Impela umuntu uhamba njengesithunzi nje;

impela uzikhathaza ngokuyize nje;

unqwabela imfuyo,

kepha akazi ukuthi ngubani ozakuyibutha.

₇“Kalokhu-ke, Nkosi,

ngilindele ntoni na?

Ithemba lami likuwe.

₈Ngisindise kuzo iziphambeko zami,

ungangenzi isithuko sesiwula.

₉Ngiyathula, angivuli umlomo wami;

ngokuba nguwe okwenzileyo.

₁₀Susa kimi ukushaya kwakho,

ngokuba ngiyaqedwa ngukushaywa yisandla sakho.

₁₁Nxa ulaya umuntu ngesijeziso ngenxa yeziphambeko,

ubuhle bakhe ubenza buphele njengenundu;

yilowo nalowo muntu ungumoya nje. Sela*

₁₂“Yizwa umkhuleko wami, Jehova,

ulalele ukumemeza kwami;

ungathuli ngezinyembezi zami,

ngokuba ngingumfokazi kuwe;

ngiyisihambi njengokhokho bami bonke.

₁₃Yeka ukungibuka, ngize ngincibilike,

ngingakamuki lapha,

ngingabe ngisabakho.”

₁Bengilindela uJehova;

wayesezikhothamisela kimi,

wezwa ukukhala kwami.

₂Wangikhipha emgodini wokubhujiswa odakeni lobishi,

wamisa izinyawo zami edwaleni,

waqinisa izinyathelo zami.

₃Wabeka igama elisha emlonyeni wami,

igama lokubonga uNkulunkulu wethu;

abaningi bayakukubona, besabe,

bamethembe uJehova.

₄Ubusisiwe umuntu obeka ithemba lakhe kuJehova,

ongaphendukeli kwabazidlayo nakwabaphambukela emangeni.

₅Jehova Nkulunkulu wami,

ziningi izimangaliso zakho ozenzileyo,

nezizindlo zakho ngathi;

akukho okungafaniswa nawe;

uma ngiyilanda, ngiyisho,

miningi kunokuba ibalwe.

₆Umhlatshelo nomnikelo wokudla awuwuthandi;

izindlebe zami uzibhobozile;

umnikelo wokushiswa nomnikelo wesono awuwubizi.

₇Ngase ngithi: “Bheka, ngiyeza;

encwadini esongwayo kulotshiwe ngami ukuthi:

₈Ngiyathanda ukwenza intando yakho,

Nkulunkulu wami,

nomthetho wakho usenhliziyweni yami.”

₉Ngishumayelile ukulunga ebandleni elikhulu;

bheka, angizivalanga izindebe zami;

Jehova, wena uyakwazi.

₁₀Ukulunga kwakho angikuthukusanga enhliziyweni yami;

ngashumayela ukukholeka kwakho nensindiso yakho;

umusa wakho neqiniso lakho angikufihlelanga ibandla elikhulu.

₁₁Wena Jehova ungangigodleli ububele bakho;

umusa wakho neqiniso lakho makungilonde njalo.

₁₂Ngokuba izinhlupheko ezingenakubalwa zingihaqile,

iziphambeko zami zingificile,

angaze ngaba nakubona;

ziningi kunezinwele zekhanda lami;

inhliziyo yami ingishiyile.

₁₃Makuthandeke kuwe Jehova ukuba ungikhulule;

Jehova, mawuphuthume ungisize.

₁₄Mabajabhe, babe namahloni bonke

abafuna umphefumulo wami ukuba bawuhlwithe;

abafisa ukulimala kwami

mababuyiselwe emuva, bajabhiswe.

₁₅Mabashaqeke ngenxa yehlazo labo abathi kimi:

“Ashila, ashila!”

₁₆Mabethabe, bajabule kuwe bonke abakufunayo;

abathanda insindiso yakho mabasho

njalo, bathi:

“Makadunyiswe uJehova.”

₁₇Noma ngihlupheka, ngimpofu,

iNkosi iyanginaka;

wena ungumsizi wami noMsindisi wami;

Nkulunkulu wami, mawungalibali.

₁Ubusisiwe onakekela ohluphekayo;

uJehova uyakumsindisa osukwini olubi.

₂UJehova uyakumlondoloza, amphilise;

uyakubusiswa emhlabeni;

awuyikumnikela entandweni yezitha zakhe.

₃UJehova uyakumphasa ecansini egula;

wena uyakuguqula ukhukho lwakhe ekuguleni kwakhe.

₄Mina ngithi: “Jehova, ngihawukele,

uphulukise umphefumulo wami, ngokuba ngonile kuwe.”

₅Izitha zami zikhuluma okubi ngami, zithi:

“Uzakufa nini, igama lakhe lichitheke, na?”

₆Nalapho kuza ozongibona,

ukhuluma amanga;

inhliziyo yakhe izibuthela ukonakala,

abesephuma akhulume ngakho.

₇Bonke abangizondayo banyenyezelana ngami:

bangisongozela okubi, bathi:

₈“Into embi inamathele kuye;

olele phansi kasayikululama.”

₉Yebo, nomhlobo wami ebengimethemba,

obedla isinkwa sami,

ungiphakamisele isithende sakhe.

₁₀Kepha wena Jehova, ngihawukele, ungilulamise,

ukuze ngibaphindisele.

₁₁Ngalokho ngiyazi ukuthi uyangithanda,

ngokuba isitha sami asihalalisi phezu kwami.

₁₂Mina uyangimisa ebuqothweni bami;

uyangibeka phambi kobuso bakho kuze kube phakade.

₁₃Makabongwe uJehova uNkulunkulu ka-Israyeli,

kusukela phakade kuze kube phakade.

Amen, Amen.

₁Njengendluzele ilangazelela amanzi emifula,

kanjalo umphefumulo wami ulangazelela wena Nkulunkulu.

₂Umphefumulo wami womela uNkulunkulu,

uNkulunkulu ophilayo;

ngiyakufika nini, ngibonakale phambi kukaNkulunkulu, na?

₃Izinyembezi zami zingukudla kwami imini nobusuku,

ngokuba usuku lonke bathi kimi:

“Uphi uNkulunkulu wakho na?”

₄Ngiyakukhumbula lokhu,

ngithulule umphefumulo wami phakathi kwami,

njengalokho ngangihamba esixukwini ngiya naso endlini kaNkulunkulu

ngenhlokomo yokwethaba nokubonga,

ibandla ligubha umkhosi.

₅Yini ukuba udangale,

mphefumulo wami,

uyaluze phakathi kwami, na?

Methembe uNkulunkulu,

ngokuba ngisezakumdumisa

ngokusindisa kobuso bakhe.

₆Nkulunkulu wami,

umphefumulo wami udangele phakathi kwami;

ngakho-ke ngikhumbula wena ezweni laseJordani,

nakwelamaHermoni,

nasentabeni yaseMisari.

₇Utwa lubizana notwa ekuhlokomeni kwezimpophoma zakho;

onke amadlambi akho namaza akho eqile phezu kwami.

₈Emini uJehova uyaleza umusa wakhe;

ebusuku isihlabelelo sakhe sikimi,

ngikhuleke kuNkulunkulu wokuphila kwami.

₉Ngizakuthi kuNkulunkulu,

iDwala lami:

“Ungikhohlweleni na?

Ngihambelani ngilila,

ngicindezelwe yisitha, na?”

₁₀Kunjengokuphohlozwa kwamathambo ami,

nxa izitha zami zingiklolodela,

zithi kimi usuku lonke:

“Uphi uNkulunkulu wakho na?”

₁₁Yini ukuba udangale,

mphefumulo wami,

uyaluze phakathi kwami, na?

Methembe uNkulunkulu,

ngokuba ngisezakumdumisa yena

oyinsindiso yobuso bami noNkulunkulu wami.

₁Ngahlulele, Nkulunkulu ungimele endabeni yami esizweni esingenamusa,

ngikhulule kumuntu wenkohliso nongenakulunga.

₂Ngokuba wena Nkulunkulu uyisiphephelo sami;

ungilahleleni na?

Ngihambelani ngilila,

ngicindezelwe yisitha, na?

₃Thuma ukukhanya kwakho neqiniso lakho,

kungihole, kungiyise entabeni yakho engcwele

nasezindlini zakho,

₄ngize ngifike kulo i-altare likaNkulunkulu,

kuNkulunkulu wenjabulo yokwethaba kwami,

ngikudumise ngehabhu,* Nkulunkulu, Nkulunkulu wami.

₅Yini ukuba udangale,

mphefumulo wami,

uyaluze phakathi kwami, na?

ngisezakumdumisa yena

oyinsindiso yobuso bami noNkulunkulu wami.

₁Nkulunkulu, sizwile ngezindlebe zethu,

okhokho besilandisa ngesenzo

owasenzayo emihleni yabo,

emihleni yasendulo.

₂Nguwe owabaxosha abezizwe ngesandla sakho,

kepha bona wabatshala;

wazichitha izizwe, kepha bona wabandisa.

₃Ngokuba abalidlanga izwe ngenkemba yabo,

nengalo yabo ayibasindisanga;

kepha kwaba yisandla sakho sokunene, nengalo yakho,

nokukhanya kobuso bakho,

ngokuba wawubathanda.

₄Wena Nkulunkulu uyinkosi yami;

yaleza ukusindiswa kukaJakobe.

₅Ngawe sizakulahla phansi izitha zethu;

ngegama lakho sizakunyathela abasivukelayo.

₆Ngokuba angiwethembi umnsalo wami,

nenkemba yami ayingisindisi;

₇kepha nguwe owasisindisa ezitheni zethu,

wajabhisa abasizondayo.

₈Sizincoma ngoNkulunkulu usuku lonke;

igama lakho siyalibonga kuze kube phakade. Sela*

₉Nokho ususilahlile, wasijabhisa;

awusaphumi nezimpi zethu.

₁₀Usihlehlisela emuva esitheni;

abasizondayo bayaziphangela.

₁₁Usinikezele ukudliwa njengezimvu,

wasihlakaza phakathi kwabezizwe.

₁₂Uthengisa ngesizwe sakho ngokuyize;

awuzuzi lutho ngokubiza ngaso.

₁₃Usenza isihlamba kubakhelwane bethu,

inhlekiso nendumazo kwabasiphahlileyo.

₁₄Usenza isaga kwabezizwe,

banikine ikhanda phakathi kwabantu.

₁₅Usuku lonke ukudunyazwa kwami kuphambi kwami,

namahloni amboza ubuso bami

₁₆ngenxa yoklolodayo nojivazayo,

ngenxa yesitha nomphindiseli.

₁₇Konke lokho kusehlele,

kodwa asikukhohlwanga wena;

asisaphulanga isivumelwano sakho.

₁₈Inhliziyo yethu ayibuyelanga emuva;

izinyathelo zethu aziphambukanga endleleni yakho,

₁₉uze usiphahlaze endaweni yezimpungushe,

usimboze ngethunzi lokufa.

₂₀Uma ngabe sikhohliwe igama likaNkulunkulu wethu,

sazelulela izandla zethu kunkulunkulu mumbe,

₂₁uNkulunkulu ubengayikukuhlola na?

Ngokuba yena uyazazi izimfihlakalo zenhliziyo.

₂₂Yebo, ngenxa yakho sibulawa usuku lonke,

siphathiswa okwezimvu zokuhlatshwa.

₂₃Vuka, Nkosi! Ulaleleni na?

Vuka, ungasilahli njalonjalo.

₂₄Ubufihlelani ubuso bakho,

ukhohlwe ukuhlupheka nokucindezelwa kwethu, na?

₂₅Ngokuba umphefumulo wethu ukhothamele othulini;

umzimba wethu unamathele emhlabathini.

₂₆Sukuma, usisize,

usihlenge ngenxa yomusa wakho.