Bible Reading Plan – Day 104

₁Nkulunkulu wami, Nkulunkulu wami,

ungishiyeleni na?

Ukude namazwi okubububula kwami nokusindiswa kwami.

₂Nkulunkulu wami,

ngikhala emini, kepha awuphenduli,

nasebusuku, ngingabi nakuthula.

₃Kepha wena ungoNgcwele

ohlezi ezibongweni zika-Israyeli.

₄Obaba bethu babekwethemba;

babethemba, wena wabakhulula.

₅Bakhala kuwe, bakhululwa;

bethemba wena, abaze bajabha.

₆Kepha mina ngiyimphethu,

angisiye umuntu;

ngiyisithuko sabantu,

ngiyindelelo yabantu.

₇Bonke abangibonayo bayangiklolodela,

baphukule imilomo,

banikine amakhanda,

₈bathi: “Zinikele kuJehova;

makamsindise, amkhulule,

njengokuba emthanda.”

₉Impela nguwe owangikhipha esizalweni,

wangikhoselisa ngasemabeleni kamame.

₁₀Ngaphonswa phezu kwakho kwasesizalweni;

unguNkulunkulu wami kwasesizalweni sikamame.

₁₁Ungabi kude nami,

ngokuba inhlupheko iseduze,

nosizayo akakho.

₁₂Izinkunzi eziningi zingibunganyele,

ezinamandla zaseBashani zingizungezile.

₁₃Zingikhamisele umlomo wazo

njengengonyama edwengulayo nebhodlayo.

₁₄Ngichithiwe njengamanzi;

onke amathambo ami enyele;

inhliziyo yami injengengcina,

incibilikile phakathi kwezibilini zami.

₁₅Amandla ami omile njengodengezi;

ulimi lwami lunamathela olwangeni lwami;

ungibeka othulini lokufa.

₁₆Ngokuba izinja ziyangibungayela;

umbonda wababi ungizungezile;

izandla zami nezinyawo zami bazibhobozile.

₁₇Ngingabala onke amathambo ami;

bayabukela, bangibuke bengiklibhizela.

₁₈Babelana izingubo zami,

benzelana inkatho ngesambatho sami.

₁₉Kepha wena Jehova mawungabi kude,

wena mandla ami, shesha ungisize.

₂₀Sindisa umphefumulo wami enkembeni,

ukuphila kwami emandleni ezinja.

₂₁Ngisindise emlonyeni wengonyama;

nasezimpondweni zezinyathi uyangizwa.

₂₂Ngiyakushumayeza abafowethu igama lakho,

ngikudumise phakathi kwebandla.

₂₃Nina enesaba uJehova, mbongeni;

nina nonke nzalo kaJakobe, mdumiseni,

nimesabe nina nonke nzalo ka-Israyeli.

₂₄Ngokuba akadelelanga,

akanengwanga yinhlupheko yohluphekayo;

akamfihlelanga ubuso bakhe,

kepha nalapha ekhala kuye, wezwa.

₂₅Kuyakuvela kuwe ukudumisa kwami ebandleni elikhulu;

izithembiso zami ngiyakuzigcwalisa

phambi kwabamesabayo.

₂₆Abamnene bayakudla, basuthe;

abafuna uJehova bayakumdumisa;

inhliziyo yenu mayiphile kuze kube phakade.

₂₇Imikhawulo yonke yomhlaba iyakukhumbula,

iphendukele kuJehova,

nezizukulwane zonke zezizwe ziyakukhuleka ebusweni bakho.

₂₈Ngokuba umbuso ungokaJehova;

nguye obusa izizwe.

₂₉Bonke abacebileyo bomhlaba bayakudla, bakhuleke;

bonke abehlela othulini bayakukhothama phambi kwakhe,

naye ongenakugcina umphefumulo wakhe ekuphileni.

₃₀Inzalo iyakumkhonza;

isizukulwane esizayo siyakulandiswa ngayo iNkosi.

₃₁Bayakuza bashumayele ukulunga kwayo

kuso isizwe esiyakuzalwa ngokuthi ikwenzile.

₁UJehova ungumalusi wami,

angiyikuswela.

₂Uyangilalisa emadlelweni aluhlaza;

uyangiyisa ngasemanzini okuphumula.

₃Ubuyisa umphefumulo wami;

uyangihola ezindleleni zokulunga ngenxa yegama lakhe.

₄Noma ngihamba esigodini sethunzi lokufa,

angesabi okubi, ngokuba wena unami,

intonga yakho nodondolo lwakho ziyangiduduza.

₅Ulungisa itafula phambi kwami ebusweni bezitha zami;

ugcoba ikhanda lami ngamafutha;

indebe yami iyachichima.

₆Impela okuhle nomusa kuyakungilandela

imihla yonke yokuphila kwami;

ngiyakuhlala endlini kaJehova kuze kube phakade.

₁Umhlaba ungokaJehova nokugcwala kwawo,

izwe nabakhileyo kulo.

₂Ngokuba yena wawusekela phezu kwezilwandle,

wawumisa phezu kwemifula.

₃Ngubani oyakukhuphukela entabeni kaJehova,

ngubani oyakuma endaweni yakhe engcwele na?

₄Yilowo onezandla ezingenacala nenhliziyo ehlanzekileyo,

ongaphenduleli umphefumulo wakhe emangeni

nongafungi ngenkohliso.

₅Uyakwamukela isibusiso kuJehova

nokulunga kuNkulunkulu wensindiso yakhe.

₆Yilesi esiyisizukulwane sabamfunayo;

bona abasinga ubuso bakho bangabantwana bakaJakobe. Sela*

₇Phakamisani, masango,

izinhloko zenu;

nani minyango yaphakade,

phakamani ukuba iNkosi yenkazimulo ingene.

₈Ingubani le Nkosi yenkazimulo na?

InguJehova onamandla, oyiqhawe,

uJehova oyiqhawe lokulwa.

₉Phakamisani, masango,

izinhloko zenu;

nani minyango yaphakade,

phakamani

ukuba iNkosi yenkazimulo ingene.

₁₀Ingubani le Nkosi yenkazimulo na?

UJehova Sebawoti

nguyena oyiNkosi yenkazimulo. Sela*

₁Jehova, ngiphakamisela kuwena umphefumulo wami.

₂Nkulunkulu wami,

ngiyethemba kuwe;

mawungangijabhisi;

izitha zami mazingethabi ngami.

₃Yebo, akuyikujabha noyedwa kwabakulindelayo;

bayakujabha abaphambuka ngeze.

₄Ngazise imendo yakho, Jehova;

ngifundise izindlela zakho.

₅Ngihambise eqinisweni lakho, ungifundise,

ngokuba wena unguNkulunkulu wensindiso yami;

ngilindela wena usuku lonke.

₆Khumbula, Jehova, ububele bakho nomusa wakho,

ngokuba kukhona kwaphakade.

₇Ungazikhumbuli izono zobusha bami neziphambeko zami;

ngikhumbule ngokomusa

wakho ngenxa yobubele bakho, Jehova.

₈UJehova muhle, ulungile;

ngalokho ufundisa izoni indlela.

₉Abathobekileyo ubaholela kokulungileyo,

abathobekileyo ubafundisa indlela yakhe.

₁₀Zonke izindlela zikaJehova zingububele neqiniso

kulabo abagcina isivumelwano sakhe nezifakazelo zakhe.

₁₁Ngenxa yegama lakho, Jehova,

ngithethelele ukona kwami,

ngokuba kukhulu.

₁₂Ngumuphi umuntu omesaba uJehova na?

Nguyena oyakufundiswa nguye indlela ayakuyikhetha.

₁₃Umphefumulo wakhe uzakuhlala ngokwenama,

inzalo yakhe iyakuzuza izwe.

₁₄Ubuhlobo bukaJehova bukubo abamesabayo;

uyakubazisa isivumelwano sakhe.

₁₅Amehlo ami akuye uJehova njalo,

ngokuba nguyena okhipha izinyawo zami enetheni.

₁₆Phendukela kimi, ube nomusa kimi,

ngokuba nginesizungu, ngihluphekile.

₁₇Izinsizi zenhliziyo yami zikhulile;

ngikhiphe ezinhluphekweni zami.

₁₈Bheka ukuhlupheka kwami nosizi lwami,

ungithethelele zonke izono zami.

₁₉Bheka izitha zami, ngokuba ziningi;

ziyangizonda ngenzondo yonya.

₂₀Londoloza umphefumulo wami, ungikhulule;

mawungangijabhisi,

ngokuba ngiphephela kuwe.

₂₁Ukulunga nobuqotho makungilondoloze,

ngokuba ngilindele wena.

₂₂Nkulunkulu, hlenga u-Israyeli

kuzo zonke izinkathazo zakhe.

₁Ngahlulele, Jehova,

ngokuba ngihamba ekulungeni kwami;

ngithemba uJehova, angiyikuntenga.

₂Ngivivinye, Jehova, ungilinge;

hlolisisa izinso zami nenhliziyo yami.

₃Ngokuba ububele bakho buphambi kwamehlo ami;

ngihamba eqinisweni lakho.

₄Angihlali nabantu bamanga,

angihambelani nezimbulu.

₅Ngiyawuzonda umhlangano wabenza okubi,

angihlali nababi.

₆Ngiyahlamba izandla zami ngingenacala,

ngizungeza i-altare lakho, Jehova,

₇ukuba ngizwakalise izwi lokudumisa,

ngilande ngazo zonke izimangaliso zakho.

₈Jehova, ngiyayithanda inkundla yendlu yakho

nendawo lapho kuhlezi khona inkazimulo yakho.

₉Ungamukisi umphefumulo wami kanye nezoni

nokuphila kwami kanye nabantu begazi

₁₀abanehlazo ezandleni zabo,

nesokunene sabo sigcwele izipho zenkohliso.

₁₁Kepha mina ngihamba ekulungeni kwami;

ngihlenge, ube nomusa kimi.

₁₂Unyawo lwami lumi ebaleni;

ngizakudumisa uJehova emihlanganweni.

₁UJehova ungukukhanya kwami nensindiso yami;

ngizakwesaba bani na?

UJehova uyinqaba yokuphila kwami;

ngizakuba novalo ngobani na?

₂Ekusondeleni kwababi ukuba badle inyama yami

abamelene nami nezitha zami bayakhubeka, bawe.

₃Noma impi imisa ngakimi,

inhliziyo yami ayesabi;

noma ngivukelwa ngukulwa,

nokho nginethemba.

₄Kunye engikucele kuJehova,

ngiyakufuna khona:

ukuba ngihlale endlini kaJehova

izinsuku zonke zokuphila kwami

ukubona ubuhle bukaJehova,

ngibuke ithempeli lakhe.

₅Ngokuba uyangithukusa edokodweni lakhe

ngosuku lokuhlupheka,

angicashise ekusithekeni kwetende lakhe,

angiphakamisele edwaleni.

₆Nakalokhu ikhanda lami lizakuphakama

ngaphezu kwezitha zami ezingihaqileyo;

ngizakunikela iminikelo yokwethaba etendeni lakhe,

ngihlabelele, ngidumise uJehova ngogubhu.

₇Yizwa, Jehova, ngikhala ngezwi elikhulu;

yiba nomusa kimi, ungiphendule.

₈Kuwena othi: “Funani ubuso bami,”

inhliziyo yami ithi:

“Ubuso bakho, Jehova, ngiyabufuna.”

₉Ungafihli ubuso bakho kimi,

ungaxoshi inceku yakho ngokuthukuthela;

wena ulusizo lwami, ungangilahli,

ungangishiyi,

Nkulunkulu wensindiso yami.

₁₀Ngokuba ubaba nomame bangishiyile,

kodwa uJehova uzakungamukela.

₁₁Ngifundise indlela yakho, Jehova,

ungihole endleleni ekhanyayo

ngenxa yezitha zami.

₁₂Unganginikeli entandweni yezitha zami;

ngokuba ofakazi bamanga bangivukele kanye nabafutha

ukudlozomela.

₁₃Yeka, uma bengingathembanga ukubona

okuhle kukaJehova ezweni labaphilayo!

₁₄Lindela uJehova, uqine,

inhliziyo yakho ime isibindi;

yebo, lindela uJehova.

₁Ngikhala kuwe Jehova;

Dwala lami, ungabi yisithulu kimi,

funa kuthi, uma uthula kimi,

ngifane nabashona emgodini.

₂Yizwa izwi lokunxusa kwami,

nxa ngikhala kuwe,

ngiphakamisela izandla zami endaweni yakho engcwelengcwele.

₃Ungangimukisi kanye nababi nabenza okubi

abakhuluma ukuthula nabakhelwane babo,

kanti kukhona okubi ezinhliziyweni zabo.

₄Banike njengokwenza kwabo nanjengobubi bemisebenzi yabo;

banike njengokwenza kwezandla zabo,

baphindisele abakwenzileyo.

₅Ngokuba abayinaki imisebenzi kaJehova

nokwenza kwezandla zakhe;

uyakubadiliza, angabakhi.

₆Makabongwe uJehova,

ngokuba ulizwile izwi lokunxusa kwami.

₇UJehova ungamandla ami nesihlangu sami;

inhliziyo yami ithembe kuye, ngasizwa;

ngakho-ke inhliziyo yami iyethaba;

ngizakumdumisa ngesihlabelelo sami.

₈UJehova ungamandla abantu bakhe;

uyinqaba yensindiso yogcotshiweyo wakhe.

₉Sindisa abantu bakho,

ubusise ifa lakho,

ubaluse,

ubathwale kuze kube phakade.