Bible Reading Plan – Day 103

₁Ngiyakuthanda, Jehova,

mandla ami.

₂Jehova uyidwala lami, nenqaba yami, nomkhululi wami;

uNkulunkulu wami uyidwala lami engiphephela kulo,

nesihlangu sami,

nophondo lokusindiswa kwami,

inqaba yami ephakemeyo.

₃Ngiyamemeza kuJehova odumisekayo,

ngisindiswe ezitheni zami.

₄Izintambo zokufa zangizungelezela,

izikhukhula zokona zangethusa.

₅Izintambo zasendaweni yabafileyo zangizungeza,

izihibe zokufa zangehlela.

₆Ekuhluphekeni kwami ngambiza uJehova,

ngakhala kuNkulunkulu wami;

walizwa izwi lami esethempelini lakhe;

ukukhala kwami phambi kwakhe kwangena ezindlebeni zakhe.

₇Umhlaba wawusuzamazama, wadikizela;

izisekelo zezintaba zathuthumela,

zagubhuzela ngokuba ethukuthele.

₈Kwenyuka umusi emakhaleni akhe,

nomlilo odlayo emlonyeni wakhe;

amalahle avutha kuye.

₉Wathobisa izulu, wehla;

ubumnyama babuphansi kwezinyawo zakhe.

₁₀Wakhwela phezu kwekherubi,* wandiza;

washweza ngamaphiko omoya.

₁₁Ubumnyama wabenza isisibekelo,

idokodo lakhe elimphahlayo;

amanzi amnyama, amafu anzima.

₁₂Ekukhazimuleni okuphambi kwakhe

amafu akhe abanga phambili,

isichotho namalahle avuthayo.

₁₃UJehova waduma ezulwini;

oPhezukonke walizwakalisa izwi lakhe:

isichotho namalahle avuthayo.

₁₄Wathuma imicibisholo yakhe, wabangquzula,

nemibani eminingi, wabadidizelisa.

₁₅Kwase kubonakala imisinga yamanzi;

izisekelo zomhlaba zambulwa ngesijeziso sakho, Jehova,

ngokufutha komoya wamakhala akho.

₁₆Waselula isandla sakhe ephezulu, wangibamba;

wangikhipha emanzini amaningi.

₁₇Wangophula esitheni sami esinamandla

nakubo abangizondayo,

ngokuba base bengahlulile.

₁₈Bangihlasela ngosuku lwesigemegeme sami,

kepha uJehova waba yinsika yami.

₁₉Wangiphumisela endaweni ebanzi;

wangikhulula, ngokuba ebethokoza ngami.

₂₀UJehova wangivuza ngokokulunga kwami;

wangibuyisela njengokuhlanzeka kwezandla zami.

₂₁Ngokuba ngizigcinile izindlela zikaJehova,

angimukanga kuNkulunkulu wami ngokushinga.

₂₂Ngokuba yonke imithetho yakhe yayiphambi kwami,

nezimiso zakhe angivumanga ukuba zisuke kimi.

₂₃Ngangiphelele kuye;

ngabuxwaya ububi.

₂₄UJehova wayesebuyisela kimi njengokulunga kwami,

njengokuhlanzeka kwezandla zami phambi kwamehlo akhe.

₂₅Kothembekileyo uyazibonakalisa uthembekile;

kumuntu oqotho uzibonakalisa uqotho;

₂₆kohlanzekileyo uyazibonakalisa uhlanzekile;

koyisigwegwe uyazibonakalisa unenkani.

₂₇Ngokuba wena uyabasindisa abantu abathobekileyo,

kepha amehlo abaqhoshileyo uyawathobisa.

₂₈Ngokuba wena uyokhela isibani sami;

uJehova uNkulunkulu wami uyakhanyisa ubumnyama bami.

₂₉Ngokuba ngawe ngingahlasela impi;

ngoNkulunkulu wami ngingeqa ugange.

₃₀Indlela kaNkulunkulu iphelele;

izwi likaJehova lihlanzekile;

yena uyisihlangu kubo bonke abaphephela kuye.

₃₁Ngokuba ngubani onguNkulunkulu ngaphandle kukaJehova,

ngubani oyidwala ngaphandle kukaNkulunkulu wethu na?

₃₂uNkulunkulu ongibhincisa amandla,

owenza indlela yami ilunge;

₃₃owenza izinyawo zami zibe njengezendluzelekazi,

angimise emagqumeni ami;

₃₄ofundisa izandla zami ukulwa,

ukuze izingalo zami zinsale umnsalo wethusi.

₃₅Wena unginikile isihlangu sensindiso yakho,

isandla sakho sokunene singisekele,

nobumnene bakho bungikhulisile.

₃₆Amabanga okunyathela kwami uwandisile;

amaqakala ami awaxegi.

₃₇Ngazixosha izitha zami, ngazifica;

angibuyanga ngingakaziqedi.

₃₈Ngaziphahlaza, zaze zahluleka ukuvuka;

zawa phansi kwezinyawo zami.

₃₉Wangibhincisa amandla okulwa;

ababengivukele wabathobisa phansi kwami.

₄₀Wangifulathelisela izitha zami,

nabangizondayo ngabaqothula.

₄₁Bakhala, kepha akubangakho osindisayo,

nakuJehova, kodwa akaze aphendula.

₄₂Ngabacolisisa njengothuli emoyeni;

ngabalahla njengensila ezitaladini.

₄₃Wangikhulula ezimpini zabantu;

wangimisa ngaba yinhloko yabezizwe;

abantu engingabaziyo bangikhonza.

₄₄Banele ukungizwa nje ngendlebe,

base bengilalela;

abafo bazithoba phansi kwami.

₄₅Abafo babuna,

baphuma ezinqabeni zabo bethuthumele.

₄₆UJehova usekhona,

malidunyiswe iDwala lami;

makaphakanyiswe uNkulunkulu wensindiso yami,

₄₇uNkulunkulu onginikile impindiselo,

wathobisa izizwe phansi kwami;

₄₈ongikhululile ezitheni zami,

yebo, ongiphakamisile phezu kwabangivukelayo,

wangikhulula kumuntu oyisidlwangudlwangu.

₄₉Ngalokho-ke ngizakukubonga phakathi kwabezizwe, Jehova,

ngilihubele igama lakho.

₅₀Uyenza insindiso ibe nkulu enkosini yakhe;

uyenza umusa kogcotshiweyo wakhe uDavide

nasenzalweni yakhe kuze kube phakade.

₁Amazulu ayalanda ngenkazimulo kaJehova,

nomkhathi ushumayela umsebenzi wezandla zakhe.

₂Usuku luyalandisa usuku inkulumo,

nobusuku bushumayeza ubusuku ukwazi.

₃Akukho ukukhuluma,

awakho amazwi,

lapho izwi lingezwakali khona.

₄Isilinganiso sawo siphumele emhlabeni wonke

namazwi awo emkhawulweni womhlaba.

Ulimisele ilanga itende kulo.

₅Lona linjengomyeni ephuma ekamelweni lakhe;

lijabulisa okweqhawe ukugijima endleleni yalo.

₆Ukuphuma kwalo kusemkhawulweni wezulu;

ukuzungeza kwalo kuya ekugcineni kwalo;

akukho okufihlelwe ukushisa kwalo.

₇Umthetho kaJehova uphelele,

uvusa umphefumulo;

ukufakaza kukaJehova kuqinisile,

kuhlakaniphisa oyisiwula.

₈Imiyalo kaJehova ilungile,

ijabulisa inhliziyo;

umyalezo kaJehova uhlanzekile,

ukhanyisa amehlo.

₉Ukumesaba uJehova kuhlanzekile,

kumi kuze kube phakade;

imithetho kaJehova iyiqiniso,

ilungile yonke.

₁₀Inxanelekile kunegolide,

kunegolide elihlanzekileyo eliningi;

imnandi kunezinyosi,

kunoju lwamakhekheba.

₁₁Nenceku yakho iyayalwa ngayo;

oyigcinayo uyakuba nomvuzo omkhulu.

₁₂Ngubani owazi iziphosiso zakhe na?

Ngithethelele kwezisithekileyo.

₁₃Yilonde inceku yakho nasezonweni ezihlazisayo;

mazingabusi phezu kwami.

Yikhona ngiyakube ngiphelele,

ngingabe ngisaba necala eziphambekweni ezinkulu.

₁₄Amazwi omlomo wami nokuzindla kwenhliziyo yami

makuthandeke ebusweni bakho, Jehova,

dwala lami nomhlengi wami.

₁UJehova makakuphendule ngosuku lokuhlupheka;

igama likaNkulunkulu kaJakobe malikuvikele.

₂Makakuthumele usizo lwasendlini engcwele,

akusekele ngamandla aseSiyoni.

₃Makakhumbule yonke iminikelo yakho yokudliwa,

awamukele umnikelo wakho wokushiswa. Sela*

₄Makakunike njengokwenhliziyo yakho,

afeze icebo lakho lonke.

₅Siyahalalisa ngensindiso yakho,

siphakamise ibhandela* egameni likaNkulunkulu wethu;

uJehova makagcwalise zonke izicelo zakho.

₆Kalokhu ngiyazi ukuthi uJehova uyamsindisa ogcotshiweyo wakhe:

esezulwini lakhe elingcwele uyamphendula

ngamandla okusindisa esandla sakhe sokunene.

₇Abanye izinqola, abanye amahhashi,

kepha thina sibonga igama likaJehova uNkulunkulu wethu.

₈Bayathoba, bawe;

kepha thina siyavuka, sime.

₉Sindisa, Jehova!

INkosi mayisiphendule ngosuku lokukhala kwethu.

₁Jehova, inkosi iyajabula ngamandla akho;

iyethaba kangakanani ngensindiso yakho.

₂Uyinikile njengokwenhliziyo yayo,

nesicelo sezindebe zayo awusinqabanga. Sela*

₃Ngokuba wayihlangabeza ngezibusiso zokuhle;

wafaka umqhele wegolide elihle ekhanda layo.

₄Yacela ukuphila kuwe,

wayinika khona,

izinsuku ezinde kuze kube phakade naphakade.

₅Inkulu inkazimulo yayo ngenxa yensindiso yakho;

udumo nobukhosi ukubeka phezu kwayo.

₆Ngokuba uyibeka ukuba ibe yisibusiso kuze kube phakade;

uyithokozisa ngenjabulo ebusweni bakho.

₇Ngokuba inkosi iyethemba uJehova,

nangenxa yesihawu soPhezukonke ayiyikuzanyazanyiswa.

₈Isandla sakho siyakufumana zonke izitha zakho;

esokunene sakho siyakubafumana abakuzondayo.

₉Uyakubenza babe njengesithando somlilo,

nxa ubonakalisa ubuso bakho;

uJehova uyakubagwinya ngentukuthelo yakhe,

umlilo uyakubaqeda.

₁₀Isithelo sabo uyakusichitha emhlabeni

kanye nenzalo yabo phakathi kwabantwana babantu.

₁₁Ngokuba babehlosa okubi,

baceba icebo;

kepha bayahluleka.

₁₂Ngokuba uyakubafulathelisa;

ngosinga lomnsalo wakho uyakukhomba ebusweni babo.

₁₃Mawuphakame, Jehova,

emandleni akho;

thina siyakuhlabelela, sidumise amandla akho.