UJobe 4

₂“Uma kulingwa ukukhulunywa kuwe,

uyakukhathazeka na?

Kepha ngubani ongazibamba, angakhulumi, na?

₃Bheka, uqondisile abaningi;

uqinisile izandla ezibuthakathaka.

₄Amazwi akho amisile okhubekayo;

usimamisile amadolo athuthumelayo.

₅“Kepha sekufikile kuwe, uyakhathazeka;

kuyakuthinta wena, uyashaywa luvalo.

₆Ukumesaba kwakho uNkulunkulu akusilo ithemba lakho yini,

nokuphelela kwezindlela zakho akusiso isisekelo sakho na?

₇Ake ukhumbule ukuthi ngubani owake wachithwa engenacala na?

Babhujiswaphi abalungileyo na?

₈Njengokubona kwami abalima okubi

bahlwanyele ukona, bayakuvuna.

₉Babhubha ngokuphephetha kukaNkulunkulu;

ngomoya wentukuthelo yakhe bayaphela.

₁₀Ukubhonga kwengonyama nezwi lebhubesi kuyaphela,

namazinyo amabhongo ayaphuka.

₁₁Ibhubesi elinamandla liyabhubha ngokuswela impango;

amawundlu ebhubesikazi ayahlakazeka.

₁₂“Kwanyenyiselwa kimi izwi,

indlebe yami yabamba ukunyenyezwa kwalo.

₁₃Ngokudlala kwemicabango ivuswe yimibono yasebusuku,

lapho abantu sebehlelwe ngubuthongo obunzima,

₁₄ngafikelwa yingebhe nokuthuthumela

okwaqhaqhazelisa onke amathambo ami.

₁₅Kwadlula umoya ebusweni bami;

uboya bomzimba wami bavuka.

₁₆Kwema okuthile, kepha angaqonda ukubonakala kwakho;

isimo sasiphambi kwamehlo ami;

kwathula;

ngase ngizwa izwi, lathi:

₁₇‘Umuntu ulungile kunoNkulunkulu na?

Umuntukazana uhlambulukile kunoMenzi na?

₁₈Bheka, nasezincekwini zakhe akethembi,

nezingelosi zakhe uyazibeka icala;

₁₉kakhulu kangakanani abahlezi ezindlini zodaka,

abazisekelo zabo zisothulini,

abachotshozwa njengenundu.

₂₀Bagxotshwa kusukela ekuseni kuze kube kusihlwa;

babhubha kuze kube phakade benganakwa muntu.

₂₁Intambo yetende labo ayisishulwa yini phakathi kwabo,

bafe bengazelele, na?’