UJobe 3

₃“Makubhubhe usuku engazalwa ngalo,

nobusuku obathi: ‘Ukhulelwe umntwana wesilisa.’

₄Lolo suku malube ngubumnyama;

uNkulunkulu makangalunaki ephezulu,

ukukhanya makungakhanyiswa kulo.

₅Ubumnyama nethunzi lokufa maluphiwe khona,

kuhlale ifu phezu kwalo;

okwenza mnyama usuku makulwesabise.

₆Ubusuku lobo isigayegaye masibubambe;

mabungajabuli phakathi kwezinsuku zomnyaka,

bungangeni phakathi komumo wezinyanga.

₇Bheka,

lobo busuku mabungabi nalutho,

kungangeni ukujabula kubo.

₈Mababuqalekise abathuka amalanga,

abalungele ukuvusa uLeviyathani.

₉Izinkanyezi zokuhwelela kwabo maziphenduke ubumnyama;

mabulinde ukukhanya kungabikho,

bungaboni izinkophe zokusa,

₁₀ngokuba abuvalanga izivalo zesizalo sikamame,

abufihlanga ukuhlupheka emehlweni ami.

₁₁“Angifanga ngani esizalweni na?

Angibhubhanga ngani ekuphumeni kwami esiswini na?

₁₂Amadolo angamukeleleni,

namabele ukuba ngincele, na?

₁₃Ngokuba kalokhu ngakube ngilele, ngithule;

khona ngakube ngilele ubuthongo nginokuphumula

₁₄kanye namakhosi nabeluleki bomhlaba

abazakhela izinqaba zamathuna,

₁₅noma kanye nezikhulu ezinegolide

ezazigcwalisa izindlu zazo ngesiliva,

₁₆noma ngangingekho njengokuphuphumileyo

okuthukusiweyo,

njengezingane ezingazange zibone ukukhanya.

₁₇Lapho amashinga ayekile ukudlova;

lapho baphumule abaphelile amandla.

₁₈Lapho iziboshwa ziyatabhaya kanyekanye;

azizwa izwi labazicindezelayo.

₁₉Lapho nabancane nabakhulu bayafanana;

isigqila sikhululekile enkosini yaso.

₂₀“Odiniweyo unikelwani ukukhanya nabanomunyu

emphefumulweni ukuphila;

₂₁abalinda ukufa kungafiki,

abakumba kunengcebo;

₂₂abathokoza baze bethabe,

bajabule, uma belithola ithuna,

₂₃nomuntu ondlela yakhe isithekile,

uNkulunkulu ambiyeleyo nxazonke zakhe, na?

₂₄Ukugquma kwami kufika phambi kwesinkwa sami,

nokububula kwami kuthululwa njengamanzi,

₂₅ngokuba engikwesabayo sekuyangifikela,

nenginovalo ngakho sekuyangehlela.

₂₆Anginakuthula, angizolile, anginakuphumula;

kepha ukuyaluza kuyafika.”