Intuthuzelo evela kwiLizwi – Day 4

₁*UNdikhoyo ndiyamthanda, kuba uyandiva;

uyasabela ndakuzibika kuye.

₂Njengoko endiphulaphula nje,

ndobhenela kuye xa ndisadl' ubomi.

₃Izabatha zokufa zandibhijela,

izoyikiso zelabafileyo zandikhonkxa;

latsho laxubayela ndangcungcutheka.

₄Ke kaloku ndabhenela kuNdikhoyo, ndathi:

“Awu, Ndikhoyo, ndiyakubongoza, ndisindise!”

₅Unesisa kambe uNdikhoyo, ulungile;

hayi ke bethu, inceba yoThixo wethu!

₆UNdikhoyo uyabakhusela abaxakiweyo;

nam ndandingenamandla wandihlangula.

₁Thixo wam, Thixo wam, undishiyeleni na?

Kudala ndizigixa, ndicel' uncedo,

kodwa andikalufumani unangoku!

₂Thixo wam, emini ndikhalela kuwe, kodwa akundiva.

Nasebusuku ndiyakhala,

ndingafumani kuphumla phezu koko.

₃Kambe wena ungqendeve phakathi kwabakudumisayo;

nditsho wena ngangamela yakwaSirayeli.

₂₄Kaloku akazideli engazicekisi iintsizi zehlwempu;

uyaziva izicelo zalo, angalifulatheli.”

₂₅Ndiya kukubonga esidlangalaleni,

ngenxa yezinto ondenzele zona;

ndowafezekisa amadinga endawenzayo,

phambi kwebandla lâbo bakuthobelayo.

₁₃₇Hayi kambe ukulunga kwakho, *Ndikhoyo!

Ewe, isigwebo sakho asinagobe.

₁₃₈Usinika imfundiso enobulungisa;

ewe, inolungelelwano, ithe ngqo.

₁₃₉Ikhwele lindongamele ngenxa yeentshaba

ezingalikhathalelanga ilizwi lakho.

₁₄₀Izithembiso zakho zivavanyiwe zagqwesa;

ke mna ndizixabise gqitha.

₁₄₁Nakuba ndidelekile, ndingazelwa nto,

andishenxi kwimimiselo yakho.

₁₄₂Ubulungisa bakho bohlala buhleli,

nomyalelo wakho wohlala uthembekile.

₁₄₃Ndiphahlwe ziinzima neenkathazo,

kodwa ke mna andiziva ngeziyalo zakho.

₁₄₄Imfundiso yakho iya kuhlala ifezekile;

ndiphe ukuqonda, ukuze ndiphile.

₁₄₅Yo-o-o! Khawundivelele, *Mhlekazi!

Ke yona imithetho yakho ndiya kuyithobela.

₁₄₆Ndizibika kuwe, ndikhulule;

imfundiso yakho ndoyithobela.

₁₄₇Ndikhala kuwe kusathi qheke ukusa;

kaloku ndikholosa ngezwi lakho.

₁₄₈Ndivuk' ezinzulwini zobusuku;

ndicamngca ngezithembiso zakho.

₁₄₉Ngenxa yezibele zakho, *Ndikhoyo, sabela,

undihlaziye ngokwesigqibo sakho.

₁₅₀Abandenzela amayelenqe bayasondela,

bona abayikhathalelanga imiyalelo yakho.

₁₅₁Kanti ke wena ukufutshane nam, Ndikhoyo,

neziyalo zakho zithembekile.

₁₅₂Kwantlandlolo ndizifundile izithethe zakho;

zaye ke zona zisisimakade.

₁₅₃Velana nam, kuba ndibandezelekile, undisindise,

kuba andishenxi emyalelweni wakho.

₁₅₄Zabalaza undihlangule;

ndihlaziye ngokwesithembiso sakho.

₁₅₅Kwizikhohlakali usindiso luthe qelele,

kuba aziyikhathalele imithetho yakho.

₁₅₆Ke wena, *Ndikhoyo, unguSozinceba;

ndihlaziye ngokwesigqibo sakho.

₁₅₇Zininzi iintshaba nabandibandezelayo,

kodwa andishenxi kwimfundiso yakho.

₁₅₈Ndiyakhamnqa ndakubona abangcatshi;

kaloku bona abalise so idinga lakho.

₁₅₉Ndiyayithanda kambe imimiselo yakho, Ndikhoyo;

ngokwezibele zakho ndazelele ebomini.

₁₆₀Oyena ndoqo wodaba lwakho yinyaniso;

xa zizonke izigqibo zakho soze zithini.

₁₆₁Iziphathamandla ziyanditshutshisa ngaphandle kwesizathu;

ke mna ndiyalihlonipha ilizwi lakho.

₁₆₂Izithembiso zakho ziyandonwabisa;

nditsho ndifane nomntu oxhaphaza isisulu.

₁₆₃Ndibuthiyil' ubutshijolo, bunezothe kum;

kanti ke umyalelo wakho ndiyawuthanda.

₁₆₄Lide liye kutshona ndikubulela

ngenxa yokulunga kwezigqibo zakho.

₁₆₅Abathobela umyalelo wakho bahlala banelisekile;

kaloku akukho nto ingabaphazamisayo.

₁₆₆Ndikhoyo, ndijonge kuwe, ndisindise;

kaloku ndizithobele iziyalo zakho.

₁₆₇Imfundiso yakho ndiyilandela ngomoya wam wonke;

kaloku andizenzi, ndiyayithanda.

₁₆₈Ndiyayithobela imimiselo nezithethe zakho,

kambe ke wena wazi konke ngam.

₁₆₉Ndiyatarhuzisa; ndive, *Nkosi;

ndivul' ingqondo ngokwesithembiso sakho.

₁₇₀Ndiyakubongoza, ndiphulaphule;

ndihlangule njengoko wathembisayo.

₁₇₁Ndiya kusoloko ndikuncoma, ndikubonga,

kuba uyandifundisa imithetho yakho.

₁₇₂Ingoma yam ngamadinga akho;

kaloku iziyalo zakho zilungile.

₁₇₃Hlala ulungele ukundinceda;

kaloku ndizikhethele imimiselo yakho.

₁₇₄Wowu! Ndiyakulangazelela ukusindiswa!

*Ndikhoyo, andiziva ngemithetho yakho!

₁₇₅Ndiphe ubomi, ukuze ndikudumise;

isigqibo sakho masindixhase.

₁₇₆Ndibhadula njengegusha elahlekileyo.

Awu, phuthuma usifune isicaka sakho,

kuba andiyilibali imiqathango yakho!

₁Ndazibika *kuNdikhoyo ndixhwalekile;

yena wandiva, wasabela.

₂Ndathi: “Mhlekazi, ndihlangule

kumaxoki nakubakhohlisi.”

₃Nithi makenze ntoni ngani uThixo?

Nisalindele ntoni eyenye, maxokindini,

₄ngaphandle kotolo lwemfazwe olubukhali,

ngokunjalo neziko elimalahle avuthayo!

₅Athi ke mna, mnt' ubhacele kwaMesheki,

mna mntu uxhwarhe phakathi kwamaKedare!

₆Kunini ndihlalele ukungcuchalaza

phakathi koompayipheli.

₇Phi ke, ndisithi nje ndakuthetha,

basuke bahlab' umkhosi.

₁Amehlo am ndiwajongis' enkalweni;

yaz'ba lovela ngaphi na uncedo lwam?

₂Umncedi wam *nguNdikhoyo,

yena ungumenzi wamazulu nehlabathi.

₃Yena wondibamba lungatyibiliki unyawo lwam;

kaloku akozeli, walusa mna.

₄Khangela, umalusi kaSirayeli akozeli,

engalali nokulala oku.

₅Kaloku nguNdikhoyo okwalusayo –

nguye okwenzela umthunzi.

₆Emini ilanga aliyi kukugqatsa;

kanti ke nenyanga ebusuku ayinakukwenza nto.

₇NguNdikhoyo ixhadi lakho lakubhek' umoya;

ewe, uya kukwalusa ungachukunyiswa nto.

₈Ngenene, uNdikhoyo uya kukwalusa,

xa uhambayo naxa ubuyayo,

kuqalela ngoku kude kube nini-nini.

₁Hay' imincili endaba nayo basakuthi kum:

“Masihambe siye endlwini *kaNdikhoyo.”

₂Naku ke ngoku iinyawo zethu zime bhuxe ngaphakathi kwamasango akho, Jerusalem.

₃Ke kaloku iJerusalem yingxikela yesixeko

esakhiwe sabandakanywa saba sinye.

₄Kulapho zityelela khona izizwe;

nditsho izizwe zikaNdikhoyo.

Kaloku lowo yaba ngummiselo kumaSirayeli

ukuba aye kudomboza abulele uNdikhoyo.

₅Apha kulapho zikhoyo iinkundla;

nditsho iinkundla zendlu kaDavide.

₆Thandazani kubekho inzolo eJerusalem, nithi:

“Makube yinkqubela kwabakuthandayo, Jerusalem;

₇kuwe makube chosi, kube hele,

ukhuseleke umzi wakho jikelele.”

₈Ngenxa yezihlobo nabalingane bam

nangoku ndithi: “Makube chosi, kube hele!”

₉Kanti ke nangenxa yendlu kaNdikhoyo uThixo wethu

ndiya kuzabalaza ndikufunela intlala-kahle.

₁*Ndikhoyo, ndikhangela kuwe,

wena ohlala emazulwini.

₂Kaloku namaphakathi ajonga izinwe zenkosi yawo,

nanjengokuba namaphakathikazi elindele izinwe kwinkosazana.

Nathi ke senjenjalo ukukhangela kuwe, Ndikhoyo Thixo wethu,

ude wena usenzele inceba.

₃Awu, Ndikhoyo, sikwa yimfesane;

velana nathi, siyakubongoza!

Koda kube nini sisisigculelo?

₄Ewe, kudala sinyamezele, sigxijwa ngabazingcayo,

sidodotyaliswa ngabacinezeli abanekratshi.

₁USirayeli makatsho athi:

“Ukuba *uNdikhoyo ebengekho ngakuthi,

₂ewe, ukuba besingaxhaswa nguNdikhoyo

ekuhlaselweni kwethu lutshaba,

₃ngelusiginye sihleli ngokuya lwaluvutha ngumsindo.

₄Ngezasitshayela iimpuphuma;

ewe, umsinga ngewawusirhaxile.

₅Ngesantywiliselwa, satshona lè,

kuloo manzi alatyuzayo.”

₆UNdikhoyo ngowokubongwa,

kuba yena akasiyekelanga

saba ngamaxhoba okuqwengwa.

₇Thina siphuncule njengentak' esigwini;

ewe, isigu saphukile, sasinda ke thina.

₈Uncedo lwethu luvela kuNdikhoyo

ongumdali wamazulu nehlabathi.

₁Abo bakholosa *ngoNdikhoyo banjengentaba iZiyon,

yona ingasoze yashukunyiswa koko izinzile ngonaphakade.

₂Kwanjengokuba iintaba ziyingqongile iJerusalem

noNdikhoyo wenjenjalo ukubaphahla abantu bakhe,

nangoku kude kube ngunaphakade.

₃Izikhohlakali soze zilawule elizweni lamalungisa,

hleze namalungisa asuke enze ububi.

₄Awu, Ndikhoyo, walungiselele amalungisa,

abo bantliziyo zingaphambukiyo.

₅Kodwa ke bona abaphambukayo

babandakanye nezikhohlakali, Ndikhoyo.

Makube chosi, kube hele kwaSirayeli!

₁Ekusibuyiseleni *kukaNdikhoyo eZiyon,

ngokuya sasiphuma ekuthinjweni,

kwasuka kwaba ngathi liphupha.

₂Safumana sagigitheka yintsini,

kwayintswahla yemincili novuyo.

Zade zatsho nezizwe zathi:

“Ngenene uNdikhoyo ubenzele izinto ezinkulu.”

₃UNdikhoyo usincede kakhulu, ngoko ke siyavuya.

₄Khawusibuyisele inkqubela, Ndikhoyo,

njengamanzi empompoz' entlango.

₅Abo bahlwayela behlininika besezinyembezini

banga bangavuna bebobotheka yimincili.

₆Abo baphuma bahambe bezibambe ngeenkophe,

bepheth' imbewu, besiya kuhlwayela,

bobuya bedanduluka, bememelela ngemincili.

Kaloku bobuya besikaza, bethwel' isivuno.

₁Ukuba *uNdikhoyo akayakhi indlu,

bafumana bebulaleka abayakhayo.

Ukuba asaluswa nguNdikhoyo isixeko,

ancam' ubuthongo ngelize amajoni alindayo.

₂Ngamampunge ukuzabalaza uzam' ukuzixhasa,

uvuka ngentseni, ulal' ezinzulwini,

ungumaphila-kukuzenzela.

Kaloku uNdikhoyo uyabaxhasa abakhe;

ewe, yena ubaxhasa belele.

₃Uyabona ke, oonyana lilifa elivela kuNdikhoyo;

ngenene, abantwana sisipho esivela kuye.

₄Oonyana bendodana bafana neentolo

elixhobe ngazo ijoni.

₅Hay' ukuzimaseka kwendoda enesiphampa sazo!

Ayisoze yadeleka mpela,

naxa ixambulisana neentshaba enkundleni.

₁Hay' inyhweba yomntu omthobelayo *uNdikhoyo,

ohamba ngokwemimiselo yakhe.

₂Onjalo uyazibona iziqhamo zemisebenzi yakhe;

uhlala ngokonwaba enenkqubela.

₃Inkosikazi yakhe ifana nomdiliya oyokozelayo, omi ngasendlwini;

abantwana bakhe bafana nezithole zomnquma ezingqonge isithebe sakhe.

₄Ewe, ngenene unenyhweba umntu omthobelayo uNdikhoyo.

₅Ngamana waphokoza amathamsanqa eseZiyon uNdikhoyo,

ke wena uyibone inkqubela yeJerusalem

ngayo yonke imihla yobomi bakho,

₆ukhule ude ukhokhobe.

Makube chosi, kube hele kwaSirayeli!

₁USirayeli makabalise athi:

“Iintshaba zandihlasela kwandiseyimveku.

₂Ewe, zanditshutshisa kwandiselula,

kodwa zange zindongamele.

₃Zandixobula umqolo, ndangathi bendilinywa.

₄Kambe ke yena *uNdikhoyo ulilungisa;

undikhulule kwiimbophelelo zabakhohlakeleyo.”

₅Bonke abayithiyileyo iZiyon mababuye bephoxekile.

₆Mabafane nengca entshula phezu kwendlu,

yona idodobalayo ingakhuli.

₇Ayide isikwe nokusikwa;

futhi ayiqokelelwa ibe zizipha.

₈Nabadlulayo abatsho nokutsho ukuthi:

“UNdikhoyo makanithamsanqele;

thina siyanithamsanqelisa egameni likaNdikhoyo!”

₁*Ndikhoyo, ndiyazibika kuwe;

ndikhala kuwe ndibindekile.

₂Awu, Nkosi, ndive ndiyakuthandaza,

usiphulaphule isikhungo sam.

₃Ukuba ubuzigcina izono zabantu, Ndikhoyo,

ngubani obengasindayo?

₄Kambe ke wena uyaxolela,

khon' ukuze uhlonitshwe.

₅Ndithembele ngokupheleleyo kuNdikhoyo;

ewe, ndikholosa ngelizwi lakhe.

₆Umoya wam ukholosa ngoNdikhoyo ngenzondelelo,

ngaphezu komlindi ojonge ukusa,

nangaphezu komantshingilane ojong' umsobomvu.

₇Sirayeli, thembela kuNdikhoyo, kuba yena unobubele,

futhi yena ukhulula ngokupheleleyo.

₈Ewe, yena uya kumkhulula uSirayeli

kuzo zonke izono zakhe.

₁Awu, *Ndikhoyo, mna andizigwagwisi;

ngokunjalo mna andiziphakamisi.

Kaloku andizixakekisi ngemicimbi ephakamileyo kunokuba ndinjalo mna.

₂Kodwa ndanelisekile, ndaye ndixolile.

Ndinjengosana oluthe cwaka ezingalweni zikanina;

ngenene umoya wam uphuphuma ukwanela.

₃Sirayeli, khawuthembele kuNdikhoyo, kususela ngoku kude kube nini-nini.

₁Awu, *Ndikhoyo, mkhumbule uDavide

ngawo onke amasuka-ndihlale akhe,

₂nesifungo awakwenzela sona, Ndikhoyo,

eso akuthembise ngaso, Ngangalala yakwaYakobi.

₃Wathi: “Andisayi kugoduka, ndingasayi kulala,

₄ngenene andisoze ndiwavale amehlo,

ndingasoze ndibuthurhe ubuthongo,

₅ndingamakhelanga umzi uNdikhoyo,

nditsho ikhaya lengangalala kaYakobi.”

₆Ewe, seva ngaloo mnqophiso e-Efrata,

sagagana nawo kumathafa aseYeharim, sathi:

₇“Masiye kuye ebhotwe;

masiye kumnqula simkhahlele.”

₈Ndikhoyo, khawuye endaweni yakho yokuphumla,

wena ndawonye netyesi yomnqophiso;

nditsho leyo ingumqondiso wamandla akho.

₉Ababingeleli mabavathe ubulungisa,

abantu bakho batsholoze ngovuyo.

₁₀Ngenxa yesicaka sakho uDavide

ungamfulatheli umthanjiswa wakho.

₁₁Kaloku, Ndikhoyo, wamenzela isifungo uDavide,

futhi ke soze usijike, usithi:

“Omnye koonyana besinqe sakho

ndiya kumthambisa abe ngukumkani,

angene esikhundleni sakho.

₁₂Ukuba ke bathe bawugcina

umnqophiso lo oonyana bakho,

kwanemimiselo endibafundisa yona,

noonyana babo bolawula,

bachophe esikhundleni sakho ngonaphakade.”

₁₃Kaloku uNdikhoyo uyinyule iZiyon;

uyikhethele ukuba ibe likhaya lakhe, esithi:

₁₄“Eli likhaya lam lokuphumla naphakade;

ndiya kuma apha ngokomnqweno wam.

₁₅Ndiya kuyithi jize ngentabalala yendyebo;

abahlelelekileyo ndiya kubondla.

₁₆Ababingeleli bovatha usindiso,

abantu bam batsholoze ngemihlali.

₁₇Kuya kuvela omnye kubazukulwana bakaDavide;

ndiya kuwugcina umlibo womthanjiswa wam.

₁₈Iintshaba zakhe ndozigalela ngehlazo;

ke olwakhe ulawulo loba nesidima nenkqubela.”

₁Khawukhangele ukubukeka nomkhitha

wokuhlala kwezalamane ngemvano!

₂Kunjengesiqholo esigalelwe entloko,

esihla ngeendevu zika-Aron,

side sithi xhaxhe ngomphetho wengubo yakhe.

₃Kufana nombethe entabeni iHermon,

lowo ulala kwiinduli zeZiyon.

Kulapho *uNdikhoyo awafumbe khona amathamsanqa

nobomi obungaphele ndawo.

₁Yizani nimbonge nimncome *uNdikhoyo,

nonke nina zicaka zakhe,

nina nonke nima bume ebusuku,

nisebenza endlwini kaNdikhoyo.

₂Ziphakamiseleni esibingelelweni izandla zenu,

nimbonge nimncome uNdikhoyo.

₃UNdikhoyo, umenzi wamazulu nehlabathi,

wanga angakuthamsanqela eseZiyon.

₁Huntshu-u-u! Khanityibele nimbonge *uNdikhoyo;

ewe, lidumisen' igama likaNdikhoyo!

Zicaka zakhe, khahlelani nidumisa uNdikhoyo;

₂nditsho nina nitabhata endlwini kaNdikhoyo,

nasenkundleni yomzi woThixo wethu.

₃Mdumiseni, kuba uNdikhoyo yindlel' enqwelo ngokulunga;

memelelani nimdumise, kuba kuluyolo ukwenjenjalo.

₄Andithi kaloku uNdikhoyo wazinyulela uYakobi!

Ewe, wazikhethela uSirayeli wangowakhe ncakasana!

₅Ndiyaqonda ukuba uNdikhoyo ubavelele,

ewe, ubakrobele bonke abanye *oothixo.

₆Kaloku uNdikhoyo wenza ngokubona kwakhe –

nditsho emazulwini nasemhlabeni,

kwiilwandle nakwiinzongo-nzongo zeenzulu.

₇Ngumavus' iingqimba zamafu eziphelweni zehlabathi,

ulokhaph' imvula ngemibane elenyayo,

aze akhuph' isaqhwithi ngendlu yaso.

₈Kaloku nguye owabhubhisa amazibulo eJiputa;

ewe, wageqa awabantu nawezilwanyana.

₉Kanye phakathi kwelaseJiputa

wenza imiqondiso nemimangaliso,

wamohlwaya ukumkani nezicaka zakhe.

₁₀Wazingenela izizwe, kwajub' ugodo,

wabageqa ookumkani abaziwayo.

₁₁Nditsho ooSihon ukumkani wama-Amori,

noo-Ogi ukumkani waseBhashan,

nazo zonke izikumkani zaseKanana.

₁₂Umhlaba wazo wona wawohlutha,

waza waba lilifa labantu bakhe amaSirayeli.

₁₃Igama lakho, Ndikhoyo, lohlala ngonaphakade;

udumo lwakho lovakala kwizizukulwana ngezizukulwana.

₁₄Kaloku uNdikhoyo uya kubalungiselela abantu bakhe,

avelane nazo izicaka zakhe.

₁₅Oothixo beentlanga benziwe ngegolide nesiliva;

basisiqhamo sobuchule bezandla zomntu.

₁₆Benemilomo nje, abakwazi ukuthetha;

banawo namehlo, kodwa ababoni.

₁₇Nakuba beneendlebe nje, bazizithulu;

baziziduli ezingenawo nomphefumlo.

₁₈Bakwafana nazo abenzi bazo,

nabo bonke abakholosa ngazo.

₁₉Khanidume nibonge uNdikhoyo, ndlu kaSirayeli,

nani ndlu ka-Aron, mbongen' uNdikhoyo.

₂₀NabaLevi mabakhahlele bebonga uNdikhoyo,

nabamthobelayo uNdikhoyo mababonge bade babongisele.

₂₁Izibongo mazihlokome, ziphuma eZiyon,

zidumisa uNdikhoyo okhaya liseJerusalem.

Awu! Sitsho sonke, sithi: “Bayethe, Mhlekazi!”

₁Bulelani nidomboze ngenxa yokulunga *kukaNdikhoyo.

Kaloku ububele bakhe buhlala buhleli.

₂Bulelani kuThixo onguyedwa.

Kaloku ububele bakhe buhlala buhleli.

₃Bambani ngazibini kwiNkosi yamakhosi.

Kaloku ububele bakhe buhlala buhleli.

₄Nguye yedwa owenza imimangaliso.

Kaloku ububele bakhe buhlala buhleli.

₅Ngobulumko bakhe wawadal' amazulu.

Kaloku ububele bakhe buhlala buhleli.

₆Ulotwabulula ihlabathi phezu kwamanzi.

Kaloku ububele bakhe buhlala buhleli.

₇Yena ngumenzi welanga nenyanga.

Kaloku ububele bakhe buhlala buhleli.

₈Ilanga laba ngumongameli wemini.

Kaloku ububele bakhe buhlala buhleli.

₉Yona inyanga neenkwenkwezi zongamela ubusuku.

Kaloku ububele bakhe buhlala buhleli.

₁₀Yena ngumaqwakanis' amazibulo aseJiputa.

Kaloku ububele bakhe buhlala buhleli.

₁₁Yena wamkhupha uSirayeli phakathi kwamaJiputa.

Kaloku ububele bakhe buhlala buhleli.

₁₂Wolula isandla sakhe, wamkhulula ngengalo yakhe engwanyalala.

Kaloku ububele bakhe buhlala buhleli.

₁₃Yena walahlula-hlula uLwandle oluBomvu.

Kaloku ububele bakhe buhlala buhleli.

₁₄USirayeli wanqumla kulo wawela.

Kaloku ububele bakhe buhlala buhleli.

₁₅Kambe ke wamntywilisela ukumkani nomkhosi wakhe.

Kaloku ububele bakhe buhlala buhleli.

₁₆Ulokhokel' abantu bakhe entlango,

Kaloku ububele bakhe buhlala buhleli.

₁₇umqwakanisi wookumkani abanamagama,

Kaloku ububele bakhe buhlala buhleli.

₁₈umhlabaniseli wookumkani abadumileyo,

Kaloku ububele bakhe buhlala buhleli.

₁₉uSihon ukumkani wama-Amori,

Kaloku ububele bakhe buhlala buhleli.

₂₀uOgi ukumkani waseBhashan.

Kaloku ububele bakhe buhlala buhleli.

₂₁Umhlaba wabo wawenza ilifa lamaSirayeli.

Kaloku ububele bakhe buhlala buhleli.

₂₂Loo mhlaba waba lilifa lesicaka sakhe uSirayeli.

Kaloku ububele bakhe buhlala buhleli.

₂₃Nguye owasivelelayo sigqusha eluthulini.

Kaloku ububele bakhe buhlala buhleli.

₂₄Yena wasihlangula ezintshabeni zethu.

Kaloku ububele bakhe buhlala buhleli.

₂₅Yena ngumondli wazo zonke izinto eziphilayo.

Kaloku ububele bakhe buhlala buhleli.

₂₆Bulelani nidomboze kuThixo wamazulu.

Kaloku ububele bakhe buhlala buhleli.

₁Ngasemilanjeni yaseBhabheli sahlala phantsi sagixa sakucinga *ngeZiyon.

₂Iikatala zethu sazixhoma emingcunubeni kwalapho.

₃Kaloku abo babesithimbile suka bathi:

“Khanisonwabise ngengoma;

khanihlabele enye kwezaseZiyon.”

₄Besingathini kambe ukucula *ezikaNdikhoyo kwelasemzini!

₅Ukuba ndingakulibala, Jerusalem, sanga singashwabana isandla sam sokunene.

₆Malunamathele ezinkalakahleni ulwimi lwam, ukuba ndinokukulibala,

xa ndinokusuka ndingayibaluli iJerusalem njengeyona ntshinga yovuyo lwam.

₇Awu, Ndikhoyo, yikhumbule into eyênziwa ngamaEdom, mhla yahlaselwa iJerusalem.

Kaloku agcoloda athi: “Yidilizeni niyisiphule neengcambu.”

₈Athi ke wena, Bhabheli, sisulundini sentshabalalo!

Hayi inyhweba yalowo ukubuyekezayo ngazo zonke izinto osenze zona.

₉Unoyolo ozithathayo iintsana zakho azintlekeze emaweni.

₅Abacinezelweyo bathembela kuNdikhoyo, bagcobe;

ewe, abasayi kuze badakumbe bona.

₆Lwazibika udwayi, waluva uNdikhoyo,

walukhupha kuzo zonke iinkxwaleko zalo.

₇Bonke abahlonela uNdikhoyo isithunywa sakhe siyabakhusela, sibahlangule.

₁₆Buyela kum, Ndikhoyo, undenzele inceba;

kaloku ndilikheswa, ndixhwalekile.

₁₇Ndikhulule kwintlungu endikuyo,

undikhuphe ezimbandezelweni.

₁₈Qwalasela ubunzima nosizi endikulo,

undixolele zonk' izono zam.

₁₉Zigqale ubuninzi bazo iintshaba zam,

nendlela ebuhlungu ezindiphethe ngayo ngolunya.

₂₀Bukhusele ubomi bam, undihlangule;

mandingadaniswa kaloku, kuba ndithembele ngawe.

₂₁Mandihlale ndingasoleki ndililungisa,

kuba kaloku ithemba lam likuwe.

₂₂Bakhulule, Thixo, abantu bakho amaSirayeli

kuzo zonke iimbandezelo zabo.

₇Ndive, Ndikhoyo, xa ndizibika kuwe;

yiba nenceba kum, undiphulaphule.

₈Kweli wena uthi: “Funani ubuso bam,”

intliziyo yam yathi: “Ewe, ndiyafuna ukukubona, Ndikhoyo.”

₉Mus' ukuzifihla kum, Ndikhoyo,

ungasilahli ngomsindo isicaka sakho.

Wena mncedi wam, mus' ukundilahla;

uzungandishiyi, Thixo wam, Mkhululi wam.

₁₀Xa ndilahlwe ngubawo noma,

wondichola yena uNdikhoyo.

₁₁Ndifundise indlela yakho, Ndikhoyo,

undikhokele endleleni elungileyo,

kuba zininzi iintshaba zam.

₁₂Uzungandiyekeli kwabandivukelayo,

kuba andivukele amangqina obuxoki,

afutha ukundenzakalisa.

₁₃Ngenene ndobuxhamla kambe ububele bukaNdikhoyo

lo gama ndisadla amazimba.

₁₄Thembela kuNdikhoyo; yomelela, ube nesibindi!

Ewe, thembela kuNdikhoyo wena!

₁₀Ziyandaluphaza iinkxwaleko zam,

nemihla yam iphelela ekungcungcuthekeni.

Ndiphelelwe ngamandla ngenxa yeentlupheko,

namathambo am selegugile.

₁₁Ndiyintlekisa kwiintshaba zam,

isigculelo kubamelwane bam.

Abandaziyo bayandoyika, bandibaleke,

xa badibana nam esitalatweni.

₁₂Sele ndalityalwa mpela;

ndinjengomfi ongasakhunjulwayo;

sendalahlwa kwesinomhlwa.

₁₃Ewe, ndiyivile intlebendwane yabanye;

kuthe saa luloyiko macal' onke,

lo gama bandenzela amayelenqe, beceba ukundibulala.

₁₄Kodwa ithemba lam likuwe, Ndikhoyo;

ewe, unguThixo wam wena.

₁Awu, khawundihlangule, Thixo!

Ndithe gabhu ngentamo emanzini.

₂Ndiyazika eludakeni olubizelayo,

apho kungekho nokuxhathisa.

Ndithe dyumpu esizibeni;

umsinga uyandintywilisela.

₃Sendikhale zada zoma,

kungokunje ndom' umqala;

amehlo afiphele kukujong' enkalweni,

ndilangazelela wena, Thixo wam.

₁₄Ndisindise ezintshabeni zam;

ndikhuphe emanzini anzongonzongo.

₁₅Ewe, mandingantywiliselwa ngumsinga;

mandingarhaxwa kwisiziba esimnyama;

mandingaginywa yinzonzobila.

₁₆Hayi ubuhle bezibele zakho!

Ndikhoyo, ndivelele undiphendule;

ewe, ngokobuninzi beenceba zakho ndive!

₁₇Musa ukusifulathela isicaka sakho.

Ndibandezelekile; nceda undiphendule.

₁₈Sondela undisindise;

ndikhulule ezintshabeni zam.

₂₉Kambe ke ndiyajwaqeka yintlungu;

ndonyule undisindise, Thixo.

₃₀Ndiya kumemelela ndibonge uThixo;

ndiya kumncoma ndidomboze.

₃₁Lo ke wona umbulelo ubalasele;

ungaphezulu kokubulela ngethole kuNdikhoyo,

uyidlula lee inkunzi yenkomo.

₃₂Ke bona abahlelelekileyo baya kuvuya;

abamlangazelelayo uThixo bokhuthazeka.

₃₃Kaloku uNdikhoyo uyabeva abahlelelekileyo;

akabacekisi abakhe ababanjiweyo.

₃₄Dandulukani, mazulu nani hlabathi, nimbonge,

nani zilwandle nako konke okushukumayo kuni!

₃₅Kuba uThixo uya kuyisindisa iZiyon,

aphinde azakhe izixeko zakwaJuda.

Izicaka zakhe ziya kuba ngabemi bakhona,

₃₆izizukulwana zona zidle ilifa,

bathi nabamthandayo bahlale khona.