Intuthuzelo evela kwiLizwi – Day 11

₁₄Kodwa ithemba lam likuwe, Ndikhoyo;

ewe, unguThixo wam wena.

₁₅Imihla yam isesandleni sakho;

ndihlangule ezintshabeni zam nakwabanditshutshisayo.

₁₆Ndisisicaka sakho, Ndikhoyo, ndikhangele ngobubele;

ndihlangule ezintshabeni zam ngenxa yezibele zakho.

₂₂Ukothuka kwam ndathi ndilahlelwe kude nawe,

kodwa wandiva ndakuzibika kuwe.

₂₄Qinani nibe nesibindi, nonke nina nithembele ngoNdikhoyo.

₁₈UNdikhoyo uyabanakekela abo bamhlonelayo

nabo bathembe izibele zenceba yakhe,

₁₉aze abahlangule ekufeni,

abondle ngelixa lendlala.

₂₀Thina sithembele kuNdikhoyo,

kuba nguye umncedi nomkhuseli wethu.

₂₁Ewe, siya kuchulumacha ngenxa kaNdikhoyo,

kuba sithembele kwigama lakhe elidumileyo.

₂₂Ndikhoyo, senzele ububele nenceba,

njengoko kaloku sithembele kuwe.

₂₉Kambe ke ndiyajwaqeka yintlungu;

ndonyule undisindise, Thixo.

₃₀Ndiya kumemelela ndibonge uThixo;

ndiya kumncoma ndidomboze.

₃₁Lo ke wona umbulelo ubalasele;

ungaphezulu kokubulela ngethole kuNdikhoyo,

uyidlula lee inkunzi yenkomo.

₃₂Ke bona abahlelelekileyo baya kuvuya;

abamlangazelelayo uThixo bokhuthazeka.

₃₃Kaloku uNdikhoyo uyabeva abahlelelekileyo;

akabacekisi abakhe ababanjiweyo.

₃₄Dandulukani, mazulu nani hlabathi, nimbonge,

nani zilwandle nako konke okushukumayo kuni!

₃₅Kuba uThixo uya kuyisindisa iZiyon,

aphinde azakhe izixeko zakwaJuda.

Izicaka zakhe ziya kuba ngabemi bakhona,

₃₆izizukulwana zona zidle ilifa,

bathi nabamthandayo bahlale khona.