Bible Reading Plan – Day 266

₂“Koda kube nini untyuntya?

Hayi bo, khawubuyel' ezingqondweni, nathi ke sithethe!

₃Kutheni ukuba usiphathe okwezilwanyana?

Ngaba usibona siziziyatha ezinjalo?

₄Uyazenzakalisa ngalo msindo wakho.

Ngaba umhlaba mawujike ube yinkangala ukungqinela ukunyaniseka kwakho?

Uthi makudilik' amawa ezindaweni zawo?

₅“Hayi kaloku, isibane sesikhohlakali siza kucinywa,

futhi ke nelangatye laso soze liphinde livuthe.

₆Ukukhanya kuya kujika kube bubumnyama endlwini yaso;

ewe, isibane saso siya kucinywa.

₇Siza kuphelelwa kukunyantsula,

sikhutyekiswe kwalelaso iqhinga.

₈Iinyawo zaso ziya kugaxeleka kwisabatha,

size sigxalathelane siye kuthi gxwa emhadini.

₉Umgibe wosuka usithi hlasi ngesithende,

usiqhoge usibambe ntshilikithi!

₁₀Kaloku sibekelwe isabatha emhlabeni,

sacutshelwa unoxhaka endleleni yaso.

₁₁Lo mntu urhwaqeliswa zizoyikiso ngeenxa zonke;

zimthe mbende zimpheka zimophula.

₁₂Inkxwaleko imlambele;

uhlala ezingelwa sisithwakumbe.

₁₃Uthiwe mome sisifo esilenceza ulusu lwakhe;

ewe, kanye izibulo lokufa limgrenya amalungu omzimba.

₁₄Woqwengelwa apho kwelo nqugwala liyinqaba yakhe,

suka ukufa kumqweqwedisele kwikumkani yezoyikiso.

₁₅Akukho nto iyeyakhe iya kusala kwelo nqugwala lakhe;

kaloku isulfure evuthayo iya kusasazeka phezu kwalo.

₁₆Phants' apha iingcambu zakhe ziya koma,

kanti ke wona amasebe akhe atshaze phezulu phaya.

₁₇Udumo lwakhe luya kutshitsha elizweni,

negama lakhe lilibaleke ehlabathini.

₁₈Wogxothwa kweli lizwe lokukhanya, akhatshelwe ebumnyameni;

ewe, uya kunikw' uphum' aphele kwelimiweyo.

₁₉Akayi kushiya mlibo nanzala phakathi kwamawabo;

ngenene akayi kushiya nempunde le kwelakowabo.

₂₀Abasentshona bothi bakuyiva le ntlekele bakhamnqe;

kanti ke abasempuma bothi bakuva ngesi sibetho batsho babamb' ongezantsi!

₂₁Kuya kuba njalo ke kwindlu yesikhohlakali.

Ewe, injalo indawo yongamkhathalelanga uThixo!”

₂“Yaz'ba koda kube nini na nindingcungcuthekisa,

nindaphula nindikroboza ngamazwi?

₃Kunini niphoxisa ngam!

Aninantloni ukundihlasela kangaka?

₄Khona sekusithiwa ndonile,

ningena phi ke nina?

₅Eyona nto ngoku niyandivuyelela;

kuni ezi nkathazo zam zibonisa ubutyala bam.

₆Anisaboni ke nina ukuba nguThixo lo undifake kule ngxingwa?

Ewe kaloku, nguye ondigubungele ngomnatha.

₇“Ndiba ngakhwaza ndisithi: ‘Ugonyamelo!’

andifumani nokuhoywa oku!

Futhi ndibe ngazibika,

akukho bani undilamlelayo!

₈Yena uyivalile indlela yam ukuze ndingabi nakugqitha.

Iindlela zam uzithe zinzi ngobumnyama.

₉Yena undihlube iwonga lam,

wandihlutha naloo ntshinga bendinayo.

₁₀Undidilize macal' onke, ndee shwaka,

walincothula njengomthi ithemba lam.

₁₁Ingqumbo yakhe uyijolise kum;

undiphethe njengolona tshaba lwakhe.

₁₂Undikhuphele umkhosi wakhe;

undimbela izikanisi zokundihlasela;

ujikeleza umzi wam.

₁₃Unditsho ndabalekwa nangabantakwethu;

xa kungokunje nezihlobo zam ezi zihambela phaya!

₁₄Okwakuzizalamane zam zindishiyile,

ngokunjalo nabazalana nam bandilibele.

₁₅Abo babeziindwendwe zam abasandikhumbuli,

nezicakazana zam azisandazele nto,

sendithathwa njengowasemzini.

₁₆Ndakusibiza isicaka sam, asisabeli nokusabela oku,

nditsho nokuba ndiyasicenga.

₁₇Kanti nomfazi wam weenkomo selekhutyekiswa kukuphefumla kwam;

sendiliqaqa nakwabesizalo sikama.

₁₈Sendidelwe nangabantwana aba bembala;

bathi ndakuthi gqi bakrukrutheke yintsini.

₁₉Endandikade ndilala ngengub' enye nabo, bayandicaphukela;

ukanti nâbo ndibathandayo bandivukele.

₂₀Izihlunu zam sezithe nca emathanjeni,

nolusu lwam sendilonwaya ngamazinyo.

₂₁“Hoyina! Hoyina, balingane bam; khanibe nebuya-mbo!

Kaloku sisandla sikaThixo esi sindenze ndanje!

₂₂Ngani ukuba nani ninditshutshise njengoThixo?

Hayi kaloku, noko ngoku sekwanele!

₂₃Akwaba ebekho owabhalayo la mazwi am;

akwaba ebeshicilelwe encwadini!

₂₄Ngenene akwaba la mazwi ebekrolwe elityeni ngentsimbi ebukhali nangelothe,

khon' ukuze ahlale ehleli nanini nanini!

₂₅Kambe ke ndiyazi ukuba umkhululi wam ukho;

ekugqibeleni iya kuba nguye otshatshelayo ehlabathini.

₂₆Nokuba ulusu lwam lungade ludlavulwe sesi sifo,

noko uThixo yena ndiya kumbona ndidlavuke ndinjalo!

₂₇Ewe, ndiya kumbona ngala wam amehlo,

indim, ingenguye wumbi.

Loo nto ndiyilangazelela ngomxhelo wam wonke.

₂₈Ke nina nisuka nithi:

‘Hayi ukungcungcutheka kwakhe!

Yabe ingcambu yaloo nto ikuye ngenkqu.’

₂₉Kambe ke lilumkeleni ikrele elifunza kuni,

ikrele lengqumbo kaThixo ngenxa yesono;

liya kunenza niqonde ukuba ukhona umgwebi.”

₂“Ukudubeka kwam kundibangela ukuba mandiphendule;

kunditsho ndikungxamele ukuthetha.

₃Ngale ndlela undigxeka ngayo uyandihlaza,

kodwa ndiza kukuphendula ngengqiqo.

₄Ngaba akuyiqondi le nto, ingathi lisiko lidala nje?

Laqala kwaukufika komntu wokuqala ehlabathini.

₅Nditsho le nto yokuba ulonwabo lwesikhohlakali alubhekele phi.

Kaloku imincili yalowo ungamnquliyo uThixo yeyomzuzwana nje.

₆Ewe, yena angasisihandiba esiwakrobeleyo namazulu,

abe sisikhulu esintloko irheca amafu,

₇kodwa wosuka adake kuphele njengelindle lakhe,

baze abo bebembonile bathi: ‘Utshone phi na?’

₈Usuka athi shwaka njengephupha,

azimele njengombono wasebusuku,

angaze aphinde alanywe bani.

₉Ababehlala bembona abaphindi bambone,

futhi nendawo yakhe ingaze ibe samalama.

₁₀Abantwana bakhe baya kubabuyekeza abasweleyo,

izandla zakhe zibuyisele ubutyebi bakhe kubo.

₁₁Nakuba wayefudula enamandla ngeemini zobutsha bakhe,

kodwa ngoku loo mandla aya kulala eluthulini kunye naye.

₁₂“Inkohlakalo inganambitheka kamnandi emlonyeni wakhe,

ade ayigushe phantsi kolwimi.

₁₃Anganamathela kuyo angavumi ukwahlukana nayo,

asuke akhethe ukuhlala eyimumathile ngenkalakahla.

₁₄Kodwa ke oko kutya kwakhe esiswini sakhe kosuka kukrakre,

kube ngathi yityhefu yephimpi.

₁₅Kaloku umntu okhohlakeleyo ubutyebi ubuginya ajike abuhlanze;

uThixo ubugrumba nakweso sisu sakhe.

₁₆Isikhohlakali simfimfitha ubuhlungu bamaphimpi,

buze busibinze kanye oku kobuhlungu berhamba.

₁₇Asihlali side sibone imilambo empompoza amanzi,

okanye iintlambo ezinkcenkceza ubusi namasi.

₁₈Ukubulaleka kwaso kufuneka sikuncame

singakhange sikuxhamle;

kaloku asilifumani ithuba lokubutya ubutyebi baso,

sinambithe imveliso yokurhweba kwaso.

₁₉Andithi na kaloku sona saphila kukucinezela abahlelelekileyo;

izindlu sizifumana singazakhanga?

₂₀“Kaloku ukunyoluka komntu okhohlakeleyo akunasiphelo;

ulixhoba leminqweno yakhe.

₂₁Utya konke, angashiyi nto;

ngoko ke ngoku inkqubela yakhe isuke yanqamka.

₂₂Uthi xa asencotsheni yempumelelo ahlelwe ziinzima;

zisuke zimfikele ngamandla iinkathazo.

₂₃Angatya yena ahluthe mpu,

kodwa uThixo wosuka amnisele ngengqumbo yakhe,

amohlwaye ngokumzisela imfazwe.

₂₄Xa azama ukuphepha ikrele elenziwe ngentsimbi

uya kuchanwa lutolo lobhedu, lumbinze luphumele.

₂₅Xa elikhupha emqolo,

encothula intloko yalo ekhazimlayo enyongweni,

wosuka onganyelwe kukunkwantya.

₂₆Yonke indyebo yakhe yovuthuluka iphele,

kuthi gqi umlilo ongaphenjwanga mntu

utshabalalise okushiyekileyo endlwini yakhe.

₂₇Amazulu osuka awadandalazise amatyala akhe,

ke lona ihlabathi lisuke limvukele.

₂₈Indlu yakhe iya kukhukuliswa,

imke nomsinga wamanzi ngemini yengqumbo kaThixo.

₂₉Naso ke isabelo uThixo asinika abakhohlakeleyo;

ewe, elo lilifa abamisele lona uThixo.”

₂“Khanibek' iindlebe nindiphulaphule;

leyo ke yoba yeyona ntuthuzelo kum.

₃Khanindinyamezele nam ndikhe ndithethe;

emva koko ke ningaqhubela phambili niphoxise.

₄“Ke mna ndifanele ukukhathazeka;

kaloku andixabananga nomntu nje.

₅Jongani kum: niya kumangaliswa,

nibamb' ongezantsi.

₆Nam ndithi ndakuyicinga le nto indihleleyo ndisuke ndikhwankqiswe,

ndize ndifikelwe kukungcangcazela komzimba.

₇Ngani ukuba abakhohlakeleyo bayizuze inyhweba yokukhula bade babe badala,

baxhamle ukomelela nenkqubela?

₈Bakhula babe nabantwana nabazukulwana;

ewe, baba nenyhweba yokusibukela isizukulwana sabo.

₉Emizini yabo bonwabile, abakhathazwa nto;

uThixo akabayekeli ngezibetho.

₁₀Kubo iinkunzi ziyazizalisa iimazi, zingashiyi nanye;

ibe ke neemazi zabo ziyazala zingaphunzi.

₁₁Owabo umlisela utaka-taka ngokwamatakane;

abantwana babo bayadloba-dloba.

₁₂Ungafika bememelela bekhatshwa ziintambula neengqongqo;

bangqungqa benemincili bebetha iifluthi.

₁₃Obabo ubomi babudla ngentlutha nenzolo,

baze bathi nyubelele baye kutshona kwelemimoya ngaphandle kwamagingxi-gingxi.

₁₄Izikhohlakali zithi kuThixo: ‘Suka kuthi!

Asinamdla wakuzazi iindlela zakho.’

₁₅Zisuka zithi:

‘Kuxa engubani yena uSomandla ukuba singade simbuse?

Khona, nzuzoni esiyifumanayo ngokumnqula?’

₁₆Kambe impumelelo yazo ayixhomekekanga ezandleni zazo.

Mna andihambisani necebo lâbo bantu bakhohlakeleyo.

₁₇“Kukangaphi isibane sesikhohlakali sicinywa?

Kukangaphi zingundaniselwa zizibetho?

Andithi na kaloku uThixo abakhohlakeleyo ubahlomlela ingqumbo yakhe,

₁₈aze abavuthele baphephetheke njengengca enqunqiweyo,

bavuthuluke njengomququ unyuka nesaqhwithi?

₁₉Ngaba uThixo usibekela abantwana isohlwayo sabazali?

Hayi bo; makohlwaye abo bonileyo ngokwabo,

khon' ukuze nabo baqonde.

₂₀Abo bonileyo mabaxhamle isohlwayo,

basele ingqumbo kaSomandla.

₂₁Kakade ke, umntu uwukhathalele ngani umzi wakhe xa yena engasekho,

xa iinyanga zakhe azibalelweyo kobu bomi seziphelile?

₂₂“Ngubani ongafundisa uThixo ulwazi?

Nezithwala-ndwe zaphezulu zisesandleni sakhe nje!

₂₃Bambi bafa bethe gabhu kwintlala-kahle nenkqubela;

bafa bengazele nto bekhuselekile.

₂₄Ewe, bafikelwa kukufa iimvaba zabo zizele ngamasi;

nangokwasempilweni bayimiqaba-qaba.

₂₅Ukanti ke bambi bafa benxunguphele,

bengazange bayive nokuyiva intlala-kahle.

₂₆Kambe ke bonke bayafa bangcwatywe,

baze ke babe lixhoba leempethu.

₂₇Ewe, ndiyakubona ukuyila kweengqiqo zenu,

ngokunjalo naloo mayelenqe niwayilayo ukuchasana nam.

₂₈Niyawaza kubuza ke nithi:

‘Uphi umzi wesikhulu xa kunamhlanje-nje?

Iphi loo ndlu sasiyenzela kuyo inkohlakalo?’

₂₉Ngaba anikhe nibuze na kwabalikhenkethileyo ilizwe?

Ke, ngaba anikayiqondi ingxelo yabo?

₃₀Le yokuba ngomhla wesithwakumbe isikhohlakali siyasinda,

sihlangulwe kuyo ingqumbo!

₃₁Akukho mntu ujongana naso asimangalele,

kungekho bani usibuyekezayo ngezenzo zaso.

₃₂Sisiwa emangcwabeni,

lilindwe ingcwaba laso.

₃₃Amagada entlambo alala athi ncwaba phezu komzimba waso.

Bonke abantu bayasilandela ukuya apho;

kanti sandulelwe linani elingenakubalwa.

₃₄“Ningathini ke ukufuna ukundithomalalisa ngamazwi alambathayo?

Zonke iingxoxo zenu bubuvuvu obungeyonyaniso.”