Bible Reading Plan – Day 265

₁“Hayi kambe umntu, intw' ezelwe ngumfazi!

Mifutshane imihla yakhe; izele ziinkathazo.

₂Uvela njengentyatyambo, akhawuleze abune;

uthi tshe oku kwesithunzi, aphel' emehlweni.

₃Uthi onjalo ke ungamgqala,

ude ume naye enkundleni umgwebe?

₄Ngaba ukhona na ongakhupha into ehlambulukileyo kwengahlambulukanga?

Unotshe, akukho namnye!

₅Kaloku imihla yakhe seyimisiwe,

nenani leenyanga zakhe liyaziwa nguwe;

kananjalo ke ummisele umda angenakuwutsiba.

₆Somyeka, ungabi samjonga,

akhe aphumle njengomqeshwa ogqibe umsebenzi wemini.

₇“Umthi xa ugawuliwe lisekhona ithemba ngawo;

awunakufa kuphele, usenokubuya uhlume amagqabi.

₈Noba ingakhula ibe ndala ingcambu yawo emhlabeni

nesiphunzi sawo sife apho simile khona,

₉uthi nje ukuba ukhe wasezela ukunyepha kwamanzi,

utsho uhlume, uvelise amasebe njengegatyana lomthi.

₁₀Ukanti ke yena umntu uyafa, iphel' intw' ibithethwa.

Ewe, uyafa aphel' emehlweni.

₁₁Njengokuba amanzi echibi ephela, namanzi omlambo esitsha ome;

₁₂nomntu ke unjalo, ulala phantsi angabuyi avuke.

Ibe ke soze aphinde avuke,

okanye ashukunyiswe kobo buthongo bakhe,

ade amazulu angabi sabikho.

₁₃“Akwaba ubungandifihla kwelo labafileyo

ide ithothe ingqumbo yakho,

uze ke undimisele ixesha oya kundikhumbula ngalo.

₁₄Ukuba ngaba ke umntu ufile, angabuya aphile?

Xa kunjalo ngendilinda yonke imihla yokubulaleka kwam,

lide lifike ixesha lokukhululeka kwam.

₁₅Ngewundibiza, ndisabele ke mna,

kuba wena ukulangazelela ukubona umsebenzi wezandla zakho.

₁₆Ngewuzibala izinyathelo zam,

ungaziqwalaseli noko iziphoso zam.

₁₇Zonke izikreqo zam ziya kuvalelwa engxoweni,

ubugqume ubugwenxa bam.

_18-19Kodwa wena uyalitshitshisa ithemba lomntu,

oku kweentaba ezidilikayo zivuthuluke,

oku kwamawa asunduziweyo angabi sabakho,

nditsho oku kwamanzi awadlayo amatye,

okwezandyondyo zemvula eziwukhukulisayo umhlaba.

₂₀Umntu umvikiva kube kanye, angabi sabikho;

uguqula ubuso bakhe, umgxothe.

₂₁Oonyana bakhe noba sebewongekile, akaqondi yena;

ukanti akaboni naxa sebehlazeka.

₂₂Kaloku into emdlayo yintlungu yesiqu sakhe,

abe ezililela yena buqu.”

₂“Uthi isilumko singaze sitsho ngembudede enje?

Singathi kanti sihlalele ukubhodla umoya wasempuma?

₃Wawusibona phi isilumko esibhibhidla kanje xa sixoxayo,

esisuka sizithethelele ngamazwi ayimfeketho njengawe lo?

₄Wena ngoku uyakuphuthisa ukuthobela uThixo;

ngale ndlela yakho akukho bani ongaphinda anxulumane noThixo.

₅Ukuthetha kwakho sekulawulwa bubugwenxa;

ulwimi lwakho luvuza amaqhinga.

₆Wena awugwetywa nandim, koko ngumlomo wakho,

ngamazwi akho kanye akugwebayo.

₇“Nguwe na umntu wokuqala ukuzalwa?

Ngaba wavela kungekabikho neentaba ezi?

₈Ngaba wawukho kwigqugula likaThixo?

Ngani ke ukuba ububange kangaka ubulumko?

₉Zinto zini ezi zaziwa nguwe wedwa singazaziyo thina?

Ngaba kukho izinto eziyintsonkotha ezicace kuwe wedwa?

₁₀Thina sineengwevu namadoda amakhulu,

amadala nditsho nakuyihlo.

₁₁Kutheni ukuba unganeli yintuthuzelo kaThixo,

okanye ngala mazwi sikubongoza ngawo?

₁₂Yintoni le ikulahlekisa kangaka?

Atshawuziswa yintoni amehlo akho?

₁₃Kutheni ukuba uvukelane noThixo,

ude uthethe amazwi anje?

₁₄“Nguwuphi umntu ongade abe nyulu,

ingubani kwabazelweyo ngabafazi ongafumaneka engenatyala?

₁₅Khumbula kaloku ukuba uThixo akathembanga nditsho neengcwele zakhe zasezulwini;

ewe, nezulu ngokwalo alikho nyulu emehlweni akhe.

₁₆Ubeka phi ke yena umntu eyinto elisikizi ephuthileyo nje?

Kuxa engubani esela uluchwe lobubi nje oku kwamanzi?

₁₇“Khawuphulaphule ndikhe ndikuxelele,

ndikwazise izinto endizibonileyo.

₁₈Nditsho ezo zaxelwayo zizilumko

njengoko zona zingafihlelwanga ngamanyange.

₁₉Kaloku wona eli lizwe alinikwa laba lelawo odwa

kungekho maveza-ndlebe.

₂₀Isikhohlakali sihlala sibhinyalaza singcungcutheka yonke imihla yaso;

ewe, bunjalo ke bonke ubomi bomntu ongqwabalala!

₂₁Kaloku sisoloko sisothuswa yingxolo esezindlebeni zaso;

size sihlaselwe xa sizicingela ukuba sikhuselekile.

₂₂Asinathemba lakuphuncula ebumnyameni

kuba sihleli silindelwe likrele.

₂₃Kaloku lo mntu usesichengeni sokuba kukutya kwamaxhalanga;

uqonda kakuhle ukuba yintshabalalo ngaphambili.

₂₄Usuka onganyelwe yinkxwaleko nomva-ndedwa,

kanye oku kokumkani esiya kuhlasela.

₂₅Kaloku yena usolulele kuThixo isandla sakhe,

wazenza igorha kuSomandla,

₂₆emhlasela engakhathalele,

ephethe elo khaka lakhe elingqingqwa.

₂₇“Noxa ubuso bakhe bugutyungelwe ngamanqatha,

nemihlubulo yakhe ivuthelene kukutyeba,

₂₈izixeko zakhe ziya kuba ngamanxuwa;

indlu yakhe ilil' ibhungane;

ngokukhawuleza iza kuba ngamabhodlo nje.

₂₉Ewe, uya kuphelelwa kukuba sisityebi, ize nendyebo yakhe ibhange,

nditsho nenzuzo yakhe ingabi sabakho kulo lonke ilizwe.

₃₀Akayi kubuphepha ubumnyama bokufa.

Ihlumelo lakhe liya kurhawulwa lilangatye,

amazwi akhe aphephetheke nomoya.

₃₁Makangazikhohlisi aqamele ngamampunge,

kuba inzuzo yakhe iya kuba lilize.

₃₂Uya kutshazwa phambi kwexesha,

amagqabi angaze abe luhlaza.

₃₃Uya kufana nomdiliya ovuthuluke iziqhamo ziseluhlaza,

nqwa nomnquma ovuthuluke iintyatyambo.

₃₄Lonke elo qela labangamnquliyo uThixo aliyi kuba nanto,

nemizi yabo eyakhiwe ngezinyobo iya kuvuthululwa ngumlilo.

₃₅Kaloku bakhawula ububi, bazale uqhushululu,

inzala yabo ibe yinkohliso.”

₂“Zonke ezi zinto nindixelela zona sendikhe ndaziva ngaphambili;

inene, xa ninonke ningabathuthuzeli abangento.

₃Ngaba le ntshwaqane yenu ayinasiphelo?

Nomelezwa yintoni kangaka engxoxweni?

₄Nam bendingathethayo ngolo hlobo xa ibinini abakule meko ndikuyo;

bendiya kuthetha nani ndimana ndichan' amagama,

ndide ndimane ndihlunguzela intloko.

₅Bendiya kunomeleza ngamacebiso,

ndinithuthuzele ngamazwi alalanisayo.

₆“Kambe ke, nokuba ndiyathetha, intlungu le ayisuki;

kanti ke nokuba ndithule, kusafana.

₇Hayi ke, ngoku uThixo undiqobile;

usapho lwam uluvuthulule bhuqe!

₈Ndifunyenwe nguye, kwaza oko kwaba bubungqina bokundityhola;

ukonakala komzimba wam bubungqina obundidobelelayo.

₉Ngale ngqumbo yakhe undiqwengile wandenzakalisa;

undisinekele ngaloo mazinyo akhe;

yena mchasi wam uyandijamela.

₁₀Abantu bathetha ngam bendigxeka;

bandimpakaza esidleleni ngengcikivo,

bebonke badibana ngokundichasa.

₁₁UThixo undiyekele ngezaphula-mthetho,

wandinikela ezandleni zezikhohlakali.

₁₂Mna bendingacingele nto, suka ke yena wandintlekeza,

wandibamba ngobhongwana, wandiqwenga.

Ewe, mna sendiyeyona nto ajolise kuyo.

₁₃Abeentolo bakhe bandirhawule;

undincule izintso engenalusini,

wayiphalazela emhlabeni inyongo yam.

₁₄Undingxwelerhe wada wandiqusha;

ufunzela kum okwejoni.

₁₅“Ngoku sendithe wambu ezokuzila;

uphondo lwam luseluthulini.

₁₆Sendilile ndada ndambatsha;

ke wona amehlo am ade af' amnyama.

₁₇Kambe ke phofu mna andinabundlongo-ndlongo,

nomthandazo wam kuThixo awunakumbi.

₁₈“Yini na, mhlaba!

Sukulingcwab' igazi lam!

Isikhalo sam masivakale!

₁₉Kaloku nangoku ingqina lam lisemazulwini;

ewe, ukho ongakum ondithethelelayo kweliphezulu.

₂₀Sendiyintlekisa nakwizihlobo zam;

ke iinyembezi zam ndiziphalaza phambi koThixo.

₂₁Akwaba ebenokulamla phakathi komntu noThixo

njengoko ebakho umlamli phakathi komntu nomhlobo wakhe!

₂₂Kuba kaloku akuseminyaka mingaphi ndithathe uhambo olungabuyiyo.”

₁“Umoya wam wonakele, nemihla yam iphelile;

ngoku sending'ong'ozelwe lingcwaba.

₂Inene, ngapha nangapha ndiphahlwe ngabandigculelayo;

ewe, ndijongene nentiyo yabo.

₃“Nceda, Thixo, undibekele isibambiso.

Kakade ke ibingubani omnye ongandikhuselayo?

₄Kaloku iingqiqo zabo uzithe lwale ngokungaqondi;

ngoko ke mabangandoyisi.

₅Kaloku umntu ongcothoza izihlobo zakhe ngenxa yenzuzo,

abantwana bakhe baya kufa amehlo.

₆“Undenze ndaba ngundaba-mlonyeni kubantu bonke,

into etshicelwa ebusweni.

₇Ngenxa yeenzingo amehlo am selede anorhatyazo;

sendide ndayingcadalala ephephukayo.

₈Abo banyanisekileyo ke bamangalisiwe;

ewe, abamsulwa bayakhathazeka ngenxa yabachasene noThixo.

₉Olilungisa ubambelele nkqi endleleni yakhe,

ngokunjalo ke nabo bazandla zimsulwa baya besomelela ngokomelela.

₁₀“Kambe ke, noba niyaphinda nibuye xa ninonke,

andiyi kufumana nasinye isilumko apho phakathi kwenu.

₁₁Imihla yam iphelile, namacebo am achithakele,

ngokunjalo neminqweno yam ivuthulukile.

₁₂Ubusuku bathi yimini;

kanti xa kuhlwayo bathi sekuza kusa.

₁₃Uthi ke, xa ndingasuka ndithi elabafileyo likhaya lam,

ndize ndizandlalele kwamnyama-ndawo,

₁₄okanye ke, xa ndinokuthi ingcwaba ngubawo,

ndize ndithi iimpethu ngumama nodade wethu:

₁₅liphi ke ithemba lam,

ingubani khona onokundibonelela?

₁₆Ngaba bendinokuhla nalo na ndiye emasangweni elabafileyo?

Bendinokuhla nalo na, ndiye kuphumla nalo eluthulini?”