Bible Reading Plan – Day 135

₁Yivani, nâbo ubulumko bumemeza!

Nayo ingqiqo nantso izazisa.

₂Kaloku bumi ngasezindleleni phezu kweentaba;

ewe, nabu buthe bhunxe eziphambukeni zeendlela.

₃Nabo bungxang' emasangweni edolophu;

ewe, buyamemelela ekungeneni esixekweni:

₄“Hoyina, ndibhenela kuni, nina nonke luntu;

ndiyanibiza nani, nzala yakwantu.

₅Kambe nani, ziyatha, fundan' ingqiqo,

nani, nina zidenge, qalisan' ukuqonda.

₆Phulaphulani, kuba ndiza kutheth' izintw' ezibalaseleyo;

yivani, kuba ndiza kuyixel' imfanelo.

₇Kaloku ngomlomo wam ndiza kutheth' inyaniso,

kuba ke mna ndiyithiyil' inkohlakalo emilebeni yam.

₈Onke amazwi omlomo wam anyanisekile;

ubuqhophololo nobuxoki abukho kuwo.

₉Kumntu oqondayo onke acacile;

kwâbo baziyo onke alungile.

₁₀Nawe ke, yamkela ingqeqesho kunesiliva;

ndithi thatha ulwazi kuneyona golide.

₁₁Mna bulumko ndiyawagqitha namatye exabiso;

nakwiindidi zobutyebi mna andidlulwa nto.

₁₂“Mna bulumko ndihlala ndithe qwa;

ndixakath' ulwazi kunye nokulungelelanisa.

₁₃Ukumthobela *uNdikhoyo kukubuthiya ububi.

Yiloo nto ndikuchasileyo ukuzigwagwisa,

ikratshi, ukungabi nasimilo, kunye nentetho egwenxa.

₁₄Ndingusomacebo, ndingumthombo weembono ezichubekileyo;

ndinako ukuqonda, kanti nokomelela kokwam.

₁₅Ewe, oozikumkani balawula ngam,

neziphathamandla zilawula ngobulungisa nje ndim.

₁₆Bonke abasemagunyeni bancedwa ndim lo:

oomatshawe, noozikhulu, nabagwebi ngokwabo.

₁₇Kaloku ndiyabathanda abo bandithandayo,

futhi ndiyafumaneka kwabo bandifunayo.

₁₈Ndibathi jize ngesihomo nendyebo,

batsho babe nobutyebi obuzinzileyo nenkqubela.

₁₉Inzala engenxa yam ingaphezu kwayo negolide;

imveliso yam iyayibetha neyona siliva.

₂₀Ihambo yam bubulungisa bodwa;

iindlela zam zifanelekile.

₂₁Ubutyebi lilifa endibanikayo abo bandithandayo;

ndibathi jize ngoovimba abaphuphumayo.

₂₂“Ekuqalekeni kwendalo kaNdikhoyo mna ndandikho ndingowakhe;

ewe, ndandikho ingekabikho imisebenzi yakhe yamandulo.

₂₃Mna wandiqingqa kwasephakadeni,

kuqala ngqa, nehlabathi lingekabikho.

₂₄Ndavela engekabikho namanzi anzongo-nzongo,

tanci ingekaveli nemithombo ephuphuma amanzi.

₂₅Ndingowokuqala phambi kwazo neentaba;

neenduli zilibone emva kwam ilanga.

₂₆Ndabakho ungekabikho umhlaba neentili zawo;

ewe, kwakungekabikho nothuli olu ehlabathini!

₂₇Ndandikho ekumiselweni kwamazulu nguThixo,

xa wayetwabulula isibhakabhaka kumanzi anzongo-nzongo.

₂₈Xa wayesambathisa isibhakabhaka ngamafu ndandilapho,

nangokuya wayeseka imithombo yeelwandle ndandikho.

₂₉Ndandilapho xa wayemisa imida yolwandle,

xa wayesithi: ‘Latyuza, kodwa ungagqithi apha.’

Ekuzimiseni kwakhe iziseko zehlabathi ndandikho.

₃₀Ewe, ndayingcali yomsebenzi, ndiyintonga yakhe yasekhosi;

ndandizele yimincili iimini ngeemini,

ndivuya apho ecaleni kwakhe.

₃₁Ngenene ndandichulumacha kulo elimiweyo;

ndandiziva ndinemihlali phakathi koluntu.

₃₂“Ngoko ke, bonyana, ndiphulaphuleni,

kuba banoyolo abo bahamba ngeendlela zam.

₃₃Yamkeleni ingqeqesho, ukuze nibe zizilumko;

sanukuyityeshela, koko bambelelani kuyo.

₃₄Unenyhweba kambe umntu ondiphulaphulayo;

nditsho lowo uhlala enkundleni yam yonke imihla,

osoloko elindile emasangweni am phaya.

₃₅Ozuze mna ke ubufumene ubomi;

uxhamla ukwaneliseka kukaNdikhoyo.

₃₆Kambe ke yena ondiphosileyo uzenzakalisile;

kanti ke lowo undithiyileyo uthand' ukufa.”

₁Ubulumko buyakhile indlu yabo,

bayenzela iintsika ezisixhenxe.

₂Ubulumko buxhelile, bayixuba newayini;

kwaye netafile sebuyidekile.

₃Buthume izicakazana ukuba zime ezindulini,

zazise apho edolophini, zithi:

₄“Yizani nonke, nina bangaqondiyo.”

Kanti ke kwabaswele ukuqonda buthi:

₅“Ngenani nitye ukutya endikulungisileyo,

nisele newayini endiyixubileyo.

₆Lahlani ubuyatha, khon' ukuze niphile;

hambani ngendlela yeengqondi.

₇“Othethisa umgxeki uzibizela ukuthukwa;

okhalimela isikhohlakali udibana nokunyeliswa.

₈Sukuziduba ngokululeka umgxeki kuba wosuka akucaphukele;

kambe ke wakululeka isilumko sitsho sikuhloniphe.

₉Wakusifundisa isilumko sitsho silumke ngaphezulu.

Ukuba uyalicebisa ilungisa litsho longeze ulutho kulwazi lwalo.

₁₀“Isiseko sobulumko kukuthobela *uNdikhoyo;

umntu omaziyo oyiNgcwele kanye uzuza ingqiqo.

₁₁Mna bulumko ndoyenza ibe mininzi imihla yakho,

ndiyongeze iminyaka yobomi bakho.

₁₂Xa usisilumko woncedwa bubulumko bakho;

kanti xa ungumgxeki iya kuba nguwe kanye ohluphekayo.”

₁₃Umfazi onguNobudenge usoloko engxola;

yindlavinikazi engazi nto.

₁₄Uthanda ukuhlala emnyango endlwini yakhe

okanye kwiindawo eziphezulu edolophini,

₁₅ufike selemana ekhwaza abantu abadlula ngendlela,

behamba bexakeke yimicimbi yabo,

₁₆esithi: “Yizani apha nonke, nina bangaqondiyo!”

Kwabaswele ukuqonda uthi:

₁₇“Akamnandi ngako amanzi abiweyo!

Kanti ke nokutya okutyiwa ekufihlekeni kokona kunencasa.”

₁₈Abamphulaphulayo abaqondi ukuba kukufa okubalindele apho;

abazi ukuba abo bakhe bamtyelela xa kungokunje bakwelabafileyo.

Unyana osisilumko ulibhongo likayise,

ke yena osisityhakala ungumva-ndedwa kanina.

₂Ubutyebi obufunyenwe ngobuqhophololo abuphumelelisi,

kodwa ke kona ukuziphatha kakuhle kuhlangula ekufeni.

₃*UNdikhoyo soze abayeke abantu abalungileyo balambe,

kambe ke zona izikhohlakali uyazithintela ingafezeki iminqweno yazo.

₄Umntu oqhokrwe izandla uba lihlwempu;

ke yena okhutheleyo uba sisityebi.

₅Unyana oxakekayo evuna ngexesha lokuvuna ukhaliphile;

kambe ke yena olalayo xa isivuno silungile lihlazo.

₆Amalungisa athiwa jize ngesithsaba sentsikelelo,

ke zona izikhohlakali ubundlobongela zibufihla ngokuthetha.

₇Kuyintsikelelo ukukhumbula amalungisa,

kambe ke lona igama lezikhohlakali liyaphutha.

₈Umntu onengqondo uyayiphulaphula imiyalelo;

kambe ke sona isityhakala esilavuzayo siya kubhanga.

₉Umntu onyanisekileyo uhamba engaxhalele nto;

ke yena onamaqhinga uya kubhaqwa.

₁₀Umntu oyivalela amehlo inkohlakalo ubangela intlupheko,

kambe ke isityhala esilavuzayo siya kubhanga.

₁₁Amazwi omntu olilungisa angumthombo wobomi;

kanti ke zona izikhohlakali ubundlobongela zibufihla ngokuthetha.

₁₂Intiyo iphembelela ingxabano;

ke lona uthando luyazingcwaba zonke izono.

₁₃Umntu oqondayo uthetha ubulumko,

kanti ke umhlana wesinyabi ufanelwe yintonga.

₁₄Isilumko siyaluqoqosha ulwazi,

kanti ke kona ukuthetha kwesityhakala kuza nentshabalalo.

₁₅Ubutyebi besinhanha lixhadi laso;

ke bona ubuhlwempu yintshabalalo yosweleyo.

₁₆Ilungisa lixhamla ubomi ngemigudu yalo;

ke yona inzuzo yesikhohlakali iphelela esonweni.

₁₇Umntu oyithobelayo ingqeqesho usekhondweni lobomi;

ke yena ongaphulaphuliyo ulahlekene nendlela.

₁₈Umntu oyifihlayo intiyo lixoki;

ke yena osasaza iindaba zolwimi sisiyatha.

₁₉Ekuthetheni kakhulu isono sidla ngokubakho,

kambe ke ozibambayo ekuthetheni unengqiqo.

₂₀Amazwi elungisa afana nesiliva ecwengileyo;

ke zona iingcinga zesikhohlakali ziphuthile.

₂₁Amazwi omntu onengqondo ayinzuzo kwabaninzi;

kanti ke zona izityhakala zibulawa kukungayisebenzisi ingqondo.

₂₂Yintsikelelo kaNdikhoyo enika umntu ubutyebi;

kambe ke yona ayihambi nazintsizi.

₂₃Isiyatha siyavuya xa sisenza ubugwenxa;

phofu ke yena umntu onengqondo uyabuvuyela ubulumko.

₂₄Umntu okhohlakeleyo uzuza kanye le nto imnxunguphalisayo,

kodwa yena olilungisa unikwa oko akufunayo.

₂₅Zakufika iinkqwithela zimka nabo abantu abakhohlakeleyo;

kanti ke bona abanyanisekileyo bema ngxishi ngonaphakade.

₂₆Asinto umdintsi ukusetyenzelwa livila,

nqwa neviniga emazinyweni okanye umsi emehlweni.

₂₇Ukuthobela uNdikhoyo kuyabongeza ubomi bomntu;

kanti ke yona iminyaka yezibhoja iyanqanyulwa.

₂₈Ithemba lelungisa liza novuyo;

ke lona ithemba lesikhohlakali liphelel' emoyeni.

₂₉Indlela kaNdikhoyo yinqaba yamalungisa;

kodwa ke yintshabalalo kwabenza ububi.

₃₀Ilungisa alisoze libhukuqwe;

ke yena okhohlakeleyo ngekhe eme elizweni.

₃₁Umntu obhadlileyo uphuphuma ubulumko,

kambe ke yena umntu ogqwethayo uya kunqunyulwa ulwimi.

₃₂Umntu onengqondo uthetha amazwi afanelekileyo;

kambe ke sona isikhohlakali sithetha amazwi akrwempayo.