Bible Reading Plan – Day 134

₁Yiphulaphuleni, bonyana, ingqeqesho kayihlo;

yigqaleni, khon' ukuze nizuze ukuqonda.

₂Ndininika eyona mfundiso iyiyo,

ngoko ke musani ukuwutyeshela umyalelo wam.

₃Ngokuya ndandiseyinkwenkwana katata,

ndiselula, ndinguyedwa kamama,

₄utata wayendiyala athi:

“Wazikise engqondweni yakho amazwi am,

ungayilibali imiyalelo yam;

yigcine imithetho yam, uphile.

₅Thabatha, nabu ubulumko, nantsi ingqiqo!

Ungaze wahlukane okanye ushenxe kumazwi omlomo wam!

₆Ungaze ubushiye ubulumko, ke bona buya kukulondoloza.

Thandana nabo, khon' ukuze bukukhusele.

₇Ubulumko ngoyena ndoqo, bufunisise!

Fumana ingqiqo, nokuba kudle konke onako.

₈Ewe, bunonelele ubulumko, ke bona buya kukuphakamisa;

bukhwaphe, ke bona buya kukuthi jize ngesihomo.

₉Boba njengentsimbi ehombisa intloko yakho,

bukuthi jize ngesithsaba esingayiwayo.”

₁₀Phulaphula, nyana wam, uwathathele ingqalelo amazwi am,

uze udle ubomi iminyaka emininzi.

₁₁Mna ngokwam ndikufundisile ubulumko,

ndakukhokelela endleleni ethe ngqo.

₁₂Xa uhamba, ukunyathela kwakho akuyi kuphazanyiswa,

ngokunjalo naxa ubaleka akuyi kukhubeka.

₁₃Ungaze wahlukane nengqeqesho, koko bambelela kuyo;

yilondoloze, kuba ibubomi bakho.

₁₄Musa ukuhambisana nabantu abakhohlakeleyo,

ungahambi nasekhondweni labenzi bobubi.

₁₅Ewe, ndithi zicezele iindlela zabo, ungahambi ngazo.

Shenxa kuzo, uhambe uzigqithe.

₁₆Kaloku izikhohlakali azaneli kukulala zingenzanga nto imbi.

Ewe, ziphuthelwa ubusuku bonke, zide zibe zenzakalise umntu.

₁₇Kaloku inkohlakalo sisonka abasidlayo;

ubundlobongela yiwayini abayiselayo.

₁₈Ke yona indlela yamalungisa ifana nemitha yokusa,

yona iya iqaqamba ngokuqaqamba de ibe yimini epheleleyo.

₁₉Kambe ke zona iindlela zabakhohlakeleyo zingumnyam' ombonde-mbonde.

Naxa bekhubeka abayazi into abakhubeka kuyo.

₂₀Ke wena, mfo wam, wagqale amazwi am,

uyibazele iindlebe into endikuxelela yona.

₂₁Amazwi am makangacimi emehlweni akho,

koko wamilisele phakathi entliziyweni yakho.

₂₂Ewe, abubomi kwabo bawafumeneyo;

ayimpilo kumzimba xa uwonke.

₂₃Eyona nto emawuyilondoloze ngaphezu kwazo zonke ezinye yintliziyo yakho,

kuba yona ingumthombo wobomi.

₂₄Mabungabikho ubuxoki emlonyeni wakho,

nentetho ekhohlisayo ibe kude lee emilebeni yakho.

₂₅Makathi ntshoo phambili amehlo akho,

neenkophe zamehlo akho zithi ngqo.

₂₆Qiqa phambi kokuba ubeke unyawo lwakho endleleni,

ukuze ihambo yakho iqiniseke.

₂₇Musa ukujika-jika uye ngasekunene nangasekhohlo;

unyawo lwakho malubucezele ububi.

₁Mfo wam, buve ubulumko bam,

ukubazele iindlebe ukuqonda kwam,

₂ukuze ube nako ukuzilungelelanisa izinto,

futhi ukwazi ukuthetha ngengqiqo.

₃Kaloku imilebe yomfazi ongakwaziyo ukuziphatha ivuza ubusi;

kwaye nenkalakahla yakhe igudile kunamafutha omnquma.

₄Kanti ke ekugqibeleni uba nobukrakra okomhlonyane,

akwenzakalise okwekrele elibukhali macala.

₅Kaloku iinyawo zakhe zisinga ekufeni;

ukunyathela kwakhe kubheka ngqo engcwabeni.

₆Uyakuwexula kwindlela eyeyobomi;

ube wena ungayazi loo nto.

₇Ngoko ke, bonyana, ndiphulaphuleni,

ningashenxi koko ndinixelela kona.

₈Ewe, ndithi mcezeleni umfazi onjalo,

ningasondeli nasemnyango wendlu yakhe,

₉hleze amandla enu axhatshazwe ngabanye,

niyinike isikhohlakali iminyaka yenu.

₁₀Ewe, xa ningeva ikamva lenu liya kuxhanyulwa ngabasemzini,

zize zona izinto eniziqwebileyo zibe sisisulu seentlanga.

₁₁Ekugqibeleni ke yoba ziincwina zodwa ugcuma,

ube wona umzimba wakho uvuthuluka nezihlunu zawo.

₁₂Uya kuthi: “Akwaba ndandingazange ndiyithiye ingqeqesho;

akwaba ndandiziphulaphule iziluleko.

₁₃Ngenene zange ndiwaphulaphule amazwi âbo babendiyala,

zange ndiyibazele iindlebe imfundiso yabandilulekayo.

₁₄Ngoku ke naku ndizibhaqa sendisehlazweni

ekuhlaleni naseluntwini.”

₁₅Nyaniseka kumfazi wakho;

ewe, sela amanzi kwelakho iqula.

₁₆Ngani ukuba abantwana bakho bathi saa,

oku komthombo omanzi wawo aphuphumela esitalatweni?

₁₇Abantwana bakho mayibe ngabakho wedwa;

sukuvuma baxhatshazwe nangabasemzini.

₁₈Ewe, ziyolise nomfazi wakho weenkomo,

abe ngumthombo olithamsanqa lakho –

₁₉nditsho loo nzwakazi imanz' andonga,

elo bhadikazi lihle kunene!

Isifuba sayo sanga singakutsho ube nemihlali,

ikurhawule ngolo thando lwayo, utsho uthi ncithi.

₂₀Mfo wam, ngani ukuba ude uthinjwe ngumfazi ongakwaziyo ukuziphatha?

Ngani ukuba ugonane nomka-mntu?

₂₁Kaloku zonke izinto ezenziwa ngumntu ziyabonwa *nguNdikhoyo;

zonke iindlela zakhe uzijongile.

₂₂Ke zona izenzo zomntu okhohlakeleyo zibambisa kwayena,

ajike akhonkxwe kwasisono sakhe.

₂₃Ubulawa kukungaqeqesheki;

ewe, uphuphuthekiswa bubuhiba bakhe.

₁Mfo wam, ukuba uthe wamela omnye umntu,

wabambana nomnye ngesandla,

₂waza ke ngaloo ndlela warhintyeleka ngamazwi omlomo wakho,

wavaleleka emgibeni ngenxa yesithembiso sakho,

₃nantsi ke into omawuyenze, nyana wam, ukuze ukhululeke ezandleni zommelwane wakho:

hamba uzithobe kuye,

umbongoze akukhulule.

₄Ewe, ungakhe ulale ungayenzanga loo nto,

ungaphumli nokuphumla oku.

₅Xelisa inxala elizihlangulayo esandleni somzingeli,

okanye intaka ephuncuka esandleni somthiyeli.

₆Yiya embovaneni, vilandini;

qwalasela indlela eziphethe ngayo, nawe ulumke.

₇Kaloku yona ayinankosi,

ingenamlawuli nankokheli,

₈kodwa nakuba injalo iyaxakeka ehlotyeni iqokelela umphako,

izilungiselela ukutya ngexesha lokuvuna.

₉Kodwa kodwa, vilandini, koda kube nini uthe tywa kuloo mandlalo?

Uya kuvuka nini kobo buthongo bakho?

₁₀Ulibele kukuthi: “Hayi noko, makhe ndithi qwaka, ndithi ntlithi kancinane,

khe ndisonge izandla, ndiphumle.”

₁₁Kambe ke bona ubuhlwempu nâbo bukuchwechwela njengomkhuthuzi.

Ewe, nantso ihambo-nzima isiza kukuhlasela oku kwendoda exhobileyo!

₁₂Ke yena umntu ohamba ejikeleza ethetha ezolwimi

ngungantweni wetshijolo.

₁₃Ewe, onjalo ungafika emana encwina amehlo,

egobhana nabanye, ekhomba ngaloo minwe yakhe.

₁₄Ngalo lonke ke elo xesha uqulunqa amayelenqe entliziyweni yakhe;

ewe, uyila ububi, aphembelele uqhushululu.

₁₅Kuthi kunjalo ke afunyanwe yinkxwaleko ngebhaqo,

atsho enzakale ngephanyazo, angabi nakunyangeka.

₁₆Zintandathu izinto azithiyileyo *uNdikhoyo;

gxebe, zisisixhenxe izinto ezilizothe kuye:

₁₇amehlo endelelo,

ulwimi oluxokayo,

izandla eziphalaza igazi elimsulwa,

₁₈intliziyo eceba amayelenqe,

iinyawo ezikhawuleza ukuquqela ebubini,

₁₉ingqina elixokayo liyigqwethe inyaniso,

nomntu ophembelela ingxabano phakathi kwabazalanayo.

₂₀Mfo wam, yithobele imimiselo oyinikwa nguyihlo,

ungazityesheli neziluleko zikanyoko.

₂₁Amazwi abo wamilisele engqondweni yakho nanini nanini,

uwagaxele abe sisihombo entanyeni yakho.

₂₂Ewe, la mazwi aya kukukhokela endleleni yakho,

abe ngumlindi wakho xa ulele,

aze athethe nawe xa uvukile.

₂₃Kaloku imiyalelo isisibane;

zona iziluleko zilukhanyiso;

ingqeqesho ekukhalimelayo ingundoqo wobomi.

₂₄Zizo ezinokukukhwebula kumfazi oziphethe kakubi,

zikuhlangule kumfazi wasemzini olwimi lugudileyo.

₂₅Sukunikezela umncwase ngenxa yobuhle bakhe;

sukumkhathalela nokuba selecela amehlo.

₂₆Ihenyukazi ungalithenga nangesonka,

kanti yena umkrexezikazi angakwenza uphulukane nobomi bakho.

₂₇Khawutsho! Uthi ungawufaka esifubeni sakho umlilo

ize impahla yakho ingatshi?

₂₈Uthi ungawanyathela amalahle avuthayo

zize zingatshi iinyawo zakho?

₂₉Kunjalo ke kumntu owambatha umka-mntu:

akukho namnye omchukumisayo oya kuba msulwa.

₃₀Aligxekwa kangako isela

xa lisiba kuba lilambile.

₃₁Noxa kunjalo lihlawuliswa kasixhenxe xa libanjiwe,

lithinjwe yonke impahla yendlu yalo.

₃₂Ke yena umntu okrexezayo ngathi ushiywe ziingqondo;

ewe, uyazibhubhisa yena ngokunokwakhe.

₃₃Isiqhamo salo msebenzi wakhe ziinduma nokuhlazeka;

futhi ke oko kuphoxeka kwakhe kuya kuhlala kungenakucinywa.

₃₄Kaloku indoda enobukhwele inengcwangu;

ithi ke apho iziphindezela khona ingabi nanceba.

₃₅Ewe, xa sele ikuloo meko ayiva zicengo,

kungekho nantlawulo iya kuyamkela noba ingakanani na.

₁Mfo wam, wagcine amazwi am,

uyimilisele kuwe imiyalelo yam.

₂Ukuba uyayilandela imimiselo yam uya kubudla ubomi.

Ewe, imfundiso yam yilondoloze njengokhozo lweliso lakho.

₃Imiyalelo yam zikhumbuze ngayo ngokungathi ibotshelelwe eminweni yakho,

ihlale ibhaliwe engqondweni yakho.

₄Yithi kubulumko: “Wena ungudade wethu,”

kwingqiqo uthi: “Wena ungumwethu.”

₅Xa kunjalo ke uya kusinda kumfazi okrexezayo,

ungabi nakufumaneka kumfazi wasemzini okulalanisayo ngamazwi.

₆Ndikrobe ngefestile yendlu yam,

ndalunguza ndingasemva kwenqwanqwa,

₇ndabona abafana abaswele ukuqonda,

phakathi kwabo ndaqaphela omnye osisityhakala.

₈Wahamba ke esitalatweni apho,

waya kubhijela ngekona ngasendlwini yomfazi othile.

₉Ngelo xesha ke kwakungongcwalazi, imini seyisangene,

ubusuku nobumnyama sebunkqonkqoza.

₁₀Nâko ke kusithi gqi umfazi emkhawulela,

ethe wambu ezobuhenyukazi, eneenjongo ezigwenxa.

₁₁Wayengungantweni womfazi othethela phezulu,

engunyawo lwambethe indlela.

₁₂Uthi esezitalatweni abe sezindaweni zembutho,

abe elunguza nasezirhangeni.

₁₃Lo mfazi usuke wamgona umfana lowo, wamanga;

ngobuso obungenazintloni wathi kuye:

₁₄“Ekhaya ndenze amadini obudlelwane;

namhlanje ndizifezekisile izibhambathiso zam.

₁₅Ndilapha nje ke bendikhangela wena,

kambe ke ngoku nguwe lo, ndikufumene!

₁₆Nomandlalo wam ndiwulungisile;

ndiwuthe wambu ngengayiwayo ilinen yaseJiputa.

₁₇Ewe, umandlalo wam sendiwuqhole

ngoozimore, ikhala, ndawonye nesinamon.

₁₈Yiza ke, masibe seluthandweni kude kuse;

ewe, masizonwabise ngalo!

₁₉Kaloku owakwam usathe tshalala;

uthathe uhambo olude, akekho ekhaya.

₂₀Umke isipaji sakhe sizele yimali;

uya kubuya ukuthwasa kwenyanga.”

₂₁Wamlalanisa ngaloo ntetho yakhe igudileyo,

wamwexula ngamazwi ezicengo zakhe.

₂₂Nanko ke selerhorhozela kwangoko emva kwaloo mfazi,

selengathi yinkomo eya ekuxhelweni.

Ungena okwesiyatha emgibeni,

₂₃luze utolo lumchane isibindi.

Oku kwentaka engqala esigwini

ulahlekelwa bubomi bakhe engaqondi.

₂₄Ngoko ke, bonyana, ndiphulaphuleni,

niwathathele ingqalelo amazwi am!

₂₅Musa ukulandelana neendlela zomfazi onjalo,

ungaze ulahlekele kuzo.

₂₆Kaloku zininzi iingxwelerha aziwisileyo;

linani eliphezulu amadoda awabuleleyo.

₂₇Xa usiya endlwini yakhe usinga ekufeni;

ewe, uhlela kumagumbi elabafileyo.