Bible Reading Plan – Day 136

₁UNdikhoyo umthiyile umntu osebenzisa isilinganiso esinegobe;

kambe ke uyamthanda lowo usebenzisa isilinganiso esingenaxanasi.

₂Umntu ozigwagwisayo uyakhawuleza ukuhlazeka;

kambe ke kona ukuzithoba kuhamba nobulumko.

₃Ukunyaniseka kuyamalusa umntu othe ngqo,

kodwa ke bona ubuqhokolo buyawabhangisa amaqhophololo.

₄Ubutyebi bomntu abumsindisi kwingqumbo kaThixo;

sisimo esisulungekileyo kuphela esimhlangulayo umntu ekufeni.

₅Indlela yabantu abamsulwa igudiswa sisimo sabo;

ke bona abakhohlakeleyo bawiswa yinkohlakalo yabo.

₆Isimilo siyamsindisa umntu othe ngqo;

kodwa bona abangcatshi babhajiswa kukunyoluka.

₇Akufa umntu okhohlakeleyo amathemba akhe ayadaka,

nokukholosa kwakhe ngamandla akhe kuyaphutha.

₈Umntu olilungisa uyahlangulwa enkathazweni –

endaweni yakhe iwa phezu kwesikhohlakali.

₉Umlomo womntu ongakhathalele Thixo wenzakalisa ummelwane wakhe;

ke bona abathobela uThixo balondolozwa lulwazi.

₁₀Inkqubela yamalungisa itsho uchulumance umzi wonke;

kanti ke ukufa kwezikhohlakali kutsho kuhlokome yimivuyo.

₁₁Isixeko siyaphakanyiswa sakuthamsanqelwa ngabantu abathe ngqo;

kambe ke wona amazwi ezikhohlakali ayasitshabalalisa isixeko.

₁₂Umntu ongenangqondo uyabanyemba abanye abantu;

ke yona ingqondi ithi cwaka.

₁₃Umntu ongenasifuba uyazidiza iimfihlelo;

kambe ke yena othembekileyo uyaligcina ihlebo.

₁₄Isizwe esingenamcebisi siyawa;

kanti ke xa sinabacebisi abaninzi siba luqilima.

₁₅Umntu omela omnye angamaziyo uyenzakala;

ke yena ongavumiyo ukubamba isandla somnye ebhambathisa ukhuselekile.

₁₆Umfazi onesimilo uyahlonitshwa;

ke wona amadoda aziindlavini azizuzela kuphela ubutyebi.

₁₇Umntu onobubele uyazimaseka;

kambe ke yena ongqwabalala uyazenzakalisa.

₁₈Okuzuzwa ngumntu okhohlakeleyo ngenkohliso kuyaphela,

phofu ke ohlala esenza okulungileyo ufumana umvuzo oqinisekileyo.

₁₉Ubulungisa obububo busingisa ebomini;

ke yena oleqa ububi usingisa ekufeni.

₂₀UNdikhoyo ubathiyile abantu abantliziyo zinenkohlakalo;

kanti ke ukholiswa ngabasimo sisulungekileyo.

₂₁Ngokuqinisekileyo baya kohlwaywa abantu abenza izinto ezimbi;

kambe ke bona abenza izinto ezilungileyo baya kusinda.

₂₂Ubunzwakazi bomfazi ongenangqiqo

bufana nomsesane wegolide empumlweni yehagu.

₂₃Umnqweno womntu olilungisa uzala ubuhle;

ke lona ithemba lesikhohlakali liza nengqumbo.

₂₄Abanye abantu banezinwe kodwa bahambela phambili ngenkqubela;

kanti ke bambi abasoluli isandla noko baya beswela ngokuswela.

₂₅Umntu ophayo uba nenkqubela;

ukuba ùyabanceda abanye abantu nawe uya kuncedwa.

₂₆Abantu bayamshwabulela umntu okubandezayo ukudla;

kanti ke bayamthamsanqela lowo ukuthengisayo.

₂₇Umntu ofuna okuhle uzuza okulungileyo;

phofu ke yena ozungula ububi uzuza kwabona.

₂₈Umntu okholosa ngobutyebi bakhe uvuthuluka njengamagqabi ebusika;

ke yena umntu ofanelekileyo uhluma njengamagqabi entlakohlaza.

₂₉Umntu oyinkathazo ekhayeni udla ilifa elingumoya;

sona isiyatha siba sisicaka sesilumko.

₃₀Isiqhamo sâbo balungisayo ngumthi onika ubomi;

umntu onobulumko uhlangula imiphefumlo yabantu.

₃₁Umntu olilungisa umvuzo wakhe uwuzuza kwalapha emhlabeni;

kobeka phi ke ukohlwaywa komqhankqalazi nomoni?

₁Umntu oyithandayo ingqeqesho uthanda ulwazi;

kodwa ke yena ongafuni kululekwa usisityhakala.

₂Umntu oziphethe kakuhle uyathandwa nguNdikhoyo,

kambe ke akamfuni umntu onamayelenqe.

₃Akakho umntu onokuzinza eqamele ngenkohlakalo;

kambe ke wona amalungisa amila abe neengcambu ezingenakugungqiswa.

₄Umfazi ofanelekileyo yintshinga yendoda yakhe;

ke yena umfazi oyithwalela amahlazo indoda yakhe ufana nempehla emathanjeni ayo.

₅Iingcinga zamalungisa zinyanisekile;

ke wona amacebo ezikhohlakali yinkohliso.

₆Amazwi abantu abakhohlakeleyo ngawokulalela igazi;

kambe ke wona amazwi abantu abathe ngqo ayasindisa.

₇Sakukhiqwa isikhohlakali iyaphela intw' ebithethwa;

kambe ke yona indlu yamalungisa ima imi.

₈Umntu onengqondo uxatyisiwe;

phofu ke yena osisidodo ngengqondo akazelwe nto.

₉Kulungile ukuba ngongenagama, kodwa noko unaso isicaka,

kunokuzenza isinhanha kodwa ulamba.

₁₀Umntu olilungisa uyazazelelela iimfuno zezilwanyana zakhe;

kodwa nezona zenzo zingathi zihle zesikhohlakali ziba ngqwabalala.

₁₁Umntu olima amasimi akhe akasweli kutya;

kambe ke bubuyatha ukulibala ngumsebenzi ongaphumi nto.

₁₂Umntu okhohlakeleyo usoloko efuna amaxhoba azuzwe ngabantu abanobubi;

ke yona ingcambu yezityalo zamalungisa iyachuma.

₁₃Umntu ongento ubanjiswa kwangamazwi akhe agwenxa;

ke lona ilungisa liyazikhulula enkathazweni.

₁₄Umntu ufumana ulutho aneliswe sisiqhamo sokuthetha kwakhe;

kananjalo umsebenzi womntu ubuyela kwakuye.

₁₅Indlela yesityhakala ibonakala ilungile kwawaso amehlo;

ke sona isilumko siyeva sakucetyiswa.

₁₆Umntu osisiyatha uzibonakalisa kwangoko xa ecaphukile;

kanti ke yena umntu oqiqayo akazidubi ngezithuko.

₁₇Ingqina elinyanisekileyo lithetha inyaniso;

ukanti ke ingqina elixokayo lisasaza ulwimi.

₁₈Amazwi okulavuza ahlabanisela njengekrele;

kambe ke wona amazwi ezilumko ayaphilisa.

₁₉Inyaniso ima ngonaphakade;

ke bona ubuxoki bobomzuzwana.

₂₀Abo bantliziyo zinenkohliso ngabo abacebi bobubi;

kambe ke abakhuthaza uxolo bazuza ulonwabo.

₂₁Amalungisa akahlelwa bubi;

ke bona abakhohlakeleyo baphahlwe ziinkathazo.

₂₂UNdikhoyo uyamcaphukela umntu oxokayo,

kodwa uyakholiswa ngonyanisekileyo.

₂₃Umntu oqiqayo akalubhengezi ulwazi lwakhe;

ke sona isiyatha sihamba sivakalisa ubudenge baso.

₂₄Abakhutheleyo ngabo abaya kulawula;

ke wona amavila aphelela kumsebenzi wobukhoboka.

₂₅Amaxhala ayamtyhafisa umntu;

ke wona amazwi enkuthazo ayahlaziya.

₂₆Ilungisa limalathisa indlela ummelwane;

ke yona indlela yabakhohlakeleyo iyabalahlekisa.

₂₇Umntu onqenayo akayosi nenyamakazi le ayizingelayo;

kodwa ke osebenzayo uzuza impahla exabisekileyo.

₂₈Indlela yobulungisa isinga ebomini;

ewe, yiyo leyo indlela engasingisi ekufeni.

₁Unyana osisilumko uyayithobela ingqeqesho kayise;

ke yena ongumgxeki akakufuni ukululekwa.

₂Umntu ufumana ulutho axhamle isiqhamo sokuthetha kwakhe;

kambe ke wona umnqweno wabantu abanganyanisekanga bubundlobongela.

₃Lowo uwubopha ngomkhala umlomo wakhe ukhusela ubomi bakhe;

kanti ke yena othetha gqitha uyazenzakalisa.

₄Ivila liyanqwenela lingazuzi nto noko;

kambe yena umntu okhutheleyo uyalangazelela aneliseke.

₅Ilungisa libuthiyile ubuxoki,

ukanti yena umntu okhohlakeleyo uthanda amanyondololo namahlazo.

₆Ubulungisa bulondoloza ihambo yomntu othe ngqo;

kanti ke inkohlakalo iyambhukuqa umoni.

₇Abanye abantu ngathi zizityebi kanti abananto;

bambi ke ngathi bahlwempuzekile kanti ke bemi kakuhle.

₈Kusenokwenzeka ukuba ubutyebi bomntu bube yintlawulo yobomi bakhe;

kanti ke lona ihlwempu alazani nokugrogriswa.

₉Isibane selungisa siqaqambile;

ke sona esomntu okhohlakeleyo siyancumeza.

₁₀Ikratshi liphembelela ingxabano;

ke bona ubulumko buzuzwa ngabo bamkela iingcebiso.

₁₁Ubutyebi obufumaneka bumini buphuncuka lula;

obufumaneka ngendlela ecothayo buya busanda ngokwanda.

₁₂Umnqweno ongafezekiyo uyamngcungcuthekisa umntu;

kanti ke wakufezeka umnqweno ufana nomthi onika ubomi.

₁₃Umntu ozidelayo iziluleko uzibizela intshabalalo;

kambe ke yena owuhlonelayo umyalelo uya kuba nomvuzo.

₁₄Imfundiso yesilumko ngumthombo wobomi,

kuba umntu imhlangula kwizabatha zokufa.

₁₅Umntu oqiqayo uyahlonelwa;

kanti ke yona indlela yabangathembekanga iyadaka.

₁₆Umntu onengqondo uyaqiqa phambi kokuba ayenze into,

kodwa yena umntu osisiyatha uyabudandalazisa ubutyhakala bakhe.

₁₇Umthunywa ongathembekanga uzifaka enkathazweni;

kambe ke yena onyanisekileyo uzisa ukuphila.

₁₈Umntu ongakhathalele ngqeqesho ulandelwa kukuhlazeka nobuhlwempu,

ke yena oziphulaphulayo iziluleko uyahlonelwa.

₁₉Ukufezeka komnqweno luyolo emphefumlweni.

Iziyatha ziyakucekisa ukwahlukana nobubi.

₂₀Umntu ovana nezilumko naye uba sisilumko;

ke yena otshomana nezityhakala uyenzakala.

₂₁Umoni uthiwa mbende ngamashwa,

kanti ke yena olungisayo uvuzwa ngenkqubela.

₂₂Umfo obhadlileyo ubashiyela ilifa abazukulwana bakhe,

ke bona ubutyebi besityhakala lilifa lamalungisa.

₂₃Umhlaba oqala ukulinywa ungawanika ukudla okuninzi amahlwempu,

kambe ke xa kungekho bulungisa kutshayelwa kuphele.

₂₄Umntu ongalusebenzisiyo uswazi umthiyile umntwana wakhe;

kanti ke yena omthandayo uyamqeqesha ngokufanelekileyo.

₂₅Umntu olilungisa utya aneliseke,

ukanti isisu sokhohlakeleyo sambathwa liphango.