IZIHLABELELO 58

₁NI ya kuluma ukulunga ngokutula isibili na? ni yahlula ngokulingana madodana abantu na?

₂Impela ni ya sebenza ukonakalisa enhliziyweni; ni ya linganisa uhlupo lwezandhla zenu emhlabeni.

₃Ababi ba ya pambuka kwa sekuzalweni, ba yeduka kwa sesiswini, ba kuluma amanga.

₄Ubuhlungu babo bu njengobuhlungu benyoka; njengebululu elingezwayo, e li vimba indhlebe yalo.

₅E li nga yi ku lalela kulo izwi lababuli aba bula ngokuhlakanipa.

₆Pohloza amazinyo emlonyeni wabo Tixo; fohloza amazinyo emihlati ezingonyama ezintya Jehova.

₇Ma ba ncibilike njengamanzi, ma ba muke njalo; lapo e gobisa umcibityelo ukunsala imisebe yake, njalo ma ba zinqume.

₈Njengomnenke o ncibilika ekuhambeni, njengesipunzi somfazi ba nga boni ilanga.

₉Izimbiza zenu zi nga wa wu zwa umlilo wameva, wo ba susa ngesipepo be sa pila, olakeni lwake.

₁₀Olungileyo wo jabula ngokuba u bonile impindiselo wo geza izinyawo zake egazini lababi.

₁₁Ku ya kuti umuntu a ti; impela u kona umvuzo kolungileyo; impela u kona uTixo o wahlulayo emhlabeni.