AMahubo 90

₁Nkosi, Wena uyisiphephelo sethu

izizukulwane ngezizukulwane.

₂Zingakaveli izintaba, umhlaba, nezwe ungakakudali,

kusukela phakade kuze kube phakade,

Wena, Nkulunkulu, ukhona.

₃Umuntu uyambuyisela othulini, uthi:

“Buyani, bantwana babantu.”

₄Ngokuba emehlweni akho

inkulungwane yeminyaka

ingangosuku lwayizolo olwedlule,

imfushane ngangomlindo wasebusuku.

₅Ubakhukhula njengesikhukhula;

banjengobuthongo, nanjengotshani obuhluma ekuseni.

₆Ekuseni buyahluma, bukhahlele,

kusihlwa bubune, bunqunywe.

₇Ngokuba siqedwa yintukuthelo yakho,

ulaka lwakho luyasithuthumelisa.

₈Amacala ethu uwabeke phambi kwakho,

izono zethu ezifihliweyo zisekukhanyeni kobuso bakho.

₉Ngokuba izinsuku zethu zidlula phansi kwentukuthelo,

iminyaka yethu iphela ngokuphazima kweso.

₁₀Izinsuku esiziphilayo ziyiminyaka

engamashumi ayisikhombisa,

kuthi uma ziziningi,

zibe yiminyaka engamashumi ayisishiyagalombili.

₁₁Ngubani owazi amandla entukuthelo yakho

nolaka lwakho olunjengokwesabeka kwakho na?

₁₂Nkosi, sifundise ukubala kahle izinsuku zethu,

ukuze sizuze inhliziyo enokuhlakanipha.

₁₃Buya, Simakade!

Kuyoze kube nini na?

Hawukela izinceku zakho.

₁₄Sisuthise ngomusa wakho ekuseni,

ukuze sithokoze,

sijabule izinsuku zethu zonke.

₁₅Sithokozise ngangezinsuku owasihlupha ngazo,

nangangeminyaka esabona okubi ngayo.

₁₆Izenzo zakho mazibonakale

kuzo izinceku zakho,

nenkazimulo yakho, kubantwana bazo.

₁₇Umusa weNkosi, uNkulunkulu wethu,

mawube phezu kwethu,

imisebenzi yezandla zethu ichume,

yisimamise imisebenzi yezandla zethu.