AMahubo 91

₁Lowo ohlala emphemeni woPhezukonke

akhosele emthunzini kaSomandla,

₂uyothi kuSimakade:

“Uyisiphephelo sami nenqaba yami,

unguNkulunkulu wami engethembele kuye.”

₃Ngokuba nguYena oyokuhlenga ogibeni

lomcuphi nasobhubhaneni,

₄uyokusibekela ngezimpaphe zakhe,

uphephele phansi kwamaphiko akhe,

ukwethembeka kwakhe kuyisihlangu nogange.

₅Awuyukwesaba okwesabisayo ebusuku,

nomcibisholo ondizayo emini,

₆nobhubhane oluhamba ebumnyameni,

nesifo esibhubhisayo emini bebade.

₇Bayakuwa abayizinkulungwane ngaseceleni kwakho,

nabayizinkulungwane ezilishumi ngakwesokunene sakho,

kodwa akuyukukuthinta wena.

₈Uyobona ngamehlo akho,

ubone izikhohlakali zijeziswa.

₉Ngokuba uSimakade umenze wayisiphephelo sakho,

oPhezukonke waba yinqaba yakho.

₁₀Okubi akuyukukwehlela,

nesifo asiyukusondela ethendeni lakho.

₁₁Ngokuba uyakuyaleza izingelosi zakhe ngawe,

zikulondoloze ezindleleni zakho zonke.

₁₂Ziyokuphakamisa ngezandla zazo,

unyawo lwakho aluyukuqhuzulwa yitshe.

₁₃Uyonyathela ingonyama nebululu,

ufihlize phansi ibhongo lengonyama nodrago.

₁₄Ngoba ubambelele kimi, ngizomhlenga, ngimvikele,

ngokuba walazi iGama lami.

₁₅Uyakungibiza, ngimphendule,

ngibe naye lapho esosizini, ngimkhulule,

ngimenze abe nodumo.

₁₆Ngiyomsuthisa ngobude bezinsuku zokuphila,

ngimbonise insindiso yami.