AMahubo 89

₁Ngizohlabelela ngomusa kaSimakade

kuze kube phakade,

ngomlomo wami,

ngazise izizukulwane ngezizukulwane ukwethembeka kwakho.

₂Ngimemezele ngithi:

“Umusa wakho umi ingunaphakade,

ukwethembeka kwakho ukuqinise emazulwini.”

₃Ngenzile isivumelwano nokhethiweyo wami,

ngafunga kuDavide, inceku yami, ngathi:

₄“Uzalo lwakho ngizoluqinisa kuze kube phakade,

isihlalo sakho sobukhosi

ngisisimamise izizukulwane ngezizukulwane.” Sela

₅Simakade, izimangaliso zakho ziyodunyiswa ngamazulu,

ukwethembeka kwakho, ebandleni labangcwele.

₆Ngubani osemafini ongalinganiswa noSimakade na?

Ngubani phakathi kwamadodana kaNkulunkulu

ongafaniswa noSimakade na?

₇UNkulunkulu uyesabeka kakhulu emkhandlwini wabangcwele,

umelwe ukuhlonishwa kakhulu

yibo bonke abamzungezileyo.

₈Simakade, Nkulunkulu Wamabandla,

ngubani onjengawe na?

Somandla, Simakade,

ukwethembeka kwakho kukuzungezile.

₉Wena ubusa amadlambi olwandle

lapho amaza alo ephakama,

Wena uyawathulisa.

₁₀URahabi umchoboze wanjengobuleweyo,

ngengalo yakho enamandla,

wahlakaza izitha zakho.

₁₁Izulu lingelakho, nomhlaba ungowakho,

izwe nokugcwala kwalo,

kukho konke, nguwe obeke isisekelo.

₁₂Nguwe owadala inyakatho neningizimu,

iThabhori neHermoni kuyathokoza egameni lakho.

₁₃Ingalo yakho inobuqhawe,

isandla sakho sinamandla,

esokunene sakho siphakeme.

₁₄Ukulunga nobulungiswa

kuyisisekelo sesihlalo sakho sobukhosi,

umusa nokwethembeka kuhamba phambi kwakho.

₁₅Sibusisiwe isizwe esikwazi ukuhlabelela ngenjabulo,

sihamba ekukhanyeni kobukhona bakho, Simakade.

₁₆Sithokoza egameni lakho usuku lonke,

siyaphakanyiswa ngokulunga kwakho,

₁₇ngokuba Wena uyinkazimulo yamandla abo,

udumo lwethu luyophakama ngomusa wakho.

₁₈Ngokuba isihlangu sethu singesikaSimakade,

inkosi yethu ingeyoNgcwele ka-Israyeli.

₁₉Ngaleso sikhathi wakhuluma ngombono

kwabethembekileyo bakho, wathi:

“Ngimsizile onamandla,

ngimphakamisile okhethwe phakathi kwabantu.

₂₀Ngiyifumene inceku yami, uDavide,

ngayigcoba ngamafutha ami angcwele.

₂₁Isandla sami siyakuba naye, simsimamise,

ingalo yami imqinise.

₂₂Isitha asiyukumehlula,

nendodana yobubi ayiyukumhlupha.

₂₃Izitha zakhe ngiyozichoboza ebuka,

ngibhubhise abamzondayo.

₂₄Ukwethembeka kwami nomusa wami kuyakuba naye,

egameni lami luyakuphakama udumo lwakhe.

₂₅Ngiyakubeka isandla sakhe phezu kolwandle,

esokunene sakhe phezu kwemifula.

₂₆Uyakungibiza, athi:

“UnguBaba, unguNkulunkulu wami

nedwala lensindiso yami.”

₂₇Ngiyomenza abe yizibulo

nophakemeyo kunamakhosi omhlaba.

₂₈Umusa wami ngiyomgcinela wona

kuze kube phakade;

isivumelwano sami siyohlala siqinile kuye.

₂₉Uzalo lwakhe ngiyolwenza lume

kuze kube phakade,

isihlalo sakhe sobukhosi siyokuma,

inqobo nje kusekhona isibhakabhaka.

₃₀“Uma abantwana bakhe

bewushiya umthetho wami,

bengahambi ngezehlulelo zami,

₃₁uma bephula izimiso zami,

bengayigcini imiyalo yami,

₃₂ngiyakujezisa iziphambeko zabo ngenduku,

namacala abo ngemivimbo.

₃₃Kepha umusa wami angiyukuwususa kuye,

ngingaphikisi ukuthembeka kwami.

₃₄Isivumelwano sami angiyukusaphula,

nengikukhiphe ngezindebe zami angiyukukuguqula.

₃₅Ngafunga ubungcwele bami kwakanye,

angiyukuwaqamba amanga kuDavide.

₃₆Abozalo lwakhe bayakuma kuze kube phakade,

isihlalo sakhe sobukhosi

sibe njengelanga phambi kwami.

₃₇Bayakuma kuze kube phakade njengenyanga,

ibe ngufakazi esibhakabhakeni.”

₃₈Nokho ogcotshiweyo wakho

usumlahlile, wamala, wamthukuthelela.

₃₉Usichithile isivumelwano senceku yakho,

wawungcolisa othulini umqhele wayo.

₄₀Udilize zonke izindonga zakhe,

wazenza izinqaba zakhe zaba yincithakalo.

₄₁Bonke abadlula ngendlela bayamphanga,

useyihlazo kwabakhelene naye.

₄₂Uphakamise esokunene sezitha zakhe,

wajabulisa zonke izitha zakhe.

₄₃Futhi uyenze yaba buthuntu inkemba yakhe,

awumsekelanga empini.

₄₄Uyisusile inkazimulo yakhe,

wasiwisa phansi emhlabathini

isihlalo sakhe sobukhosi.

₄₅Uzifinyezile izinsuku zobusha bakhe,

wamthela ngamahloni. Sela

₄₆Simakade, kuyoze kube nini uzisithile,

nentukuthelo yakho ivutha njengomlilo na?

₄₇Khumbula ukuthi isikhathi sami singakanani,

nokuthi bonke abantwana babantu wabadalela ize.

₄₈Ngubani oyophila angakuboni ukufa,

akhulule umphefumulo wakhe

emandleni endawo yabafileyo na? Sela

₄₉Nkosi, uphi umusa wakho wakuqala

owawufungela kuDavide ngokwethembeka kwakho na?

₅₀Khumbula, Nkosi, ihlazo lezinceku zakho,

nokuthi ngithwele esifubeni sami

ihlazo lezizwe eziningi kakhulu,

₅₁ezisola ngalo izitha zakho, Simakade,

ezisola ngalo ukuhamba kogcotshiweyo wakho.

₅₂Makabongwe uSimakade, kuze kube phakade.

Amen, Amen.