IZaga 3

₁Ndodana yami,

ungawukhohlwa umthetho wami,

kepha inhliziyo yakho

mayilonde imiyalelo yami,

₂khona iyakwenezela kuwe izinsuku,

neminyaka yokuphila nokuthula.

₃Ububele neqiniso makungakushiyi;

kubophele entanyeni yakho,

ukulobe esibhebheni senhliziyo yakho,

₄ukuze uthole umusa nodumo oluhle

emehlweni kaNkulunkulu nabantu.

₅Thembela kuSimakade

ngayo yonke inhliziyo yakho,

unganciki kokwakho ukuqonda.

₆Mazise Yena ezindleleni zakho zonke,

uyakuqondisa imikhondo yakho.

₇Ungazishayi ohlakaniphileyo emehlweni akho;

mesabe uSimakade, uqhele ebubini.

₈Lokho kuyakuba yimpilo emzimbeni wakho,

nokuhlunyelelwa kwamathambo akho.

₉Mhloniphe uSimakade ngempahla yakho,

nangolibo lwazo zonke izithelo zakho,

₁₀ukuze izinqolobane zakho

ziphuphume ngobuningi bomkhiqizo,

nezikhamo zakho zichichime iwayini elisha.

₁₁Ndodana yami,

ungakwedeleli ukuyala kukaSimakade,

ungakwenyanyi ukusola kwakhe.

₁₂Ngokuba uSimakade uyamyala amthandayo,

njengoyise eyala indodana ayithandayo.

₁₃Ubusisiwe umuntu othola ukuhlakanipha,

nomuntu ozuza ukuqonda,

₁₄ngokuba inzuzo yakho

yinhle kunenzuzo yesiliva;

nenzuzo yakho kunegolide.

₁₅Ukuhlakanipha kuyigugu kunamarubhi,

nakho konke okunxanelekayo akunakuqhathaniswa nakho.

₁₆Impilo ende isesandleni sakho sokunene,

kwesokhohlo sakho kukhona ingcebo nodumo.

₁₇Izindlela zakho ziyizindlela zobumnandi;

yonke imikhondo yakho ingukuthula.

₁₈Kungumuthi wokuphila kulabo abakubambayo,

babusisiwe labo ababambelela baqine kukho.

₁₉USimakade wasekela umhlaba ngokuhlakanipha;

wamisa amazulu ngokuqonda.

₂₀Ngokwazi kwakhe izinzulu zaqhekezwa,

amafu aconsa amazolo.

₂₁Ndodana yami,

makungasuki emehlweni akho,

gcina ukuhlakanipha namasu,

₂₂kuyokuba ngukuphila emphefumulweni wakho,

nomgexo entanyeni yakho.

₂₃Khona uyohamba endleleni yakho uphephile,

unyawo lwakho lungaqhuzuki.

₂₄Uma ulala, awuyukwesaba lutho;

nalapho usulele, uyoba nobuthongo obumnandi.

₂₅Awuyukwesaba inhlekelele ezumayo,

nokubhujiswa okulethwa yizikhohlakali,

₂₆ngokuba uSimakade uyakuba seduze nawe,

agcine unyawo lwakho ukuba lungabhajwa.

₂₇Ungabagodleli okuhle labo abakufanele,

uma lokho kusemandleni akho

ukuba ukwenze.

₂₈Ungathi kumakhelwane wakho:

“Hamba, ubuye kusasa, ngiyokunika khona,”

ube unakho lokho akufunayo.

₂₉Ungacebi okubi ngomakhelwane wakho,

lapho ehlezi nawe elondekile.

₃₀Ungaphikisani namuntu ngeze

uma engakonanga ngalutho.

₃₁Ungabi namhawu ngomuntu oyisidlova,

ungakhethi neyodwa yezindlela zakhe,

₃₂ngokuba oyisigwegwe uyisinengiso kuSimakade,

kepha abaqotho bayisifuba sakhe.

₃₃Isiqalekiso sikaSimakade sisendlini yezikhohlakali,

kodwa uyalibusisa ikhaya labalungileyo.

₃₄Izedeleli uyazedelela,

kepha abathobekileyo ubapha umusa.

₃₅Abahlakaniphileyo bayozuza udumo,

kepha iziwula ziyothelwa ngehlazo.