IZaga 4

₁Yizwani madodana ami, ukuyala kukayihlo,

nilalelelisise, ukuze nazi ukuqonda.

₂Ngokuba ngininika imfundiso enhle;

ningawushayi indiva umthetho wami.

₃Ngokuba ngangiyindodana kababa,

ngintekentekana, futhi ngingedwa kumame,

₄wangifundisa,

wathi, kimi:

“Inhliziyo yakho mayibambelele emazwini ami,

ugcine imiyalelo yami, uphile.

₅Zuza ukuhlakanipha, uzuze ukuqonda;

ungakhohlwa, ungachezuki emazwini omlomo wami;

₆ungakushiyi, kuyakukugcina;

kuthande, kuyakukulondoloza.

₇Ukuqala kokuhlakanipha yilokhu:

zuza ukuhlakanipha;

yebo, ngakho konke okutholileyo,

zuza ukuqonda.

₈Kuhloniphe, kuyakukuphakamisa;

kuyakukudumisa, lapho ukugona.

₉Kuyakukufaka umqhele womusa ekhanda lakho,

kukunike umqhele wodumo.”

₁₀Yizwa ndodana yami,

wemukele amazwi ami

khona iminyaka yokuphila

kwakho iyoba miningi.

₁₁Ngikufundisile indlela yokuhlakanipha,

ngakuhola emikhondweni yobuqotho.

₁₂Lapho uhamba,

izinyathelo zakho aziyukuthiywa yilutho,

nalapho ugijima awuyukukhubeka.

₁₃Bambelela ekuyalweni, ungakuyeki;

kulonde,

ngokuba kungukuphila kwakho.

₁₄Ungalubhadi unyawo lwakho

endleleni yezikhohlakali,

ungahambi emkhondweni wababi.

₁₅Yigweme, ungahambi ngayo;

chezuka kuyo,

₁₆Ngokuba abalali uma bengakwenzanga okubi;

bayaqwasha uma bengakhubekisanga muntu;

₁₇kwazise badla isinkwa senkohlakalo,

baphuze iwayini lobudlova.

₁₈Indlela yabalungileyo injengokukhanya kokusa

okuqhubeka kukhanye kuze kube semini.

₁₉Indlela yezikhohlakali injengobumnyama;

abazi nokuthi bakhutshwa yini.

₂₀Ndodana yami,

lalela amazwi ami,

ubeke indlebe yakho

kukho ukukhuluma kwami.

₂₁Makungasuki emehlweni akho,

ukugcine ekujuleni kwenhliziyo yakho,

₂₂ngokuba kungukuphila kwabakufumanayo,

nempilo emzimbeni wonke.

₂₃Gcina inhliziyo yakho kukho konke okulondayo,

ngokuba yona ingumthombo wokuphila.

₂₄Qhela ekukhulumeni okugwegwile,

dedisela kude nawe izindebe ezonakele.

₂₅Amehlo akho mawabheke phambili,

nezinkophe zakho ziqonde phambi kwakho.

₂₆Hlelemba indlela yezinyawo zakho

ukuze ziphephe zonke izindlela zakho.

₂₇Ungaphambukeli kwesokunene nakwesokhohlo;

dedisa unyawo lwakho kokubi.