IINDUMISO 7

₁Yehova, Thixo wam, ndizímela ngawe;

Ndísindise kubo bonke abandisukelayo, undihlangule,

₂Hleze bawuqwenge njengengonyama umphefumlo wam,

Bawudlavule, kungekho mhlanguli.

₃Yehova, Thixo wam, ukuba ndithe ndenza oku,

Ukuba kukho ubugqwetha ezandleni zam,

₄Ukuba ndimphethe kakubi obexolelene nam,

Ndambhunyula ondibandezele kungekho sizathu:

₅Maluwusukele utshaba umphefumlo wam, luwufumane,

Lubunyashele phantsi ubomi bam,

Uzuko lwam lululalise eluthulini. (Phakamisani.)

₆Khawusuk' ume, Yehova, únomsindo,

Kuphakamele ukuphuphuma komsindo wabandibandezelayo;

Uvuke, undikhawulele; wena umisé umgwebo.

₇Ibandla lezizwe malikungqonge;

Ubuyèle phezulu phezu kwalo.

₈UYehova uya kugweba phakathi kwezizwe.

Lithethe ityala lam, Yehova, ngobulungisa bam, nangokugqibelela kwam okukum.

₉Mabuphele ububi babangendawo, ulizimase ilungisa;

Ùngumcikidi weentliziyo nezintso, Thixo wobulungisa.

₁₀Ingweletshetshe yam inoThixo,

Umsindisi wabantliziyo zithe tye.

₁₁UThixo ngumgwebi olilungisa;

ÚnguThixo obhavuma yonke imihla.

₁₂Ukuba ongendawo uthe akabuya, ulilolile ikrele lakhe;

Úsityedile isaphetha sakhe, wasilungisa.

₁₃Uzibhekisé kuye izixhobo zokufa,

Uzenzé zanomlilo iintolo zakhe.

₁₄Yabona, yena unenimba yobutshinga;

Ukhawulé ububi, wazala ubuxoki;

₁₅Umbé umhadi, wawugomba;

Weyela esihogweni awasisebenzayo.

₁₆Ububi bakhe bobuyela entlokweni yakhe,

Naselukakayini lwakhe kufike ukugonyamela kwakhe.

₁₇Ndiya kubulela kuYehova ngokobulungisa bakhe,

Ndivume ngendumiso kwigama likaYehova ophezu konke.