SIRAKHA 41

₁Lufu wee,

muthu a tshi u humbula

zwi vhavha hani!

Zwi dina hani muthu a takadzwaho nga thundu yawe,

muthu a si na tshi no mu thithisa, zwoṱhe zwi tshi mu nakela,

a no kha ḓi ḓiphiṋa nga zwiḽiwa zwawe.

₂Lufu wee,

ṱhamu yau i ṱanganedzwa hani nga muthu wa muhoṱa,

a si tshee na nungo,

o no vhaho wa maḓuvha,

a si tsha kona,

wa mbilwana a no dzula a tshi ḽa mbilu!

₃U songo ofha ṱhamu yau ya lufu,

elelwa vhe vha vha vhe hone u sa athu bebwa

na vhane vha ḓo vha hone iwe u si tsheeho.

₄Ndi Muṋe washu we a ri zwivhumbwa zwoṱhe zwi ḓo fa,

zwino zwe Waṱaḓuluṱaḓulu a vhona zwi zwone,

iwe u nga zwi landula hani?

Nangwe muthu o tshila miṅwaha

ya tshigidi kana ḓana kana fumi,

e vhudzulavhafu a hu tshee na tshiṱalula.

₅Vhana vha vhavhi ndi maḓáná a nengisaho,

vha kuvhangana mahayani a vha nyadzaho Mudzimu.

₆Ifa ḽa vhana vha vhavhi ḽi ḓo lovha,

vha lutsinga lwavho vha dzula vhe na samba.

₇Khotsi muvhi u ḓo teketelwa nga vhana vhawe,

ngauri vha vha na samba nga mulandu wawe.

₈Ni ḓo zwi vhona inwi vhavhi;

no ṱutshela Mulayo wa Waṱaḓuluṱaḓulu.

₉Ni tshi bebiwa no bebelwa hone u teketelwa,

na musi ni tshi fa ifa ḽine na sia ndi samba.

₁₀Tshine tsha bva buseni, tshi dovha tsha vha buse;

na vhavhi vho ralo:

vhubvo havho ndi deketelo, he vha livha ndi ndozwo.

₁₁Hu tshi lilelwa vhafu hu lilelwa mivhili yavho fhedzi,

hone dzina ḽivhi ḽa vhavhi ḽi ḓo lovha.

₁₂Londola dzina ḽau, ḽi ḓo u tikedza

u fhira zwisiku zwa tshigidi zwo ḓalaho musuku.

₁₃Vhutshilo havhuḓi a vhu yi thambo,

hone dzina ḽavhuḓi a ḽi lovhi lini na lini.

₁₄Vhananga, thetshelesani ndayo dzanga,

ndi hone ni tshi ḓo rudza mbilu.

Vhuṱali ho dzumbiwaho na lupfumo lwo bwelwaho fhasi,

izwo vhuvhili hazwo zwi farisani?

₁₅Muthu a no dzumba vhutsilu hawe u khwiṋe

u fhira muthu a no dzumba vhuṱali hawe.

₁₆Hu na mashonele a si one na a re one;

hu na mavhonele a re one na a si one;

zwenezwo ivha na ṱhoni kha zwi no nga izwi:

₁₇Shona zwa vhupaṱi phanḓa ha khotsi na mme,

shona u amba mazwifhi ú na muvhusi kana muḓivhalea.

₁₈Shonela vhuvemu phanḓa ha muhaṱuli,

na u nyadza zwikhethwa phanḓa ha tshivhidzo.

₁₉Shona zwa vhufhura phanḓa ha ṱhama na khonani,

na u tswela vhathu vhane wa dzula navho.

₂₀ṱhonifha ngoho ya Mudzimu na mulanga wawe,

u si gogoḓele kha ḓafula zwi tshi ambiwa.

₂₁Shona u dzima muthu tshithu arali wo humbelwa,

na u gungula

musi u tshi ṋewa tshithu kana u tshi ṋea muṅwe,

na u fhumulela ane a u resha,

₂₂na u ṱalela musadzi a re phombwe,

na u pandela wa hau á si na tshe a fara,

₂₃na u zhomba mukovhe wa muṅwe,

na u ambisa mufumakadzi wa muṅwe

₂₄kana musidzana a re mulanda wawe;

u songo sendela tsini na vhulalo hawe –

₂₅na u amba zwi vhaisaho khonani

u songo ṋea muthu tshithu wa vho mu ḽela vhuhali –

₂₆na u vha tshiisaphungo, na u ambulula zwidzumbe.

₂₇Izwo ndi zwithu

zwine wa fanela u zwi shonela,

ndi hone vhathu vhoṱhe vha tshi ḓo u takalela.