1Hone
u songo shonela zwithu izwi,
u sa ḓo tshinya nga u ṱhonifha vhathu:
2U songo shonela mulayo wa Waṱaḓuluṱaḓulu na mulanga wawe,
kana u vhofholola vhatsinda tsengoni.
3U songo shona u kovhekana na muṅwe hu tshi lixwa milandu ni tshi farisana nḓila na muṅwe,
kana u siela khonani ifa ḽa thundu yau,
4na u pima zwithu nga zwikalo na mielo,
na u bindula zwiṱuku kana zwinzhi,
5na u wana mbuelo u tshi rengisa thundu,
na u dzula u tshi laya vhana vhau,
na u rwa mulanda a sa fulufhedzei a vhuya a bva malofha.
6Arali u na musadzi ane a ṱolou dzhenelela kha mafhungo au,
u songo shona u shatela maṅwalo
wa vhea luswayo,
kana u khielela thundu hu na vhalanda vhanzhi.
7Zwine wa kovhela vhalanda,
zwi ṅwale nga vhuronwane,
khathihi na mali yoṱhe
yo shumaho na yo ṱanganedzwaho.
8U songo shona u laya danana,
kana mukalaha a no semana na vhana.
Ndi hone u tshi ḓo vhonala wó laiwa lwa ngoho,
wa takalelwa nga vhathu vhoṱhe.
Khotsi a tshi ḽa mbilu nga ṅwananyana wawe
9Khotsi a tshi humbula ṅwananyana, ha eḓeli,
u lala a tshi ḽa mbilu ngae a si fare khofhe.
Vha ri khamusi u ḓo vha mutshelukwa
a si vhingwe;
musi o no vhingwa vha ri khamusi a nga si funiwe.
10Musi a tshee phorelele vha ofha uri a nga tshinya,
kana a vhifha muvhilini a tshee muṱani wa khotsi awe;
kana musi o no vha vhuhadzi a ṱonḓola,
kana a vha muumba!
11ṅwananyana wau u na tshipimbi naa?
Dzula wo mu vhea iṱo,
a sa ḓo u nyadzisa wa sewa nga maswina au,
ḽa tou vha ḽiambele muḓini, vhoṱhe vha u sola,
wa tou vha tshiseo hune vhathu vha kuvhangana hone.
Vhasadzi
12U songo ṱalela lunako lwa muthu, u songo dzula vhukati ha vhasadzi;
13fonyolodzi ḽa musadzi ḽi bva kha tsiko ya vhasadzi
u ḓi nga muunda u tshi bva kha zwiambaro.
14Fonyolodzi ḽa munna ḽi tshee khwiṋe u fhira vhulenda ha musadzi;
musadzi ndi ene a no ita uri u shone na u soliwa.
VHUGALA HA MUDZIMU
Vhugala ha Mudzimu kha tsiko
15Zwino ndi ḓo u humbudza mishumo ya Muṋe washu.
nda u vhudza zwe nda zwi vhona.
Mishumo ya Muṋe washu yo vha hone nga ipfi ḽawe,
zwisikwa zwoṱhe zwi ita zwine a funa.
16ḓuvha ḽi tshi ṱavha ḽi vhonetshela zwoṱhe,
mishumo yoṱhe ya Muṋe washu i sumbedza vhugala hawe.
17Vharuṅwa vhakhethwa vha Muṋe washu na vhone,
ho ngo vha ṋea maanḓa a u ṱalutshedza zwimangadzo zwawe zwoṱhe
zwe Muṋe washu Ramaanḓaoṱhe a zwi vhumba zwó khwaṱha,
tsiko yoṱhe ya konou ima nga vhugala hawe i sa dzinginyei.
18U londola vhudzivha,
a phuletshedza mbiluni dza vhathu, a ṱalukanya vhufhura havho.
Waṱaḓuluṱaḓulu u ḓivha zwoṱhe zwine zwa nga ḓivhiwa,
a vhona zwiga zwa zwifhinga.
19U ḓivhadza zwe zwa vha hone na zwi no ḓo vha hone,
u dzumbulula vhuṱala ha zwo dzumbamaho.
20A hu na muhumbulo wo mu dzumbamaho,
a hu na na ipfi na ḽithihi ḽine a si ḽi pfe.
21O ṱama mishumo mihulu ya vhuṱali hawe;
u ḓi dzula e Ene tsha kale na kale na lini na lini.
A hu na tshi no engedzwa khae kana tsha fhungudzwa,
ha lili mueletshedzi.
22Mishumo yawe yoṱhe i tamisa hani! I tou kombodza maṱo!
23Zwisikwa zwoṱhe zwi a tshila, zwi dzula zwi hone,
zwi mu thetshelesa misi yoṱhe.
24Zwoṱhe zwo sikwa zwi zwivhili zwo livhana,
sa tshedza na swiswi,
a hu na tshi re tshiṱahe.
25Tshiṅwe tshi ḓadzisa vhugala ha tshiṅwe.
Maṱo a nga vhuya a fura nga vhugala ha Mudzimu naa?
